Kuhwelelenu Nenu Yehova Wayikeña

1. Muloñadi chimwadihaninini kudi Yehova? (Talenu cheñi mwevulu.)

MUNAKWANUKA mpinji yimwadihanini kudi Yehova? Mwafuukwilihu kwila chumichi muloña mwamwilukili nikumukeña. Mwamukanini nenu mukutwamijañaku kwila nkeñelu yindi muchihandilu chenu nawa mukutwalekahu kumukeña namuchima wenu wejima, nawumi wenu wejima, nayitoñojoka yenu yejima ninañovu jenu jejima. (Maku 12:30) Kufuma tuhu hayina mpinji, munakuswejelaku kumukeña. Hanu dinu mukwakula ñahi neyi muntu ayihula nindi, “Chalala mwamukeña Yehova?” Chakadi nikushintajala, mukumwakula nenu, “Namukeña chikupu kubadika muntu wudi wejima hela chuma chidi chejima!”

2-3. Yehova nakukeña nindi tukuhweleli netudi, nawa yumanyi yitukuhanjekahu muchinu chibaaba? (Yeremiya 31:3)

² Hanu dinu, munateli kwakula ñahi neyi muntu ayihula nindi, “Chalala munakuhweleli nenu Yehova wayikeña?” Komana mukushintajala kwakula, hadaha nakutoñojoka nenu mwashikilamu wanyi kuyikeña kudi Yehova? Muhela wumu wamweneña nindi amukeñeli wanyi hadiñayi kansi, wahosheli nindi: “Neluka nami namukeña Yehova. Hinajinokaña hachumichi hela hantiku. Ilaña kakavulu najinokaña neyi chakwila Yehova wankeña.” Hanu dinu yumanyi yinateli kuyikwasha kwiluka nenu Yehova wayikeña?

³ Yehova nakukeña mukuhweleli chikupu nenu wayikeña. (Tañenu Yeremiya 31:3.) Chalala chidi chakwila nawu Yehova wayikokeleli kudi yena. Nawa hampinji yimwadihanini nikupapatishewa, mwatambwilili chuma chalema nankashi—kukeña kwindi kwakashinshi. Chumichi chinatalishi mukwila nawu wayikeña nankashi nawa hamba kayishiyaku. Iku kukeña kwamuleteshaña ayimoneña akakudifukula indi ashinshika, kushilahu ninenu, nindi ‘hiiheta dindi dalemeshayi.’ (Mal. 3:​17, tth.) Yehova nakukeña mukuhweleli nenu wayikeña neyi chakuhweleleliyi kapostolu Pawulu. Pawulu wakuhweleli chikupu nakusoneka nindi: “Ami neluki chikupu nami hela kufwa, hela wumi, hela añelu, hela nfulumendi, hela yuma yidiku chayinu mpinji, hela yuma yakenza, hela ñovu, hela kuleha, hela kukunama, hela chuma chejima chaleñawu, hijinateli kutwambula kukukeña [kwaNzambiku].” (Rom. 8:​38, 39) Muchinu chibaaba, tukudiza chichalemena kukuhwelela chikupu netu Yehova watukeña niyuma yitunateli kwila yikutukwasha kukuhwelela chumichi.

CHICHALEMENA KUKUHWELELA NETU YEHOVA WATUKEÑA

4. Makudinyi akeñañayi Satana nindi mukuhweleli, nawa tunateli kutondolwela ñahi awa makudi?

⁴ Neyi tukuhwelela netu Yehova watukeña, tukushinda kafuta kamu ‘hatufuta twaDiyabolu.’ (Efwe. 6:11) Satana nateli kwila chuma chidi chejima hakwila atukañeshi kumukalakela Yehova. Kafuta kamu kazatishañayi Satana nankashi hatufuta twindi hikutaandisha makudi akwila nindi Yehova watukeña wanyi. Bayi muvulamena nenu Satana welukaña mpinji yakutulukukaku. Kakavulu watulukukaña neyi amona nindi hitukuzeya, hadaha neyi tunakutoñojoka nankashi hayuma yatumwekeneni kunyima, hakukala kutunakumona chayinu mpinji hela neyi tunakwakama nankashi hayuma yakumbidi. (Yish. 24:10) Satana wudi neyi mutupa wunakukeñakeña kanyama kanazeyi katela kukwatayi. Dichi wafwilaña kutulukuka hampinji yitunazeyi muyitoñojoka kulonda atuleteshi tuleki kumukalakela Nzambi. Ilaña neyi twilaña yuma yikutukwasha kukuhwelela chikupu netu Yehova watukeña, tukutwesha kwikala adimanyeka ‘kudikaña’ naSatana nitufuta twindi twakudimbana nawa twatama.—1 Pet. 5:​8, 9; Yak. 4:7.

