Ifutu Danyiloña Datudizishaña Yumanyi?

1. Kuya kuChanukishu chakufwa kwaKristu chekalañaku hachaaka-hachaaka, kwatukwashaña ñahi?

MWAMWENI mukwiteja nenu ifutu danyiloña hichawaana chalema wuseya! (2 Kor. 9:15) Chineli Yesu wahanini wumi windi, munateli kwikala nawubwambu wakola naYehova Nzambi. Munateli cheñi kwikala nakuchiñeja kwakushakama haya nyaaka. Dichi chinateleli etu kumwekesha kusakilila hefutu danyiloña nikudi Yehova, wadihanini muloña wakukeña! (Rom. 5:8) Hakwila atukwashi kwikala namuchima wakusakilila nawa atukwashi kubula kudiwula kulema kwefutu danyiloña, Yesu watachikishili Chanukishu chakufwa kwindi chekalañaku hachaaka⁠-⁠hachaaka.​—Luka 22:19, 20.

2. Yumanyi yitukuhanjekahu muchinu chibaaba?

² Achinu chaaka, Chanukishu chakekalaku Hamposu, April 12, 2025. Chakadi nikujina, wejima wetu tunakudiloñesha kulonda twakayi kuniku kupompa. Twakelukilahu yuma yayivulu nankashi neyi twikalaña nampinji yakutoñojoka chikupua mumpinji yaChanukishu hachuma chatwililawu kudi Yehova niMwanindi. Muchinu chibaaba, tukuhanjeka yuma yatudizishaña ifutu danyiloña kutalisha hadi Yehova niMwanindi. Muchibaaba chinalondelihu, akatukwasha kutiyishisha ifutu danyiloña chidatukwashaña nichitunateli kumwekesha kusakilila hanichi chawaana.

YUMA YATUDIZISHAÑA IFUTU DANYILOÑA HADI YEHOVA

3. Kufwa kwamuntu wumu kwamwinini ñahi mamiliyoni awantu? (Talenu cheñi mwevulu.)

³ Ifutu danyiloña datudizishaña hadi Yehova chamwekeshañayi wuñanji. (Kuhit. 32:4) Munjilanyi? Toñojokenu hachumichi: Muloña wakudikaña kwaAdama, twaswanini nshidi yaleteshaña tufweña. (Rom. 5:12) Hakwila atusubuli kunshidi nikukufwa, Yehova watemesheli Yesu kulonda ahani ifutu danyiloña. Hanu dinu mulambu wamuntu wumu wawanina wunateli kukuula ñahi mamiliyoni awantu? Kapostolu Pawulu walumbulwili nindi: “Muloña neyi chekalili antu amavulu akanshidi muloña wakudikaña kwamuntu wumu [Adama], munjila yoyimu, antu amavulu akekala aloña muloña wakwovwahila kwamuntu wumu [Yesu].” (Rom. 5:19; 1 Tim. 2:6) Munjila yikwawu, muntu wumu wawanina wabulili kwovwahila diyi watukojejeli twiikali anduñu anshidi nikufwa. Dichi, muntu wumu wawanina wovwahilili diyi watusubwili kuniwu wuduñu.

4. Muloñadi Yehova chabulililiyi kwiteja hohu anyana kaAdama akweti nyichima yaloña kulonda ashakami haya nyaaka?

⁴ Komana mwamweni Yesu wateleleli kufwa kulonda atwamwini? Komana Yehova hadi kufuukulahu hohu kwiteja anyana kaAdama akweti nyichima yaloña kulonda ashakami haya nyaakaku? Kudi etu antu abula kuwanini, chumichi chadi kumwekana neyi chidi hohu chiwahi kwila mwenimu. Ilaña hichikumwekesha wuñanji waYehova wawaninaku. Chineli Yehova welaña yuma munjila yoloka, hadi kudiwula chilwilu chaAdama chakudikañaku.

5. Muloñadi chitwatela kukuhwelela netu Yehova welaña yuma yaloña mpinji yejima?

⁵ Indi neyi Yehova wahanini wanyi ifutu danyiloña nakubula kumwikesha wuñanji kuhitila mukwiteja anyana kaAdama awamayala niawambanda abula kuwanina kushakama haya nyaaka? Hadaha antu adi kutoñojokaña nawu Nzambi wukudiwulaña wuñanji nimuyuma yikwawu. Chakutalilahu, komana antu adi kujinokaña nawu wukukañanya kushikija yikaninu yindi yejima? Twatela kwakamena hayuma yamuchidiwu wanyi. Chineli Yehova welili chuma chaloña chakwila wadibondeli chikupu yomweni, kuhitila mukuhana Mwanindi akeñayi, chatukwashaña kukuhwelela netu mpinji yejima welaña yuma yaloña.

