Watchtower LAYIBULALI YAHAINTANETI
Watchtower
LAYIBULALI YAHAINTANETI
Lunda
  • BAYIBOLU
  • NYIKANDA
  • KUPOMPA
  • w25 May mafu 20-25
  • Ijina daYehova, Dalema Ñahi Kudi Yesu?

Vidiyo yimwatonda hosi.

Atwanakeniku mwani, vidiyo yakañanya kwenzunuka.

  • Ijina daYehova, Dalema Ñahi Kudi Yesu?
  • Kaposhi Kakutalila Kanakubidika Wanta WaNzambi (Kakudiza)—2025
  • Tunyitu Twanyanya
  • Nsañu Yinadifwani
  • “AMI NAKOJEJI IJINA DEYI ADILUKI”
  • “[IJINA] DEYI DIWANYINKA”
  • “TATA, LEMESHAKU IJINA DEYI”
  • “NUKUHANA WUMI WAMI”
  • “NAMANISHI MUDIMU WUWANYINKELI”
  • Ijina daYehova, Dalema Ñahi Kudi Etu?
    Kaposhi Kakutalila Kanakubidika Wanta WaNzambi (Kakudiza)—2025
  • “Shimekenu Ijina daYehova”
    Kaposhi Kakutalila Kanakubidika Wanta WaNzambi (Kakudiza)—2024
  • Ifutu Danyiloña Datudizishaña Yumanyi?
    Kaposhi Kakutalila Kanakubidika Wanta WaNzambi (Kakudiza)—2025
  • “Ditondelenu . . . Imwatela Kukalakela”
    Kaposhi Kakutalila Kanakubidika Wanta WaNzambi (Kakudiza)—2025
Talenu nsañu yikwawu
Kaposhi Kakutalila Kanakubidika Wanta WaNzambi (Kakudiza)—2025
w25 May mafu 20-25

CHIBAABA CHAKUDIZA 22

KAMINA 15 Hamekenu Wedi waYehova!

Ijina daYehova, Dalema Ñahi Kudi Yesu?

“Ami nakojeji ijina deyi adiluki nawa nakadikojeja akadiluki cheñi.”—YOW. 17:26.

TUKUDIZA

Yesu chakojejeliyi ijina daYehova adiluki nawa chadijilikiliyi idi ijina nikudihakwilaku.

1-2. (a) Chumanyi cheliliyi hawufuku wakukumishaku henohu kanda amujahi? (b) Malwihwinyi itukuhanjekahu muchinu chibaaba?

HADIÑA hachiwana namelela, haNisani 14, 33 C.E., nawa Yesu adiña kwakwihi nakumufukejela, kumusompesha, kumufwisha namuloña, kumukabisha nikumujaha. Dihamanishiliyi hohu kuda kuda kwadimena mukapeka kahewulu hamu nawapostolu indi ashinshika. Hanyima yakuda, Yesu wayilejeli apostolu indi mazu akukolesha akuyishalisha nachu. Nawa chikwashalili hohu kapinji kantesha henohu wejima wawu kanda afumi mukapeka kahewulu, Yesu wahudikilili nawa walombeli kulomba kwalema nankashi. Kapostolu Yowanu wasonekeli iku kulomba; kwekala muYowanu kapetulu 17.

2 Kulomba kwaYesu kwatukwashaña kwiluka yumanyi yakameneniyi hayina mpinji? Akuna kulomba kwamwekeshaña ñahi chuma chalemesheliyi nankashi mumudimu windi wejima hampinji yadiñayi hanu hamaseki? Tuhanjekenu hañakwilu janawa malwihu.

“AMI NAKOJEJI IJINA DEYI ADILUKI”

3. Yesu wahosheli nindidi hejina daYehova, nawa watalishili mudihi? (Yow. 17:​6, 26)

3 Mukulomba kwindi, Yesu wahosheli nindi: “Ami nakojeji ijina deyi adiluki.” Kafwampi, wahosheli kapampa kayedi nindi wakojejeli ijina daYehova adiluki kudi atumbanji twindi. (Tañenu Yowanu 17:​6, 26.) Watalishili mudihi? Komana wayilejeleña ijina dabula kwilukawu? Atumbanji twaYesu adiña aYudeya, dichi adiña eluka dehi ijina daNzambi, Yehova. Idi ijina dawanikaña muNsona jachiHeberu kwakwihi mapampa 7,000. Dichi Yesu watalishileña wanyi kwijina dadeni daNzambi; ilaña, watalishileña kuyuma yemeneneñaku idi ijina. Yesu wakojejeli ijina daYehova adiluki chachiwahi, mwabombela nkeñelu yindi, nyidimu yindi niyilwilu yindi, munjila yakwila kwosi mukwawu wunateli kwila mwenimuku.

