“Ditondelenu . . . Imwatela Kukalakela”

1. Yumanyi yitwatela kwila hakwila twiikali namuzañalu waweni, nawa muloñadi? (Isaya 48:​17, 18)

TATA yetu wamwiwulu watukeña nankashi, nawa wakeñaña nindi tudiluñisheña wumi chayinu mpinji nikumbidi. (Mukwa. 3:​12, 13) Watuleñeli nawuswa wakwila yuma yayiwahi yayivulu, ilaña hatwinka wuswa wakudiyuula etu aweni chachiwahi hela wakudifuukwila yuma yayiwahi niyatamaku. (Mukwa. 8:9; Yere. 10:23) Weluka nindi hakwila twiikali namuzañalu waweni, twatela kumukalakela nikwovwahila nshimbi jindi.—Tañenu Isaya 48:​17, 18.

2. Satana wakeñaña nindi tukuhweleli netudi, nawa chumanyi chelayi Yehova hakwila amwekeshi nindi Satana hisakutwamba?

² Satana wakeñaña tukuhweleli netu tunateli kwikala namuzañalu chakadi Yehova, nawa nindi antu anateli kudiyuula awenawu chachiwahi. (Kutach. 3:​4, 5) Hakwila yamwekeshi nindi Satana hisakutwamba, Yehova neteji antu kudiyuula awenawu hakapinji. Muloña wayuma yinakumwekana, chaswayi kumona netu chiyuulu chawantu chinakañanyi. Hela chochu, muNsona ashimunamu yakutalilahu yawamayala niambanda adiña namuzañalu muchihandilu chawu muloña wakumukalakela Yehova. Yesu Kristu diyi wadiña namuzañalu chikupu hadi awa ejima. Tusambilenu kuhanjeka hayuma yaletesheli yatondihu kumukalakela Yehova. Kuhiñahu, tukuhanjeka muloña waweni chitwatela kudifukwila hohu kudi Tata yetu wamwiwulu. Nkumininaku, tukuhanjeka yuma yaleteshaña tutondihu kumukalakela Yehova.

YUMA YALETESHELI YESU ATONDIHU KUMUKALAKELA YEHOVA

3. Chumanyi chamulejeliwu Yesu kwila, ilaña yena wafuukwilihu chumanyi?

³ Hadiñayi hamaseki, Yesu wateleleli kutondahu watela kukalakelayi. Hashimbwili wanyi kufuma hapapatisheweliyi Yesu, Satana wamulejeli nindi wukumwinka mawanta ejima ahamaseki neyi adifukula kudi yena kamu hohu. Yesu wamwakwili nindi: “Fumaku aha, eyi Satana! Muloña chasonekewa nawu: ‘Watela kudifukula kudi Yehova Nzambi yeyi nawa yena hohu diyi iwatela kukalakela mudimu wajila.’” (Mat. 4:​8-10) Muloñadi Yesu chafuukwililiyi muniyi jila? Talenu yuma yimu yaletesheli.

4-5. Yumanyi yaletesheli Yesu afuukulihu kumukalakela Yehova?

⁴ Chuma chacheni chamuletesheli Yesu atondihu kumukalakela Yehova hikukeña, muloña Yesu wamukeña chikupu Tata yindi. (Yow. 14:31) Kubombelahu, Yesu wamukalakelaña Yehova muloña dichuma chaloña chatela kwilayi. (Yow. 8:​28, 29; Chim. 4:11) Weluka nindi Yehova diyi Nsulu yawumi, washindamenewa nawa wekala nachisambu. (Mas. 33:4; 36:9; Yak. 1:17) Yehova wamulejeleña Yesu chalala mpinji yejima nawa wamwinkeli yuma yejima yadiñayi nayu. (Yow. 1:14) Ilaña, Satana diyi waletesha tufweña. Hisakutwamba wenzala nalwisu nawa wafwilaña kwila yuma yakuditiyisha yomweni kuwaha. (Yow. 8:44) Chineli welukili yumiyi, Yesu hatoñojokelihu nijakumwimbujola Satana kulonda yadikañi naYehovaku.—Fwili. 2:​5-8.

⁵ Chuma chikwawu chaletesheli Yesu afuukulihu kumukalakela Yehova, wachiñejeleña yuma yikafumamu neyi atwalekahu kuzata mudimu windi nakashinshi. (Heb. 12:2) Welukili nindi neyi atwalekahu kwikala washinshika, wukujilika ijina daTata yindi nawa wukubuza njila yakumanishilamu makabi ejima aleteliyi Diyabolu.

MULOÑA WAWENI WUTWATELA KUDIFUKWILA KUDI YEHOVA

6-7. Muloñadi antu amavulu makonu chabulilañawu kumukalakela Yehova, hanu dinu muloñadi chitwatela kudifukwila kudi yena hohu?

