Ilenuña Mwaya Kulomba Kwakuwahi Kwalombeliyi Yesu
“Tata, . . . Lemesha Mwaneyi, kulonda Mwana akulemesheyi.”—YOW. 17:1.
MUNATOÑOJOKUHU NENUDI?
Yumanyi yabombelamu ‘mukwiluka’ chikupu Nzambi?
Indi kulomba kwaYesu kwasonekawu mumukanda waYowanu kapetulu 17 akwakwili ñahi muyaaka nkulakaji yakusambila?
Tunateli kwila ñahi mwaya kulomba kwaYesu makonu?
1, 2. Shimunenu chuma chakoñeleliyi Yesu apostolu indi ashinshika hanyima yakwanakana chawija chaPaseka mu 33 C.E.
YADIÑA mpinji yamelela haNisani 14, muchaaka cha 33 C.E. Yesu nialunda nindi anakumishi tuhu kwanakana chawija chaPaseka, chayanukishileña Nzambi chapulwishiliyi ankakulula jawu kufuma muwuduñu muEjipitu. Ilaña atumbanji twindi ashinshika adi kukamwihi nakuyipulwisha munjila yabadika chikupu. Ifuku dahiñiluhu, Nlomboli yawu waloña amujahili kudi ayilumbu jindi. Mulambu wawumi windi wawanina wukaleñela antu ejima akasubuki kunshidi nikukufwa.—Heb. 9:12-14.
2 Hakwila twanukeña ichi chawana chachiwahi chakufuma kudi Nzambi, Yesu watachikili chanukishu chachiha chahiñili haPaseka yahachaaka. Wanoneli dinkendi dakadi iluñi, hakudihumuna, nakwinka apostolu indi ashinshika ikumi nawumu, wahosheli nindi: “Weniwu diwu mujimba wami wanahanuwu hanyijimba yenwenu; ilenuña mwenimu muñanakanaña nachu.” Welili chochimu chanoneliyi lupasa lwavinyu yichinana, nakuyileja nindi: “Lupasilu dichi chitiyañenu chachiha chamumashi ami, awa akuyipwekela.”—Luka 22:19, 20.
3. (a) Kuhimpikanyi kweneni kwamwekeni hanyima yakufwa kwaYesu? (b) Malwihwinyi itwatela kutoñojokahu kutalisha hakulomba kwaYesu kwasonekawu mumukanda waYowanu kapetulu 17?
3 Nshimbi yachitiyañenu hakachi kaNzambi nimunza wawaIsarela yadiña kwakwihi nakumana. Hasinsili chitiyañenu chachiha hakachi kaYehova niatumbanji twaYesu awayishewa. Yesu washili maana chikupu hachihandilu chaniwu munza wawuha wakuspiritu. AIsarela akumujimba hiyadinuñili mukudifukula kwawu kudi Nzambuku, nawa chumichi chaleteli kasawuntu hejina daNzambi dajila. (Yow. 7:45-49; Yil. 23:6-9) Kwambukaku, Yesu wakeñeleña nindi atumbanji twindi atwalekuhu kwikala anuñañana kulonda atweshi kuzatila hamu nakuleta kalemesha hejina daNzambi. Dichi, chumanyi cheliliyi Yesu? Walombeli kulomba kwakuwahi nankashi kwatela kutaña muntu wudi wejima. (Yow. 17:1-26; talenu mwevulu wakutachikilahu.) Chitukushinshikaña haniku kulomba, tutoñojokeña hanawa malwihu, “Komana Nzambi waakula kulomba kwaYesu?” Twatela cheñi kudishinshika nikudihula netu, “Komana inakwila mwaya iku kulomba?”
YUMA YATWAMIJILEÑAKU YESU
4, 5. (a) Chumanyi chitwadizilañaku kuchibalu chatachi chakulomba kwaYesu? (b) Indi Yehova waakwili ñahi kulomba kwaYesu kwalombeliyi yuma yakeñeleñayi?
