“Kusañuka Kwakusambila”—Kunakumwekana Makonu!
“Afu amudi Kristu diwu akasambila kusañuka.”—1 ATESALONIKA 4:16.
1, 2. (a) Kuchiñejanyi kudiku kutalisha hadi afu? (b) Indi kukuhwelela kwenu kwakusañuka kwashindamena hankahi? (Talenu tunsona twaheshina.)
“AMOMI eluka dehi nawu, Twakafwa.” Kufuma tuhu mpinji yakoñeliyi Adama nshindi, awa mazu ekala alala. Munsañu yanyaka yejima, muntu wejima wukusemuka weluka nindi wamba kafwa mukuhita kwampinji, nawa antu amavulu ehulaña nawu: ‘Chumanyi chalondelañahu? Indi afu ekala ñahi? Bayibolu yakulaña nawu: “hakwila afu hiyeluka chumaku.”—Mukwakutaŋisha 9:5.
2 Komana kudiku kuchiñeja kwawantu afwa dehi? Eñañi. Dichi kuchiñeja kwawafu kudikoku hakwila nawu nkeñelu yaNzambi yatachi yamuchidi wamuntu yikashikijewi. Yaaka nkulakaji yinahituhu, ambuña aNzambi ashinshika anamwekeshi chikuhwelelu chawu mukukana kwaYehova kutalisha kuLubutu olu lwakajilumuna Satana nikufumishahu kutama kwaletayi. (Kutachika 3:15) Antu amavulu anafwi. Hakwila nawu akamoni kushikijewa kwachikaninu chenichi nikukana kukwawu kwakanayi Yehova, atela kuyisañula kufuma mudi afu. (Aheberu 11:13) Komana chumichi chaswayi? Eña. Kapostolu Pawulu nindi: “Kwamba kekala kusañuka kwawaloña nikwawabula kuloña.” (Yililu 24:15) Hampinji yimu Pawulu wasañwili mukwenzi weyala wejina daYutikusa, owu waholokeli kufuma hanjanina yetala damuchisatu nawa “hiyakumunona nawu wafwa dehi.” Iku diku kwadiñi kusañuka kwamuchitanu nachiwana kuyasonekawu muBayibolu.—Yililu 20:7-12.a
3 Kukundejanyi kuwunawani mumazu aYesu asonekawu haYowanu 5:28, 29, nawa muloñadi?
3 Iku kusañuka kutanu nakuwana dihashindamena chikuhwelelu chawanewaña mumazu aPawulu. Kwakoleshaña chikuhwelelu chetu muchikaninu chaYesu: ‘Mpinji yinakwinza yakela antu ejima adi mumajamu achanukishu akatiya izu daYesu; nakwidikamu.’ (Yowanu 5:28, 29) Awa himazu akuzañalesha! Nawa awa mazu akukundeja kudi yihita yawantu akweti ayawu akeñawu adi mutulu twakufwa!
4, 5. Indi Bayibolu yashimuna hakusañuka kwamuchidinyi kwashiyashana, nawa kusañukanyi kukuhajekewahu muchinu chibaba?
4 Antu amavulu akasañulawu akafunta kwiseki diyakaloñeshawu mukuwunda kudi Wanta waNzambi. (Masamu 37:10, 11, 29; Isaya 11:6-9; 35:5, 6; 65:21-23) Hela chochu, kusañuka kukwawu kwamwekeni henohu iku kanda kumwekani. Chatachi, Yesu amusañwili kulonda kutwihaninaku kulema kwamulambu windi kudi Nzambi. Yesu wafwili nawa amusañwili mu 33 C.E.
5 Chamuchiyedi izanvu dawawayishewa ‘dawaIsarela ambala aNzambi’ akamuwana Mwanta Yesu Kristu muwanta wamwiwulu, muyakekalawu “naMwanta haya nyaka.” (Aŋalija 6:16; 1 Atesalonika 4:17) Iyi nsañu ayitenaña nawu “kusañuka kwakusambila”. (Chimwekeshu 20:6) Kusañuka kweniku chikwakakuma, mpinji yakusañula yihita yawantu hamaseki nachikuhwelelu chakwikala nawumi wahaya nyaka muParadisa yakashika. Dichi, hela chakwila chikuhwelelu chetu chakushakama mwiwulu hela hamaseki, wejima wetu tunakufwila kwiluka chikupu “kusañuka kwakusambila.” Komana hikusañuka kwamuchidinyi? Kwakekalaku mpinjinyi?
