Yehova ‘Wakamwekesha Wuñanji Windi’

‘Komana Nzambi yabuli kumwekesha wuñanji kudi antu indi atondayi dehi, amubilelaña nimwaana niwufuku?’—LUKA 18:7.

1. Anyi ekala nsulu yakukukolesha, nawa muloñadi?

KUNYEÑUMUKA kaayi kejima aYinsahu jaYehova adiluñishaña wulunda naweniKristu amayala niambanda anamukalakeli Yehova nakashinshi hadi yaaka yayivulu. Komana welukahu amakwawu hakachi kanawa yitwakeña? Hamwaha wunateli kutoñojoka hadi muheletu washinakaja dehi, wapapatisheweli hayaaka yayivulu yinahitihu nawa hajiñaña kukupompa Hetala daWantaku. Hela wunateli kutoñojoka hadi mana kwetu washinakaja dehi wakalakalaña nakashinshi mumudimu wamwiha wahachipompelu mulungu nimulungu nawa nakalakali hadi yaaka yayivulu. Mwalala, amavulu hadawa ashinshika atoñojokeleña nawu hayinu mpinji, Amagedoni kachi yenza dehi. Hela chochu, chineli akanu kaayi katama kachidihohu hikanazeyeshi chikuhwelelu chawu chayikaninu yaYehova hela kuzeyesha kufwila kwawu ‘kwakukakela nikunsaku.’ (Matewu 24:13) Chikuhwelelu chakola chinamwekeshi ambuña aYehova ashinshika wenawa, mwalala hinsulu yakukolesha nachu chipompelu chejima.—Masamu 147:11.

2. Yumanyi yatwineñeshaña?

² Mpinji yimu, hekwawu twatela kumona yililu yashiyashana chikupu. A Yinsahu amakwawu akalakeli mumudimu wakushimwina hayaaka yayivulu, ilaña mukuhita kwampinji, chikuhwelelu chawu mudi Yehova chafuntili hanyima, nawa alekeli kudikunda nachipompelu chawiniKristu. Chatwineñeshaña chikupu netu akwetu yitwadiña nawu anamushiyi Yehova, nawa hinkeñelu yetu yakufuma kumuchima yakutwalekahu kukwasha “mukoku wajimbala” wudi wejima kulonda yafunti kumukanka. (Masamu 119:176; Aroma 15:1) Hela chochu chambu chakwila nawu, amakwawu ahembaña chikuhwelelu chawu nakutwalekahu kwikala akola hakwila amakwawu ajimbeshaña chikuhwelelu chawu nikuleka kudikunda nachipompelu chaleteshaña kwihula malwihu. Chumanyi chayikwashaña aYinsahu amavulu kuhemba chikuhwelelu chawu muyikaninu yaYehova henohu amakwawu achijimbeshaña? Chumanyi chitunateli kwila halwetu hakwila chikuhwelelu chetu chakwila netu “Ifuku daYehova deneni” dinakuswila kwakwihi chitwalekuhu kwikali chakola? (Zefwaniya 1:14) Lekenu tutali hachakutalilahu chekala muNsañu Yayiwahi yaLuka.

Kusoñamisha Kwanowu Anakushakama muMpinji ‘Yakenzayi Mwana kaMuntu’

3. Anyi atela kuhetelamu chikupu muchakutalilahu chanfwila nansompeshi, nawa muloñadi?

³ HaLuka kapetulu 18, hawanewaña chakutalilahu chaYesu kutalisha hadi nfwila ninsompeshi. Chadifwanaku nachakutalilahu chamukwakutambwila mwenyi walombeleña chakadi kuleka, chitwadizili muchibaba chinafumihu. (Luka 11:5-13) Hela chochu, nhoshelu yamuchibaba chamuBayibolu yahoshaña hachakutalilahu chanfwila ninsompeshi yamwekeshaña nawu chumichi chinakutalisha sweje-e kudi owu anakushakama ‘mumpinji yakenzayi mwana kamuntu’ muñovu yaWanta, mpinji yeniyi yatachikili mu 1914.—Luka 18:8.a

