MUTU WUDI HEFU DATACHI | MUNATELI KWIKALA IBWAMBU DANZAMBI
Komana Mweluka Ijina daNzambi Nawa Mwadizatishaña?
Mukweti ibwambu imwadikunda nindi chikupu imwabula kwiluka ijina? Hadaha mukuhosha nenu inehi. Mumbanda wakuBulgaria wejina daIrina wahosheli nindi, “Kwila mwikala ibwambu daNzambi neyi himweluka ijina dinduku.” Neyi chashimunawu muchibaaba chinafumuhu, Nzambi nakukeña nindi mwikali ibwambu dindi. Dichi, nakuzatisha Bayibolu hakudilumbulula yomweni kudenu nindi: “Yami Yehova. Didu ijina dami.”—Isaya 42:8.
Hakwila antu ekali amabwambu asambilaña kudiluka majina. Komana mweluka ijina daNzambi?
Komana Yehova wamonaña nindi kwiluka ijina dindi nikudizatisha kwalema tahindi nehi? Toñojokenu hachumichi: Ijina daNzambi, dasonekawu munsona jiwana jamuchiHeberu jatenañawu nawu Tetragrammaton, adisoneka muNyikanda yatachi yamuchiHeberu kwakwihi na 7,000. Didi ijina datenawu kakavulu muBayibolu kubadika majina amakwawu. Chumichi chamwekeshaña nawu Yehova wakeñaña nindi twiluki ijina dindi nikudizatisha.a
Nzambi nakuzatisha Bayibolu hakudilumbulula yomweni kudenu nindi: “Yami Yehova. Didu ijina dami.”—Isaya 42:8
Hela chochu, antu amakwawu anateli kutoñojoka nawu chineli Nzambi wajila nawa hichinaweji, kuzatisha ijina dindi hikumusawula. Mwalala, chinateli kwikala chaluwa kuzatisha ijina daNzambi munjila yabula kutelela, neyi chimukubula kuzatisha ijina debwambu denu munjila yabula kutelela. Ilaña, Yehova wakeñaña nindi antu amukeña alemeshi ijina dindi nikuditiyakesha. (Masamu 69:30, 31; 96:2, 8) Anukenu nenu Yesu walejeli atumbanji twindi kulomba nawu: “Tata yetu wekala mwiwulu, ijina deyi dijili.” Tunateli kwilahu chuma chimu hakwila nawu ijina daNzambi dijili. Kwila mwenimu kwatukundamishaña kwakwihi naNzambi.—Matewu 6:9.
Bayibolu yahoshaña nawu Nzambi watiyililaña kudi antu ‘atoñojokaña hejina dindi.’ (Malaki 3:16) Yehova wayikana awa antu nindi: ‘Nakamukiña nanochu chanelukiyi ijina dami. Wakantambika, Naketiya, nakekala nindi hamu hakamonayi ihuñu.’ (Masamu 91:14, 15) Neyi tunakukeña kudiluñisha wubwambu wakola naNzambi twatela kwiluka ijina daYehova nikudizatisha.
a Chawushona, mumaBayibolu amavulu mwekala mwosi ijina daNzambi, hela chakwila damwekanaña nankashi muNyikanda yachiHeberu yatenañawu nawu Chitiyañenu Chachikulu. Ilaña, hadiña ijina daNzambi asonekahu nkumbu yidi neyi “Mwanta” hela “Nzambi.” Neyi munakukeña nsañu yikwawu, talenu mafu 195-197 mumukanda waChumanyi Chacheni Chatañishaña Bayibolu? wasonekawu kudi aYinsahu jaYehova.