‘Akasañuka naMujimba Wamuchidinyi?’
6, 7. (a) Henohu eniKristu awahishewa kanda ayi mwiwulu, chumanyi chatela kumwekana? (b) Akayisañula namujimba wamuchidinyi?
6 Mumukanda windi watachi kudi aKorinda, Pawulu wehwili lwihu kutalisha hakusañuka kwakusambila nindi: “Afu akayisañula ñahi? Eñani, akenza namujimba wudi ñahi?” Dichi nakuli nindi: “Oyu yiwukutumba, chiña yisambila kufwa kulonda yihandi . . . Ilaña Nzambi hakuyimenesha mwakeñelayi yomweni, . . . Kudi kuwaha kwachuma chamwiwulu, kudi kuwaha kwacheñi kwachuma chahanu hamaseki.”—1 Akorinda 15:35-40.
7 Mazu aPawulu anakumwekesha nawu eniKristu awahishewa naspiritu yajila atela kufwa henohu kanda atambwili wuloku wawu wamwiwulu. Hakufwa kwawu, nyijimba yawu yahamaseki yafuntaña kulunkuñu. (Kutachika 3:19) Hampinji yashikila yaNzambi, ayisañulaña namuchidi wamujimba wawuwahi wesekana nawumi wamwiwulu. (1 Yowanu 3:2) Cheñi Nzambi wayinkaña wumi wabulaña kufwa. Hichuma chiyasemukaña nachuku, chidi neyi ayoneneni wumi wabulaña kufwa. Pawulu wahosheli nindi: ‘Ninowu wafwaña chiña akavwala kubula kufwa.’ Kubula kufwa hichawana chafumaña kudi Nzambi, ‘chekalaña’ nanowu akawanewa mukusañuka kwakusambila.—1 Akorinda 15:50, 53; Kutachika 2:7; 2 Akorinda 5:1, 2, 8.
8. Tweluka ñahi netu Nzambi hasakulaña a 144,000 kufuma kumazanvu ansakililu yamboka-mbokaku?
8 A 144,000 hohu diwu atambwilaña kusañuka kwakusambila. Yehova watachikili kuyitonda haPentakosta 33 C.E., hanyima yakwila namusañuli dehi Yesu. Ejima wawu akweti “ijina [daYesu] niijina daTata yindi akusoneka hamahamawu.” (Chimwekeshu 14:1, 3) Dichi, hiyayisakulaña kufuma mujinsakililu jamboka-mbokaku. Wejima wawu hiyatumbanji twaYesu, namuzañalu nikalemesha emenañaku ijina daTata—Yehova. Neyi anayisañuli dehi, atambwilaña mudimu mwiwulu. Iku kuchiñeja kwakumukalakela Nzambi munjila yoloka ñana kwayizañaleshaña chikupu.
Komana Kusañuka Kunakumwekana Makonu?
9. Indi Chimwekeshu 12:7 ni 17:14 yatwikwashaña ñahi kutena mpinji yidiku kukamwihi nampinji yatachikili kusañuka kwakusambila?
9 Mpinjinyi yamwekanaña kusañuka kwakusambila? Kudi wunsahu watiyakana chikupu wakwila nawu kunakumwekana makonu. Chakutalilahu, esekejenu tupetulu tuyedi twaChimwekeshu. Chatachi, talenu haChimwekeshu kapetulu 12. Aha twatañañahu nawu Yesu Kristu yanaswanishuwu katataka, hamu niañelu indi ajila, hiyakulwa njita naSatana niandemoni jindi. (Chimwekeshu 12:7-9) Neyi chinamwekeshi iyi magazini kakavulu, iyi njita yatachikili mu 1914.b Cheñi, Ilukenu nenu, kwosi atumbanji twaKristu awayishewa yanatenuwu nawu adiña hamu naYesu muniyi njitaku. Ichi talenu hakapetulu 17 kaChimwekeshu. Aha twatañañahu nawu hanyima yakujilumuna ‘Babiloni Muneni,’ Mwana kamukoku wakashinda nyunza. Cheñi, wunabombelihu nawu: “Ninawa adiyi nawu atambikewa, atondewa ashinshika [akela mwenimu].” (Chimwekeshu 17:5, 14) Owu “Atambikewa, atondewa anshinshika” atela ayisañula dehi neyi chakwila akekala naYesu mukushinda kwakukumishaku kwakanu kaayi kaSatana. Dichi dikwila nawu, awayishewa afwaña henohu Amagedoni kanda yishiki ayisañulaña kufuma tuhu mumpinji yahakachi ka 1914 naAmagedoni.
