Kapetulu 15

Zañalalenu naMudimu Wenu Wumunakabakeni

‘Muntu wejima watela . . . kuzañalala hanyidimu yindi yejima yikukabakenayi.’—MUKWAKUTAŊISHA 3:13.

1-3. (a) Indi antu amavulu atiyaña ñahi kutalisha hanyidimu yawu? (b) Indi Bayibolu yakonkomwenaña ñahi kutalisha hamudimu, nawa malwihwinyi yitukuhanjekahu mukanu kapetulu?

ANTU amavulu mukaayi kamakonu, hiyatiyaña kuwaha nanyidimu yazatañawuku. Hamuloña wakuzata maora amavulu hamudimu wahelawu, hiyakeñaña kuya kumudimu mafuku ejimaku. Munjilanyi mutunateli kusañumwina antu akweti yililu yamuchidiwu kulonda akeñi mudimu wazatañawu, sweje-e kuzañalala namudimu wawu?

² Bayibolu yakonkomwenaña antu kuzata nañovu. Yahosha nawu mudimu ninyikabu yachu hiyamukunkulu. Solomoni wasonekili nindi: ‘Muntu wejima watela kudya nikunwa nikuzañalala hanyidimu yindi yejima yikukabakenayi. Hichawaana chakudi Nzambi.’ (Mukwakutaŋisha 3:13) Yehova, watwikeña nawa wakeñaña kutwinka yuma yatwitelela, wakeñaña nindi tuzañalaleña nanyidimu yetu nikudiluñisha yuma yitwakabakenaña. Hakwila nawu tushakami mukukeña kwindi, twatela kumona mudimu neyi chawumonañayi nikulondela nshimbi jindi.—Mukwakutaŋisha 2:24; 5:18.

³ Mukanu kapetulu, tukutala hamalwihu awana: Munjilanyi mutunateli kuzañalela namudimu wetu wutunakabakeni? Nyidimu yamuchidinyi yabulañawu kuzata akwaKristu alala? Tunateli kwesekeja ñahi nyidimu yakumujimba nanyidimu yakuspiritu? Nawa mudimwinyi wasweja kulema wutwatela kuzata? Chatachi, tushinshikenu chakutalilahu chawakwakukalakala ayedi abadika mukuleña kwejima, Yehova Nzambi niYesu Kristu.

MUKWAKUKALAKALA MUNENI NIMUKALAWENU

4, 5. Indi Bayibolu yamwekesha ñahi nawu Yehova himukwakukalakala wadikita?

⁴ Yehova hiMukwakukalakala Muneni. HaKutachika 1:1 hahosha nawu: “Hatachi Nzambi waleñeli nimawulu nimaseki.” Chelili Nzambi namanishi dehi mudimu windi wakuleña yuma yahamaseki, wayimweni nindi “yinawahi nankashi.” (Kutachika 1:31) Munjila yikwawu watiyili kuwaha chikupu nanyidimu yindi yejima yahamaseki. Chakubula nikujina, Yehova, ‘Nzambi wamuzañalu,’ wazañaleli chikupu hakwikala mukwakuzata wadikita.—1 Timotewu 1:11.

⁵ Nzambi yetu wadikita halekaña kuzataku. Chelili naleñi dehi iseki niyuma yejima yekalahu, Yesu wahosheli nindi: “Tata yami wuchidi kukalakala nihanu.” (Yowanu 5:17) Yumanyi yinakukalakalayi Tata? Kufuma mwiwulu mwashakamañayi, natwalekuhu kulombola nikwakamena antu. Naleti ‘yileñaleña yayiha,’ akwaKristu akuspiritu akayula naYesu mumawulu kumbidi. (2 Akorinda 5:17) Wakalakalaña kulonda yashikiji nkeñelu yindi yamuchidi wamuntu, kulonda antu amukeña akaswani wumi wahaya nyaka mwituña dadiha. (Aroma 6:23) Yehova watiyaña kuwaha chikupu nanyikabu yamudimu windi. Yihita yawantu yineteji nsañu yaWanta, anakuyikwokola kudi Nzambi nawa anakuhimpa chihandilu chawu kulonda ashakami mukukeña kwindi.—Yowanu 6:44.

6, 7. Ijinanyi dadiwahi dakudikita hadi mpinji yayilehi dikwetiyi Yesu?