6. Njilanyi yimu mwamwekeshelaña ifutu danyiloña nawu Yehova watukeña? (1 Yowanu 4:9, 10)

⁶ Hela chakwila ifutu danyiloña datukwashaña kutiyishisha netu Yehova welaña yuma munjila yaloña, datukwashaña cheñi kwiluka kukeña kwindi kwabadika. (Yow. 3:16; Tañenu 1 Yowanu 4:9, 10.) Ntañishilu yahosha hefutu danyiloña yamwekeshaña nawu Yehova wakeñaña nindi twakekali nawumi wahaya ­nyaaka nikwila muchisaka chindi. Toñojokenu hachumichi: Adama chavulumwiniyi, Yehova wamufumishili muchisaka Chindi chawakakudifukula. Chafumamu, wejima wetu twavwalikilaña muchisaka chaNzambi wanyi. Ilaña kushindamena hefutu danyiloña, Yehova watwanakenaña nshidi jetu nawa nkumininaku, waletaña muchisaka chindi antu ejima amwekeshaña chikuhwelelu nikwovwahila. Nichayinu mpinji, tunateli kwikala nawubwambu wawuwahi naYehova ninawakwetu akakudifukula. Eña, Yehova watumwekeshela kukeña kwakweni!​—Rom. 5:10, 11.

7. Kukabakana kwakabakeniyi Yesu kwatukwashaña ñahi kwiluka Yehova chatukeñayi?

⁷ Tunateli kutiyishisha Yehova chatukeñayi neyi tutoñojoka chatiyiliyi hakumona Mwanindi nakukabakana. Satana wahoshaña nindi kwosi kambuña aNzambi wunateli kutwalekahu kwikala washinshika kudi Yena neyi yuma yinakumukalila. Hakwila adihakwiliku, Yehova wamwitejeli Yesu kukabakana henohu kanda afwi. (Yoba 2:1-5; 1 Pet. 2:21) Iku Yehova nakutalaku, Yesu amusupishili kudi akakwitiya akakudimbulula, amuvupoleli yikoti kudi amashidika nawa amupopeleli hamutondu. Dichi Yehova wamweneña Mwanindi akeñayi hampinji yakabakeneñayi nakufwa kwayeña. (Mat. 27:28-31, 39) Yehova wadiña nañovu yakukañesha ichi chuma kumwekana mpinji yidi yejima. Chakutalilahu, chelili ana akakudimbulula ahoshi nawu: “Mulekenu [Nzambi] amwamwini neyi nakukeña kumukwasha,” Yehova wadi kushikena kumukwasha. (Mat. 27:42, 43) Hela chochu, neyi Nzambi welili mwenimu, ifutu danyiloña chiña adihanini wanyi nawa hitwadi kwikala nakuchiñejaku. Dichi Yehova wetejeli Mwanindi kuumika makabi sampu nichafwiliyi.

8. Komana Yehova chamukatili kumuchima chamweniyi Mwanindi nakukabakana? Lumbululenu. (Talenu cheñi mwevulu.)

⁸ Bayi tutoñojoka netu chineli Nzambi wañovu jejima, hichamukataña kumuchimaku! Atuleña muchinfwana chindi, watuleña munjila yakwila chatukataña kumuchima, dichi chidi hohu chiwahi kwiluka netu Yehova niyena chamukataña. Bayibolu yamulumbulula nawu ‘watiyaña kutama’ nawa ‘waneñaña.’ (Mas. 78:40, 41) Toñojokenu cheñi hansañu yahosha hadi Abarahama naIsaka. Mukwanuka nenu Abarahama amulejeli nawu alambuli mwanindi wumu hohu. (Kutach. 22:9-12; Heb. 11:17-19) Tunateli kufwikija hohu yuma yatoñojokeleñayi Abarahama hampinji yadiloñesheleñayi kumujaha Isaka chelili aholi mpoku nindi amujahi. Yehova chatela chamuneñesheli nankashi chamweneñayi Mwanindi anakumukabisha chikupu kudi antu abulileña kumwakama Nzambi sampu nichafwiliyi!​—Talenu ha jw.org vidiyo yinakwila nawu Pashanyeni Icitetekelo Cabo​—Abrahamu, Ulubali 2.

