MUTU WUDI HEFU DATACHI | MUNATELI KWIKALA IBWAMBU DANZAMBI
Komana Mudi Ibwambu daNzambi?
“Kwikala ibwambu daNzambi kwaleñelaña mwikali akiñewa nawa himukwakamenañaku. Chidi neyi Nzambi nakuyishinshika kulonda yayikwashi.”—CHRISTOPHER, KANSI WEYALA WAKUGHANA.
“Nzambi wamonaña makabi ejima, wamwekeshaña kukeña nikwakamena nankashi.”—HANNAH WUKWETI YAAKA 13, WAKUALASKA, U.S.A.
“Kwikala nawubwambu wakola naNzambi kwanletelaña muzañalu nankashi nikuwunda.”—GINA, WAKUJAMAICA WUKWETI YAAKA 45.
Bayi neyi Christopher, Hannah, niGina diwu hohu atiyaña mwenimuku. Antu amavulu mukaayi kejima eluka chikupu nawu Nzambi wayimonaña nindi hiyamabwambu jindi. Ndochu enu? Komana mwamonaña nenu Nzambi hibwambu denu? Indi kwiji munakukeña nenu yekali ibwambu denu? Hadaha munakujinoka nenu: ‘Muntu wabula kuwanina nateli kwikala ñahi ibwambu daNzambi Wabadika? Neyi nateli, munjilanyi?’
MUNATELI KWIKALA IBWAMBU DANZAMBI
Kwesekeja nachahosha Bayibolu, tunateli kwikala nawubwambu wakola naNzambi. Bayibolu yahoshaña nawu Nzambi wamuteneni nkakulula kaHeberu Abarahama nindi ‘ibwambu dami.’ (Isaya 41:8) Talenu cheñi mazu asonekawu hamukanda waYakoba 4:8: “Kundamenu kwakwihi naNzambi, niyena wukukundama kwakwihi nanenu.” Mwalala tunateli kwikala nawubwambu wakola naNzambi. Chineli Nzambi hamwekanañaku, munateli ‘kukundama’ ñahi kwakwihi nayena nikwikala ibwambu dindi?
Hakwila twakuli ilu lwihu, shinshikenu yuma yaleteshaña antu ekali amabwambu chikupu. Kakavulu antu asambilaña kudiluka majina. Kuhiñahu, wubwambu wawu wakolaña muloña wakuhanjeka hayuma yinakutoñojokawu niyuma yakeñawu. Muloña wakufwila kudikwasha muyuma yambokamboka wubwambu wawu wakolaña nankashi. Tunateli kwila chochimu hakwikala nawubwambu wakola naNzambi. Tuhanjekenu hayuma yitunateli kwila kulonda twikali amabwambu jaNzambi.