3 Dizenu Walala Hadi Yesu

‘Chaswejeliyi Nzambi kukeña mpata yamunu mwishina, waheni Mwanindi wasemuka kankawindi, kulonda muntu wukumukuhwelela aheti wumi wahaya nyaka, akabuli kunoña.’—Yowanu 3:16.

KUKALANYI KUNATELI KUYIKAÑESHA KWIKALA NACHIKUHWELELU? Amakwawu anateli kuyileñela mukuhweleli nenu Yesu hadiña muntu yomwenuku. Antu amakwawu eluka nawu wadiña kwoku ilaña ahoshaña nawu wadiña muntu hohu wafwili dehi.

MUNATELI KUMANISHA ÑAHI KUKALA KWENIKU? Imbujolenu kambanji Nataneli.a Ibwambu dindi Fwilipu wamulejili nindi watoñojokeli nindi namuwani Mesiya—“Yesu wakuNazareta, mwana kaYosefu.” Hela chochu, Nataneli hashikeneni dakukuhwelela mazu ahosheliyi Fwilipuku. Kafwampi, wamwihwili nindi: “Chuma chachiwahi chitweshi kufuma muNazareta?” Hela chakwila wajinokeli, wetejeli mutambi waFwilipu ‘wakwinza nakudimwena.’ (Yowanu 1:43-51) Anenu nawa munateli kuhetelamu neyi muditañila wunsahu wahosha hadi Yesu. Chumanyi chimwatela kwila?

Keñakeñenu nsañu yanyaka yamwekeshaña nawu Yesu wadiñi muntu yomweni. Josephus niTacitus hiyantu alemesheluwu elukili nsañu yanyaka amuyaaka nkulakaji yakusambila nawa hiyadiña akwaKristuku. Ahosheli hadi Yesu Kristu nawu himuntu yomweni nawa wadiña kwoku. Hakulumbulula Mwanta wakuRoma Nero chafwishiliyi akwaKristu namuloña nawu diwu akojejeli kesi kahitili muRoma mu 64 C.E., Tacitus wasonekeli nindi: “Nero wahishili izaza dawantu daheleluwu kudi Aroma dateneneñawu nawu akwaKristu, hamuloña wakwikala nayililu yawakwaKristu, nikuyimwesha kalula. Christus, kwafuma ijina dakwila nawu [Kristu], amukabishili chikupu kudi nguvulu yetu Pontusi Pilatu muchiyuulu chaTiberusi.”

Kwesekeja nawunsahu washimwinuwu kudi antu eluka nsañu yanyaka amuyaaka nkulakaji yakusambila niyamuchiyedi kutalisha hadi Yesu niakwaKristu akusambila, mukanda wamu wahosha nawu: “Iyi nsañu yadimena yamwekeshaña nawu mumpinji yakushankulu niayilumbu jawakwaKristu etejeli walala wakwila nawu Yesu wadiñi kwoku, nsañu yeniyi ayitadikili katachi nawa chakadi wunsahu walala, kukumana kwayaaka nkulakaji yamu 18 ni 19, nikukutachika kwayaaka nkulakaji yamu 20.” (2002 Encyclopædia Britannica) Mu 2002, chibaba chadiña muchipapilu chansañu chahosheli nawu: “Atudizi amavulu kufumishaku antu abula kukuhwelela mudi Nzambi, eteja nawu Yesu wakuNazareta wadiña kwoku.”—The Wall Street Journal.

Shinshikenu wunsahu wamwekeshaña nawu Yesu amusañwili. Hampinji yamukwatiluwu Yesu kudi ayilumbu jindi, alundanindi chikupu niatumbanji twindi amushili nawa apalañeni, niibwambu dindi Petulu wamukaanini nindi hamwilukaku hamuloña wawoma. (Matewu 26:31, 55, 56, 69-75) Chakubula nikwiluka, atumbanji twindi atachikili kudikita chikupu. Petulu niYowanu ashimwinini antu akojejeli kufwa kwaYesu chakadi woma. Atumbanji adiña neyena chikupu chakwila atandishili ntañishilu yaYesu muWanta waRoma wejima, afuukwiluhu kufwa kubadika kuleka yuma yakuhweleleluwu.

Muloñanyi waletesheli ahimpi yililu yawu chikupu? Kapostolu Pawulu washimuna nindi Yesu amusañwili mudi afu, ‘wamwekeni kudi Kefwasi [Petulu], kulondelahu nikudi ikumi nayedi.’ Pawulu wabombeleluhu nindi: ‘Kulondelahu wamwekeni kudi ana kwetu apompeli hamu, kuyichinda abadikili nkulakaji jitanu.’ Hampinji yasonekeliyi Pawulu awa mazu, ayinsahu amweni namesu kapu achidiñi kwoku. (1 Akorinda 15:3-7) Wunsahu wamuntu wumu hela ayedi amweni namesu kapu wadiña waswayi kuwujimañesha kudi akwakujinoka. (Luka 24:1-11) Ilaña wunsahu wawantu akubadika nkulakaji jitanu amweni namesu kapu wamwekesheli nawu Yesu amusañwili mudi afu.

NKISWINYI YEKALA MUKUKUHWELELA BAYIBOLU? Antu amukuhwelela Yesu nikumwovwahila, anateli kuyanakena nshidi jawu nawa anateli kwikala nachinleji chitooka. (Maku 2:5-12; 1 Timotewu 1:19; 1 Petulu 3:16-22) Neyi afwa, Yesu wakana kuyisañula “hefuku dakukuminina.”—Yowanu 6:40.

Neyi munakukeña kwilukilahu nsañu yikwawu, talenu kapetulu 4, “Yesu Kristu Hinyi?,” nikapetulu 5, “Ifutu daNyiloña—Chamukunkulu ChaNzambi Chabadika Kulema,” mumukanda waChumanyi Chacheni Chatañishaña Bayibolu?b

[Tumazu twaheshina]

[Mwevulu wudi hefu 7]

Kufwana Nataneli, keñakeñenu wunsahu wahosha hadi Yesu