MALWIHU AMUBAYIBOLU ANAYAKULI

Komana tunateli kutiyishisha Bayibolu?

Bayibolu Hiizu daNzambi. Yidi neyi mukanda wunafumi kudi tata yawantu wukweti kukeña. (2 Timotewu 3:16) Nzambi walumbulula muBayibolu chitwatela kumuzañalesha, chetejelayi kutama niyuma yakakoñelayi antu kumbidi. Ilaña antañishi amuyipompelu ahimpa ntañishilu yamuBayibolu, chumichi chaletesha antu amavulu kutoñojoka nawu hiyamba katiyishisha Bayiboluku.—Yililu 20:29, 30.

Yehova Nzambi wakeñaña nindi twiluki nsañu yalala yahosha hadi yena. Dimuloña watwinkelayi mukanda wutwatela kutiyishisha.—Tañenu 1 Timotewu 2:3, 4.

Munateli kutiyishisha ñahi Bayibolu?

Bayi neyi Yehova watwinka Bayibolu hohuku, ilaña watukwashaña cheñi kulonda tuyitiyishishi. Watemesheli Yesu kulonda yatudizishi. (Luka 4:16-21) Yesu wakwashili antiyilili jindi kutiyishisha Nyikanda yajila, hakutena vasi nivasi.—Tañenu Luka 24:27, 32, 45.

Yesu watuñili chipompelu chawakwaKristu kulonda mudimu watachikiliyi wutwalekuhu. (Matewu 28:19, 20) Makonu, atumbanji twaYesu alala akwashaña antu kutiyishisha yuma yatañishaña Bayibolu hadi Nzambi. Neyi munakukeña kutiyishisha Bayibolu, aYinsahu jaYehova akutiya kuwaha kuyikwasha.—Tañenu Yililu 8:30, 31.

Neyi munakukeña nsañu yikwawu, talenu kapetulu 2 kaniwu mukanda, Chumanyi Chacheni Chatañishaña Bayibolu?, wasonekawu kudi aYisanhu jaYehova