Yehova Wayinkaña ‘Spiritu Yajila Owu Amulombaña’

‘Dichi neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’—LUKA 11:13.

1. Mpinjinyi yitwakeñaña nankashi wukwashu waspiritu yajila?

‘H INATELI kutwesha kumika chumichi nkawamuku. Natweshi hohu kumika kukala kweniku kuhitila muwukwashu waspiritu yajila!’ Wahoshahu dehi mazu amuchidiwu akufuma kumuchima? EniKristu amavulu ahoshahu dehi mwenimu. Hadaha wahosheli mwenimu hanyima yakwiluka neyi wukweti chikatu cheneni. Hekwawu yadiña mpinji yafwili mukwenu wamumaluwi yiwashakamini nindi yaaka yayivulu. Hela yinateli kwikala mpinji yiwaneñeli. Hampinji yiwatiyili kutama mukuhanda kweyi, watela watiyili neyi wahandileña hohu hamuloña wakwila spiritu yajila yaYehova yakwinkeli “ñovu jabadika nankashi.”—2 Akorinda 4:7-9; Masamu 40:1, 2.

2. (a) Kukalanyi kwamonañawu eniKristu alala? (b) Malwihwinyi yitukudizahu munichi chibaba?

² Hamu neyi eniKristu alala twamonaña ikakeja niikañesha dinavuli mukanu kaayi kabulaña kumwakama Nzambi. (1 Yowanu 5:19) Kubombela hekakeja niikañesha damukaayi, atumbanji aKristu ayilukukaña kudi Satana Diyabolu wunakwasa njita yeneni nanowu “[ana]kuhemba mwanayilejuwu kudi Nzambi, achidi kukakela kushimuna nsañu yaYesu.” (Chimwekeshu 12:12, 17) Dimuloña waweni wutunakukeñela wukwashu waspiritu yajila yaNzambi makonu kubadika hakusambila. Chumanyi chitwatela kwila hakwila nawu tutwalekuhu kusweja kutambwila spiritu yajila yaNzambi? Nawa tuneluki ñahi netu Yehova nakukeñesha kutwinka ñovu yakeñekaña mumpinji yakweseka? Twawanaña ñakwilu yanawa malwihu muyakutalilahu yiyedi yaYesu.

Lombenuña Chakadi Kuleka

3, 4. Yesu waheni chakutalilahwinyi, nawa wachitalishili ñahi kukulomba?

³ Kambanji kaYesu wumu wamulombeli nindi: ‘Mwanta, tuleji chakulomba.’ (Luka 11:1) Mukwakula kwindi, Yesu wayilejeli atumbanji twindi yakutalilahu yiyedi yadifwanaku. Chatachi chamuntu wunatambwili mwenyi, nawa chamuchiyedi chatata yawantu watiyililaña mwanindi. Lekenu tutalenu hayakutalilahu yiyedi yeniyi.

⁴ Yesu wahosheli nindi: “Hadenu hadi mwinenwinyi wukweti ibwambu dindi wukuya kudi yena mukachi kawufuku nindi, Eyi ibwambu dami, nsondamishuku mankendi asatu; kunenzi ibwambu dami munjila yindi, hinikweti yakumudiishaku. Yena amwakuli omu mukachi mwadiyi eli nindi, Kuchisu kwakwenzela dehi; nakama dehi kwami hakadidi, nianyanami nawa, kutwesha kuhinduka nakukwinka nehi. Nukuyileja nami, hela kwonti kwindi kuhinduka nakumwinka nansañu yawubwambu, wukuhinduka nakumwinka yuma yejima yanakeñiyi nansañu yakumukakelayi.” Kufumahu Yesu walumbulwili chinakulumbulula ichi chakutalilahu kuchaaku chakulomba, nindi: “Nukuyileja nami, lombenu akuyinka; keñakeñenu mukuwana; dondomwenenu akuyenzulwila. Muloña ejima akulomba akutambula; muntu wukukeñakeña wukuwana; wukudondomwena akumwenzulwila.”—Luka 11:5-10.