5. Muloñadi chichalemena kutiya netu Yehova watukeña nawa watwakamenaña nankashi?

⁵ Neyi tukuhwelela netu Yehova watukeña, tukuswina kwakwihi nayena. Talenu chuma chikuletesha tuhoshi muniyi njila. Yehova watuleñeli munjila yakwila tumwekesheleña akwetu kukeña nawa ninetu atumwekesheleña kukeña. Neyi muntu atumwekeshela kukeña, chatusañumunaña ninetu kumumwekeshela kukeña. Dichi neyi tutiyaña netu Yehova watukeña nawa watwakamenaña nankashi, ninetu tukuswejelaku kumukeña. (1 Yow. 4:19) Nawa neyi tuswejelañaku kumukeña, niyena wukuswejelañaku kutukeña. Bayibolu yatulejaña chakadi kuhita mumbadi nawu: “Swinenu kwakwihi naNzambi, niyena wukuswina kwakwihi nanenu.” (Yak. 4:8) Hanu dinu, yumanyi yitwatela kwila yikutukwasha kukuhwelela chikupu netu Yehova watukeña?

YUMANYI YITWATELA KWILA YIKUTUKWASHA KUKUHWELELA CHIKUPU NETU YEHOVA WATUKEÑA?

6. Hakwila tukuhweleli netu Yehova watukeña, yumanyi yitwatela kulomba?

⁶ Shimunenuña mukulomba yuma yimunakukeña nawa lombenuña chakadi kuleka. (Luka 18:1; Rom. 12:12) Mulombenuña Yehova kapampa kakavulu hefuku-hefuku neyi chinatwesheki, kulonda yayikwashi mudimoneña neyi chayimonañayi. Mpinji jikwawu, muchima wenu nateli kuyileja nindi mudi amukunkulwayi chakwila chikuyikalila kukuhwelela nenu Yehova wayikeña. Ilaña anukenu nenu Yehova wabadika muchima wenu. (1 Yow. 3:​19, 20) Wayiluka chiwahi kubadika chimwadiluka enu aweni; wamonaña yuma yimunateli kukañanya kumona. (1 Sam. 16:7; 2 Kushi. 6:30) Dichi mulejenu chimunakutiya, nawa mulombenu ayikwashi kukuhwelela nenu wayikeña. (Mas. 62:8) Kuhiñahu, ilenu kwesekeja namumunalombi kuhitila mukwila yuma yinalondelihu.

7-8. Masamu atukwashaña ñahi kukuhwelela netu Yehova watukeña?

⁷ Kuhwelelenu mwahoshayi Yehova. Wayoneneni ansoneki aBayibolu kumulumbulula chiwahi chekala. Talenu ñimbi yaMasamu Davidi chamulumbulwiliyi chiwahi Yehova. “Yehova wudi kwakwihi nawantu abaluka nyichima; wamwinaña antu ananeñi.” (Mas. 34:​18, tth.) Neyi munaneñi nankashi, hadaha munateli kutoñojoka nenu kwosi wuneluki chimunakutiya hela wunateli kuyikwasha. Ilaña Yehova washiika nindi mumpinji jamuchidiwu wukwikala kwakwihi nanenu, muloña namoni nindi munakukeña wukwashu windi chikupu. Mwisamu dikwawu, Davidi wasonekeli nindi: “Nonaku madilu ami wuyishi mwipakumuna deyi dachitembi.” (Mas. 56:8) Yehova wamonaña neyi munakukabakana. Wayakamenaña nankashi nawa chamukataña kumuchima neyi amona munakukabakana. Neyi chochamonañayi kulema muntu wendaña muchinkalampata menji ashañayi mwipakumuna dachitembi, madilu enu alema nankashi kudi Yehova nawa wanukaña mpinji yejima yimwatiyaña kuyeña mumuchima nikudila. HaIsamu 139:​3, twatañañahu netu: “[Eyi Yehova] weluka njila jami jejima.” Yehova weluka njila jenu jejima, ilaña washaña muchima hayuma yayiwahi yimwelaña. (Heb. 6:10) Muloñadi? Muloña walemesha nankashi yuma yejima yimwelaña hakwila mumutiyishi kuwaha.a