10, 11. (a) Komana akulumpi 24 hiyanyi, nawa mukulumpi wumu nalumbululi chumanyi kudi Yowanu? (b) Chumanyi chitunateli kukunkulula hanichi?
10 Komana tunateli kutena chikupu mpinji yatachikili kusañuka kwakusambila? Chuma chakwilukilaku chawanikaña haChimwekeshu 7:9-15, halumbululayi kapostolu Yowanu chimwenu chindi ‘chezaza deneni dakadi kutwesha kudichinda kudi muntu.’ Chuma chakwilukilaku idi izaza deneni anachimwekeshi kudi Yowanu kuhitala mudi mukulumpi wumu wahadi akulumpi 24, nawa awa akulumpi anakwimenaku a 144,000 answana naKristu muwanta wamwiwulu.c (Luka 22:28-30; Chimwekeshu 4:4) Yowanu wadiñi nachikuhwelelu chakuya mwiwulu; ilaña chineli wachidiñi muntu hanu hamaseki hampinji yahosheliyi namukulumpi, muchimwenu Yowanu watela nakwimenaku awayishewa adi hanu heseki achidi kanda atambuli wuloku wawu wamwiwulu.
11 Dichi tunateli kukunkulula netudi hawalala wakwila nawu mukulumpi wumu wahadi akulumpi 24 nakwimenaku izaza deneni kwesekeja naYowanu? Chinamwekani neyi amakwawu kufuma hanidi izanvu dawakulumpi 24 atela kudibomba mukutiyakesha walala waNzambi munanu mafuku. Muloñadi chumichi chichalemena? Muloña wunsahu watiyakana wakwilukilaku izaza deneni awilumbulwili kudi awayishewa aNzambi hanu heseki mu 1935. Neyi chakwila mukulumpi wumu wahadi akulumpi 24 amuzatishili hakushimuna iyi nsañu yalema, kachi amusañwili hohenohu nakuya mwiwulu kukamwihi na 1935. Chumichi chinakumwekesha nawu kusañuka kwakusambila kwatachikili dehi hakachi ka 1914 ni 1935. Komana chaswayi kutena ñakwilu yayeni chikupu?
12. Lumbululaku nooña yamu 1918 chiyayimwenañawu nawu yatela yadiña mpinji yatachikili kusañuka kwakusambila.
12 Hayinu mpinji chinateli kutukwashaku kutala hachuma chadifwanaku chiyamwekeshawu muBayibolu. Yesu Kristu amuwayishili hamu neyi Mwanta waWanta waNzambi kukumana kwa 29 C.E. Chimwahitili yaaka yisatu nachikuku, mu 33 C.E. mumpinji yanooña, amusañwili hamu neyi muntu wakuspiritu wabadika kulema. Komana tunateli kuchitoñojoka netu chineli Yesu amuswanikili hakumana kwa 1914, kusañuka kwawatumbanji twindi awayishewa nawa ashinshika kwatachikili chimwahitili yaaka yisatu nachikunku, mu 1918 mumpinji yanooña? Ichi hichuma chinateli kutwesheka. Hela chakwila hiyachilumbulula muBayibolu chikupuku, ilaña chetejewa nansona jikwawu jamuBayibolu jamwekeshaña nawu kusañuka kwakusambila kwatachikili hohenohu hanyima yakwinza kwaKristu.
13. Munjilanyi 1 Atesalonika 4:15-17 muyinamwekesheli nawu kusañuka kwakusambila kwatachikili kumatachikilu akwinza kwaYesu?
