Nsakililu Yayiwahi Yatañishaña Antu Kukeñañana Mukachi Kawu niKukeña Amakwawu
BAYIBOLU yahosha nawu, “Muntu wabula kukeña hanamwiluki Nzambuku, muloña Nzambi diyi kukeña.” (1 Yowanu 4:8) Dichi nsakililu yayiwahi yatela kutañisha antu kukeñañana mukachi kawu nikukeña amakwawu.
Nsakililu yayivulu yazataña mudimu wawuwahi wakwakamena antu akata, atujinakaji niatuzweñi. Akoleshaña antu mukachi kawu kuzatisha kufumba kwakapostolu Yowanu wasonekeli nindi: “Muntu wukweti yuma yampata yamunu mwishina, wukumona mana kwindi nayibuli, hakumuumina muchima windi mwivumu, kukeña kwaNzambi kukutwesha kushakama mudi yena ñahi? Enu anyanami anyanya, bayi tukeña akwetu chamukanwa, hela chamukuhosha hohuku; chiña tuyikeñi chalala nakwila mutwahoshaña.”—1 Yowanu 3:17, 18.
Hanu dinu, chumanyi chamwekanaña neyi nyunza hiyikulwa njita? Komana nshimbi yaNzambi yakwila nawu “keñaku mukwenu neyi chiwadikeña eyi aweni” atela kuyizatisha neyi kudi kuwunda ilaña atela kuyidiwula neyi mukwapolitiki hela mwanta yahosha nindi alwi namunza wadikumashana nawu?—Matewu 22:39.
Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:35) Chimukwakulaña awa malwihu analondeluhu, dihulenu nenu, ‘Komana antu amuniyi nsakililu akeña antu ejima mpinji yejima bayi mukuhosha hohuku ilaña nimuyuma yazatañawu?’
MUTU WANSAÑU: Njita.
CHATAÑISHAÑA BAYIBOLU: Yesu walejeli atumbanji twindi nindi: “Nukuyileja nami keñenu ayilumbu jenu, ninawa ayikabishaña, yilombelenu.”—Matewu 5:44.
Hampinji yenjiluwu amashidika nakumukwata Yesu, kapostolu Petulu wanoneli chitwa kulonda yamukiñi. Ilaña, Yesu wahosheli nindi: “Somekaku cheñi mpoku yeyi yakabali muchindalu chayu; muloña antu ejima akukwata kumpoku yakabali akafwa kumpoku yakabali.”—Matewu 26:52.
Kapostolu Yowanu wasonekeli nindi: “Kweniku diku kwamwekenaña anyana kaNzambi nianyana kadiyabolu; muntu wabulaña kwila yaloña, hela wabulaña kukeña mana kwindi, hiwakudi Nzambuku. Diyi nsañu yimwatiyili kufumisha kutachi, nawu tukeñañani. Tubuli kwikala neyi Kena wadiñi wanowu watama, wajahili mana kwindi.”—1 Yowanu 3:10-12.
LWIHU: Komana iyi nsakililu yakoleshaña antu mukachi kawu kulwa njita?
MUTU WANSAÑU: Politiki.
CHATAÑISHAÑA BAYIBOLU: Chelili antu amakwawu amumoni Yesu nakoñi yihayamisha, akeñeli nawa yeñili mujipolitiki. Chumanyi cheliliyi? “Yesu chanamoniyi antu hiyakukeña kwinza nakumukwata nañovu amudiishi wanta, hakuwombolokela kumpidi kwakanka windi.”—Yowanu 6:15.
Chamukwatiluwu Yesu nakumutwambila nawu nakuleja antu kudikaña nanfulumendi, wayakwili nindi: “Wanta wami hiwampata yamunu mwishinaku; neyi wanta wami wadiñi wampata yamunu mwishina, ambuñami adi kulwa, kulonda abuli kunhana kudi aYudeya; wanta wami hiwamunuku.”—Yowanu 18:36.
Chalombeleñayi kudi Nzambi kutalisha hadi atumbanji twindi, Yesu wahosheli nindi: ‘Ami nayinki izu deyi, akwampata yamunu mwishina anayiheli nanichi chanabuluwu kwikala ampata yamunu mwishina, neyi chineli ami nawa hinidi wampata yamunu mwishinaku.’—Yowanu 17:14.
LWIHU: Komana iyi nsakililu yalondelaña chakutalilahu chaYesu chakubula kudiñija mujipolitiki, hela chakwila antu amukachi kawu akuyihela kudi akajipolitiki?
MUTU WANSAÑU: Chaambu.
CHATAÑISHAÑA BAYIBOLU: Chelili ayidima abulili kwikala aYudeya akusambila ekali akwaKristu, kapostolu Petulu wahosheli nindi: ‘Nzambi haakamaña antu kumesuku; hakwila munyunza yejima, muntu wamwakamaña yena, welaña mwaloña, amutiyaña kudi Nzambi kuwaha.’—Yililu 10:34, 35.
Yakoba wasonekeleli akwaKristu amuyaaka nkulakaji yakusambila nindi: “Enu ana kwami, bayi mwikala nakwitiya Mwanta wetu Yesu Kristu walema, nakwakama antu kumesuku. Muloña neyi muchipompelu chenu mukwiñila muntu wavwala kazeya kawuru nimahina amawahi, mwiñila nawa nikazweñi wavwala mahina atama, enu himukulemesha owu wavwala mahina amawahi, himukwila nenu, Shakamaku hanu hahawahi; himukumwila kazweñi nenu, Imanaku oku; indi kwiji, Shakamaku hamaseki kunyendu yami. Chimwelaña mwenomu, mwaambulaña mukachi kenu munekali akwakusompesha nayitoñojoka yatama.”—Yakoba 2:1-4.
LWIHU: Komana iyi nsakililu yatañishaña nawu Nzambi wamonaña antu ejima nindi esekana nawa nawu antu amuchipompelu hiyatela kwaambula muntu wudi wejima hamuloña wamali akwetiyi hela ikowaku?
[Mazu ekoku adi hefu 7]
Nsakililwinyi yatañishaña antu jawu kushinda nyikoleku yaambulaña antu chidi neyi jipolitiki, chaambu chekowa nimali akwetiyi muntu?