⁸ Chazatishayi nsona jakukundeja jidi neyi iji Mwizu dindi donenewa, chidi hohu neyi Yehova nakuhosha nindi: “Inakukeña wiluki neyi nakukeña nankashi nawa nakwakamenaña.” Ilaña neyi chitwadiza dehi hakusambila, Satana wataandishaña makudi akwila nawu Yehova wayikeña wanyi. Dichi neyi mpinji jikwawu mutachika kujinoka neyi chakwila Yehova wayikeña hela nehi, hudikilenu nakudihula nenu, ‘Hinyi inatela kukuhwelela—“tata yakutwamba” tahindi “Nzambi yachalala”?’—Yow. 8:44; Mas. 31:5.

9. Yehova wayishiika nindidi antu amukeña? (Kwidika 20:​5, 6)

⁹ Toñojokenuña hachuma chayililañayi Yehova antu amukeña. Talenu Yehova chamulejeliyi Mosi niaIsarela. (Tañenu Kwidika 20:​5, 6.) Yehova washiika nindi wukutwalekahu kuyimwekeshela kukeña kwakashinshi antu amukeña. Awa mazu anakutukwasha kukuhwelela netu Nzambi yetu washinshika hanateli kukañanya kumwekeshela kukeña akakudifukula indi amukeñaku. (Nehe. 1:5) Dichi neyi mpinji jikwawu munakukeña kwiluka neyi chakwila Yehova wayikeña, hudikilenu nakudihula nenu, ‘Komana namukeña Yehova?’ Kuhiñahu toñojokenu hachumichi: Neyi mwamukeña nawa munakuzata hakumina ñovu jenu kwila yuma yinakumutiyisha kuwaha, mwatela kwiluka nenu wayikeña chikupu. (Dan. 9:4; 1 Kor. 8:3) Ichi chinatalishi mukwila nawu, neyi mwakuhwelela chikupu nenu mwamukeña Yehova, himwatela kujinoka nenu hayikeñaku. Wakayimwekeshelaña kukeña mpinji yejima nawa hamba kayishiyaku.

10-11. Yehova nakukeña nindi mumoneña ñahi ifutu danyiloña? (AÑalija 2:20)

¹⁰ Toñojokenuña chikupu hefutu danyiloña. Mulambu wefutu danyiloña waYesu Kristu dichawaana chabadika chenkayi Yehova antu. (Yow. 3:16) Komana ichi chawaana chinayikundami ninenu? Eña! Toñojokenu hachuma chamumwekeneni kapostolu Pawulu. Anukenu nenu wakoñeli nshidi yahamesu bwii-i henohu kanda ekali mukaKristu, nawa nihanyima yakwikala mukaKristu watwalekelihu nakulwisha nakuzeyazeya kwindi. (Rom. 7:​24, 25; 1 Tim. 1:​12-14) Ilaña, welukili nindi Yehova wahanini ifutu danyiloña kukoola yena. (Tañenu AÑalija 2:20.) Anukenu nenu Yehova wamwoneneni Pawulu kusoneka awa mazu. Nawa yuma yejima yasonekawu muBayibolu, ayisoneka kulonda etu tudizileñaku. (Rom. 15:4) Mazu aPawulu amwekeshaña nawu Yehova wakeñaña nindi mumoneña ifutu danyiloña nenu hichawaana chayinkayi enu halwenu. Neyi mumonaña ifutu danyiloña muniyi njila, mukukuhwelela chikupu nenu Yehova wayikeña enu halwenu.

