Yumanyi Yadizishañawu aYinsahu jaYehova?
AYinsahu jaYehova akuyikwasha kulonda mudizi nsañu yamuBayibolu. Kudiza Bayibolu nanetu kukuyikwasha:
Kwikala namuzañalu muchihandilu
Kwikala ibwambu daNzambi
Kwiluka yuma yayiwahi yakatwililayi Nzambi yashimunawu muBayibolu
Yuma yidi muchinu chibaaba
Neyi niteja kudiza Bayibolu, komana akunkakeja kwikala Chinsahu chaYehova?
Neyi nadizahu dehi Bayibolu nawaYinsahu jaYehova? Nateli cheñi kutachika kudiza?
Mwetejaña muntu kutachika kudiza Bayibolu yomweni chakadi kwikala namuntu wakumudizisha?
Yumanyi yamwekanaña hakudiza Bayibolu?
Chinsahu chaYehova wunakuyidizisha wukuyikwasha kulonda mwiluki nsañu yekala muBayibolu hamutu-hamutu. Mukanda waMunateli Kwikala naMuzañalu Haya Nyaaka! wukuyikwasha kwiluka nsañu yayivulu yamuBayibolu nichiyinateli kuyikwasha. Neyi munakukeña kwilukilahu nsañu yikwawu, talenu iyi vidiyo.
Mali añahi afweteshañawu hakwili wudizi Bayibolu?
Hiyafweteshañaku. AYinsahu jaYehova ovwahilaña lushimbi lwaheniyi Yesu kudi atumbanji twindi nindi: “Mwatambwilili chamukunkulu, hanenu chamukunkulu.” (Matewu 10:8) Kubombelahu, nyikanda yitwazatishaña hakudiza Bayibolu, yidi neyi Bayibolu nimukanda waMunateli Kwikala naMuzañalu Haya Nyaaka! twahanaña yawaana.
Nukudiza hadi tukweji tuñahi?
Mukanda wejima wudi nanyitu yansañu 60. Neyi munakukeña kumanisha swayi kudiza kwejima chinashindamena hadenu, antu amavulu itwadizaña nawu asakulahu kumanisha mutu wansañu wumu hela yiyedi mumulungu.
Nukwila ñahi hakwila nitachiki kudiza?
1. Sonekenu fomu yahaintaneti. Neyi munatemeshi dehi fomu tukuzatisha nsañu yimunatemeshi kulonda tuleji Chinsahu chaYehova yahanjeki nenu.
2. Chinsahu chaYehova wutukuleja wukuyitemeshela foni. Chinsahu chaYehova wukuyidizishaña wukuyileja yuma yimukwilaña hakudiza Bayibolu nawa wukwakula nimalwihu ejima imukweti.
3. Mukutiyañana enu ayedi chimukudizaña. Munateli kushakama hamu nakudiza, munateli kutatisha foni hela vidiyo confalence, nyikanda, hela maemelu. Amavulu akeñaña kudiza hadi ora yimu, ilaña twekala wanyi namwakukumina, enu aweni munateli kutuleja mpinji yimunakukeña kudiza.
Nateli kweseka kudizaku hohu chantesha?
Eña. Neyi dichimunakukeña, sonekenu fomu yahaintaneti. Chayitemeshelawu kudi Chinsahu chaYehova mulejenu nenu munakukeña kweseka kudiza kulonda mutiyi neyi munateli kutwalekahu. Wukuzatisha broshuwa yaMunateli Kwikala naMuzañalu Haya Nyaaka! mudi kudiza kusatu kwakutachikilahu, kukuyikwasha kumona neyi mukukeña kutwalekahu kudiza Bayibolu hela nehi.
Neyi niteja kudiza Bayibolu, komana akunkakeja kwikala Chinsahu chaYehova?
Inehi. Etu aYinsahu jaYehova twakeña kudizisha antu Bayibolu, ilaña hitwakanjikijaña muntu wudi wejima kwikala Chinsahu chaYehovaku. Twayidizishaña nakalemesha yuma yahosha Bayibolu nawa tweluka netu muntu wejima wukweti wuswa wakusakulahu yuma yatela kukuhwelelayi.—1 Petulu 3:15.
Nakasunuka kuzatisha Bayibolu yami?
Eña, mwakasunuka kuzatisha Bayibolu yejima yimunakeñi. Hela chakwila twazatishaña Bayibolu yapela kutiya nawa yoloka yaNsona jaKaayi Kakaha, neyi muntu nakukeña kuzatisha Bayibolu yenjililayi tukumukaanisha wanyi.
Nateli kutambikaku amakwawu kulonda tudizili nawu hamu?
Eña. Munateli kutambika chisaka chenu hela amabwambu kulonda mudizili hamu.
Neyi nadizahu dehi Bayibolu nawaYinsahu jaYehova? Nateli cheñi kutachika kudiza?
Eña. Kafwampi, mukutiya kuwaha kudiza Bayibolu mumukanda wetu wawuha, muloña anawusoneki kulonda wukwasha antu amavulu kudiza Bayibolu. Iwu mukanda wawuwahi muloña mudi nyevulu nimavidiyo kubadika nyikanda yikwawu yitwazatishileña kunyima.
Mwetejaña muntu kutachika kudiza Bayibolu yomweni chakadi kwikala namuntu wakumudizisha?
Eña. Hela chakwila atudizi amavulu adizaña jajivulu neyi anakuyidizisha kudi muntu, amakwawu akeñaña kutachika kudidizisha aweni. Nsañu yidi haChadizishaña Bayibolu hawebusayiti yetu yikuyikwasha kudidizisha enu aweni Bayibolu. Mukuwanahu mutu wunakuhosha nawu:
Malwihu amuBayibolu anayakuli. Yibaaba yidimu yakula malwihu amavulu nankashi ehulañawu antu kutalisha haBayibolu.