Nsakililu Yayiwahi Yatañishaña Nshimbi Jaloña Hayuma Yayiwahi Niyatama
NSAKILILU yayiwahi yatutañishaña chakutoñojoka hayuma yayiwahi. Yatukwashaña kwila yuma yaloña nikwikala antu amawahi. Tuneluki ñahi netu nsakililu yalala yelaña mwenimu?
Shinshikenu kapostolu Pawulu chasonekeleliyi akwaKristu amuyaaka nkulakaji yakusambila adiña muKorinda, muGreece. Antu adiñi muniwu musumba wakushankulu ayilukili munjila yatama hamuloña wayililu yawu yawuzondu. Pawulu wayibabesheli nindi: “Hela ayivumbi, hela akwakupesha, hela akwawusenji, hela amayala adilisha neyi ambanda, hela aditamishaña nawakwawu amayala, hela amakombi, hela akwalwisu, hela akwakusheta walwa, hela akwakutukana, hela akwanyilami, hiyamba kaswana wanta waNzambuku.” Pawulu wabombeleluhu nindi: ‘Ninenu amakwawu dichi chimwadiñi. Ilana ayiwelesheli, ayijilikili, ayiyiñishili nakuyitena aloña mwijina daMwanta Yesu Kristu, nimudi Spiritu yaNzambi yetu.’ (1 Akorinda 6:9-11) Toñojokenu—nsakililu yayiwahi yakwashili antu amakwawu abulileña kulondela nshimbi jidi jejima kutalisha kuyuma yayiwahi niyatama nakwikala atooka nawa ambuña aNzambi aloña.
Kwambuka Bayibolu yasoñamisha nawu: ‘Muloña mpinji yakenza hakalekawu kutiyilila kutañisha kwalala, akaheta matu owana, akadivulishila antañishi aya mwaya kufwila kwawu kwatama.’—2 Timotewu 4:3.
Indi nsakililu yimweluka yelaña ñahi muniyi nsañu? Komana alemesha nshimbi jamuBayibolu jajiwahi? Tahindi adiwulaña kufumba kwaMwizu daNzambi kwatiyakana nakuleja hohu antu ‘yuma yakuyuwa kumatu’?
Hakwila mwiluki nenu nsakililu yeniyi yasoñaña mukabu wawuwahi, komana kwila mwikala nampinji yakwakula awa malwihu analondeluhu nehi?
MUTU WANSAÑU: Wulu.
CHATAÑISHAÑA BAYIBOLU: ‘Wulu wikali walema kudi antu ejima, nikadidi kekali kajila; muloña Nzambi wakasompesha akwawujila niayivumbi.’—Aheberu 13:4.
LWIHU: Komana iyi nsakililu yakeñaña nawu antu amuchipompelu chawu, eyala namumbanda adisumbuli kwesekeja nanshimbi?
MUTU WANSAÑU: Kudiseña.
CHATAÑISHAÑA BAYIBOLU: Chamwihwiluwu Yesu neyi chakwila kwekala chuma chatelela kudiseñelawu antu, wahosheli nindi: “Muntu wukuseña iñodindi, chiña namuloña wawuvumbi hohu; neyi wukumuseña chakadi muloña wawuvumbi hakusumbula wacheñi, neli wuvumbi.”—Matewu 19:9.
LWIHU: Komana iyi nsakililu yovwahilaña lushimbi lwaYesu nakwiteja antu kudiseña nikusumbula cheñi, chiña hohu hamuloña wawuvumbi?
MUTU WANSAÑU: Wuvumbi.
CHATAÑISHAÑA BAYIBOLU: “Temukenu wuvumbi. Chavulumunaña antu nyiloña yikwawu chakuminaña kunyijimba yawu; hakwila muntu welaña wuvumbi waditamishaña mujimba windi yomweni.”—1 Akorinda 6:18.
“Muloña ambandawu aweni hiyakushiya mwayileñeleluwu nakwila yuma yabulili kuyileñelawu. Amayala nawa hiyakushiya mwamuleñeleluwu mumbanda, hiyakusweja lwisu lwakuditamisha nawakwawu amayala, hiyakutambwilamu wufwetu watelela kuluwa kwawu.”—Aroma 1:26, 27.
LWIHU: Komana iyi nsakililu yatañishaña nawu kwila wuvumbi chili hakachi keyala namumbanda chili hakachi keyala neyala hela mumbanda namumbanda hinshidi?
MUTU WANSAÑU: Nsakililu yayiwahi yatañishaña antu amuchipompelu chawu kulemesha nshimbi jamuBayibolu.
CHATAÑISHAÑA BAYIBOLU: “Neyi muntu anatenuwu nawu himana kwenu wukwikala chivumbi, hela mukwalwisu, hela mukwakupesha, hela mukwakutukana, hela mukwakusheta walwa, hela mukwanyilami, nami muntu wudi ochu, bayi kudibomba ninduku, hela kudya nindi chinjila.” (1 Akorinda 5:11) Chumanyi chatela kuyilawu antu aditenaña nawu hiyakwaKristu ilaña hiyakwanshidi abulaña kubalumuka mumuchima? Izu daNzambi dahosha nawu, “Fumishenu owu muntu watama mukachi kenu.”—1 Akorinda 5:13.
LWIHU: Komana iyi nsakililu yafumishaña antu abulaña kubalumuka mumuchima nawa adiwulaña nshimbi jamuBayibolu muchipompelu chawu?
[Mazu ekoku adi hefu 6]
Nsakililwinyi yelukawu nawu yalemesha chikupu nshimbi jamuBayibolu jaloña?