4 Yesu wadizishili atumbanji twindi yuma yayivulu yayiwahi kushika nimpinji yawufuku. Kuhiñahu wafumbwili mesu indi kwiwulu nakulomba nindi: “Tata, mpinji yinashiki dehi. Lemesha Mwaneyi, kulonda Mwana akulemesheyi. Chiwunamwinki wanta hadi antu ejima, kulonda ejima wunamwinki ayinki wumi wahaya nyaka. . . . Ami nakulemeshi hamaseki, namanishi dehi mudimu wanyinkeli kwila. Ichi dinu, eyi Tata, anlemesheli kumu naneyi aweni nakulema kunadiñi naku hadiñi mpata yamunu mwishina yichidi kanda.”—Yow. 17:1-5.
5 Yesu watachikili kulomba kwindi kuhitila mukutena yuma yalemesheliyi chikupu. Chuma chaswejeliyi kulemesha chadiña chakulemesha ijina daTata yindi wamwiwulu, nawa chumichi chesekana nachuma chatachi chalombeliyi mukulomba kwindi kwachitalilu nindi: ‘Tata ijina deyi dijili.’ (Luka 11:2) Kuhiñahu, Yesu walombeleli hayuma yakankililuwu atumbanji twindi nindi ‘yayinki wumi wahaya nyaka.’ Nkumininaku, Yesu walombeli yuma yakeñeleñayi, nindi: “Tata, anlemesheli kumu naneyi aweni nakulema kunadiñi naku hadiñi mpata yamunu mwishina yichidi kanda.” Yehova wamulambwili Mwanindi washinshika nayuma yabadika nayalombeliyi kuhitila mukumwinka Yesu ‘ijina dabadika kuwaha’ dawañelu ejima.—Heb. 1:4.
‘KWILUKA NZAMBI WALALA WUMU HOHU’
6. Hakwila apostolu aheti wumi wahaya nyaka, yumanyi yateleleluwu kwila, nawa tweluka ñahi netu atwesheli kwila mwenimu?
6 Yesu walombeli cheñi hayuma yitwatela kwila etu akwanshidi hakwila tukashikuhu hakutambwila chawana chabadika chawumi wahaya nyaka. (Tañenu Yowanu 17:3.) Wahosheli nindi twatela ‘kwiluka’ Nzambi niKristu. Njila yimu mutwatela kwilila mwenimu yidi yakuzatisha mesu etu nimatu hakudiza yuma yayivulu hadi Yehova niMwanindi. Njila yikwawu yalema yakumwilukilamu Nzambi yidi yakuzatisha yuma yitwadizaña hadi yena. Apostolu alondeleli iyi njila yakupulwisha, neyi chalombeliyi Yesu nindi: “Mazu wanyinkeli ami nayinki wena; niwena anayitambuli.” (Yow. 17:8) Ilaña hakwila aheti wumi wahaya nyaka, ateleleli kutwalekahu kutoñojoka chikupu hamazu aNzambi nikuyizatisha muchihandilu chawu. Komana apostolu ashinshika atwesheli kwila mwenimu kushika nikukumisha kwachihandilu chawu chahamaseki? Eñañi atwesheli kwila mwenimu. Tweluka netu atwesheli muloña majinawu ayisoneka hamalola ayikuku ikumi nayiyedi amuYerusalema yayiha yamwiwulu.—Chim. 21:14.