4. Chumanyi chahosheliyi Yesu henohu kanda yashimuni chakutalilahu chawanikaña haLuka kapetulu 18?

⁴ Henohu kanda yashimuni chakutalilahu chanfwila nansompeshi, Yesu wahosheli nindi wunsahu wakwinza kwindi muñovu yaWanta akawimona chikupu wukwila neyi ‘Nvula yinakukena’ “kumutamba wumu wewulu, kutooka nikumutamba wukwawu.” (Luka 17:24; 21:10, 29-33) Hela chochu, antu amavulu anakushakama ‘mumpinji yakukuminina’ hiyakasha kashinshi kuniwu wunsahu watiyakanaku. (Danyeli 12:4) Muloñadi? Hamuloña yowumu waletesheli antu amumafuku aNowa niLoti kudiwula kusoñamisha kwaYehova. Mumafuku wenawa, antu ‘adiilaña, anwinaña, alandilaña, alandishilaña, adiminaña, atuñileña ndo nikwifuku diyayijilumwinuwu.’ (Luka 17:26-29) Afwili muloña adiñijili chikupu muniyi nyidimu yakoñeleñawu mpinji yejima chakwila hiyashili kashinshi kunkeñelu yaNzambuku. (Matewu 24:39) Makonu, antu amavulu niwena anadiñiji chikupu muyuma yinakumwekana chakwila anakañanyi nikwiluka wunsahu wakwila nawu kukuma kwakanu kaayi kabulaña kumwakama Nzambi kudi mukamwihi.—Luka 17:30.

5. (a) Yesu wahanini iku kusoñamisha kudi anyi, nawa muloñadi? (b) Chumanyi chinaleñeli antu amakwawu kujimbesha chikuhwelelu chawu?

⁵ Chakadi nikujinoka, Yesu wakameneni nindi atumbanji twindi niwena atela kuyiluwañesha kudi kaayi kaSatana, kushika tuhu nikuchipimu chakwila anateli ‘kufunta kuyuma yidi kunyima.’ (Luka 17:22, 31) Eñañi, chumichi chinayimwekeni eniKristu amakwawu. Hayaaka yayivulu antu wenawa adiña nakuhembelela ifuku damba kakisañanayi Yehova kanu kaayi katama. Hela chochu, Amagedoni chiyabulili kushika hampinji yakuhweleluwu, aneñeli. Chikuhwelelu chawu chakuswina kwefuku daYehova dakusompesha chazeyeli. Afuntili hanyima mumudimu wakushimwina, mukuhita kwampinji atachikili kudiñija munyidimu yampinji yejima yakoñeleñawu muchihandilu chawu chakwila adiñi hohu nampinji yanti yakuzata nyidimu yakuspiritu. (Luka 8:11, 13, 14) Mukuhita kwampinji, ‘afuntili kuyuma yashiluwu kunyima’—chawushona!

Chuma Chinakukeñekela ‘Kulombaña Mpinji Yejima’

6-8. (a) Shimunaku chakutalilahu chanfwila nansompeshi. (b) Indi Yesu wazatishili ñahi ichi chakutalilahu?

⁶ Chumanyi chitwatela kwila hakwila twiluki chikupu netu chikuhwelelu chetu chakola hakushikijewa kwayikaninu yaYehova chibuli kuzeya? (Aheberu 3:14) Yesu wehwili lwihu lwenilu hanyima yakusoñamisha atumbanji twindi hakubula kufunta kukaayi kaSatana katama.

⁷ Luka nashimuni nindi Yesu ‘watwalekeluhu kuyileja chakutalilahu kutalisha kunkeñelu yakulombaña mpinji yejima chakadi kuzeya.’ Yesu nindi: “Mumukala weneni wumu mwadiñi [nsompeshi] wumu wabulili kutiya Nzambi woma, hela kubaña antu nehi. Mumukalowu mwadiñi mumbanda wanfwila wumu; yena mumbanda hakuzebaña kudi owu [nsompeshi] nindi, Nhosheli muloña nasamuloña wami. Hahitili mafuku yena kwonti kwindi; nkumininaku hakwila mumuchima windi nindi, Ami hinatiyaña Nzambi womaku, hela antu kuyibaña nehi; hela chochu, chakuswejayi mumbanda iwu kunzebela, keña anzeyeshi tuhu, chakwilayi zebe-e ichi, nukukumina dakumuhoshelaku muloña windi tuhu.”

⁸ Hanyima yakushimuna iwu mujimbu, Yesu wakunjikili kunsañu nindi: ‘Tiyenu chahosheliyi owu nsompeshi waheña. Nzambi wakamwekesha wuñanji kudi antu indi atondayi dehi, amubilelaña nimwaana niwufuku, adiwunjikilañayi wunjike-e? Nukuyileja nami hakalaba kumwekesha wuñajuku. Hela ochu, chakenzayi Mwana kamuntu, wakawana chikuhwelelu hamaseki, tahindi?’—Luka 18:1-8.