⁶ Yesu wekala nejina dadiwahi dakukalakala nakudikita hadi mpinji yayilehi nankashi. Henohu kanda yenzi hamaseki, wadiña “mukalawenu” waNzambi hakuleña yuma yejima “yamumawulu niyahamaseki.” (Yishimu 8:22-31; Akolose 1:15-17) Hampinji yadiñayi hamaseki, Yesu watwalekeluhu kwikala mukwakukalakala wadikita. Kufuma kuwansi, wadizili mudimu wakutuña, nawa amwilukili nawu “mukwakusoña.”a (Maku 6:3) Iwu himudimu wakola chikupu nawa wakeñekaña kwiluka nyidimu yayivulu, sweje-e hayina mpinji yikwabulili matala akupulilamu mbawu, masitolu nimakina akesi kawuneñu. Komana munateli kufwikija Yesu nakudipulila mbawu yomweni, hadaha nikutema nyitondu nikuyikuba nakuyitwala kwiluña kunakuzatilayi? Munateli kumufwikija Yesu nakutuña matala, kupanjika matala, kusoña mapitu, nikusoña yitwamu yikwawu? Chakadi nikujina, Yesu watiyili muzañalu wafumaña mumudimu wunazatewi chachiwahi.

⁷ Yesu wadiña mukwakukalakala wadikita chikupu hakuzata mudimu windi wakushimwina. Wadikitili chikupu mumudimu windi walema hadi yaaka yisatu nachibalu. Hamuloña wakukeña kushimwina antu amavulu chikupu, wazatili nañovu, wahindukileña budidi yayeni nakuzata kushika niwufuku. (Luka 21:37, 38; Yowanu 3:2) Wayileña “nimunyikala yamaneni nimunyikala yanyanya, hakuyishimwina nikuyitwela nsañu yawanta waNzambi yayiwahi.” (Luka 8:1) Yesu wadiña nakwenda makilomita amavulu, hamaseki munyikwakwa yalunkuñu nakutwala nsañu yayiwahi kudi antu.

8, 9. Indi Yesu wazañaleli ñahi namudimu windi wakabakeneniyi?

⁸ Komana Yesu wazañaleleña namudimu windi wakushimwina wakabakeneniyi? Eña! Wakuwili mbutu yachalala chaWanta, nakushiya maha atookashana dehi to-o anakukeñeka kumuna. Kuzata mudimu waNzambi kwamwinkeleña Yesu ñovu chakwila walekeleña nikudya kulonda yawumanishi. (Yowanu 4:31-38) Toñojokenu hamuzañalu watiyiliyi hampinji yamanishiliyi mudimu windi wahamaseki hakumuleja Tata yindi chikupu nindi: “Ami nakulemeshi hamaseki, namanishi dehi mudimu [wu]wanyinkeli kwila.”—Yowanu 17:4.

⁹ Chalala, Yehova niYesu hiyakutalilahu yabadika yawantu azañalalaña nanyidimu yawu yakabakenañawu. Kukeña kutwamukeña Yehova kwatusañumunaña kwikala “akwakwimbujola Nzambi.” (Aefwesesa 5:1) Kukeña kutwamukeña Yesu kwatuleñelaña ‘kwenda mumahaji indi.’ (1 Petulu 2:21) Ichi dinu tutalenu chitwatela kuzañalala ninetu nanyidimu yetu yitwakabakenaña.

CHITWATELA KUZAÑALALA NAMUDIMU WETU WUTWAKABAKENAÑA

10, 11. Chumanyi chinateli kutwikwashaku kukeña mudimu wetu?

¹⁰ Mudimu wakumujimba wunateli kwikala mbadi yachihandilu chawakwaKristu alala. Tunakukeña kuzañalala namudimu wetu, ilaña chumichi chinateli kutwikalila chikupu neyi tunakuzata mudimu wakumujimba wutunabuli kukeña. Tunateli kuzañalala ñahi neyi twazataña mudimu wamuchidiwu?