4-5. (a) Chakutalilahwinyi chitunateli kuzatisha chikutukwasha kwiluka mwatalisha kwiluka ijina damuntu? (b) Atumbanji twaYesu elukili ñahi ijina daYehova?

4 Chakutalilahu, fwikijenu muchipompelu chenu mudi mukulumpi wumu wejina David nawa hindotolu waladikaña. Munamwiluki iwu manakwetu hadi yaaka yayivulu. Ilaña ifuku dimu mukata nankashi. Ayitemwishila kuchipateli kwazatilañayi iwu manakwetu, nawa yazatishi yuma yadizayi hamu neyi ndotolu kulonda apulwishi wumi wenu. Komana ichi mukumwiluka hohu nenu himanakwetu tahindi mukutoñojokaña nihachuma chinayililiyi? Chakadi nikujina, mukutoñojokaña nihanochu chuma! Ichi David himunakumini hohu hakumwiluka nenu himukulumpi muchipompeluku; ilaña munamwiluki cheñi nenu hindotolu waladikaña wapulwisha wumi wenu.

5 Munjila yoyimu, atumbanji twaYesu adiña eluka dehi ijina daYehova. Ilaña adilukili chiwahi nankashi idi ijina chidayikundamini kuhitila mumudimu waYesu. Muloñadi chitukuhoshela muniyi njila? Muloña Yesu wamwekesheli yilwilu yaTata yindi muyuma yejima yahosheleñayi niyelileñayi. Dichi apostolu indi ‘amwilukili’ Yehova chiwahi kuhitila mukutiyilila kuchatañishileñayi Yesu nikushinshika chelileñayi nawantu.—Yow. 14:9; 17:3.

“[IJINA] DEYI DIWANYINKA”

6. Yehova wamwinkeli Yesu ijina dindi munjilanyi? (Yowanu 17:​11, 12)

6 Mukulomba kwindi, Yesu wayilombeleliku atumbanji twindi, nindi: “Yihembi muloña wejina deyi diwanyinka.” (Tañenu Yowanu 17:​11, 12.) Komana chumichi chatalishili mukwila nawu Yesu adi kutachika kumutena nawu Yehova? Inehi. Yesu chahosheliyi hejina daYehova, wahosheli nindi ‘ijina deyi.’ Dichi ijina daYehova hidekalili ijina daYesuku. Hanu dinu, Yesu watalishili mudihi chahosheliyi nindi amwinkeli ijina daNzambi? Chatachi, Yesu wamwimeneneñaku Yehova nikumuhoshelaku. Wenjilili mwijina daTata yindi nawa wakoñeli nyidimu yañovu munidi ijina. (Yow. 5:43; 10:25) Kubombelahu, ijina dakwila nawu Yesu datalisha mukwila nawu “Yehova Diyi Chamwinu.” Dichi ijina daYesu mudatalisha mwabombela niijina daYehova.

7. Shimunenu chakutalilahu chikuletesha tuhoshi netu Yesu wahosheleleña mwijina daYehova.

7 Chakutalilahu, chineli ñimeni wemenañaku nyuuli, nateli kuhoshela mwijina danyuuli. Dichi mazu akuhoshayi iwu ñimeni, akwikala nañovu yoyimu namazu anateli kufuma mukanwa kanyuuli yomweni. Munjila yoyimu, Yesu wamwimeneneñaku Yehova nawa wamuhosheleleñaku kudi antu mwijina Dindi.—Mat. 21:9; Luka 13:35.

8. Ijina daYehova dadiña ñahi “mudi” Yesu henohu kanda enzi hamaseki? (Kwidika 23:​20, 21)

8 Chineli hiIzu, Yesu wazataña hamu neyi Mukakumuhoshelaku Yehova kuhitila mukushimuna nsañu ninshimbi kudi anyana kaNzambi amakwawu akuspiritu kushilahu nikudi antu. (Yow. 1:​1-3) Yesu hadaha dikañelu atemesheliwu kudi Yehova kwakamena aIsarela hampinji yaKwidika. Hampinji yayilejeleñawu aIsarela kwovwahila iwu kañelu, Yehova wahosheli nindi: “Muloña ijina dami didi mudi yena.”a (Tañenu Kwidika 23:​20, 21.) Ijina daYehova dadiña “mudi” Yesu muloña wamwimenañaku Yehova nawa diyi wabadika mukuhakwilaku nikujilika ijina daTata yindi.