5. Indi chakutalilahu chamuntu walombeleña chakadi kuleka chinakutudizisha chumanyi hayililu yetu kutalisha hakulomba?

⁵ Ichi chakutalilahu chatiyakana chamuntu walombeleña chakadi kuleka chinakumwekesha chatela kwikala yililu yetu hampinji yitunakulomba. Ilukenu nenu Yesu nahoshi nindi, iwu muntu natweshi kutambula yuma yinakukeñayi ‘nansañu yakukakela kwindi.’ (Luka 11:8) Izu dadeni dachiGreek dinabalumunuwu ahanu nawu ‘kukakela’ damwekanaña hohu kamu muBayibolu. Adibalumuna mwiizu dachiGreek dinakulumbulula ‘kubula nsonyi.’ Kakavulu kubula nsonyi kwamwekeshaña yililu yatama. Hela chochu, kubula nsonyi hela kukakela neyi akwimwekesha munjila yayiwahi, kunateli kwikala chililu chachiwahi. Hohamu namukwakutambwila mwenyi wudi muchakutalilahu. Hatiyileña nsonyi hakulomba chakadi kuleka yuma yakeñeleñayuku. Chineli Yesu namwekeshi mukwakutambwila mwenyi hamu neyi chakutalilahu chetu, twatela kulombaña chakadi kuleka. Yehova nakukeña nindi ‘tulombeña, tukeñakeñeña, tudondomweneña.’ Chikafumamu, ‘wakayinka owu amulombaña spiritu yajila.’

6. Indi chaaku chakumwekesha chisambu achimweneña ñahi mumafuku aYesu?

⁶ Yesu hanatuleji hohu chakulomba chakadi kulekaku—ilaña natuleji cheñi muloña yitwatelela kulombaña. Hakwila nawu tutiyishishi iku kudiza chiwahi, twatela kushinshika hadi antu atiyilili kuchakutalilahu chaYesu chamuntu watambwilili mwenyi chamweneñawu chaaku chakumwekesha chisambu. Nsañu yayivulu yashimunawu muNsona yamwekeshaña nawu mumpinji yamuBayibolu, kwakamena enyi chadiñi hichaaku chalema nankashi, sweje kudi ambuña aNzambi. (Kutachika 18:2-5; Aheberu 13:2) Kubula kumwekesha chisambu kwadiñi hikubula kumwekesha kalemesha. (Luka 7:36-38, 44-46) Saña twahembela nsañu yeniyi muyitoñojoka, lekenu tutali cheñi hampanji yaYesu.

7. Muloñadi mukwakutambwila mwenyi wudi muchakutalilahu chaYesu chabuliliyi kutiya nsonyi yakuhindwisha ibwambu dindi?

⁷ Mukwakutambwila mwenyi muchakutalilahu watambwilili mwenyi mukachi kawufuku. Mukwakutambwila mwenyi wakeñesheli kuloñesha kudya kwamwenyi windi, ilaña ‘hadiña nayakumudiishaku.’ Muyitoñojoka yindi, chumichi chakeñekeleña mukunyakashana! Chiña tuhu yakeñi mankendi, hela chakwila akwikala nawuseya weneni ñahi. Dichi wanyamukili nakuya kudi ibwambu didi chakadi kutiya woma nakumuhindwisha. Mukwakutambwila mwenyi hakumulomba nindi, “Eyi ibwambu dami, nsondamishuku mankendi asatu.” Watwalekañahu nakulomba chakadi kuleka nichikutambulayi yuma yinakukeñayi. Nateli hohu kwikala mukwakutambwila mwenyi wamuwahi, neyi wukweti mankendi.

Neyi Wunakukeña Yuma Yayivulu—Lombaku Yayivulu

8. Chumanyi chinateli kutuleñela kulomba spiritu yajila chakadi kuleka?

⁸ Indi ichi chakutalilahu chinakumwekeshadi hamuloña wutwalombelaña chakadi kuleka? Iwu muntu watwalekeluhu kulomba mankendi muloña welukili nindi, neyi wukwikala namankendi wenawa chikwikala chalema chikupu kukalakala mudimu windi hamu neyi mukwakutambwila mwenyi. (Isaya 58:5-7) Chakadi mankendi hanatweshi kukalakala mudimu winduku. Chochimu, muloña tweluka netu kwikala naspiritu yaNzambi hichuma chalema chikupu hakwila nawu tutwalekuhu namudimu wetu wakushimwina hamu neyi eniKristu alala, twatwalekañahu kulomba kudi Nzambi, kulomba spiritu. (Zekariya 4:6) Chakadi spiritu, tunateli kukañanya. (Matewu 26:41) Munamoni kukunkulula kwalema kutunateli kudizila kunichi chakutalilahu? Neyi tumona spiritu yaNzambi neyi hichuma chitunakukeña mukunyakashana, twatela kutwalekahu kuyilomba.

