CHIBAABA CHAKUDIZA 23
KAMINA 2 Iyeyi Yehova
Ijina daYehova, Dalema Ñahi Kudi Etu?
“Yehova nahoshi nindi, ‘Enu yenu ayinsahu jami.’”—ISA. 43:10.
TUKUDIZA
Yuma yitwatela kwila hakwila tujiliki nikuhakwilaku ijina daYehova.
1-2. Tweluka ñahi netu Yesu walemesha nankashi ijina daYehova?
YESU walemesha chikupu ijina daYehova. Diyi wabadika mukuhakwilaku ijina daTata yindi. Neyi chamwekesheliwu muchibaaba chinafumihu, Yesu wadihanini kufwa kukoola ijina daYehova niyuma yejima yidemenañaku. (Maku 14:36; Heb. 10:7-9) Nawa hanyima yaChiyuulu Chindi chaYaaka Ikombakaji, Yesu wakafuntisha wuswa wejima wukwetiyi kudi Tata yindi kulonda yakajiliki ijina daYehova. (1 Kor. 15:26-28) Kukeña kwakeñayi Yesu ijina daNzambi, kwatukwashaña cheñi kwiluka chadikundayi naTata yindi. Chumichi chamwekeshaña hatooka nawu Yesu wamukeña chikupu Mwini idi ijina.
2 Yesu wenjili heseki nakumuhoshelaku Tata yindi. (Yow. 5:43; 12:13) Wayikwashili akakumulondela kwiluka ijina daTata yindi. (Yow. 17:6, 26) Wadizishileña antu mwijina daYehova nikukoña yihayamisha munidi ijina. (Yow. 10:25) Kafwampi, Yesu wamulombeli Yehova nindi ayihembeña apostolu indi “muloña wejina [Dindi].” (Yow. 17:11) Dichi, neyi chakwila Yesu wakeñeli nankashi ijina daYehova muniyi njila, muntu nateli kuditena ñahi nindi himukakumulondela Kristu walala ilaña heluka ijina daTata yindi hela kudizatishaku?
3. Yumanyi yitukudiza muchinu chibaaba?
3 Chineli tudi akaKristu, twafwilaña kulondela mumahaji aYesu, dichi twalemesha chikupu ijina daTata yindi. (1 Pet. 2:21) Muchinu chibaaba, tukumona muloña waweni Yehova chenkelayi ijina dindi antu ashimwinaña “nsañu yayiwahi yaWanta.” (Mat. 24:14) Tukuhanjeka cheñi chitunateli kulemesha ijina daYehova hamuntu-hamuntu.
“ANTU EJINA DINDI”
4. (a) Yesu wayinkeli atumbanji twindi mudimwinyi henohu kanda yafunti mwiwulu? (b) Lwihwinyi lutunateli kudihula muloña waniwu mudimu wayinkeliyi?
4 Henohu kunashali hohu mpinji yantesha nakufunta mwiwulu, Yesu wayilejeli atumbanji twindi nindi: “Mwakatambula ñovu neyi spiritu yajila yinenzi hadi enu, nawa mwakekala ayinsahu jami muYerusalema, muYudeya nimuSamariya mwejima nikwakumina iseki dejima.” (Yilw. 1:8) Dichi nsañu yayiwahi akayishimwina nikumaluña amakwawu bayi muIsarela hohuku. Nkumininaku, antu akunyuza yejima akekala nakukooleka kwakwikala akakumulondela Yesu. (Mat. 28:19, 20) Ilaña Yesu wahosheli nindi: “Mwakekala ayinsahu jami.” Komana awa atumbanji amaha ateleleli kwiluka ijina daYehova, tahindi ateleleli hohu kwikala ayinsahu jaYesu? Yuma yamwekeni yalumbululawu muYilwilu kapetulu 15 yikutukwasha kuwana ñakwilu yanilu lwihu.
5. Apostolu niakulumpi muYerusalema amwekesheli ñahi nawu antu ejima ateleleli kwiluka ijina daYehova? (Talenu cheñi mwevulu.)
5 Muchaaka cha 49 C.E., apostolu niakulumpi muYerusalema abulakeni hamu nakuhanjeka yuma yateleli kwilawu akaNyuza abula kwalama hakwila ayiteji kwikala akaKristu. Hakukunkulula iku kuhanjeka, Yakoba mwanyika Yesu wahosheli nindi: “[Petulu] nalumbululi chiwahi chikupu chabalumukililiyi Nzambi kudi antu akunyuza katachi nakunonamu antu ejina dindi.” Hinyi yomweni idi ijina dateneneñayi Yakoba? Kuzatisha mazu akaprofwetu Amosi, wabombelelihu nindi: “Kulonda antu akashalahu akamukeñakeñi chikupu Yehova, hamu niantu akunyuza yejima, owu atenañawu nejina dami, ichi dichinahoshiyi Yehova.” (Yilw. 15:14-18) Awa atumbanji amaha adi kudiza hohu hadi Yehova wanyi, ilaña adi ‘kuyitenaña cheñi nejina dindi.’ Chumichi chatalishili mukwila nawu adi kulejaña antu ijina daNzambi nawa niwena adi kuyilukilaña kunidi ijina.