¹¹ Kuhitila mukukeña mudimu wetu. Mpinji jikwawu hitunateli kuhimpa nyidimu yetuku, ilaña tunateli kuhimpa yitoñojoka yetu. Kutoñojoka chikupu chamonañayi Nzambi mudimu kunateli kutukwasha kukeña mudimu wetu. Chakutalilahu, neyi mudi mutu wachisaka, toñojokenu nenu mudimu wenu, hela chakwila wakehelamu, wayikwashañaku kuhandisha chisaka chenu. Dichi kwakamena antu yimwakeña hichuma chalema kumesu aNzambi. Izu dindi dahosha nawu muntu wukubula kukwasha chisaka chindi “nabadiki wabula kwitiya kutama.” (1 Timotewu 5:8) Chimweluka nenu mwahandilaña mumudimu wenu, chikuyikwashaku kukalakala mudimu wayinkayi Nzambi, chikuyikwashaku kwikala namuzañalu ninkeñelu yabula kwikala mudi akwenu yimwazataña nawu.

12. Munjilanyi mutwekalilaña nankisu neyi twikala adikita nawa akashinshi hamudimu wetu?

¹² Kuhitila mukudikita nikwikala nakashinshi. Kuzata nañovu nikudiza chakuzata mudimu wetu chachiwahi kunateli kutuletela nkisu. Ankoñi adikita nawa elukisha mudimu ayilemesha chikupu kudi antu ayiñija mudimu. (Yishimu 12:24; 22:29) Hakwikala akwaKristu alala, twatela kwikala akashinshi hamudimu wetu, bayi twiyaña mali, yuma yambala, hela kudya mpinji yamukwamudimuku. (Aefwesesa 4:28) Neyi chitwadizili mukapetulu kanafumuhu, kashinshi kaletaña nkisu. Neyi muntu weñijawu mudimu washinshika anateli kumukuhwelela. Hela chakwila enimudimu atumonaña nawu twadikita hela nehi, tunateli kwikala namuzañalu wenzaña hamuloña wakwikala ‘nachinleji chamuchima chachiwahi’ nikwiluka netu tunakuzañalesha Nzambi yitwakeña.—Aheberu 13:18; Akolose 3:22-24.

13. Yumanyi yinateli kumwekana neyi twikala nayililu yayiwahi hamudimu?

¹³ Kuhitila mukwiluka netu yililu yetu yinateli kumulemesha Nzambi. Neyi tumwekeshaña yililu yayiwahi yawakwaKristu hamudimu wetu, antu amakwawu akumona chumichi. Chumanyi chikufumamu? Tunateli ‘kuwahisha kuleja kwaNzambi, Chamwinu chetu.’ (Titusa 2:9, 10) Eñañi, yililu yetu yayiwahi yakojejaña antu kumona kudifukula kwetu chikwawaha, nawa kwayiletelaña ikoku nankashi. Toñojokenu chimwadi kutiya neyi mukwenu yimwazataña nindi yeteja chalala muloña wachakutalilahu chenu chachiwahi hamudimu! Sweje-e dinu, toñojokenu hanilu lwihu: Kuduhu chuma chikuyizañalesha chikupu kubadika hakwiluka nenu yililu yenu yayiwahi yamulemeshaña Yehova nawa yatiyishaña muchima windi kuwaha?—Yishimu 27:11; 1 Petulu 2:12.

KUZATISHA KASHINSHI HAKUTONDA MUDIMU

14-16. Neyi hitukufuukula hansañu yakwiñila mudimu, malwihwinyi alema yitwatela kudihula?

¹⁴ Bayibolu hiyashimuna chikupu nyidimu yakumujimba yetejewa niyabula kwitejewaku. Ichi hichinayi mukwila nawu twatela kwiteja mudimu wejima hichikweti muloña wayuma yekalamuku. Nsona yinateli kutukwasha kutonda mudimu wawuwahi wamuzañaleshaña Nzambi nakutondolwela mudimu wunateli kumuneñesha. (Yishimu 2:6) Neyi hitukufuukula hansañu yakwiñila mudimu, kudi malwihu ayedi alema yitwatela kudihula.

¹⁵ Komana kuzata mudimu wamuchidiwu kukwikala chililu chahishawu muBayibolu? Izu daNzambi dahisha chikupu kwiya, kutwamba nikusoña ankishi. (Kwidika 20:4; Yililu 15:29; Aefwesesa 4:28; Chimwekeshu 21:8) Tunateli kukaana mudimu wudi wejima mwekala yuma yamuchidiwu. Kukeña kutwamukeña Yehova hikwakatwiteja kwiñila mudimu wabombelamu kwila yuma yafumpaña nshimbi jaNzambuku.—1 Yowanu 5:3.