13 Chakutalilahu, Pawulu wasonekeli nindi: “Etu amomi, tuchidi hanu kushika hakenzayi Mwanta, [bayi kunsa yakwinza kwinduku] hiyetu twakasambilañahu dehi kuya, akwetu anakami tulu [twakufwa] atulondeli munyimaku. Muloña yomweni Mwanta wakasuluka kwiwulu nakabobobu, nezu damukulumpi wawañelu, nampuña yaNzambi; niafu amudi Kristu diwu akasambila kusañuka. Hohenohu ninetu amomi tuchidi hanu, akatuhukwila chimu nawu mumavu, kulonda twakahumañani naMwanta muluzwizu; dichi hitwakekala naMwanta haya nyaka.” (1 Atesalonika 4:15-17) Dichi eniKristu awayishewa afwili henohu kwinza kwaKristu kanda ayihidwishileñahu dehi nawumi wamwiwulu henohu owu achidiña amomi hampinji yakwinza kwaKristu kanda. Ichi chinakulumbulula nawu kusañuka kwakusambila kwatela kwatachikileñahu dehi kumatachikilu akwinza kwaKristu, nawa kwatwalekahu ‘nihakwinza kwindi.’ (1 Akorinda 15:23) Chatela kuyisañwila hamu ejima, kusañuka kwakusambila kwamwekanaña mukuhita kwampinji.
‘Hiyakuyinka Wejima Wawu haMuntu haMuntu, Nyinkukumba Yitooka’
14. (a) Yimwenu yasonekawu haChimwekeshu kapetulu 6 yikashikijewa mpinjinyi? (b) Chuma chidi haChimwekeshu 6:9 chinakwimenakodi?
14 Talenu cheñi wunsahu wawanewaña haChimwekeshu kapetulu 6. Aha Yesu namwekani cheñi nakwendesha wukwila neyi Mwanta wunakuya nakushinda. (Chimwekeshu 6:2) Nyunza yinadiñijimu muniyi njita yeneni chikupu. (Chimwekeshu 6:4) Kudi nzala yakapwelendendi. (Chimwekeshu 6:5, 6) Yipupu yafwana yinaholokeli muchidi wamuntu. (Chimwekeshu 6:8) Iyi yuma yejima yaprofweteluwu yinadifwaniku nayuma yinakuzatika mukaayi kufuma tuhu mu 1914. Ilaña kwamwekeni yuma yikwawu. Yitoñojoka yetu anayibalumwini kukameña kakulambwilahu. Mwishina dakameña mudi “antu ajahiluwu, akooleli mazu aNzambi nikushimuna kwashimwinuwu.” (Chimwekeshu 6:9) Chineli “wumi wamujimba wekala mumashi,” chuma chidi mwishina dakameña chinakwimenaku chikupu mashi awambuña aYesu ashinshika ajahiluwu hamuloña wakumika kwawu nikushimwina chikupu.—Alevi 17:11.
15, 16. Lumbululaku muloñadi mazu awanewaña haChimwekeshu 6:10, 11 chiyanakuhoshela hakusañuka kwakusambila.
15 Kufwana mashi Abeli washinshika, mashi anawa eniKristu ajahiluwu kufwila chikuhwelelu chawu anakukeña wuñanji. (Kutachika 4:10) “Hiyakubidika nezu datiyakana nawu, Eyi Mwanta wajila, walala, wamba kasompesha antu ashakama hamaseki mwakanyi, kulonda kututendela mashi etu?” Chumanyi chahiñiluhu? “Hiyakuyinka wejima wawu hamuntu hamuntu, [nyinkukumba] yitooka, hiyakuyileja nawu, Nookenuhu kapinji kakwawu kanti, kulonda akwenu anduñu nenu, niana kwenu akajahawu neyi chajahiluwu enu akawanini nawa.”—Chimwekeshu 6:10, 11.
16 Komana iyi nyinkukumba yitooka ayitumpinkili mumashi amavulu adiñi kwishina dakameña? Chinjila! Nyinkukumba yeniyi ayihanini kudi antu wenawa avwishililuwu mashi, wukwila neyi adi hakameña. Alambwili mawumi awu kuhitila mwijina daYesu nawa ayisañwili hamu neyi akuspiritu. Tweluka ñahi chumichi? Hakusambila hamukanda waChimwekeshu twatañahu nawu: “Yowu wukwimika mushindu, diyi akavwikawu mahina atooka; hinakajimañesha ijina dindi mumukanda wawumuku.” Cheñi anukenu nenu akulumpi 24 “anavwali mahina atooka; nikunyitu yawu [kwadiña] yibaba yawuru.” (Chimwekeshu 3:5; 4:4) Dichi hanyima yakwila njita, nzala, yipupu yinatachiki kukisañana iseki, amwizanvu da 144,000 afwili, emenañaku mashi adi mwishina dakameña, ayisañwili nawumi wamwiwulu nawa ayivwikili nyinkukumba yitooka yachifwikija.
