Watchtower LAYIBULALI YAHAINTANETI
Watchtower
LAYIBULALI YAHAINTANETI
Lunda
  • BAYIBOLU
  • NYIKANDA
  • KUPOMPA
  • w15 3/1 mafu 5-15
  • Chitwatela Kuzañalala naNyidimu Yitwadikitaña

Vidiyo yimwatonda hosi.

Atwanakeniku mwani, vidiyo yakañanya kwenzunuka.

  • Chitwatela Kuzañalala naNyidimu Yitwadikitaña
  • 2015 Kaposhi Kakutalila Kanakubidika Wanta wa Yehova
  • Tunyitu Twanyanya
  • Nsañu Yinadifwani
  • MONENUÑA NENU NYIDIMU YEJIMA YAYIWAHI
  • ZATENUÑA HAKUMINA ÑOVU YENU
  • TOÑOJOKENUÑA MUDIMU WENU CHIWAHETESHAÑA AKWENU
  • ZATENU NAKUBADIKISHA
  • ZATENUÑA NYIMUDIMU NAKWESEKEJA
  • Zañalalenu naMudimu Wenu
    Chakushakama Mukukeña KwaNzambi
  • Zañalalenu naMudimu Wenu Wumunakabakeni
    ‘Shakamenu Mukukeña kwaNzambi’
  • Diluñishenu Nanyidimu Yenu Yejima
    Chihandilu niMudimu Wanetu AkwaKristu—Mukanda Wakupompa 2016
  • Komana Twatela​—Kuzata naÑovu?
    2015 Kaposhi Kakutalila Kanakubidika Wanta wa Yehova
Talenu nsañu yikwawu
2015 Kaposhi Kakutalila Kanakubidika Wanta wa Yehova
w15 3/1 mafu 5-15
Kansi weyala nakuzata namuchima wumu

Chitwatela Kuzañalala naNyidimu Yitwadikitaña

“Antu ejima adyi, anwi, kunyidimu yejima yakukabakanawu amwenuku kuwaha; hichamukunkulu chakudi Nzambi.” (Mukwakutaŋisha 3:13) Neyi Nzambi wakeñaña nindi tuzañalaleña nanyidimu yetu, komana kwila yatuleja chitwatela kwikala namuzañalu nehi? (Isaya 48:17) Kafwampi watulejaña chumichi Mwizu dindi Bayibolu. Shinshikenu kufumba kwamuBayibolu kunalondeluhu kunateli kuyikwasha kuzañalala nanyidimu yenu.

MONENUÑA NENU NYIDIMU YEJIMA YAYIWAHI

Hela mwazatilaña mukasanji hela mudimu wenu wakunyika mujimba hela nyidimu yikwawu, ilukenu nenu ‘mukukabakana kwejima mwekala kudiilamu.’ (Yishimu 14:23) Mukudiila mwodi? Kuzata nañovu, kwatukwashaña kwikala nayuma yakumujimba yitwakeñaña. Mwamweni, Nzambi washika nindi wakayinka antu adifukulaña kudi yena yuma yakeñañawu. (Matewu 6:31, 32) Ilaña wakeñaña nindi tuzateña nañovu kulonda twikali nayuma yitwakeñaña munjila yayiwahi.—2 Atesalonika 3:10.

Dichi, twatela kumona nyidimu yetu netu dimwafumaña yuma yitwakeñaña. Kuzata nyidimu kwatukwashaña kudakamena kumujimba. Joshua wudi nayaaka 25 wahosheli nindi, “Kudakamena etu aweni kumujimba dimudimu wutwatela kuzata. Neyi chakwila mudimu wumunakuzata wunakuyikwasha kwikala nayuma yinakukeñeka dikwila nawu owu mudimu wudi hohu chiwahi.”

Neyi muntu nakuzata nañovu antu akumulemeshaña. Hela chochu kuzata nañovu kwakala. Ilaña neyi twinjilila kuzata mudimu wetu hela chakwila wakala, tunateli kuzañalala hakwiluka netu tunakuzata nañovu. Hitukwikala neyi ankopi atoñojokaña nawu hiyatela kuzata nañovuku. (Yishimu 26:14) Neyi mwila mwenimu, mukuzañalalaña namudimu wenu. Aaron ashimunawu muchibaaba chinafumuhu wahosheli nindi “Natiyaña kuwaha neyi nazati nañovu odu ifuku. Nazeyaña nawa hadaha akwetu elukaña niwanyi yuma yinazati, ilaña nelukaña nami nazati nañovu.”