‘Nhosheluku Muloña’

9. Mutwinyi wuyanakonkomwenuwu muchakutalilahu chanfwila nansompeshi?

⁹ Mutu wanichi chakutalilahu chatiyakana wunatiyakani chikupu. Anawiteni kudi antu ejima ayedi adi muchakutalilahu cheñi nikudi Yesu. Nfwila walembeleli nindi: ‘Nhosheluku muloña.’ Nsompeshi nindi: “Nukukumina dakumuhoshela muloña windi.” Yesu wehwili nindi: ‘Komana Nzambi yabuli kumwekesha wuñanji?’ Kutalisha kudi Yehova, Yesu wahosheli nindi: ‘Hakalaba kumwekesha wuñajuku.’ (Luka 18:3, 5, 7, 8) Indi Nzambi wamba ‘kamwekesha wuñanji’ mpinjinyi?

10. (a) Indi wuñanji awumwekesheli mpinjinyi munkulakaji yayaaka yakusambila? (b) Mpinjinyi nawa munjilanyi muyakamwekeshelawu antu jaNzambi wuñanji makonu?

¹⁰ Muyaaka nkulakaji yakusambila, ‘mafuku akumwekesha wuñanji’ (hela “mafuku akutenda,” Kingdom Interlinear) ashikili mu 70 C.E. hampinji yakisañenuwu Yerusalema nitembeli yayu. (Luka 21:22) Hakwila antu jaNzambi makonu, wuñanji akawimwekesha ‘hefuku daYehova deneni.’ (Zefwaniya 1:14; Matewu 24:21) Hampinji yeniyi, Yehova ‘wakahiñishila lukadi, kudi owu alumwekeshaña’ kudi antu jindi ‘[hampinji yakaletayi Yesu Kristu] kutenda hadi antu abula kumwiluka Nzambi, nihadi antu abulaña kwovwahila nsañu yaMwanta wetu Yesu yayiwahi.’—2 Atesalonika 1:6-8; Aroma 12:19.

11. Munjilanyi wuñanji muwakenjila ‘mukunyakashana’?

¹¹ Hanu dinu munjilanyi mutunateleli kutiyishisha kukana kwaYesu kwakwila nawu Yehova wakamwekesha wuñanji ‘mukunyakashana’? Izu daNzambi damwekeshaña nawu ‘hela chakwila Yehova wadiwunjika’ mukunyakashana wakamwekesha wuñanji neyi mpinji yinashikili. (Luka 18:7, 8; 2 Petulu 3:9, 10) Mumafuku aNowa, chashikili Dibaji antu atama ayijilumwini chakadi nikulaba. Chochimu, nimumafuku aLoti, chanokeli kesi kufuma mwiwulu, antu atama ajiyili. Yesu wahosheli nindi: ‘Mwomumu nawa dichakekala nihadina ifuku dakamwekana Mwana kamuntu.’ (Luka 17:27-30) Cheñi antu atama ‘akayijilumuna chakuyikasumwisha.’ (1 Atesalonika 5:2, 3) Mwalala, twatela kukuhwelela chikupu netu Yehova haketeja kaayi kaSatana kutwalekahu hela ifuku dimu kuhitahu kwesekeja nachakeñekaña wuñajuku.

‘Wakamwekesha Wuñanji’

12, 13. (a) Chakutalilahu chaYesu chanfwila ninsompeshi chadizishaña chumanyi? (b) Muloñadi chitwatelela kwiluka netu Yehova nateli kutiya kulomba kwetu nakumwekesha wuñanji?

¹² Chakutalilahu chaYesu chanfwila nansompeshi chinakonkomweni cheñi hachalala chalema. Hakulumbulula mwatalishili ichi chakutalilahu, Yesu wahosheli nindi: ‘Tiyenu chahosheliyi owu nsompeshi waheña. Komana Nzambi abuli kumwekesha wuñanji kudi antu indi atondayi dehi?’ Hela chochu, Yesu hesekejeleña Yehova nansompeshi nawu wakayila akakwitiya munjila yoyimuku. Ilaña, Yesu wadizishili atumbanji twindi hadi Yehova kuhitila mukumwekesha chambu chidi hakachi kansompeshi naNzambi. Munjilanyi muyanambukiluwu?

¹³ Nsompeshi wudi muchakutalilahu chaYesu wadiñi “waheña” hakwila ‘Nzambi hinsompeshi waloña.’ (Masamu 7:11; 33:5) Nsompeshi hamwekesheli kukeña kudi nfwilaku, hakwila Yehova wakeña antu ejima. (2 Kushindulula 6:29, 30) Nsompeshi hakeñeleña kumukwasha nfwilaku, hakwila Yehova wakeñaña kukwasha chikupu owu anakumukalakela. (Isaya 30:18, 19) Chumanyi chitwatela kudizilahu? Neyi chakwila nsompeshi watiyilili kulomba kwanfwila nakumumwekeshela wuñanji, Yehova nateli kutiya chikupu kulomba kwawantu jindi nikuyimwekeshela wuñanji.—Yishimu 15:29.