¹⁶ Komana kuzata iwu mudimu kukutuleñela kwikala asamuloña hela kuletesha amakwawu kufwa namuloña wayililu yatama? Talenu hanichi chakutalilahu. Mudimu wakutambwila enyi nijinshiña hiwatamaku. Ndochu neyi mukwaKristu anakukeña kumwiñija mudimu wamuchidiwu hachipatela hafumishilañawu mavumu? Eña, mudimu windi hiwunakundami chikupu kumudimu wakufumisha mavumuku. Hela chochu, komana mudimu wazatañayi hiwakwashaña chipatela kutwalekahu nakufumisha mavumu, chililu chahishawu Mwizu daNzambuku? (Kwidika 21:22-24) Hakwikala antu amukeña Yehova, hitunakukeña kudiñija muyililu yahishawu munsonaku.

17. (a) Yumanyi yitwatela kutoñojokahu neyi hitukufuukula kutalisha hamudimu? (Talenu chikasha hefu 177.) (b) Indi chinleji chetu chinateli kutukwasha ñahi kufuukula yuma yamuzañaleshaña Nzambi?

¹⁷ Malwihu amavulu kutalisha hanyidimu anateli kwakulewa kuhitila mukushinshika nakanañachima hañakwilu yamalwihu alema adi muparakalafu 15 ni 16. Kubombelahu, kudi yuma yikwawu cheñi yitwatela kutoñojokahu chikupu neyi hitukufuukula kutalisha hamudimu.b Hitwatela kukuhwelela izaza danduñu wakashinshi netu dinateli kutwinka nshimbi jatela kutuleja mwakwilila nakukala kwejima kukumwekanaku. Munsañu yamuchidiwu, mwatela kuzatisha kashinshi. Neyi chitwadizili muKapetulu 2, twatela kufumba nikudizisha chinleji chetu kuhitila mukudiza chakuzatisha Izu daNzambi muchihandilu chetu. ‘Nayitoñojoka’ yetu yitwafumba dehi ‘nakwinjilisha,’ chinleji chetu chatela kutukwasha kufuukula yuma yamuzañaleshaña Nzambi nakutwileñela kushakama mukukeña kwindi.—Aheberu 5:14.

KUZATA NYIDIMU MUKUTELELA

18. Muloñadi chichakalila kuzata nyidimu yakuspiritu mukutelela?

¹⁸ Kufuukula hayuma yatwikwashaña kwikala nawuselewa waYehova mpinji yejima hichuma chakala munanu “mafuku akukuminina” ‘anyaka yakala.’ (2 Timotewu 3:1) Hakwila nawu wuwani mudimu nakutwalekahu kuwuzata hichuma chakala nankashi. Hakwikala akwaKristu alala, twazataña nañovu kulonda tukwashi chisaka chetu. Dichi neyi kubabala nehi, akwetu hamudimu hela yililu yetuña yaluwañeshaña yakufwila maheta yinateli kukañesha nyidimu yetu yakuspiritu. (1 Timotewu 6:9, 10) Twayenu tuhanjeki chitwatela kuzata nyidimu yetu mukutelela, nakushinshika ‘yuma yabadika kulema.’—Afwilipi 1:10.

19. Muloñadi chitwatela kumukuhwelela Yehova chikupu, nawa chikuhwelelu chamuchidiwu chatukwashaña kutondolweladi?

¹⁹ Mukuhwelelenu Yehova chikupu. (Yishimu 3:5, 6) Komana Yehova hatelela kumukuhwelela chikupuku? Diyi watwakamenaña. (1 Petulu 5:7) Weluka chikupu yuma yitwakankilaña kubadika yitweluka, nawa hakweti chifwaku. (Masamu 37:25) Chikuwaha neyi tukutiyilila chatulejaña Izu dindi nawu: “Ikalenu nanyichima yakadi kufwila mali; toñojokenu yuma yimudi nayu nenu yinawani dehi; muloña [Nzambi] nahoshi nindi, Hinamba kakulekaku, hela kukushiya hinakakushiyaku.” (Aheberu 13:5) Akwakukalakala amavulu amudimu wampinji yejima atela kwiteja hañovu yaNzambi yakuhana yuma yakeñañawu. Neyi tukuhwelela chikupu netu Yehova wakatwakamena, hitwakasweja kwakamena hayuma yakuhandisha nachu chisaka chetuku. (Matewu 6:25-32) Hitwaketeja mudimu wakumujimba kutuleñela kudiwula nyidimu yakuspiritu, yidi neyi kushimwina nsañu yayiwahi nikuwanika kukupompaku.—Matewu 24:14; Aheberu 10:24, 25.