Hakubulakana kwezanvu dalombolaña damumafuku awakaKristu akusambila, ana amayala ashinshika elukili chikupu nawu akaKristu atela kwikala antu ejina daNzambi (Talenu paragilafu 5)
6-7. (a) Muloñadi Yesu chenjililiyi heseki? (b) Chumanyi chikwawu chalema chadibombelelimu?
6 Ijina daYesu datalisha mukwila nawu “Yehova Diyi Chamwinu,” nawa wamwekesheli hatooka nindi diyi azatishiliwu kudi Yehova kwamwina nachu antu amwekeshaña chikuhwelelu. Yesu wenjili heseki nakudihana yomwenindi kulonda afwili antu. (Mat. 20:28) Chahaniniyi ifutu danyiloña wabuzili njila yakwamwinamu antu nikwikala nawumi wahaya nyaaka.—Yow. 3:16.
7 Hanu dinu muloñadi antu chakeñekeleleñawu kuyamwina? Muloña wachuma chamwekeni mwitempa daEdeni. Neyi chashimwiniwu muchibaaba chinafumihu, anvwali jetu akusambila, aAdama naEva, adikañili naYehova nawa chumichi chaletesheli ajimbeshi kukooleka kwawu kwakushakama haya nyaaka. (Kutach. 3:6, 24) Ilaña, Yesu wenjili heseki nakwila chuma chasweja kulema kubadika kwamwina hohu antu akanshidi. Ijina daYehova aditwambilili chikupu. (Kutach. 3:4, 5) Dichi kwamwina anyana kaAdama naEva mwabombeleli chuma chalema, dikwila nawu kujilika ijina daYehova. Chineli Yesu wamwimeneneñaku Yehova nawa washimwinini ijina Dindi, wazatili mudimu weneni mukujilika ijina daYehova.
Muntu nateli kuditena ñahi nindi himukakumulondela Kristu walala ilaña heluka ijina daTata yindi hela kudizatishaku?
8. Yumanyi yateleli kwilukawu ejima amukuhweleleli Yesu?
8 Antu ejima amukuhweleleli Yesu, aYudeya niakaNyuza, ateleleli kumwiluka Nsulu yawamwinu wawu, dikwila nawu Tata yaYesu, Yehova Nzambi. (Yow. 17:3) Kubombelahu, kufwana Yesu adi kuyitenaña nejina daYehova. Adi kwiluka cheñi chichalemena kujilika idi ijina. Wamwinu wawu washindameneni hachumichi. (Yilw. 2:21, 22) Dichi akakumulondela Yesu ejima ashinshika, ateleleli kumwiluka Yehova niYesu. Dihafumini Yesu akunkululi kulomba kwindi kwasonekawu muYowanu 17 nanawa mazu akwila nawu: “Ami nakojeji ijina deyi adiluki nawa nakadikojeja akadiluki cheñi, kulonda kukeña kuwankeñeli kwiikali mudi wena nawa ninami nidikundi nawu.”—Yow. 17:26.
“YENU AYINSAHU JAMI”
9. Tunateli kumwekesha ñahi netu twalemesha ijina daYehova?
9 Dichi, akakumulondela Yesu ejima alala atela kwiluka nawu akweti mudimu weneni wakujilika ijina daYehova. (Mat. 6:9, 10) Atela kwiluka nawu ijina daYehova didabadika majina ejima. Nawa atela kumwekesha chumichi muyuma yejima yelañawu. Dichi yumanyi yitwatela kwila hakwila tujiliki ijina daYehova nikumwekesha netu yuma yahosheli Satana hadi yena yakutwamba?
10. Nsañwinyi yitwatañaña mumukanda waIsaya kapetulu 42 kushika kukapetulu 44? (Isaya 43:9; 44:7-9) (Talenu cheñi mwevulu.)
10 Yuma yalema yitwatela kwila hakwila tujiliki ijina daYehova ayishimuna mumukanda waIsaya kapetulu 42 kushika kukapetulu 44. Munitu tupetulu, Yehova naleji antu abulaña kudifukula kudi yena nindi amwekeshi wunsahu wunakumwekesha nawu anzambi jawu alala. Nayileji cheñi nindi neyi adi nawayinsahu enzi kumbidi nakuhakwilaku awa anzambi jawu. Ilaña kwosi niwumu wuneli mwenimuku!—Tañenu Isaya 43:9; 44:7-9.
