Komana Nzambi Wukweti Ijina?
Ñakwilu yaseka:
▪ “Diyi Nzambi.”
▪ “Hakweti ijinaku.”
Indi Yesu wahosheli nindidi?
▪ “Tiyenu chimukulombaña; lombenuña nenu, Tata yetu wekala mwiwulu, ijina deyi dijili.” (Matewu 6:9) Yesu welukili nindi Nzambi wukweti ijina.
▪ “Nayileji ijina deyi kulonda adiluki, namba kayilejadu nawa kulonda akadiluki; kulonda kukeña kuwankeñeli nachu kwakekali mudi wena ninami nakekali mudi wena.” (Yowanu 17:26) Yesu watiyakesheli ijina daNzambi.
▪ “Nukuyileja nami, kunmona cheñi chiña kwifuku dimwakela nenu, Kisu kisu iwu wukwinza mwijina daYehova.” (Luka 13:35; Masamu 118:26) Yesu wamuteneneña Nzambi hejina.
NZAMBI watuleja ijina dindi. Wahosha nindi: “Yami Yehova; didu ijina dami.”a (Isaya 42:8) Ijina dakwila nawu Yehova hiijina delukawu chikupu muLunda dafuma kwizu dachiHeberu daditumbayi Nzambi. Chinateli kuyihayamisha hakuwana neyi idi ijina dadimena dachiHeberu damwekanaña mapampa kakavulu muBayibolu. Kafwampi damwekana mapampa kakavulu kubadika majina amakwawu atenawu muBayibolu.
Amakwawu anateli kwakula ilu lwihu lwakwila nawu, “Indi Nzambi ijina dindi hinyi?” nawu “Nzambi.” Kwakula mwenimu chidi neyi kwakula lwihu lunakwila nawu, “Hinyi wahita hakuvota?” nenu, “Muntu wemeni.” Ñakwilu yeniyi hiyatiyakanaku, muloña “Nzambi” hela “muntu” himajina wanyi.
Muloñadi Nzambi chatulejayi ijina dindi? Watuleja kulonda tumwiluki chachiwahi. Chakutalilahu, muntu anateli kumutena nawu Mwanta, Mukulumpi, Tata, hela Nkaka Weyala, kwesekeja nachidi yuma. Nkumbu jeniji jinakumwekesha chekalayi muntu. Ilaña ijina damuntu datwanukishaña yuma yejima yitweluka hadi yena. Hohamu, nkumbu yakwila nawu Wañovu Yejima, Tata, nawa Nleñi yatuleñelaña kutoñojoka hayuma yashiyashana yakoñayi Nzambi. Hela chochu, ijina dindi daYehova didatwanukishaña hohu yuma yejima yitweluka hadi yena. Hakwila nawu mumwiluka Nzambi, mwatela kwiluka ijina dindi.
Chalema nankashi kwiluka idi ijina nikudizatisha. Muloñadi? Bayibolu yatuleja nawu: ‘Muntu wejima wukutambika ijina daYehova wakahanda.’—Aroma 10:13; Yoweli 2:32.
[Tumazu twaheshina]
a Munateli kutala mafu 195-197 mumukanda wunakwila nawu Chumanyi Chacheni Chatañishaña Bayibolu? wasonekawu kudi aYinsahu jaYehova kulonda mwiluki chalumbuluka ijina daNzambi, nimuloña wabulilawu kuzatisha idi ijina mumaBayibolu amakwawu.
[Mazu ekoku adi hefu 6]
Muntu anateli kumutena nawu Mwanta, Mukulumpi, Tata, hela Nkanka Weyala, kwesekeja nachidi yuma. Ilaña ijina dindi datwanukishaña yuma yejima yitweluka hadi yena