KWILISHA ATUMBANJI
KUDIZA 10
Shenuku Muchima
Chishina: “Hitwafwilileña hohu kuyileja nsañu yayiwahi yaNzambiku, ilaña twahanini nimawumi etu muloña twayikeñeli chikupu.”—1 Tesa. 2:8.
Chamwekesheliyi Yesu Ichi Chilwilu
1. Talenu VIDIYO, hela tañenu Yowanu 3:1, 2. Kufumahu dihulenu awa malwihu:
Chumanyi chaletesheli Nikodemu yakeñi kwinza kudi Yesu nawufuku?—Talenu Yowanu 12:42, 43.
Nikodemu chenjiliyi kudi Yesu nawufuku, indi Yesu wamwekesheli ñahi nindi washili muchima hamudimu wakwilisha atumbanji?
Chumanyi Chitunakudizila Kudi Yesu?
2. Tukumwekesha netu twayikeña antu neyi tukushañaku muchima wakuyikwasha kulonda ekali atumbanji.
Mufwanenu Yesu
3. Dizenu hampinji niiluña dikumuwahila kadizi wenu. Hadaha kudi ifuku nimpinji yakeñayi. Komana wakeña kudizila kumudimu, hetala tahindi heluña hadi antu amavulu? Esekenu chikupu kuhimpa nzatilu yenu kulonda mwili chinakukeñayi.
4. Dizenuña mpinji yejima. Neyi munakufumahu, bayi mumuleja nenu tukudiza wanyiku, ilaña toñojokenu:
Munateli kudiza nindi ifuku dikwawu munowu mulungu?
Munateli kudiza nindi hafoni hela havidiyo konfalensi?
Munateli kwila mukwenu mukakushimwina kulonda yayi nakudiza nindi?
5. Lombenu kulonda mushiku muchima. Mulombenu Yehova yayikwashi mushi muchima hadi kadizi wenu hela chakwila chamukalilaña kudiza mpinji yejima, hela kuzatisha kufumba kwamuNsona. (Fwili. 2:13) Hadaha kadizi wenu wukweti yilwilu yayivulu yayiwahi, dichi lombenu kulonda mumoni chimukumukwasha.