Komana Twatela—Kuzata naÑovu?
Alex hakwaba chinakunyamunayi chikasha chikwawu nakusha mumotoka yahakampani hazatilañayi. Hakudihula nindi, ‘Muloñadi chinakukabakena nakuzata mudimu wamuchidiwu?’ ‘Nukutwalekahu kuzata iwu mudimu wamuchidiwu? Nadi kushakama hohu chiwahi hela chakwila inakuzata wanyi.’
Kufwana Alex, makonu antu amavulu hiyakeñaña kuzata nañovuku. Aaron waloñeshaña nyotoka wahosheli nindi “Antu amavulu ahoshaña nawu kwila azata ‘nyidimu yabula kushikilamu nehi.’ Ahoshaña nawu: ‘Inakudelejelamu hohu.’”
Muloñadi antu amavulu chahoshelañawu nawu hiyatela kuzata nañovuku? Hadaha ayiluwañeshaña nansañu yahayikunzulemba, yavula kumwekesha “chihandilu” chakudiluñisha chakubula kuzata. Matthew wazataña mudimu wakuwahisha wahisha, wahosheli nindi “antu atoñojokaña nawu neyi wunakuzata nañovu wukudiluñishaña wanyi.” Shane wazataña wumalonda niyena wetejeli nindi: “Antu akeñaña wanyi kuzata ifuku damukuma hakwila nawu atambuli nfwetu yefuku damukuma.”
Kwambukaku, antu amavulu aheta azataña nañovu. Daniel wudi nayaaka 25 wazataña mudimu wakutuña wahosheli nindi, “Namonaña nami kuzata nañovu kwakuwahi nankashi, sweje-e neyi wunakufwila kwila yuma yayiwahi.” Andre, wudi nayaaka 23, niyena wahosheli nindi, “Neluka nami neyi muntu nakukeña kwikala namuzañalu nikushakama chiwahi watela kuzata. Kubula kuzata nyidimu nañovu hikwaletaña muzañaluku, ilaña kwaleñelaña muntu kwikala nkopi!”
Muloñadi Daniel naAndre chahosheleluwu nawu kuzata nañovu kwakuwahi? Muloña azatishaña nshimbi jamuBayibolu muchihandilu chawu. Bayibolu hiyakaanisha kuzata nañovuku ilaña yatulejaña kuzata nañovu nikutatakena. Nawa yatulejaña yuma yayivulu bayi neyi kuzata nañovu hohuku. Yatulejaña cheñi chitunateli kuzañalala nanyidimu yetu.
Yishinanyi yamuBayibolu yinateli kuyikwasha kuzañalala nanyidimu yenu? Shinshikenu iyi yishina yantesha yinashimunuwu muchibaaba chinalondeluhu.