7. Indi kutwalekahu ‘kwiluka’ Nzambi kwatalisha mudihi, nawa muloñadi kwila mwenimu chikwalemena chikupu?
7 Hakwila tukashakami haya nyaka, twatela kutwalekahu ‘kwiluka’ Nzambi. Indi chumichi chinatalishi mudihi? Chinatalishi mukwila nawu twatela kutwalekahu kudiza chikupu hadi yena. Ilaña chumichi chabadika hakwiluka hohu yililu yindi ninkeñelu. Twatela kumukeña chikupu nikwikala nawubwambu wakola nayena. Nawa twatela kumwekesha kukeña kudi amana kwetu niahela. Bayibolu yalumbulula nawu: “Muntu wabula kukeña hanamwiluki Nzambuku.” (1 Yow. 4:8) Dichi, kumwiluka Nzambi kwabombelamu kumwovwahila. (Tañenu 1 Yowanu 2:3-5.) Dichi tukweti kukooleka kweneni nankashi kwakwikala hakachi kwawantu anakumwiluka Nzambi. Ilaña twatela kubabala chikupu kulonda tubuli kujimbesha wubwambu wetu walema nayena neyi cheliliyi Yudasi Isakaroti. Dichi tuzatenu nañovu kulonda tukoleshi wubwambu wetu naYehova. Neyi twila mwenimu twakatambwila chawana chawumi wahaya nyaka.—Mat. 24:13.
‘HAMULOÑA WEJINA DEYI’
8, 9. Chumanyi chalemesheliyi Yesu chikupu hampinji yazatileñayi mudimu windi hamaseki, nawa tushidikilwinyi twamunsakililu twakaaniniyi?
8 Neyi tutaña kulomba kwaYesu kwasonekawu mumukanda waYowanu kapetulu 17, tunateli kumona netu Yesu wakeñeli chikupu apostolu indi kushilahu ninetu. (Yow. 17:20) Hampinji yoyimu, twatela kwiluka netu kupuluka kwetu hikwadiña kwalema nankashi kudi Yesuku. Chuma chalemesheliyi chikupu kufumisha kukutachika kwamudimu windi wakushimwina hanu hamaseki nakushika hampinji yamanishiliyi mudimu windi chadiña hikujilika nikulemesha ijina daTata yindi. Chakutalilahu, hampinji yatachi yalumbulwiliyi mudimu wenjililiyi hanu hamaseki, watañili mumuvuñilu waIsaya nindi: ‘Spiritu yaYehova yidi hadami, muloña wanwayisha dehi manji nishimwini atuzweñi nsañu yayiwahi.’ Tunakuhweleli netu hampinji yatañileñayi Yesu, ijina daNzambi waditeneni chachiwahi.—Luka 4:16-21.
9 Kwesekeja natushidikilu twawaYudeya, kunyaka henohu Yesu kanda yenzi hamaseki, akulumpi jansakililu akaanishileña antu kuzatisha ijina daNzambi. Tuneluki netu Yesu wakaanini chikupu tushidikilu twamuchidiwu twabula kwikala twamunsona. Walejeli antu adiña nakumudimbulula nindi: “Ami nenzi mwijina daTata yami, himunantambuluku; neyi wacheñi wukwinza mwijina dindi yomweni, mukumutambula.” (Yow. 5:43) Kuhiñahu, chikwashalili mafuku antesha nakufwa, Yesu washimwini chuma chalemesheliyi chikupu muchihandilu chindi kuhitila mukulomba nindi: ‘Tata, lemeshaku ijina deyi.’ (Yow. 12:28) Dichi mukulomba kutunakuhanjekahu, chinamwekani hatooka chikupu nawu chuma chalemesheliyi Yesu chikupu muchihandilu chindi chadiña chakulemesha ijina daTata yindi.
10, 11. (a) Indi mudimu waYesu wakutiyakesha ijina daTata yindi wabombelelumu yumanyi? (b) Muloñadi atumbanji twaYesu chiyatiyakeshilaña ijina daYehova?
10 Yesu walombeli nindi: “Namwekeshi ijina deyi kudi antu wanyinkeli mukachi kawakwampata yamunu mwishina; adiñi eyeyi, yeyi wanyinkeluwu, niwena anahembi mazu eyi. Hinukwikala nawa cheñi mumpata yamunu mwishinaku, ilaña awa adi mumpata yamunu mwishina; ami hinukwinza kudeyi. Eyi Tata Wajila, yihembi mwijina deyi awa wunanyinki, kulonda ekali wumu neyi chitwekaletu.”—Yow. 17:6, 11.