⁶ Makonu, antu amavulu hiyamukalakelaña Yehovaku, muloña kanda eluki yilwilu yindi yayiwahi nawa hiyeluka yuma yejima yayililayiku. Dichadiña niantu ashimwininiyi kapostolu Pawulu muAtenisi.—Yilw. 17:​19, 20, 30, 34.

⁷ Pawulu wayilumbulwilili antiyili jindi nindi Nzambi walala “wenkaña antu ejima wumi niyuma yejima.” Wabombelelihu nindi: “Twekala nawumi, twendaña nawa twahandaña muloña wayena.” Nzambi diyi Nleñi, “waleñeli nyuza yejima yawantu kufuma kudi muntu wumu,” dichi diyi hohu itwatela kudifukulaku.—Yilw. 17:​25, 26, 28.

8. Chumanyi chakabula kwilayi Yehova? Lumbululenu.

⁸ Chineli hiNleñi nawa Nyuuli wayileñaleña yejima, Yehova wukweti wuswa wakutwesha kukanjikija antu kumukalakela. Hela chochu, Yehova hamba kela chumichiku. Ilaña, watwinkaña wunsahu watukwashaña kwiluka netu wekala kwoku nawa watukeña chikupu hamutu-hamutu. Nakukeña antu amavulu nankashi kwikala amabwambu jindi haya nyaaka. (1 Tim. 2:​3, 4) Muloña wachumichi, Yehova natudizishi kulonda tulejeña antu hankeñelu yindi niyuma yayiwahi yakayililayi. (Mat. 10:​11-13; 28:​19, 20) Watupompesha muyipompelu nawa watwinka akulumpi akweti kukeña atwakamenaña.—Yilw. 20:28.

9. Kukeña kwaYehova kwamwekenaña muyumanyi?

⁹ Kukeña kwaYehova kwabadika kwamwekenaña munochu chelañayi nawantu akaanaña nawu wekalaku wanyi. Toñojokenu hachumichi: Hadi yaaka yayivulu yinahitihu, antu amavulu nankashi adituñilaña nshimbi jawu jakulondela hakufuukula yuma yayiwahi niyatama. Hela chochu, Yehova wayinkaña yuma yayikwashaña kuhanda nikudiluñisha wumi. (Mat. 5:​44, 45; Yilw. 14:​16, 17) Wayinka kukooleka kwakwikala nawamabwambu ayikeña, kuvwala anyana nikudiluñisha yuma yayiwahi yafumaña munyidimu yazatañawu. (Mas. 127:3; Mukwa. 2:24) Yuma yejimiyi yamwekeshaña hatooka nawu Tata yetu wamwiwulu wakeña antu ejima. (Kwid. 34:6) Ichi dinu tudanukishenu yuma yikwawu yatuleteshaña tutondihu kumukalakela Yehova nichatukiswilañayi.

YUMA YATULETESHAÑA TUTONDIHU KUMUKALAKELA YEHOVA

10. (a) Chumanyi chacheni chaleteshaña tumukalakeleña Yehova? (Matewu 22:37) (b) Kudiwunjika kwaYehova kunayikwashi ñahi? (Isamu 103:​13, 14)

¹⁰ Kufwana Yesu, chuma chacheni chatuleteshaña tumukalakeleña Yehova muloña twamukeña chikupu. (Tañenu Matewu 22:37.) Twaswinaña kwakwihi naYehova neyi tudizaña hayilwilu yindi. Chakutalilahu, talenu Yehova chadiwunjikañayi nanetu. AIsarela chadikañiliwu nayena, wayilembeleli nindi: “Mwani, balumukenu nakuleka njila jenu jatama.” (Yere. 18:11) Yehova wanukaña nindi twawanina wanyi, tudi lunkuñu. (Tañenu Isamu 103:​13, 14.) Neyi mutoñojokaña chikupu hakudiwunjika kwaYehova nihayilwilu yindi yikwawu yayiwahi, komana hichikuyiletesha kukeña kumukalakela haya nyaakaku?

11. Yumanyi yikwawu yatuleteshaña tutondihu kumukalakela Tata yetu wamwiwulu?

¹¹ Chatusañumunaña cheñi kumukalakela Yehova muloña dichuma chaloña chitwatela kwila. (Mat. 4:10) Kubombelahu, tweluka yuma yayiwahi yafumaña mukumukalakela nakashinshi. Neyi tutwalekahu kukalakala nakashinshi, twajilikaña ijina daYehova, twamwekeshaña netu Diyabolu hisakutwamba nawa twazañaleshaña muchima waTata yetu. Nawa neyi tutondahu kumukalakela Yehova chayinu mpinji, tukwikala nakukooleka kwakumukalakela haya nyaaka!—Yow. 17:3.