9, 10. (a) Lumbululaku muloña wutwakeñelaña kumulomba Nzambi spiritu yindi chakadi kuleka. (b) Lwihwinyi lutwatela kudihula etwaweni, nawa muloñadi?

⁹ Hakuzatisha kudiza kweniku muchihandilu chetu chananu mafuku, chitoñojoki neyi chakwila muntu wumu wamuchisaka cheyi nakati mukachi kawufuku. Wunateli kuhindwisha ndotolu kulonda yayikwashuku? Hiwukumuhindwisha neyi chakwila muyeji wukweti kankati kanyanyaku. Ilaña, neyi wakata yikatu yamuchima, hiwunateli kutiya nsonyi yakumutambika ndotoluku. Muloñadi? Muloña wunahumañani chuma chinakukeñeka mukunyakashana. Nawa wuneluki neyi wukwashu wamuntu wadiza chikupu wunakukeñeka. Kubula kulomba wukwashu kunateli kukojeja muyeji kufwa. Chochimu, eniKristu alala atwalekañahu kumona yuma yamwekanaña mukunyakashana, munjila yikwawu. Walala wudi wakwila nawu, Satana nakwenda neyi “mutupa wabulumaña,” kulonda kukeña kutwikisañana. (1 Petulu 5:8) Hakwila nawu tutwalekuhu kwikala akola lwakuspiritu, wukwashu waspiritu yaNzambi wunakukeñeka chikupu. Neyi tubula kulomba wukwashu waNzambi chikwikala chafwana. Dichi, twatela kumulomba Nzambi spiritu yindi yajila chakadi nsonyi. (Aefwesesa 3:14-16) Kwila mwenimu hohu dimu tunateli kwikalila nañovu yinakukeñeka ‘kumika nikunsa.’—Matewu 10:22; 24:13.

¹⁰ Dichi mpinji jikwawu chalema kuhulumana zo-o nakudihula etwaweni netu, ‘Mwalala nalombaña chakadi kuleka?’ Anukenu nenu, neyi twiluka chikupu netu tunakukeña wukwashu waNzambi, kulomba kwetu kwakukeña spiritu yajila kunatweshi kutwalekahu chakadi kuleka.

Chumanyi Chatwileñelaña Kulomba naChikuhwelelu?

11. Yesu wazatishili ñahi chakutalilahu chatata yawantu nimwanindi hakulomba?

¹¹ Chakutalilahu chaYesu chamukwakutambwila mwenyi, walombeli chakadi kuleka chinakulumbulula yililu yamuntu walombaña—mukwakwitiya. Chakutalilahu chinahiñuhu chinakulumbulula chatiyañayi mukwakutiyilila kulomba—Yehova Nzambi. Yesu wehwili nindi: ‘Mwinenwinyi wukwila neyi hitata yawantu, amulomba kudi mwanindi weyala inshi amwinki kapela? Hela nalombi iteta amwinki kanjimbu?’ Yesu watwalekeluhu nakulumbulula nindi: ‘Dichi neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’—Luka 11:11-13.

12. Indi chakutalilahu chatata yawantu watiyaña kulomba kwamwanindi chinakulumbulula ñahi chakeñañayi Yehova kwakula kukulomba kwetu?

¹² Ichi chakutalilahu chatata yawantu chatiyañayi namwanindi, Yesu namwekeshi chatiyañayi Yehova nawantu amulombaña. (Luka 10:22) Chatachi, talenu chambu chidi haniyi yakutalilahu yiyedi. Kwabukaku nanona muntu wudi muchakutalilahu chatachi wadiña nakushintajala hakukwashana, Yehova wudi neyi nvwali yamuntu wakamenaña, wakeñaña kutiyilila anyanindi akeñaña wukwashu. (Masamu 50:15) Kutwalekahu Yesu namwekeshi chatiyañayi Yehova hadetu kuhitila muyitoñojoka yatata yawantu nakushika kudi tata yawantu wamwiwulu. Nahoshi nindi neyi tata yawantu, hela chakwila ‘watama’ hamuloña wanshidi yakuswana, wahanaña yawaana yayiwahi kudi mwanindi, indi yuma yiñahi yitunateli kukuhwelela kutambwila kudi Tata yetu wamwiwulu, hakwikala saluwi, natweshi kuhana spiritu yajila kuchisaka chidi chawakwakudifukula!—Yakoba 1:17.