ZATENUÑA HAKUMINA ÑOVU YENU

Bayibolu yahosha hadi muntu “wadikitaña nyidimu yindi” nihadi mumbanda “wakalakalaña nyidimu namakasindi.” (Yishimu 22:29; 31:13) Hela chochu, kuzata nañovu hikwenzaña nañomaku. Antu antesha diwu akeña kuzata nyidimu yabula kwilukawu. Hadaha dichaleñelaña antu amavulu kubula kuzata nyidimu, muloña azataña wanyi nañovu kulonda eluki.

Chakadi nikujina, muntu nateli kwiluka kuzata mudimu wudi wejima neyi nakuzata namuchima wumu, dikwila nawu kushaku kashinshi kulonda yawiluki. William wudi nayaaka 24 wahosheli nindi, “Neyi muzata hakumina ñovu yenu nawa mumona yuma yinafumimu, mukutiya kuwaha. Himukutoñojokaña kuzatisha tunjila twanyiketu hakuzata hela kuzata hohu chanteshaku.”

Kansi wamumbanda nakudiza chakuzatisha ikina chiwahi

TOÑOJOKENUÑA MUDIMU WENU CHIWAHETESHAÑA AKWENU

Bayi mutoñojokaña hohu hamali imunakutambulaku. Ilaña dihulenu nenu: ‘Muloñadi chinakuzatila iwu mudimu? Chumanyi chadi kumwekana neyi nabulaña kuzata iwu mudimu hela neyi nabula kuwuzata chiwahi? Indi akwetu ahetelañamu ñahi mumudimu wunazataña?’

Munateli kutoñojoka halwihu lwakukumishaku muloña mukutiya kuwaha neyi mwiluka mudimu wenu chiwunakuhetesha antu amakwawu. Yesu wahosheli nindi: ‘Mukuhana mwekala muzañalu weneni kubadika wekala mukutambwila.’ (Yililu 20:35) Kudi antu amakwawu ahetelaña munyidimu yitwazataña bayi neyi akwakulanda niakanyidimu hohuku. Awa antu hiyantu amuchisaka niantu anakaankili.

Antu amuchisaka. Neyi mutu wachisaka yazata nañovu kukeñela chisaka chindi yuma yinakukeñawu, wayikwashaña munjila jiyedi. Chatachi, wayikeñelaña yuma yatela kuyikwasha kumujimba yidi neyi yakudya, yakuvwala nimwakukama. Wazataña mudimu wamwinkawu kudi Nzambi ‘wakukwasha ayindi.’ (1 Timotewu 5:8) Chamuchiyedi, muntu ashindamenawu muchisaka wadizishaña akwawu chakuzata nañovu kuhitila muyuma yelañayi. Shane itwashimuna muchibaaba chinafumuhu wahosheli nindi, “Nzatilu yawatata yatwinkaña chakutalilahu chachiwahi. Ashinshika muloña anazati nañovu muchihandilu chawu, sweje-e mudimu wakusoña. Nyidimu yazatañawu, yinandizishi nawu nyidimu yamakasa yalema nankashi, kutuña yuma yatela kukwasha antu.”

Antu anakaankili. Kapostolu Pawulu wayilejeli akwaKristu ‘kukalakala nyidimu . . . kulonda aheti yuma yakuyinka akwawu anabuli.’ (Aefwesesa 4:28) Dichi neyi tukuzata nañovu nakudikeñela etu aweni nichisaka chetu yuma yakumujimba, tunateli kukwashaku niantu anakaankili. (Yishimu 3:27) Dichi neyi tukuzataña nañovu chikutukwasha kwikala namuzañalu wafumaña mukuhana.

ZATENU NAKUBADIKISHA

Mumpanji yindi yaya mpuhu yaHampidi, Yesu wahosheli nindi: “Muntu wukukukakela nindi wuyi nindi mpata yimu, yaku nindi nijiyedi nawa.” (Matewu 5:41) Munateli kuzatisha ñahi ilu lushimbi ludi haniyi nsona munyidimu yenu? Chatela muzateña hohu chantesha, wanenu njila yakuzatilamu nakubadikisha. Imikenu yikonkwanyi, ikalenu namuchima wakuzata mudimu wenu chiwahi nawa mukunyakashana. Zañalalenuña nimutunyidimu twanyanya tumwazataña.