12-13. Yumanyi yitunakudizila kuchuma chayimwekeneni aJane naPam?

¹² Hampinji yituchidi atwansi, tunateli kwikala namuchima wakumukeña nankashi Yehova, nawa iku kukeña kukuswejelañaku hampinji yitunakukula. Talenu chuma chayimwekeneni akansi namukulumpi ayedi awambanda, aJane naPam.a Hampinji yatachikiliwu kudiza Bayibolu, wamukulumpi wadiña nayaaka 11, wakansi wadiña nayaaka 10. Hela chakwila anvwali jawu hiyakeñeleña kudizaku, ayitejeli aJane naPam kudikunda nawaYinsahu chakala hohu awa atwansi ayaña hamu kuchechi nachisaka chawu kunsa yamulungu. Jane wahosheli nindi: “Yuma yamuBayibolu yandizishiliwu aYinsahu, yankwashili kukaana ikakeja dawakwetu dakunleja nawu ninweña yitumbu yashetana nikwila wuvumbi.”

¹³ Chimwahitili yaaka yantesha hohu, awa atwansi ejima ayedi ekalili akakushimwina. Nkumininaku, atachikili kuzata mudimu wawupayiniya nawa hampinji yoyimu akameneneña anvwali jawu akula dehi. Chanukiliyi yuma yayimwekeneni, Jane wahosheli nindi: “Nadimweni namesu kapu nami Yehova wakamenaña chikupu amabwambu jindi nawa neluki nami, neyi chahosha 2 Timotewu 2:​19, ‘Yehova weluka antu jindi.’” Twajinokaña wanyi netu Yehova wakamenaña antu afuukulañahu kumukeña nikumukalakela!

14. Twahakwilañaku ñahi ijina daYehova muyuma yitwahoshaña niyitwelaña? (Talenu cheñi nyevulu.)

¹⁴ Tunakukeña antu eluki nawu nsañu yejima yakutwamba yatiyawu hadi Yehova, yalala wanyi. Fwikijenu chumichi: Mukweti ibwambu denu imwadikunda nindi nankashi wukweti luwi, chisambu nawa wanakenaña. Ifuku dimu, mutiya muntu nakuhosha nindi ibwambu denu watama muchima nawa washinshika wanyi. Mukwila ñahi? Mukumuhakwilaku. Munjila yoyimu, neyi Satana ninowu amuhakwilañaku anakufwila kutamisha ijina daYehova kuhitila mukutaandisha nsañu yamakudi hadi Yena, twahakwilañaku chikupu ijina daYehova kuhitila mukuhosha chalala hadi Yena. (Mas. 34:1; Isa. 43:10) Twamwekeshaña netu tunakukeña kumukalakela Yehova nawumi wetu wejima kuhitila muyuma yitwahoshaña niyitwelaña.

15. Yumanyi yayiwahi yafuminimu chelili kapostolu Pawulu ahimpiku yuma yimu yafwilileñayi muchihandilu chindi? (AFwilipi 3:​7, 8)

¹⁵ Twadihanaña nakuhimpaku yuma yimu yitunakufwila muchihandilu chetu kulonda tumuzañalesheña Yehova hela kukalakala chikupu mumudimu windi. Chakutalilahu, kapostolu Pawulu watondelihu kubula kutuumbakana muchituñilu mwashakamineñayi hakwila ekali mukakumulondela Kristu nawa amukalakeleña Yehova. (Ñal. 1:14) Chafuminimu, wekalili nachihandilu chamuzañalu nikukooleka kwakuyuula hamu naKristu mwiwulu. Haditoñesheli nanochu chafuukwilihu kumukalakela Yehovaku, nawa ninetu twakaditoñesha wanyi.—Tañenu AFwilipi 3:​7, 8.