9. ARoma 8:32, 38, 39 yayikwashaña ñahi kutiyishisha Yehova chayikeñayi enu niakwenu akakudifukula?

⁹ Ifutu danyiloña datukwashaña kwiluka netu Yehova watukeña nankashi kubadika muntu wudi wejima, kushilahu niantaña jetu itwakeña hela amabwambu itwadikunda nawu chikupu. (Tañenu ARoma 8:32, 38, 39.) Chakadi nikujina, Yehova watukeña kubadika nichitwadikeña etu aweni. Munakukeña kushakama haya nyaaka? Dichuma chafwilañayi Yehova nankashi kutalisha hadi enu. Munakukeña kuyanakena nshidi jenu? Yehova nakufwila chikupu kuyanakena. Chuma chatulejañayi hohu kwila hikwiteja mulambu windi wabadika kuhitila mukumwekesha chikuhwelelu nikwikala ovwahila. Ifutu danyiloña diyi njila yimu yabadika mwamwekeshelañayi Nzambi kukeña. Nawa mukaayi kakaha, twakadizilahu yuma yayivulu hakukeña kwaYehova.​—Mukwa. 3:11.

YUMA YATUDIZISHAÑA IFUTU DANYILOÑA HADI YESU

10. (a) Chumanyi chamuneñesheli nankashi Yesu hampinji yamujahileñawu? (b) Yesu wajilikili ñahi ijina daYehova? (Talenu cheñi chikasha chinakwila nawu “Kashinshi Kamwekesheliyi Yesu Kajilikili Ijina daYehova.”)

¹⁰ Yesu wakamenaña chikupu antu chatoñojokañawu hadi Tata yindi. (Yow. 14:31) Yesu waneñeli chamwinkeliwu muloña wakuhosha kasawuntu nikudikaña nanfulumendi nindi chikuleta kasawuntu hejina daTata yindi. Dihafumini alombi nindi: “Tata, neyi chinatwesheki, itejaku aka kaapu kanhiti.” (Mat. 26:39) Chatwalekelihu kuhemba kashinshi kindi kudi Yehova sampu chafwiliyi, Yesu wajilikili chikupu ijina daTata yindi.

11. Yesu wamwekesheli ñahi nindi wakeña antu chikupu? (Yowanu 13:1)

¹¹ Ifutu danyiloña datukwashaña kwiluka cheñi netu Yesu wayakamenaña chikupu antu, sweje-e atumbanji twindi. (Yish. 8:31; tañenu Yowanu 13:1.) Chakutalilahu, Yesu welukili nindi yuma yikwawu yakamonayi ­hakazatañayi mudimu windi wahamaseki yakekala yakala nankashi, sweje-e kufwa kwindi kwayeña. Hela chochu, hazatileñayi mudimu windi hanu hamaseki, welili mwenimu muloña wakeña antu. Yesu wamwekesheli kukeña kwabadika kwayikeñayi antu kuhitili mukuyishimwina, kuyidizisha nikuyikwasha. Nihefuku dafwileñayi, Yesu wekalili nampinji yakuwelesha nyendu yawapostolu indi nawa wayilejeli mazu amavulu akukumishaku akukundeja nikuyinka nshimbi. (Yow. 13:12-15) Kuhiñahu, hampinji yadiñayi hamutondu wakuyandishila, Yesu wekaliliku nakapinji kanti kakuhanjeka nakapondu wadiña kwakwihi nakufwa mazu akuchiñeja nawa wamuloñesheleli mama yindi muntu watela kumwakamena. (Luka 23:42, 43; Yow. 19:26, 27) Dichi kukeña kwaYesu kwabadika kwamwekeneni mukufwa kwindi nimuyuma yejima yelileñayi muchihandilu chindi chahamaseki.

12. Munjilanyi Yesu munatwalekelihu kudihana kukoola etu?

¹² Hela chakwila Kristu wafwili “kamu hohu kunahu,” natwalekihu kutwilila yuma yayivulu. (Rom. 6:10) Welaña ñahi mwenimu? Natwalekihu kuzata nañovu kutwinka yuma yayivulu yayiwahi muloña wefutu danyiloña. Talenu yuma yinatwalekihu kuzatayi. Diyi Mwanta wetu, Kapristu Muneni, nawa mutu wachipompelu. (1 Kor. 15:25; Efwe. 5:23; Heb. 2:17) Nakulombola mudimu wakupompesha awayishewa niizaza deneni, mudimu wakamana hohu henohu lukadi lwasweja kanda lumani.b (Mat. 25:32; nihaMaku 13:27) Nakuzata cheñi nañovu kulonda ambuñindi ashinshika ayidiisheña chachiwahi kuspiritu munanu mafuku akukuminina. Nawa muChiyuulu chindi chaYaaka Ikombakaji, wakatwalekahu kutwinka yuma yitunakukeña. Mwamweni Yehova watwinkeli Mwanindi kulonda atukwasheña!