Tudi ayinsahu anakumuhakwilaku Yehova (Talenu paragilafu 10-11)
11. Yehova wahosha nindidi kutalisha hadi antu jindi neyi chashimunawu haIsaya 43:10-12?
11 Tañenu Isaya 43:10-12. Yehova wahosha kutalisha hadi antu jindi nindi: “Yenu ayinsahu jami, nawa yami Nzambi.” Yehova nakukeña nindi aakuli ilu lwihu: “Kudihu Nzambi mukwawu kubadika ami?” (Isa. 44:8) Dichi, tukweti kukooleka kwakwakula ilu lwihu. Kuhitila munhoshelu yetu nimuyuma yitwelaña, twamwekeshaña netu Yehova diyi Nzambi walala hohu. Ijina dindi dabadika majina ejima. Yuma yitwelaña muchihandilu chetu yamwekeshaña nawu twamukeña chikupu Yehova nawa twekala ashinshika kudi yena, hichikweti muloña nakukala kunateli kutuletelayi Satanaku. Kwila mwenimu kwatukwashaña kwikala nakukooleka kwakujilika ijina Dindi.
12. Wuprofwetu wekala haIsaya 40:3, 5 washikijeweli ñahi?
12 Neyi tunakuhakwilaku ijina daYehova, dikwila nawu tunakumwimbujola Yesu Kristu. Isaya washimwineñahu dehi nindi kwakekala muntu wakatwaminaku “[wakamuloñeshela] Yehova njila.” (Isa. 40:3) Iwu wuprofwetu washikijeweli ñahi? Yowanu Mpapatishi wamuloñesheleli Yesu njila, wenjilili mwijina daYehova nawa wahosheleli mwijina daYehova. (Mat. 3:3; Maku 1:2-4; Luka 3:3-6) Wuprofwetu wowumu wahosheli nawu: “Kulema kwaYehova kukamwekana.” (Isa. 40:5) Chumichi chashikijeweli ñahi? Yesu chenjiliyi hanu heseki, wamwimeneniku Yehova chachiwahi chakwila chamwekeni tuhu neyi Yehova yomweni wenjili hanu heseki.—Yow. 12:45.
13. Tunateli kumwimbujola ñahi Yesu?
13 Kufwana Yesu, ninetu tudi aYinsahu jaYehova. Twashimwinaña ijina daYehova nawa twalejaña antu ejima itwawanaña yuma yakuhayamisha yelayi. Hela chochu, hakwila tuzati chiwahi iwu mudimu, twatela cheñi kuleja antu mudimu walema wazatañayi Yesu mukujilika ijina daYehova. (Yilw. 1:8) Yesu diyi Chinsahu chaYehova wabadika, nawa twamwimbujolaña. (Chim. 1:5) Muyumanyi yikwawu mutwamwekeshelaña netu twalemesha ijina daYehova hamuntu-hamuntu?
YUMA YIKWAWU MUTWAMWEKESHELAÑA NETU TWALEMESHA IJINA DAYEHOVA
14. Neyi chinamwekeshiwu haIsamu 105:3, twatiyaña ñahi hejina daYehova?
14 Twadisambilaña hejina daYehova. (Tañenu Isamu 105:3.) Yehova watiyaña kuwaha nankashi chitwadisambilaña hejina dindi. (Yere. 9:23, 24; 1 Kor. 1:31; 2 Kor. 10:17) “[Kudisambila] mudi Yehova” kwatalisha mukwila nawu tunamukuhweleli Yehova netu diyi Nzambi yetu. Twamonaña netu hikukooleka kulemesha ijina dindi nikudihakwilaku. Bayi tutiya nsonyi kuleja akwetu mutwazatilaña, akwetu akashikola, antuñi netu niantu amakwawu netu tudi aYinsahu jaYehovaku! Diyabolu wakeñaña nindi tuleki kuyileja antu ijina daYehova. (Yere. 11:21; Chim. 12:17) Kafwampi, Satana niatuprofwetu indi akutwamba afwilaña kukojeja antu avulameni ijina daYehova. (Yere. 23:26, 27) Ilaña kukeña kutwakeña ijina daYehova kwatuleteshaña kutwalekahu kuzañalela munidi ijina “mpinji yejima.”—Mas. 5:11; 89:16.