11 Kutiyakesha ijina daTata yindi kudi atumbanji twindi kwabombelelumu yuma yayivulu yabadikili hakutena idi ijina. Yesu wayikwashili cheñi eluki mwatalishili ijina daNzambi, dikwila nawu, yililu yayiwahi yaNzambi ninjila yayiwahi yatukwashilañamu. (Kwid. 34:5-7) Kubombelahu, hela chakwila Yesu himwanta mwiwulu, nakutwalekahu kukwasha atumbanji atiyakesheña ijina daYehova mwahita kaayi kejima. Muloñadi chanakuzatilawu iwu mudimu? Anakuwuzata kulonda apompeshi atumbanji amavulu henohu kukuma kanda kushiki. Nawa iyi mpinji chiyikashika, wukapulwisha ayinsahu jindi ashinshika, niantu ejima akeluka ijina daYehova.—Ezek. 36:23.
‘KULONDA AKWAMPATA YAMUNU MWISHINA ETIYI’
12. Yumanyi yisatu yalema yatela kutukwasha hakwila tutweshi kuzata mudimu wetu wakupulwisha mawumi awantu?
12 Hampinji yadiñayi hamaseki, Yesu wazatili nañovu kulonda yakwashi atumbanji twindi ashindi kuzeyazeya kwawu. Chadiña chalema hakwila atweshi kuzata mudimu watachikiliyi Yesu. Yesu walombeli nindi: “Chiwantemeshelami mumpata yamunu mwishina, dichi chinayitemeshi niwena mumpata yamunu mwishina.” Hakwila atweshi kuzata iwu mudimu wakupulwisha mawumi awantu, Yesu wakonkomweneni hayuma yisatu yalema. Chatachi, walombeli nindi atumbanji twindi abuli kwikala ampata yamukaayi kaSatana katamaku. Chamuchiyedi, walombeli nindi atela kuyijilika, hela kwikala anjila, kuhitila mukuzatisha nsañu yalala yekala Mwizu daNzambi. Chamuchisatu, Yesu walembeleli kapampa kakavulu nindi atumbanji twindi adinuñi mumpanda yimu yakukeña yekala hakachi kayena niTata yindi. Hakwila mwenimu chakeñekaña kudishinshika chikupu. Wejima wetu twatela kudihula netu, ‘Komana inakwila mwaya yuma yisatu yalombeliyi Yesu? Yesu wakuhweleli nindi neyi atumbanji ela yumiyi, antu amavulu akatambwila chalala.—Tañenu Yowanu 17:15-21.
13. Indi kulomba kwaYesu akwakwili ñahi muyaaka nkulakaji yakusambila C.E.?
13 Hakwila twiluki netu kulomba kwaYesu akwakwili twatela kudiza mumukanda wamuBayibolu walondela hanyikanda yiwana yaNsañu Yayiwahi, mukanda waYililu yawaPostolu. Toñojokenu hayuma yateleleli kuleta chaambu hakachi kawakwaKristu akusambila, amakwawu adiña aYudeya niaJentili, asamaheta niatuzweñi, anduñu niankaka jawu. Ilaña, wejima wawu adinuñili chikupu hamu chakwila tunateli kuyifwanisha nayidi yashiyashana yamujimba wamuntu naYesu neyi mutu wawu. (Efwes. 4:15, 16) Mukaayi kaSatana mwabula kunuñañana, kunuñañana kwamuchidi kwamwekeni hamuloña waspiritu yajila yaYehova yikweti ñovu.—1 Kor. 3:5-7.
