Progilamu Yakudiza Bayibolu Nawantu Ejima

A Yinsahu jaYehova ayiluka nawu ashimwinaña mwiluña mwekala antu amavulu. Mweluka nenu twekala naprogilamu yakudiza Bayibolu nawantu mukaayi kejima?

Mu 2014, aYinsahu akubadika ha 8,000,000 mumatuña 240 alombweli atudizi aBayibolu kwakwihi na 9,500,000 kakweji nikakweji.a Nambaala yawantu itwadizishaña Bayibolu yinabadiki kuvula kwawantu adi mumatuña 140.

Hakwila tuzati iwu mudimu, aYinsahu jaYehova asonekaña maBayibolu, nyikanda, magazini, ninyikanda yikwawu yakudizilamu Bayibolu yakushika ku biliyoni yimu nachikunku mumadimi 700. Iyi nyikanda yakwashaña antu kudiza Bayibolu mwidimi dinakukeñawu.

ÑAKWILU YAMALWIHU EHULAÑAWU ANTU KUTALISHA HAPROGILAMU YETU YAKUDIZISHA ANTU BAYIBOLU

Mwadizishaña ñahi?

Twadizishaña nsañu yamuBayibolu yambokamboka nikuhanjeka nsona muBayibolu yinakuhosha hansañu yitunakuhanjeka. Chakutalilahu, Bayibolu yakulaña malwihu adi neyi: Nzambi hinyi? Himuntu wamuchidinyi? Komana wukweti ijina? Washakamaña kudihi? Komana tunateli kuswila kwakwihi naNzambi? Kuwana hadi ñakwilu muBayibolu kwakala nankashi.

Twakwashaña antu kuwana ñakwilu kuzatisha mukanda wamafu 224 wunakuhosha nawu Chumanyi Chacheni Chatañishaña Bayibolu?b Iwu mukanda awusoneka kulonda wukwashi antu kwiluka ntañishilu yapela yamuBayibolu. Mwekala nsañu yahosha hadi Nzambi, Yesu Kristu, chakabakenañawu antu, kusañuka, kulomba ninsañu yikwawu yayivulu.

Mpinjinyi nawa kudihi kunatela kudizila?

Munateli kudiza mpinji yimunakeñi niluña.

Nateli kudiza mumaora añahi?

Antu amavulu adizaña Bayibolu ora yimu hela kubadikishahu mulungu nimulungu. Hela chochu munateli kuhimpa kuleha kwampinji yakudiza. Tunateli kuhimpa mpinji kwesekeja nandandanda yenu. Antu amakwawu adizaña jiminiti 10 hela 15 mulungu nimulungu.

Mwafweteshaña mali añahi?

Twafweteshaña wanyi hakudizisha. Awa mazu anesekani namazu aYesu alejeliyi atumbanji twindi nindi: “Munatambuli chamukunkulu; kuhana, kahanenu nawa chamukunkulu.”—Matewu 10:8.

Natela kudiza nakushika hadihi?

Munateli kudiza kwesekeja nachimunakukeña. Mumukanda waChumanyi Chacheni Chatañishaña Bayibolu? mwekala tupetulu 19. Munateli kudiza tupetulu tumunakukeña hela twejima.

Komana natela kwikala Chinsahu chaYehova?

Inehi. Tweluka netu muntu wejima wukweti wuswa wakutonda chuma chatela kukuhwelelayi. Hela chochu antu adizaña ntañishilu yamuBayibolu yapela, atela kutondahu aweni.

Kudihi kunatela kuwana nsañu yayivulu?

Ha Webu sayiti ya jw.org hekala nsañu yalala yahosha hakwitiya ninyidimu yawaYinsahu jaYehova.

Nateli kwila ñahi neyi inakukeña muntu wankudizisha Bayibolu?

• Sonekenu fomu yakulombelahu neyi munakukeña kudiza Bayibolu chawana yidi ha www.jw.org/lun nawa temeshenu.

• Sonekelenu keyala yamwituña denu yidi hefu damuchiyedi daniyi magazini.

• Keñenu aYinsahu jaYehova adi kukamwihi nakumwashakamaña. Munateli kukeña aYinsahu jaYehova kuhitila mukuzatisha manambaala amafoni amunodu iluña ekala mumukanda.