Nkoñu wamusitolu nakukwasha akwakulanda

Neyi muzata nakubadikisha, dikwila nawu mukuzañalalaña namudimu wenu. Muloñadi? Muloña enu aweni muneluki chakuzata. Mukuzataña nañovu muloña dichimunakukeña bayi neyi anakuyikanjikijaku. (Fwilemoni 14) Neyi tuzata muniyi njila, tukwanuka lushimbi lwekala haYishimu 12:24: “Chikasa chamukwakudikita nyidimu chochamba kayuulaña akwawu, ilaña mukwakukatala amba kamwesekela yikwonkwanyi.” Mwamweni, antu antesha hohu diwu ekala muwuduñu hela enkañawu yikwonkwanyi. Hela chochu, muntu wazataña chantesha hohu watiyaña neyi wudi muwuduñu, muloña amukanjikijaña kudi akwawu mpinji yejima. Ilaña muntu wazataña nakubadikisha hamuloña wakwila dichinakukeñayi wekalaña wamuzañalu muwumi windi. Watwalekañahu kuzata chiwahi nyidimu yindi.

ZATENUÑA NYIMUDIMU NAKWESEKEJA

Kuzata nañovu kwakuwahi, hela chochu twatela kwanuka netu kudi yuma yayivulu yakeñekaña kubadika mudimu. Bayibolu yatulejaña kudikita nañovu. (Yishimu 13:4) Ilaña hiyashimuna nawu twiñiji mutu munyidimuku. Nsona yaMukwakutaŋisha 4:6 yahosha nawu, “Chakudya chamuchikasa chimu chakudya mumesu mwawunda, chinabadiki chamumakasa ayedi chakudya nakukabakana nakukabila tuhu mpepela.” Munjilanyi? Muntu weñija mutu munyidimu hanateli kudiluñisha nyikabu yakumakasinduku neyi nyidimu yindi yimumanishilaña mpinji niñovu. Dikwila nawu, mudimu windi wukwikala neyi “nakukabila tuhu mpepela.”

Bayibolu yinateli kutukwasha kuzata nyidimu nakwesekeja. Hela chakwila yahosha nawu twatela kuzata nañovu nyidimu yetu, yatulejaña cheñi ‘kushinshika yuma yabadika kulema.’ (Afwilipi 1:10) Yumanyi yabadika kulema? Kwikala nampinji yakuhanjeka nachisaka nimabwambu yekala hakachi kayuma yeniyi. Ilaña yuma yasweja kulema hinyidimu yakuspiritu yidi neyi kutaña Izu daNzambi nikutoñojokahu chikupu.

Chisaka chinakudila hamu

Antu elaña mwenimu azañalalaña nanyidimu yawu. William ashimunawu wahosheli nindi, “Muntu wumu hakachi kawantu añiñijili mudimu wazataña nyidimu nakwesekeja. Wazataña nañovu, nawa watiyañanaña nawakwakulanda muloña wakuzata chiwahi. Chafumayi kumudimu, hatoñojokaña hamudimu winduku ilaña washaña muchima hachisaka chindi nikudifukula. Chumichi chamuleñela kwikala namuzañalu.”

Chatiyañawu Neyi Anazati naÑovu

Nick wahosheli nindi, “neyi nazeyi hanyima yakuzata, natiyaña muzañalu nami nazati chikupu. Nelukaña nami dalelu nazati chikupu.”

Christian wahosheli nindi, “kuzata nañovu kwakuwahi nankashi. Neyi kudi chuma chalema, chizatenu chiwahi.”

David wahosheli nindi, “Muntu nateli kwila yuma yakuhayamisha. Nasakililaña ichi chawaana chawumi mukuzata nañovu nikukwasha antu amakwawu.”

    Lunda Publications (2006-2025)
    Fumenumu
    Iñulenu
    • Lunda
    • Inkenuhu akwenu
    • Hakusetiñila
    • Copyright © 2025 Watch Tower Bible and Tract Society of Pennsylvania
    • Nshimbi Jakulondela
    • Nshimbi Jakujinda
    • Privacy Settings
    • JW.ORG
    • Iñulenu
    Inkenuhu akwenu