¹¹ Twamusakililaña Yehova hakutemesha Yesu kwinza hanu hamaseki nakutufwila. Ilaña chuma chikwawu chenjililiyi Yesu hanu hamaseki hikuleja antu chalala hadi Nzambi. (Yow. 18:37) Ichi chalala mwabombela chatiyañayi Yehova hadi anyanindi.

YESU CHATUKWASHAÑAYI KUKUHWELELA CHIKUPU NETU YEHOVA WATUKEÑA

12. Muloñadi chitwatela kukuhwelela yuma yahosheli Yesu hadi Yehova?

¹² Hampinji yadiñayi heseki, Yesu wayilejeleña antu chakufuma hamuchima chekalayi Yehova. (Luka 10:22) Tukweti wunsahu wawuvulu wukuletesha tukuhweleli yuma yahosheliyi Yesu hadi Yehova. Kafwampi, Yesu washakamini yaaka yayivulu hama naYehova mwiwulu henohu kanda yenzi hamaseki. (Kol. 1:15) Muloña wakudimwena chamukeñeliwu kudi Tata yindi, Yesu welukili Yehova chayikeñayi chikupu anyanindi ashinshika awamayala nawambanda. Yesu wakwashaña ñahi antu kukuhwelela nawu Nzambi wayikeña?

13. Yesu wakeñaña nindi tumumoneña ñahi Yehova?

¹³ Yesu wakeñaña nindi tumumoneña Yehova neyi chamumonañayi. Munyikanda yaNsañu Yayiwahi, Yesu wamutena Yehova nindi “Tata” kubadika hamapampa 160. Nawa neyi nakuhosha nawakakumulondela, wazatishileña mazu akwila nawu “Tata yenu” hela “Tata yenu wekala mumawulu.” (Mat. 5:16; 6:26) Yesu henohu kanda enzi hamaseki, ambuña aYehova ashinshika amuteneneña Yehova nawu ‘Wañovu Jejima,’ ‘Mukakubadika Chikupu,’ ‘Nleñi Wabadika’ ninkumbu jikwawu jadifwanaku. Ilaña Yesu wavulileña kumutena Yehova nindi ‘Tata’ yetu. Awa mazu anakumwekesha nawu Yehova wakeñaña ambuñindi kuswina kwakwihi nayena neyi chaswinañayi mwana kwakwihi natata yindi wamukeña. Mwamweni, Yesu nakukeña tumumoneña Yehova neyi chamumonañayi, netu hiTata yetu wukweti kukeña, wakeña nankashi anyanindi. Tuhanjekenu hayakutalilahu yiyedi mwazatishiliyi Yesu izu dakwila nawu “Tata.”

14. Yesu wamwekesheli ñahi nindi wejima wetu hamuntu-hamuntu twalema kumesu aTata yetu wamwiwulu? (Matewu 10:​29-31) (Talenu cheñi mwevulu.)

¹⁴ Chatachi, tuhanjekenu hamazu aYesu ekala haMatewu 10:​29-31. (Tañenu.) Anzwimba hiyatuda anyanya nankashi nawa hiyanateli kudifukula kudi Yehova hela kumukeñaku. Hela chochu, Tata yetu walemesha nzwimba wudi wejima chakwila welukaña neyi yaholoka heseki. Neyi Yehova walemesha kada kanyanya muniyi njila, twatela kukuhwelela netu walemesha nawa wakamenaña chikupu mukakudifukula washinshika wejima wamukalakelaña muloña wakumukeña! Yesu wahosheli cheñi nindi Tata yetu weluka kuvula kwansuki jitwekala naju kumutu hamuntu-hamuntu. Chineli Yehova weluka nituyuma twanyanya nankashi hadi etu, tunateli kukuhwelela chikupu netu watwakamenaña nankashi. Mwamweni, Yesu nakukeña tukuhweleli netu wejima wetu hamuntu-hamuntu twalema kumesu aTata yetu wamwiwulu.