“TATA, LEMESHAKU IJINA DEYI”

9. Yesu wamweneña ñahi ijina daYehova? Lumbululenu.

9 Neyi chitunahanjekihu dehi, nihampinji yelili Yesu kanda enzi hamaseki, ijina daYehova dadiña dalema chikupu kudi yena. Dimuloña waweni hadiñayi hanu hamaseki, yuma yejima yelileñayi Yesu yamwekesheli nawu walemesheli nankashi ijina daYehova! Kwakwihi nakumanisha mudimu windi, Yesu wabidikili nindi: “Tata, lemeshaku ijina deyi.” Hohenohu, Tata yindi wamwakwili nezu datiyakana nankashi kufuma mwiwulu nindi: “Nadilemesha dehi, inakudilemesha nawa cheñi.”—Yow. 12:28.

10-11. (a) Yesu walemesheli ñahi ijina daYehova? (Talenu cheñi mwevulu.) (b) Muloñadi ijina daYehova chidakeñekelaña kudijilika nikudihakwilaku?

10 Yesu niyena walemesheli ijina daTata yindi. Munjilanyi? Njila yimu mwelililiyi mwenimu hikuleja antu hayilwilu yaTata yindi yayiwahi niyuma yelañayi. Hela chochu, mukulemesha idi ijina mwadibombeleli yuma yayivulu. Ijina daYehova dakeñekeleña kudijilika nikudihakwilaku.b Yesu wamwekesheli kulema kwakwila mwenimu chayidizishiliyi akakumulondela kulomba kwachitalilu. Wahosheli nindi: “Tata yetu wekala mumawulu, ijina deyi diikali dajila.”—Mat. 6:9.

11 Muloñadi ijina daYehova chidakeñekelaña kudijilika nikudihakwilaku? Muloña mwitempa daEdeni, Satana Diyabolu wamusawili nikumutwambila Yehova Nzambi. Satana wahosheli nindi Yehova wadiña sakutwamba nawa nindi kudi yuma yayiwahi yajindiliyi yabulili kuyinkayi aAdama naEva. (Kutach. 3:​1-5) Satana watalishileña cheñi mukwila nindi njila yelilileñamu Yehova yuma yadiña yaloña wanyi. Awa makudi aSatana atamishili nankashi ijina daYehova. Mukuhita kwampinji, mumafuku aYoba, Satana wahosheli nindi antu amukalakelaña Yehova elaña mwenimu muloña hohu wayuma yayinkañayi. Iwu sakutwamba watwambili cheñi nindi kwosi muntu wunateli kumukeña Yehova chikupu nakutwalekahu kumukalakela hampinji yinakumonayi kukala. (Yoba 1:​9-11; 2:4) Hakeñekeleña kuhita mpinji hakwila sakutwamba elukewi, hakachi kaYehova naSatana.

Yesu nakuhana Mpanji yaHampidi kwizaza deneni dawantu.

Yesu wayidizishili akakumulondela kwiluka chichalemena kujilika ijina daNzambi (Talenu paragilafu 10)


“NUKUHANA WUMI WAMI”

12. Yesu wadihanini kwiladi muloña wakukeña ijina daYehova?

12 Muloña wakumukeña Yehova, Yesu wakeñeleña kuzata hakumina ñovu jindi kulonda ajiliki nikuhakwilaku ijina daYehova. Yesu wahosheli nindi: “Nukuhana wumi wami.” (Yow. 10:​17, 18) Mwamweni, wadihanini nikufwa kukoola ijina daYehova.c Antu ayedi akusambila awanina, aAdama naEva, amufutaleleli Yehova nakufuukulahu kwikala kukabadi kaSatana. Kwambukaku, Yesu wadihanini kwinza hamaseki kulonda amwekeshi kukeña kwamukeñayi Yehova. Yesu welili mwenimu kuhitila mukwikala washinshika chikupu muchihandilu chindi chejima. (Heb. 4:15; 5:​7-10) Watwalekelihu kuhemba kashinshi kindi kushika muchihandilu chindi chejima nichafwiliyi hamutondu wakuyandishila. (Heb. 12:2) Muloña wakwila mwenimu, wamwekesheli nindi wamukeñeli Yehova niijina Dindi.