17. Munjilanyi ‘muyakanookela’ owu akatambula nyinkukumba yitooka?
17 Awa antu anasañuki katataka atela ‘kunooka.’ Atela kuwunda hampinji yanakuhembelelawu ifuku daNzambi dakutenda. ‘Akwawu aduñu nawu,’ nawa eniKristu awayishewa achidi hanu heseki, keña amwekeshi kashinshi kawu kuhitila mukuyeseka. Neyi mpinji yakusompesha kwaNzambi yinashiki dehi, ‘kunooka’ kwakamana. (Chimwekeshu 7:3) Hampinji yeniyi, awantu akasañuka akadibomba hamu naMwanta Yesu Kristu kulonda kujilumuna antu atama, kubombelaku ninowu avwishili mashi aweniKristu akubula muloña.—2 Atesalonika 1:7-10.
Chichinakulumbulula Kudetu
18, 19. (a) Yumanyi yinateli kukuletesha kukunkulula neyi kusañuka kwakusambila kunakumwekana makonu? (b) Indi kutiyishisha kweyi hakusañuka kwakusambila kunakuleñeli kuditiya ñahi?
18 Izu daNzambi hidashimuna chikupu ifuku dakusañuka kwakusambilaku, ilaña damwekesha nawu kwamwekeni hampinji yimu yelili Kristu nenzi dehi. Antu adiñi atachi kusañula adiñi eniKristu awayishewa owu afwili henohu kwinza kwaYesu kanda. Kwinza kwaKristu chikukutwalekahu, eniKristu awayishewa amanishaña mudimu wawu wahamaseki nakashinshi ayibalumunaña muyileñaleña yañovu yakuspiritu kuhitila “mukulabula kwadisu.” (1 Akorinda 15:52) Komana awayishewa ejima akatambwila wuloku wawu wakwiwulu henohu njita yaAmagedoni kanda? Hitunelukuku. Hela chochu, chuma chitweluka chakwila nawu hampinji yaNzambi yashikila, a 144,000 ejima akayiwana anemani Hampidi yaZiyona yamwiwulu.
19 Cheñi nawa tweluka netu a 144,000 amavulu anuñañana dehi naKristu. Antesha hohu diwu anashali heseki. Ichi hichuma cheneni chinakumwekesha nawu mpinji yakushikija wunsompeshi waNzambi yinakuswina kukamwihi mukunyakashana. Kaayi kejima kaSatana keña akijilumuni. Satana akamumbila mwikela. Kuhiñahu, kusañula kwawantu ejima dihu hikwakatachika niantu ashinshika akasañuka kuhitila mumulambu wefutu danyiloña daYesu, akayinka wumi wawanina chikupu neyi wajimbesheliyi Adama. Wuprofwetu waYehova wasonekewa haKutachika 3:15 wunakushikijewa chiwahi. Okukoleka kweneni hakushakama muyinu mpinji!
[Tumazu twaheshina]
a Hakusañuka kukwawu kutanu nakusatu, talenu 1 Anyanta 17:21-23; 2 Anyanta 4:32-37; 13:21; Maku 5:35, 41-43; Luka 7:11-17; 24:34; Yowanu 11:43-45; Yililu 9:36-42.
b Nsona jakwilukilaku nawu Kristu watachikili kuyula mu 1914, talenu mukanda waChumanyi Chacheni Chatañishaña Bayibolu? ifu 215-18, wasonekewa nawaYinsahu jaYehova.
c Nsañu jikwawu hachitweluka nawu akulumpi 24 emenañaku eniKristu awayishewa adi nachifulu chawu chakwiwulu, talenu Revelation—Its Grand Climax At Hand! ifu 77 wasonekewa nawaYinsahu jaYehova.
Munateli Kulumbulula?
Indi iji nsona jatwikwashaña ñahi kwiluka mpinji ‘yakusañuka kwakusambila’?
• 1 Akorinda 15:23; 1 Atesalonika 4:15-17
[Mwevulu wudi hefu 31]
Kusañuka kwamuchidinyi kwamwekanaña henohu antu ejima kanda asañuki?