13. Chumanyi chitwatela kwiluka neyi tunakulomba kudi Yehova?

¹³ Chumanyi chitunateli kudizilaku? Twatela kukuhwelela netu neyi tumulomba Tata yetu wamwiwulu spiritu yajila, wakeñaña chikupu kwakula kulomba kwetu. (1 Yowanu 5:14) Neyi tumulomba chakadi kuleka, Yehova hanatweshi kuhosha nindi: ‘Lekaku kunkabisha, Kuchisu kwakwenzela dehuku.’ (Luka 11:7) Kwabukaku Yesu wahosheli nindi: ‘Lombenuña akayinka; keñakeñenuña mwakawana; dondomwenenuña akayenzulwila.’ (Luka 11:9, 10) Dimu, Yehova ‘wakatwitiya hefuku ditwakatambika.’—Masamu 20:9; 145:18.

14. (a) Yitoñojokanyi yakutwamba yakabishaña amakwawu amonaña kukala? (b) Neyi twikala mukweseka, muloñadi chitwatelela kulomba nachikuhwelelu kudi Yehova?

¹⁴ Chakutalilahu chaYesu chatata yawantu wakamenaña chakonkomwenaña cheñi nawu kuwaha kwaYehova kwabadika chikupu hakuwaha kwamwekeshaña nvwali. Dichi, wejima wetu hitwatela kutoñojoka netu kukala kutwamonaña hichinjikijilu chakutwihilila kudi Nzambuku. Chilumbu chetu muneni, Satana diyi wakeñaña nindi tutoñojokeña muniyi njila. (Yoba 4:1, 7, 8; Yowanu 8:44) Hikwekala Nsona hashindamena yitoñojoka yamuchidiwu yakudifwisha namuloñaku. Yehova hatwesekaña “nayuma yatamaku.” (Yakoba 1:13) Hatwesekaña nakukala kudi neyi kwakutwinka kapela hela kanjimbuku. Tata yetu wamwiwulu wayinkaña ‘amulombaña yuma yayiwahi.’ (Matewu 7:11; Luka 11:13) Dimu, chitwasweja kwiluka kuwaha kwaYehova nichakeñañayi kutukwasha, chakatwileñela kulomba nachikuhwelelu nankashi. Hampinji yitunakwila mwenimu, ninetu nawa tunateli kuhosha mazu adi neyi añimbi yamasamu wasonekeli nindi: “Ilaña chalala Nzambi natiyi dehi, natiyilili izu dami chinalomba.”—Masamu 10:17; 66:19.

Muyekalila Spiritu Yajila Nkwashi Yetu

15. (a) Chikaninwinyi chashiikiliyi Yesu kutalisha haspiritu yajila? (b) Njilanyi yimu mwatwikwashilaña spiritu yajila?

¹⁵ Kukamwihi nakufwa kwindi, Yesu wafuntishiluhu chikaninu chakaniniyi muyakutalilahu yindi. Chahosheleñayi haspiritu yajila, walejeli apostolu indi nindi: “Ami nakamulomba Tata, wakayinka Nkwashi mukwawu akekali nanenu nyaka yejima.” (Yowanu 14:16) Dichi Yesu washiikili nindi nkwashi, hela spiritu yajila, yakekala hadi atumbanji twindi kumpinji yakumbidi, kubombelahu nimumafuku etu. Njilanyi yimu yalema yitwatambwilaña wukwashu wamuchidiwu makonu? Njila yimu yalema yidi yakwila nawu, spiritu yajila yatwikwashaña kumika makabi amboka-mboka. Munjilanyi mwatwikwashilaña spiritu yajila kumika makabi? Kapostolu Pawulu wamweni kweseka, walumbulwili mumukanda watemesheleliyi eniKristu kuKorinda ochu spiritu yaNzambi chiyamukwashili. Lekenu tushinshiki chanti hayuma yasonekeliyi.