14. Muloñadi chitunateleli kubula kujimbesha chikuhwelelu chetu kutalisha kwifuku daNzambi dakusompesha dinakwinza?

¹⁴ Dichi, antu ajimbeshaña chikuhwelelu chawu kutalisha hakwinza kwefuku dakusompesha aluwañeshaña chikupu. Muloñadi? Kuhitila mukubula kukuhwelela chikupu nawu “ifuku daYehova deneni” didi kukamwihi, amwekeshaña kuhitila munyidimu yawu nawu ajinokaña, neyi chakwila anateli kumukuhwelela Yehova kuhemba yikaninu yindi nakashinshi. Ilaña kwosi muntu wunateli kujinoka kashinshi kaNzambuku. (Yoba 9:12) Lwihu lwalema ludi lwakwila nawu, komana twakatwalekahu kwikala ashinshika halwetu? Diyi mutu wansañu wateneniyi Yesu hakukumisha kwachakutalilahu chanfwila nansompeshi.

‘Chalala Wakawana Ichi Chikuhwelelu haMaseki Tahindi?’

15. (a) Lwihwinyi lwehwiliyi Yesu, nawa muloñadi? (b) Twatela kudihula netudi etwaweni?

¹⁵ Yesu wehwili lwihu lwaluwahi nindi: ‘Chakenzayi Mwana kamuntu, komana wakawana ichi chikuhwelelu hamaseki, tahindi?’ (Luka 18:8) Nhoshelu yakwila nawu ‘ichi chikuhwelelu’ yinakumwekesha nawu Yesu hatalishili kuchikuhwelelu chekala nawantu ejimaku, ilaña chikuhwelelu chamuchidi wacheñi—chidi neyi chadiña nanfwila. Yesu hakwili lwihu lwinduku. Wehwili kulonda atumbanji twindi atoñojoki neyi chakwila adiñi nachikuhwelelu chamuchidiwu. Komana chazeyeleña chovu-chovu, chakwila ekala muwubanji wakufunta kuyuma yashiyiluwu kunyima? Tahindi adiñi nachikuhwelelu neyi chamwekesheliyi nfwila? Makonu, twatela kudihula etwaweni netu, ‘Chikuhwelelu chamuchidinyi chinateli kuwanayi mumuchima wami “Mwana kamuntu”?’

16. Chikuhwelelu chamuchidinyi chadiña nanfwila?

¹⁶ Hakwila nawu tukekali hakachi kanowu akatambula wuñanji waYehova, twatela kwimbujola njila yaniwu nfwila. Chikuhwelelu chamuchidinyi chadiñayi nachu? Wamwekesheli chikuhwelelu chindi kuhitila mukuzebela ‘kudi owu nsompeshi nindi, Nhosheluku muloña.’ Iwu nfwila walembeli chakadi kuleka kulonda kutambula wuñanji kufuma kudi muntu wabula kuloña. Chochimu, ambuña aNzambi makonu atela kukuhwelela nawu akatambula wuñanji kufuma kudi Yehova—hela chakwila wukushimbula kwesekeja nachiyakuhweleleluwu. Cheñi, amwekeshaña chikuhwelelu chawu muyikaninu yaNzambi kuhitila mukulomba chakadi kuleka—eña kuhitila ‘mukumudilila Yehova nimwana niwufuku.’ (Luka 18:7) Mwalala neyi chakwila mwiniKristu walekeli kulomba wuñanji, nateli kumwekesha nindi wajimbesheli chikuhwelelu chakwila nawu Yehova wakayizuñilaku ambuñindi.

17. Yumanyi yinateli kutwileñela kutwalekahu kulomba chakadi kuleka nikutwalekahu kukuhwelela netu ifuku daYehova dakusompesha dinakwinza?