14. Indi kulomba kwaYesu akwakula ñahi makonu?
14 Chawushona, iku kunuñañana kwamuchihayamisha hikwatwalekeluhu hanyima yakufwa kwawapostoluku. Ilaña, kwesekeja nachiyashimwineñahu dehi, kwenjili akwakusekesha amavulu, chaleñeleli muKristendomu mwikali chaambu. (Yil. 20:29, 30) Ilaña muchaaka cha 1919, Yesu wafumishili atumbanji twindi awayishewa muwunkoli wansakililu yakutwamba nawa wayipompesheli hamu ‘mumpanda yasweja kunuña antu hamu.’ (Kol. 3:14) Indi mudimu wawu wakushimwina wunakwashi ñahi antu mukaayi? “Anyikoku acheñi” akubadika ha 7 miliyoni nialunda nawu “akunyuza yejima, akunyichidi yejima, akumatuña ejima, akumadimi ejima” anakudifukula kudi Yehova hamu nawantu jindi awayishewa. (Yow. 10:16; Chim. 7:9) Iyi hiñakwilu yakuhayamisha yakulomba kwaYesu nindi, “kulonda akwampata yamunu mwishina akeluki nawu yeyi [Yehova] wantemesheli; akeluki nawu wayikeñeli neyi chiwankeñelami.”—Yow. 17:23.
KUKUNKULULA KWAKUWAHI
15. Chumanyi Yesu chalombeleluku atumbanji twindi awayishewa?
15 Hefuku daNisani 14 nampinji yamelela, Yesu walemesheli apostolu indi kuhitila mukutuña chitiyañenu nawu chakuyuula hamu nindi muWanta windi. (Luka 22:28-30; Yow. 17:22) Dichi, kutalisha kudi antu ejima akekala atumbanji twindi awayishewa Yesu walombeli nindi: “Tata, nakeñi nami antu wunanyinki akekali chimu nanami kunakekalami, kulonda akabanjileña lubanji lwakulema kwami kuwunanyinki, nanochu chiwankeñeli helili chikuku champata yamunu mwishina chichidi kanda.” (Yow. 17:24) Anyikoku acheñi atiyaña kuwaha hawuloku wakatambwila awayishewa, hiyayitiyilaña ichimaku. Chumichi hichinjikijilu chikwawu chamwekeshaña nawu akwaKristu alala makonu adinuña chikupu.
16, 17. (a) Hakukumisha kulomba kwindi, Yesu wahosheli nindi wukatwalekahu kwila chumanyi? (b) Yumanyi yitwatela kufwila kwila?
16 Hamuloña wakuyiluwañesa kudi anlomboli jawu jansakililu, antu amavulu mukaayi atondañahu kudiwula wunsahu walala wakwila nawu Yehova wukweti antu anuñañana amwiluka chikupu. Ichi chamwekeni nimumpinji yaYesu. Dichi wakunkulwili nanawa mazu amawahi nindi: “Eyi Tata waloña, antu ampata yamunu mwishina hiyakwilukiluku, ilaña ami nakwilukili; ninawa aneluki nawu yeyi wantemesheli. Nayileji ijina deyi kulonda adiluki, namba kayilejadu nawa kulonda akadiluki; kulonda kukeña kuwankeñeli nachu kwakekali mudi wena ninami nakekali mudi wena.”—Yow. 17:25, 26.
17 Hinyi wunateli kujinoka nindi Yesu helili mwaya kulomba kwinduku? Hakwikala Mutu wachipompelu, nakutwalekahu kutukwasha kulonda tutiyakesheña ijina daTata yindi ninkeñelu yindi. Tutwalekenuhu kwovwahila wunlomboli windi kuhitila mukwovwahila chikupu lushimbi lwindi lwakushimwina nikwilisha atumbanji. (Mat. 28:19, 20; Yil. 10:42) Twatela kuzata cheñi nañovu kulonda tukiñi kunuñañana kwetu kwalema. Neyi twila mwenimu, tukwilaña mwaya kulomba kwaYesu nikuleta kalemesha hejina daYehova nikwikala namuzañalu wahaya nyaka.
[Mwevulu wudi hefu 28]
AkwaKristu amuyaaka nkulakaji yakusambila alondeleleña wunlomboli waspiritu yajila hakwila atwalekuhu kwikala anuñañana (Talenu parakalafu 13)
[Mwevulu wudi hefu 30]
Antu jaYehova kunyeñumuka kaayi kejima ekala anuñañana (Talenu parakalafu 14)