20. Indi kwikala nadisu datala mumu hohu chaya mudihi, nawa munateli kwikala ñahi nadisu damuchidiwu?

²⁰ Ikalenu nadisu datala mumu hohu. (Matewu 6:22, 23) Kwikala nadisu datala mumu hohu chaya mukwila nawu kwikala nachihandilu chapela. Disu datala mumu hohu damukwaKristu dikweti nkeñelu yimu hohu, yakwila nkeñelu yaNzambi. Neyi chakwila disu detu dinakutala mumu hohu, hitwakafwila mudimu wamali amavulu hela chihandilu chawuhanduku. Cheñi hitwakafwa mumuhetu wakusweja kufwila yuma yakatataka nawa yayiwahi yatiyakeshañawu akwakulandisha kulonda atwikokoli nachu nawu diyi yikutwiletela muzañaluku. Munateli kwikala ñahi nadisu datala mumu hohu? Bayi mudiñijaña munyikuduku. Bayi mudilumbikila maheta amanishaña mpinji yeneni nawa kumukusweja kusha kashinshuku. Tiyililenu kufumba kwamuBayibolu kwakuzañalala ‘nayakudya niyakudivwika’ yimukweti. (1 Timotewu 6:8) Fwilenu kupelesha chihandilu chenu chikupu.

21. Muloñadi chitwatela kutwamijaku yuma yalema, nawa chumanyi chitwatela kutwamijaku muwumi wetu?

²¹ Shenu yuma yakuspiritu hambidi, nawa kakelenuku. Chineli hitukweti mpinji yeneni muchihandilu chetuku, twatela kutwamijaku yuma yalema. Neyi nehi, yuma yamukunkulwayi yinateli kumanisha mpinji yetu yalema, nakudiwula yuma yasweja kulema. Chumanyi chitwatela kutwamijaku chikupu muchihandilu chetu? Antu amavulu mukaayi atwamijaku chikupu kutaña shikola yahewulu kulonda ekali namudimu wamali amavulu mudinu ituña. Ilaña, Yesu wakonkomweneni atumbanji twindi ‘kusambila kukeña wanta.’ (Matewu 6:33) Eña, hakwikala akwaKristu alala, twatwamijañaku Wanta waNzambi muwumi wetu. Nshakaminu yetu, yuma yitwatondaña, yikonkwanyi yitwemikaña ninyidimu yitwakeñaña, yatela kumwekesha nawu twalemesha yuma yakundama kuWanta ninkeñelu yaNzambi kubadika kwakamena yuma yakumujimba.

KUZATA NAÑOVU MUMUDIMU WAKUSHIMWINA

22, 23. (a) Mudimwinyi weneni wukwetuwu akwaKristu alala, nawa tukumwekesha ñahi netu twalemesha iwu mudimu? (Talenu chikasha hefu 180.) (b) Chumanyi chimunafuukuluhu kutalisha hamudimu wakumujimba?

²² Chituneluki netu tunakushakama mumufuku akukuminina, twasha kashinshi chikupu kumudimu wawakwaKristu alala, mudimu wakushimwina nikwilisha atumbanji. (Matewu 24:14; 28:19, 20) Kufwana Chakutalilahu chetu, Yesu, chihandilu chetu chatela kwinzala namudimu wakupulwisha mawumi. Tunateli kumwekesha ñahi netu iwu himudimu walema chikupu kudetu? Antu jaNzambi amavulu adihanaña kukalakala mudimu wakushimwina namuchima wumu neyi akwakushimwina amuchipompelu. Amakwawu nshakaminu yawu yakuzata mudimu wawupayiniya hela wumishonali. Hamuloña wakulemesha yikonkwanyi yakuspiritu, anvwali amavulu akoleshaña anyanawu kufwila kuzata mudimu wampinji yejima. Komana akwakushimwina aWanta adikita azañalalaña namudimu wawu wakushimwina? Eña. Kumukalakela Yehova namuchima wumu kwaletaña muzañalu muchihandilu ninkisu jajivulu.—Yishimu 10:22.