¹⁷ Yuma yashiyashana yamumwekeneni nfwila yinakutwileja nawu tukweti yuma yikwawu yakeñekaña kulomba chakadi kuleka. Talenu chambu chidi hakachi kanyiloña yindi nayetwetu. Iwu nfwila watwalekeluhu kumusolomoka nsompeshi hela chakwila hikwadiña muntu wakumukolesha kukoña mwenimuku, ilaña Izu daNzambi datwikoleshaña chikupu ‘kukakela mukulomba chakadi kuzeya.’ (Aroma 12:12) Iwu nfwila hadiñi nachikuhwelelu nindi akumwakula kulomba kwinduku, ilaña Yehova natwikani nindi wakatwimwekeshela wuñanji. Kuhitila mudi kaprofwetu windi, Yehova nindi: “Hela chikulabajala, chichiñilili, muloña chakenza chalala, hichakalabaku.” (Habakuki 2:3; Masamu 97:10) Iwu nfwila hadiñi nankwashi wakumulembelelaku kulonda kumwitejelaku kulomba kwinduku. Hakwila etu tukweti nkwashi yetu wabadika ñovu, Yesu, “wekala kuchikasa chaNzambi chachidiilu, diyi watulembelelaña nawa.” (Aroma 8:34; Aheberu 7:25) Dichi, neyi chakwila nfwila wadiñi nakukala, nawa watwalekeluhu kumulembelela nsompeshi nakukuhwelela nindi akumuhoshelaku nyiloña, hakwila etu twatela kutwalekahu kukuhwelela chikupu ifuku daYehova dakusompesha dinakwinza.

18. Indi kulomba kunateli kukolesha ñahi chikuhwelelu chetu nikutwikwashaku kutambwila wuñanji?

¹⁸ Chakutalilahu chanfwila chinakutwidizisha nawu hadi kudifwanaku kweneni chikupu hakachi kakulomba nichikuhwelelu nawa nawu kulomba kwetu kwakadi kuleka kunateli kukañesha yuma yaluwañeshaña yinateli kuzeyesha chikuhwelelu chetu. Dichi chumichi hichinakulumbulula nawu kulomba kwakumwekesha hohu hanji kunateli kukolesha chikuhwelelu chinajimbaluku. (Matewu 6:7, 8) Neyi tunakukeña kulomba hamuloña wakwanukaña netu twashindamena chikupu hadi Nzambi, kulomba kukutwiswija kukamwihi naNzambi nikukolesha chikuhwelelu chetu. Nawa chineli chikuhwelelu chakeñekaña hakupuluka, diwu muloña wachimweneniyi Yesu kwikala chalema kukolesha atumbanji twindi ‘kulombaña mafuku ejima chakadi kuzeya.’ (Luka 18:1; 2 Atesalonika 3:13) Mwalala, kwinza ‘kwefuku daYehova deneni’ hikwashindamena hakulomba kwetuku—damba kenza hela chakwila tunakulomba hela nehi. Hela chakwila twakatambula wuñanji nikupuluka hanjita yaNzambi hela nehi, chashindamena chikupu hachikuhwelelu chitukweti ninjila yaloña yitwalondelaña hamu nikulomba kwetu.

19. Tunateli kumwekesha ñahi netu tunakuhweleli chikupu netu Nzambi ‘wakamwekesha wuñanji’?

¹⁹ Neyi chitunakwanuka, Yesu wehwili nindi: ‘Chakenzayi Mwana kamuntu, komana wakawana ichi chikuhwelelu hamaseki, tahindi?’ Indi ñakwilu yanilu lwihu lwindi lwaluwahi ñana yidi yakwila nawudi? Owu muzañalu wutukweti wakwila nawu yihita yawambuña aYehova ashinshika kunyeñumuka kaayi kejima makonu anakudilukisha kuhitila mukulomba kwawu, kudiwunjika nikumika nawu akweti chikuhwelelu chenichi! Dichi lwihu lwaYesu akalwakula nawu, eña. Dimu, hela chakwila ituña daSatana datuletelaña makabi, tunakuhweleli chikupu netu Nzambi ‘wakamwekesha wuñanji windi kudi antu jindi atondayi.’

[Tumazu twaheshina]

Munakwanuka?

• Chumanyi chinakojeji eniKristu amakwawu kujimbesha chikuhwelelu chawu?

• Muloñadi chitunateleli kwikala nachikuhwelelu chakola kutalisha kwifuku daYehova dakusompesha dinakwinza?

• Yumanyi yatwileñelaña kulomba chakadi kuleka?

• Kulomba chakadi kuleka kunateli kutukwasha ñahi kukiña kukubula kujimbesha chikuhwelelu chetu?

[Mwevulu wudi hefu 19]

Chikumanyi chinamwekeshi chakutalilahu chanfwila nansompeshi?

[Nyevulu yidi hefu 21]

Yihita yawantu makonu yakuhwelela chikupu nawu Nzambi ‘wakamwekesha wuñanji’