13. Muloñadi Yesu chekalililiyi wabadika chikupu mukumwekesha hatooka nawu Satana hisakutwamba? (Talenu cheñi mwevulu.)

13 Kwesekeja nayuma yelileñayi muchihandilu chindi, Yesu wamwekesheli hatooka to-o nawu Satana diyi sakutwamba, bayi Yehovaku! (Yow. 8:44) Yesu wamwilukili Yehova chiwahi chikupu kubadika wudi wejima. Neyi hadiñahu nsañu yalala yidi yejima hanyiloña Satana yamutwikiliyi Yehova, Yesu wadi kuyiluka. Ilaña Yesu watwalekelihu kuhakwilaku ijina daYehova. Nihampinji yamwekeni neyi Yehova namushiyi nkawindi, Yesu wadihanini kufwa chatela amufutaleli Tata yindi wukweti kukeña.—Mat. 27:46.d

Yesu wakukudika hamutondu wakuyandishila.

Yuma yejima yeliliyi Yesu muchihandilu chindi yamwekesheli hatooka to-o nawu Satana diyi sakutwamba, bayi Yehovaku! (Talenu paragilafu 13)


“NAMANISHI MUDIMU WUWANYINKELI”

14. Yehova wamufweteli ñahi Yesu muloña wakashinshi kindi?

14 Mukulomba kwalombeliyi hawufuku wakukumishaku henohu kanda afwi, Yesu wahosheli nindi: “Namanishi mudimu wuwanyinkeli kuzata.” Wakuhweleleli nindi Yehova wakamufweta muloña wakwikala washinshika. (Yow. 17:​4, 5) Kukuhwelela kwamukuhweleleliyi Yesu Tata yindi hikwayili hohu mumenjiku. Yehova wamulekeli wanyi kutwalekahu mwijamu. (Yilw. 2:​23, 24) Wamusañwili Yesu nawa wamwinkeli chifulu chahewulu mwiwulu. (Fwili. 2:​8, 9) Nkumininaku, Yesu watachikili kuyuula hamu neyi Mwanta waWanta waNzambi. Yumanyi yakela iwu Wanta? Chibalu chamuchiyedi chakulomba kwachitalilu chahosha nawu: “Wanta weyi winzi. Nkeñelu yeyi [yaYehova] ayili hamaseki neyi chayilañawu mwiwulu.”—Mat. 6:10.

15. Yumanyi yikwawu yakelayi Yesu?

15 Katataka Yesu azuñi njita nawayilumbu jaNzambi nikujilumuna antu atama haAmagedoni. (Chim. 16:​14, 16; 19:​11-16) Hanyima yachumichi, wakamuumbila Satana “mwikela,” mwakekalayi hohu neyi muntu wunafwi. (Chim. 20:​1-3) Yesu wakafuntisha kuwunda nikwilisha antu kwikala awanina mumpinji yaChiyuulu Chindi chaYaaka Ikombakaji. Wakasañula afu, nawa wakelisha iseki dejima kwikala paradisa. Nkeñelu yaYehova yakashikijewa!—Chim. 21:​1-4.

16. Yumanyi yakamwekana hakukuma kwaChiyuulu chaYaaka Ikombakaji?

16 Yumanyi yitunateli kukuhwelela kumwekana hakukuma kwaChiyuulu chaYaaka Ikombakaji? Nshidi jawantu nikubula kuwanina jakekalaku cheñi wanyi. Antu hiyakakeñekaña cheñi kulomba nawu ayanakeni nshidi jawu kushindamena hefutu danyiloñaku; hiyakakeñekaña cheñi kwikala nehaku hela atupristuku. Nawa “chilumbu wakukumishaku [akela anamujiyishi dehi], yowu kufwa [kwaleteliyi Adama].” Kwosi muntu wakekala mwijamuku. Afu akela anayisañuli dehi. Antu ejima hamaseki akekala awanina.—1 Kor. 15:​25, 26.

17-18. (a) Chumanyi chakamwekana hakukuma kwaChiyuulu chaYaaka Ikombakaji? (b) Yesu wakela ñahi neyi mpinji yindi yakumanisha kuyuula yinashiki dehi? (1 AKorinda 15:​24, 28) (Talenu cheñi mwevulu.)