15. Mazu aYesu ekala haYowanu 6:44 ayikwashaña kwiluka yumanyi hadi Tata yenu wamwiwulu?

¹⁵ Talenu chakutalilahu chamuchiyedi mwazatishiliyi Yesu izu dakwila nawu “Tata.” (Tañenu Yowanu 6:44.) Tata yenu wamwiwulu wayikokeli nkawenu, hela kuyisañumuna hakwila mwiluki chalala. Muloñadi chayikokeleliyi? Muloña wamweni nindi mukweti muchima washinshika. (Yilw. 13:48) Hampinji Yesu yahosheleñayi mazu ekala haYowanu 6:​44, hadaha watalishileña kumazu ahosheliyi Yehova ekala haYeremiya 31:3. Haniyi vasi, Yehova wayilejeli antu jindi nindi: “Nakukokeli kudi ami nakukeña kwakashinshi [hela, natwalekihu kukumwekeshela kukeña kwakashinshi].” (Yere. 31:3; tth.; Esekejenu Hoseya 11:4.) Toñojokenu mwatalisha awa mazu. Tata yetu wamwiwulu wukweti kukeña, wamonaña yuma yayiwahi mudi enu yimunateli kubula kumona enu aweni.

16. (a) Munjila yikwawu Yesu nakutuleja nindidi, nawa muloñadi chitwatela kumukuhwelela? (b) Chumanyi chinateli kuyikwasha kukuhwelela chikupu nenu Yehova diyi Tata yenu wayikeña nawa wayakamenaña nankashi? (Talenu chikasha chinakwila nawu “Tata Wutwafwilaña Wejima Wetu.”)

¹⁶ Hakumulumbulula Yehova nindi hiTata yetu, munjila yikwawu Yesu nakutuleja nindi: “Bayi neyi hiTata yami hohuku, hiTata yenu ninenu. Nawa inakuyileja chalala nami wayikeña nawa wayakamenaña chikupu hamuntu-hamuntu.” Dichi neyi mutachika kujinoka neyi chakwila Yehova wayikeña, hudikilenu nakudihula nenu, ‘Komana kwila nikuhwelela mazu aMwana wamwiluka chiwahi Tata nawa wahoshaña mwalala mpinji yejima nehi?’—1 Pet. 2:22.

TWALEKENUHU KWILA YUMA YIKUYIKWASHA KUKUHWELELA CHIKUPU NENU YEHOVA WAYIKEÑA

17. Muloñadi chitwatela kutwalekelahu kwila yuma yikutukwasha kukuhwelela chikupu netu Yehova watukeña?

¹⁷ Twatela kutwalekahu kukuhwelela chikupu netu Yehova watukeña. Neyi chitwadiza hakusambila, chilumbu chetu wababala, Satana, wukuleka wanyi kufwila kutukañesha kulonda tuleki kumukalakela Yehova. Muloña wakufwila kutuzeyesha, Satana wukutwalekañahu kuzata nañovu kulonda atukojeji tuleki kukuhwelela netu Nzambi watukeña. Bayi tumwiteja Satana atwimiki mushinduku!—Yoba 27:5.

18. Yumanyi yimunateli kwila yikuyikwasha kukuhwelela chikupu nenu Yehova wayikeña?

¹⁸ Hakwila mutwalekihu kukuhwelela chikupu nenu Yehova wayikeña, lombenuña kulonda ayikwashi mudimoneña neyi chayimonañayi. Toñojokenuña nakanañachima hamavasi amuBayibolu amulumbulula Yehova chakamenañayi antu amukeña. Toñojokenuña hachuma chayililañayi Yehova antu amukeña, hanateli kukañanya kumwekeshela kukeña antu amukeñaku. Toñojokenuña chikupu hachichalemena kumona ifutu danyiloña nenu hichawaana chayinkawu enu halwenu. Nawa kuhwelelenu nenu Yehova hiTata yenu wamwiwulu neyi chahosheliyi Yesu. Dichi neyi muntu ayihula nindi: “Chalala munakuhweleli nenu Yehova wayikeña?” mukwakula chakadi kujinoka nenu: “Eña, wankeña! Nawa hefuku-hefuku nazataña hakumina ñovu jami kumwekesha chinamukeña!”