BAYI MULEKA KUDIZAKU

13. Kutoñojokahu chikupu kunateli kuyikwasha ñahi kutwalekahu kudiza hakukeña kwatumwekeshelaña Nzambi niKristu?

¹³ Munateli kutwalekahu kudiza hakukeña kwatumwekeshelaña Yehova Nzambi niKristu Yesu neyi mutwalekahu kutoñojokahu chikupu. Hadaha mumpinji yaChanukishu chachinu chaaka, munateli kutaña nakanañachima Mukanda waNsañu Yayiwahi wumu hela kubadikahu. Bayi mutaña nsañu yayivulu hampinji yimuku. Ilaña, hudikilenu nawa sandujolelenuhu nsañu yikwawu kulonda mwiluki yuma yikuletesha tumukeñi Yehova niYesu. Nawa zatenu hakumina ñovu jenu kulejaku antu yuma yimunadizi.

14. Kwesekeja naIsamu 119:97 nitumazu twaheshina, kusandujola kunateli kutukwasha ñahi kudizilahu yuma yayivulu hefutu danyiloña nihantañishilu yikwawu? (Talenu cheñi mwevulu.)

¹⁴ Neyi munashimbuli muchalala hadaha mukutachika kujinoka neyi chakwila munateli kwilukilahu yuma yayiha hansañu yelukewa nankashi, chidi neyi wuñanji waNzambi, kukeña kwindi niifutu danyiloña. Chalala chidi chakwila nawu mpinji yejima tukudizilañahu yuma yayiha haniyi nsañu nihanyitu yikwawu. Dichi, chumanyi chimwatela kwila? Ikalenuña nampinji yakudiza nsañu yalema yekala munyikanda yetu. Neyi muwana nsañu yimunabuli kutiyishisha, sandujolenuhu. Kuhiñahu mwifuku dejima, toñojokenuña chikupu hayuma yimwasandujola nichiyinakuyidizisha hadi Yehova, Mwanindi nihakukeña kwayikeñawu.​—Tañenu Isamu 119:97 nitumazu twaheshina.

15. Muloñadi chitwatela kutwalekelahu kukeñakeña yuma yalema yamuBayibolu?

¹⁵ Bayi muzeyaku neyi kwosi nsañu yayiha hela yakuzañalesha yimunawani hampinji yimunakutaña hela kusandujola. Munjila yikwawu, mudi neyi muntu wunakukeñakeña wuru. Mukudiwunjika, awa antu ombaña maora hela mafuku amavulu henohu kanda awanihu tuhu hela kachikunku kawuru. Ilaña ­atwalekañahu nakukeñakeña muloña kachikunku kejima kawuru kalema nankashi kudi wena. Dikwila nawu nsañu yejima yitukudiza muBayibolu yalema nankashi kubadika wuru! (Mas. 119:127; Yish. 8:10) Dichi diwunjikenu nawa twalekenuhu kulondela ndandanda yenu yakutaña Bayibolu.​—Mas. 12.

16. Tunateli kumwimbujola ñahi Yehova niYesu?

¹⁶ Hampinji yimunakudiza, keñenu njila jikuyikwasha kuzatisha yuma yimunakudiza. Chakutalilahu, mwekeshenuña wuñanji waYehova kuhitila mukubula kuyimwekeshela akwenu chaambu. Imbujolenuña kukeña kwaYesu kwamukeñayi Tata yindi niantu kuhitila mukudihana enu aweni muloña wejina daYehova nikukalakela akwenu akaKristu. Mwimbujolenuña cheñi Yesu kuhitila mukushimwina antu kulonda niwena ekali nakukooleka kwakwiteja chawaana chaYehova chasweja kulema wuseya.

17. Yumanyi yitwakahanjekahu muchibaaba chinalondelihu?

¹⁷ Neyi tutiyishisha nikumwekesha kusakilila hefutu danyiloña, tukuswejelaku kumukeña Yehova niMwanindi. Chikufumamu, niwena akutukeña chikupu. (Yow. 14:21; Yak. 4:8) Dichi tuzatisheña yuma yatuloñeshelañayi Yehova kulonda tutwalekihu kwilukilahu nsañu yayivulu hefutu danyiloña. Muchibaaba chinalondelihu, twakahanjeka njila jimu ifutu danyiloña chidinateli kutukwasha nichitunateli kumwekesha kusakilila hakukeña kwaYehova.