16 Indi kukala kwetu kunateli kudifwana ñahi nakuna kwaPawulu?

¹⁶ Chatachi, Pawulu walejeli akwawu akwakwitiya nindi wadiñi ‘namwiña mumujimba,’ kukala kwamuchidiwu. Dichi wahosheli nindi: “Namulembelelichu Mwanta [Yehova] mapampa kasatu, nami anfumishi mwiñiwu.” (2 Akorinda 12:7, 8) Hela chakwila Pawulu wamulembeleli Nzambi kumufumisha kukala kwadiñayi naku, hikwamaninuku. Hekwawu nineyi wamonaña kukala kudi neyi iku makonu. Kufwana Pawulu, hekwawu walombaña chakadi kuleka nachikuhwelelu, nakumulomba Yehova kulonda kufumisha kweseka. Hela chakwila walembelelaña kayedi kayedi, hohamu, wuchidi kumona kukala. Komana chinakubalumuna nawu Yehova hakwili kulomba kweyuku nawa spiritu yindi hiyinakukwashaku? Inehi! (Masamu 10:1, 17) Talenu mazu ahosheliyi kapostolu Pawulu.

17. Indi Yehova wakwili ñahi kulomba kwaPawulu?

¹⁷ Kwesekeja nakulomba kwaPawulu, Nzambi wamwakwili nindi: “Luwi lwami lunakuwanini, muloña ñovu yami yalumbulukaña chikupu hakuzeya.” Pawulu wahosheli nindi: “Dichi hinukutiya kuwaha nankashi, nami komana chuma chachiwahi chochakudisamba nakuzeyazeya kwami, kulonda ñovu yaKristu yakekali hadami.” (2 Akorinda 12:9; Masamu 147:5) Dichi, Pawulu wachimweni neyi kuhitila mudi Kristu, kukiñewa kwaNzambi kwabadika akwalili hadi yena neyi itenti. Makonu, Yehova wakulaña kulomba kwetu munjila yadifwanaku. Wawanishaña kukiñewa kwindi wukwila neyi mwakuswama ambuñindi.

18. Muloñadi chitwatelela kutwesha kumika kweseka?

¹⁸ Hela chochu, itenti hidakañeshaña nvula kunoka hela kukunka mpepelaku, ilaña dakwashañaku kujikilila yuma yeniyi. Chochimu, itenti daloñeshewa ‘nañovu yaKristu’ hidalekeshaña kweseka kutumwekena hela kukala kutumwekenaku. Ilaña, hamu neyi akwakudifukula aYehova datwikiñaña kuyuma yatama yekala mukanu kaayi nikukulukukewa kwanyuli yakanu kaayi, Satana. (Chimwekeshu 7:9, 15, 16) Dichi, hela wunakumona kweseka kwabulaña ‘kukwamuka,’ watela kwiluka neyi Yehova weluka kulwisha kweyi nawa natiyi ‘kukaluka kwamutetu weyi.’ (Isaya 30:19; 2 Akorinda 1:3, 4) Pawulu wasonekeli nindi: “Ilaña Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela [hela kukumika].”—1 Akorinda 10:13; Afwilipi 4:6, 7.

19. Chumanyi chiwunakufwila kwila, nawa muloñadi?

¹⁹ Mwalala, ‘mafuku akukuminina’ amakonu akanu kaayi kabulaña kumwakama Nzambi ayilukaña kuhitila ‘kunyaka yakala.’ (2 Timotewu 3:1) Hela chochu, kudi ambuña Nzambi iyi nyaka hiyakala kudi wenaku. Muloñadi? Hamuloña wawukwashu nikukiñewa naspiritu yajila yaNzambi, yahanañayi Yehova namuchima windi wejima nawa yabadika chikupu kudi ejima amulombaña chakadi kuleka nachikuhwelelu. Dichi lekenu, tufwili kutwalekahu kulomba spiritu yajila mafuku ejima.—Masamu 34:6; 1 Yowanu 5:14, 15.

Munateli Kwakula Ñahi?

• Chumanyi chitwatela kwila hakwila nawu tutambuli spiritu yajila yaNzambi?

• Muloñadi chitwatelela kukuhwelela netu Yehova nateli kwakula kulomba kwetu kwakulomba spiritu yajila?

• Munjilanyi spiritu yajila muyatwikwashilaña kumika kweseka?

[Mwevulu wudi hefu 13]

Chumanyi chitunateli kudizila kuchakutalilahu chaYesu chamukwakutambwila mwenyi walombeleña chakadi kuleka?

[Mwevulu wudi hefu 15]

Komana walombaña spiritu yajila yaNzambi chakadi kuleka?

[Mwevulu wudi hefu 16]

Chumanyi chitunadizili kudi Yehova kuchakutalilahu chatata yawantu wakamenaña?