²³ Etu amavulu twazataña mpinji yeneni kumudimu wakumujimba kulonda tukwashi chisaka chetu kumujimba. Anukenu nenu Yehova wakeñaña nindi tuzañalaleña namudimu wetu wutunakukabakena. Neyi yililu yetu niyitoñojoka yikwendelaña hamu nayitoñojoka yaYehova ninshimbi jindi, tunateli kuzañalala namudimu wetu. Dichi bayi twiteja nyidimu yakumujimba kutusenuna kumudimu wetu weneni, wakushimwina nsañu yayiwahi yaWanta waNzambuku. Neyi tutwamijaku iwu mudimu muchihandilu chetu, tukumwekesha nawu twamukeña Yehova nawa tukushakama mukukeña kwindi.

[Tumazu twaheshina]

[Chikasha/Mwevulu wudi hefu 177]

KOMANA NATELI KWITEJA IWU MUDIMU?

Lushimbi: “Mumwelaña mwejima ilenuña kulonda kulemesha Nzambi.”—1 Akorinda 10:31.

Malwihu yimwatela kudihula

▪ Komana iwu mudimu wakundama kuyuma yahishawu chikupu Mwizu daNzambi?—Kwidika 20:13-15.

▪ Komana kuzata iwu mudimu kukunleñela kuzataku munjila yikwawu yililu yahishawu?—Chimwekeshu 18:4.

▪ Komana himudimu wawuwahi wakeñaña kuzatawu antu ejima nawa hiyawuhisha muNsonaku?—Yililu 14:16, 17.

▪ Chumanyi chikufumamu mukuzata iwu mudimu; komana wukuneñeshaña yinleji yawantu amakwawu?—Aroma 14:19-22.

▪ Neyi nazatilaña mwituña dacheñi nawa nashiya chisaka chami, indi chisaka chami chinateli kuhanda ñahi kumujimba nikuspiritu?—Aefwesesa 5:28–6:4.

[Chikasha chidi hefu 180]

“KUFUUKULA KWAMI KUNANLETELI MUZAÑALU WENENI MUKUHANDA KWAMI”

“Nadiñi namaana nankashi kushikola chakwila antondeli kuya nakutañila hashikola yalemeshawu muMusumba waNew York yabula kukundama kunfulumendi nikunfwetelaña. Mukwakufumba wahashikola wankanjikijili kusonekela mashikola amavulu ayunivesiti atiyakana. Mashikola antesha añitejeli nawa añitejeli kunfwetela hayunivesiti yimu yekala hamashikola asweja kutiyakana mpuhu muUnited States. Hela chochu, nakaanini hamuloña wayuma yiyedi. Nelukili wubanji wakushakama hashikola neyi wufuma kwitala, nawa nadiñi nampwila yeneni yakuzata wupayiniya.

“Chayinu mpinji nakalakali wupayiniya wampinji yejima kubadika hadi yaaka 20. Mpinji yonsu nadikitaña munyidimu yejima—kukalakela kudi kukankila kweneni, kukwashana mumudimu wakutuña Matala aWanta, nikuzata mudimu wakukwasha antu adi muwubanji. Chakatataka, nidi namuzañalu wakwikala muchipompelu chahoshaña idimi dacheñi muMusumba waNew York.

“Chinatoñojoka hampinji yinnakalakali mumudimu wampinji yejima, namonaña nkisu yinukweti. Kufuukula kwami kunanleteli muzañalu weneni muchihandilu chami. Yuma yinnamoni niamabwambu yinukweti hinukutwesha kuyihimpa nachuma chidi chejimaku.”—Zenaida.

[Nyevulu yidi hefu 175]

Kuzatisha nshimbi jamuBayibolu kunateli kuyikwasha kuzañalala namudimu wenu wumunakabakeni

[Mwevulu wudi hefu 178]

Tunateli kumwekesha netu twamukeña Yehova kuhitila mukutwamijaku mudimu wakushimwina muchihandilu chetu