16. Yumanyi yitunakudizila kuchuma chamumwekeneni Julia? (Talenu cheñi nyevulu.)

¹⁶ Neyi tutwamijañaku mudimu waYehova muchihandilu chetu, tukwikala nachihandilu chamuzañalu chayinu mpinji nikumbidi. Talenu chuma chamumwekeneni muhela wejina daJulia. Henohu kanda adizi chalala, Julia wadiña mwizanvu dawañimbi amuchechi kufuma tuhu hachidiñayi kansi. Wembileña chiwahi nankashi chakwila atachikili kumudizisha kudi ñimbi wakulukila. Hashimbwili wanyi, Julia wayili mpuhu nawu hiñimbi wamuwahi nankashi nawa watachikili kwimbila mutupeka twalemeshawu nankashi mwembilañawu tumina. Hampinji yadiñayi kushikola yaya mpuhu hadizishañawu chakwimba tumina, mukwawu mwatañilileñawu watachikili kuhanjeka nindi hadi Nzambi nawa wamulumbulwilili nindi Nzambi wukweti ijina, Yehova. Hashimbwili wanyi, Julia watachikili kudiza Bayibolu kayedi mumulungu. Nkumininaku, wafuukwilihu kusha muchima hakumukalakela Yehova muchihandilu chindi chatela afwileña kudiza mudimu wakwimba tumina. Iku kufuukula kwamupeleleli wanyi. Wahosheli nindi: “Antu amavulu anlejeleña nawu nafuukwili mwawusupi kuleka kwimba nakutachika kumukalakela Nzambi. Ilaña nakeñeleña kuzatisha chihandilu chami chejima kumukalakela Yehova.” Watiyaña ñahi chayinu mpinji hanichi chuma chafuukwiliyi kubadika yaaka 30 yinahitihu? Wahosheli nindi, “Nikweti kuwunda kwamuyitoñojoka, nawa nakuhweleli nami Yehova wakashikija yuma yejima yafwilaña muchima wami kumbidi.”—Mas. 145:16.

TWALEKENUHU KUMUKALAKELA YEHOVA

17. Kwiluka netu tunakushakama mumpinji yakwila kukuma kwanshakaminu yamakonu kudi kwakwihi chikupu, kukuletesha antu amukalakelaña Nzambi ninana achidi kanda atondihu kwila chumanyi?

¹⁷ Tunakushakama mumpinji yakwila kukuma kwanshakaminu yamakonu kudi kwakwihi chikupu. Kapostolu Pawulu wasonekeli nindi: “Muloña kunashali ‘kapinji kantesha nankashi,’ dichi ‘owu wunakwinza wukushika, nawa hakulabaku.’” (Heb. 10:37) Chumichi chinatukundami ñahi? Twatela kwiluka chumichi, mpinji yinashaliku hakwila antu atondihu kumukalakela Yehova yinakehi nankashi. (1 Kor. 7:29) Nawa neyi twatondahu dehi kumukalakela Nzambi, tweluka netu hela chakwila twakamona kukala kwamuchidinyi, kwakekala hohu “[kwakapinji] kantesha nankashi.”

18. Yesu niYehova akeñaña nawu twileñadi?

¹⁸ Yesu wayikolesheli atumbanji twindi nindi bayi atachika hohu kumulondelaku, ilaña cheñi nindi atwalekeñahu kumulondela. (Mat. 16:24) Dichi neyi tunamukalakeli Yehova hadi yaaka yayivulu, bayi tufunta hanyima nakuleka kumukalakelaku. Twatela kuzata nañovu kutwalekahu kukakela kukudihana kwetu kutwadihanini netu tukumukalakelaña. Chapela wanyi kwila mwenimu, ilaña tunateli kudiluñisha nkisu niyuma yayiwahi, nichayinu mpinji!—Mas. 35:27.

19. Yumanyi yitunakudizila kuchuma chamumwekeneni Gene?

¹⁹ Amakwawu atoñojokaña nawu kumukalakela Yehova kukuyikañeshaña kwilahu yuma yikwawu. Neyi mudi kansi, komana munakutoñojoka nenu mukushalañahu yuma yikwawu neyi mutondahu kumukalakela Yehova? Manakwetu wumu wakansi wejina daGene wahosheli nindi: “Natiyileña nami kwikala Chinsahu chaYehova kwanletesheleña kushalahu yuma yikwawu yayiwahi. Namweneña nami akwetu atwansi amavulu mutwakulilileña adiluñishileña yuma yidi neyi kuya kuyidika, kukulujoka nawambanda, hela kuhema yisela yamavidiyo amadombu, ilaña ami nombilileña mpinji yami kukuya nakupompa nikushimwina.” Iyi yitoñojoka yamuletesheli Gene kwiladi? Wahosheli nindi: “Natachikili kwila yuma yatama nawa nadiluñishili hadi kapinji kantesha. Ilaña chumichi hichanleteleli muzañalu walalaku. Natachikili kutoñojoka hachalala chamuBayibolu chinadiwili nawa nafuukwilihu kumukalakela Yehova namuchima wejima. Kufuma tuhu hayina mpinji, chinamwekani neyi Yehova waakula kulomba kwami kwejima.”

20. Chumanyi chitukufuukulahu kutwaleka kwila?

²⁰ Ñimbi yaMasamu wamwimbilili Yehova nindi: “Wudi namuzañalu yowu muntu iwunatondi nikumuleta kulonda ashakami mumalubanza eyi.” (Mas. 65:4) Dichi tutwalekihu kumukalakela Yehova, nakuhosha neyi chahosheliyi Yoshuwa nindi: “Ami niamwitala dami, tukumukalakelaña Yehova.”—Yosh. 24:15.