15. Kutambika hejina daYehova kwatalisha mudihi?
15 Twatwalekañahu kutambika hejina daYehova. (Yoweli 2:32; Rom. 10:13, 14) Kutambika hejina daYehova mwabombela yuma yayivulu bayi kwiluka hohu ijina daNzambi nikudizatishaku. Twamwilukaña Yehova netu hiMuntu, twamukuhwelelaña nawa twalombaña kudi yena netu atukwashi nikutulombola. (Mas. 20:7; 99:6; 116:4; 145:18) Twalejaña cheñi antu ijina dindi niyilwilu yindi nakuyikonkomwena netu abalumuki mumuchima nikuleka yuma yelañawu hakwila ayitiyeña kuwaha kudi Yehova.—Isa. 12:4; Yilw. 2:21, 38.
16. Tunateli kumwekesha ñahi netu Satana hisakutwamba?
16 Twadihana kukabakana kukoola ijina daYehova. (Yak. 5:10, 11) Neyi tutwalekahu kwikala ashinshika kudi Yehova hampinji yitunakukabakana, tukumwekesha netu Satana hisakutwamba. Mumafuku aYoba, Satana wahosheli kutalisha hadi antu amukalakelaña Yehova nindi: “Muntu wukuhana yuma yejima yikwetiyi kulonda apulwishi wumi windi.” (Yoba 2:4) Satana wahosheli nindi antu anateli hohu kumukalakela Yehova neyi yuma yidi chiwahi nawa nindi anateli kumufutalela Yehova neyi amona kukala. Iyala washinshika Yoba wamwekesheli nindi awa himakudi. Ninetu tukweti kukooleka kwakumwekesha netu hela chakwila Satana wukutuletela kukala kwamuchidinyi, hitwamba kamufutalela Yehovaku. Tunateli kukuhwelela chikupu netu Yehova wakatwalekahu kutuhemba muloña wejina dindi.—Yow. 17:11.
17. Kwesekeja nachinashimuniwu ha 1 Petulu 2:12, muyumanyi yikwawu mutunateli kuletela kalemesha hejina daYehova?
17 Twamwekeshaña kalemesha hejina daYehova. (Yish. 30:9; Yere. 7:8-11) Chineli twamwimenañaku Yehova nawa atutenaña hejina dindi, yuma yitwelaña yinateli kuletesha ijina dindi adishimeki hela kudisawula. (Tañenu 1 Petulu 2:12.) Dichi, twatela kuzata hakumina ñovu jetu kumushimeka Yehova munhoshelu yetu nimuyilwilu. Neyi tukwilaña mwenimu, hela chakwila twawanina wanyi tukuletaña kalemesha hejina dindi.
18. Chumanyi chikwawu mutunateli kumwekeshela netu twalemesha ijina daYehova? (Talenu cheñi tumazu twaheshina.)
18 Twalemesha nankashi ijina daYehova kubadika nichitwalemesha ijina detu. (Mas. 138:2) Chumichi chalemenadi? Muloña neyi twilaña yuma yamutiyishaña Yehova kuwaha, kakavulu antu anateli kututiya kuwaha wanyi nawa anateli kuhosha yuma yatama hadi etu.a Yesu wadihanini kufwa munjila yakasawuntu neyi kwiji hikapondu anafwishiwu namuloña kulonda alemeshi ijina daYehova. Wadiwili nsonyi nanochu chabulileñayi kuneña hela kusweja kwakama nayuma yatoñojokeleñawu antu hadi yena. (Heb. 12:2-4) Washili muchima hakwila nkeñelu yaNzambi.—Mat. 26:39.
19. Mwatiyaña ñahi hejina daYehova, nawa muloñadi?
19 Twadisambilaña hejina daYehova nawa twatiyaña netu hikukooleka kututena nawu aYinsahu jaYehova. Muloña wachumichi, tukutwalekañahu kuumika hela chakwila antu akutusawula chamuchidinyi. Twalemesha nankashi ijina daYehova kubadika nichitwalemesha ijina detu. Dichi tufwilenu kutwalekahu kushimeka ijina daYehova hichikweti muloña nakukala kunateli kutuletelayi Satanaku. Chitwela mwenimu, tukumwekeshaña netu twalemesha chikupu ijina daYehova, neyi chadilemeshayi Yesu Kristu.
KAMINA 10 Mulemeshenu Yehova Nzambi Yetu!
a Nimuntu washinshika Yoba waluwankeni chelili amabwambu jindi asatu atachiki kuhosha yuma yatama hadi yena. Hakusambila, chafwishiliyi anyanindi nikujimbesha yuma yindi yejima, “Yoba havulumwini hela kumwinka Nzambi muloña nindi neli chuma chatamaku.” (Yoba 1:22; 2:10) Hela chochu, chamwinkeliwu muloña wakukoña yuma yatama, watachikili kuhosha “mazu akutuboka.” Washili muchima hakuhakwilaku ijina dindi chatela ajiliki ijina daNzambi.—Yoba 6:3; 13:4, 5; 32:2; 34:5.