17 Yumanyi yikwawu yakamwekana hakukuma kwaChiyuulu chaYaaka Ikombakaji? Hayina mpinji, chuma chachiwahi nankashi chakamwekana. Kwosi hela wumu wakajinokahu cheñi neyi chakwila Yehova wajila nawa hiNzambi wawuñanji. Muloñadi? Mwitempa daEdeni, Satana wahosheli nindi Yehova hisakutwamba nawa hayuulaña antu munjila yakukeñaku. Kufuma tuhu hayina mpinji, ijina dindi anatwalekihu kudijilika kudi antu amulemeshaña. Dichi hakumana kwaChiyuulu chaYaaka Ikombakaji, ijina daYehova akadihakwilaku chikupu. Wakamwekesha hatooka to-o nindi hiTata yetu wamwiwulu wukweti kukeña.

18 Nkumininaku, yuma yejima yahosheliyi Satana hadi Yehova yakamwekana hatooka nawu yakutwamba. Yesu wakela ñahi neyi mpinji yindi yakumanisha kuyuula yinashiki dehi? Komana wakela chuma cheliliyi Satana nakudikaña naYehova? Inehi! (Tañenu 1 AKorinda 15:​24, 28.) Yesu wakafuntisha Wanta kudi Tata yindi. Wakwovwahila chiyuulu chaYehova. Eña, kwambukaku naSatana, Yesu nakufwila kuhana yuma yejima muloña wakumwovwahila Yehova.

Yesu wudi mwiwulu, nakuhana chibañula chindi kudi Yehova.

Yesu nakufuntisha chakufuma hamuchima Wanta kudi Yehova hakukuma kwaChiyuulu Chindi chaYaaka Ikombakaji (Talenu paragilafu 18)


19. Ijina daYehova dalema ñahi kudi Yesu?

19 Tunamoni komana chaletesheli Yehova amwinki Yesu ijina Dindi! Yesu namwekeshi hatooka nindi hiñimeni wamuwahi waTata yindi. Dichi, ijina daYehova dalema ñahi kudi Yesu? Wadilemesha kubadika chuma chidi chejima. Wadihanini kufwa kukoola idi ijina, nawa wakafwilaña kufuntisha yuma yejima kudi Yehova hakukuma kwaChiyuulu chaYaaka Ikombakaji. Tunateli kumwimbujola ñahi Yesu? Twakahanjeka hañakwilu yanilu lwihu muchibaaba chinalondelihu.

MUKWAKULA NENUDI?

  • Yesu wayikwashili ñahi atumbanji twindi kwiluka ijina daYehova?

  • Yesu amwinkeli ijina daYehova munjilanyi?

  • Yesu wadihanini kwila chumanyi kukoola ijina daYehova, nawa muloñadi?

KAMINA 16 Mushimekenu Ya Hakutwinka Mwanindi niAwayishewa

a Mpinji jikwawu, añelu niwena amwimeneneñaku Yehova neyi nayitemeshi kuya nakushimuna nsañu mwijina dindi. Dimuloña waweni mumavasi amakwawu, Bayibolu yahoshaña nawu Yehova diyi wunakuhosha hela chakwila kañelu diyi wunakumuhoshelaku. (Kutach. 18:​1-33) Hela chakwila Bayibolu yahosha nawu Mosi watambwilili Nshimbi kufuma kudi Yehova, mavasi amakwawu amwekeshaña nawu Yehova wazatishili añelu hakuhana iji Nshimbi mwijina Dindi.—Lev. 27:34; Yilw. 7:​38, 53; Ñal. 3:19; Heb. 2:​2-4.

b KULUMBULULA MAZU: “Kujilika” kwatalisha mukulemesha chuma, kuchimona kwikala chajila, hela kuchitiya woma chikupu. “Kuhakwilaku” kwatalisha mukumuhoshelaku muntu nawu wudana nyiloña neyi kudi antu anakumutwambila hela anakuhosha yuma yatama hadi yena.

c Kufwa kwaYesu cheñi kwayibuzila antu njila yakwikalilamu nawumi wahaya nyaaka.

d Talenu “Malwihu Kufuma Kudi Antañi” muKaposhi Kakutalila kaApril 2021, mafu 30-31.

    Lunda Publications (2006-2025)
    Fumenumu
    Iñulenu
    • Lunda
    • Inkenuhu akwenu
    • Hakusetiñila
    • Copyright © 2025 Watch Tower Bible and Tract Society of Pennsylvania
    • Nshimbi Jakulondela
    • Nshimbi Jakujinda
    • Privacy Settings
    • JW.ORG
    • Iñulenu
    Inkenuhu akwenu