Kwakama Chakuhemba Chisaka

Janet wahosheli nindi, “Hashimbwili wanyi kufuma hafwili atata, nfumwami walejeli nindi wudi namumbanda mukwawu. Hashimbwili wanyi, chakadi nikunleja hela kushiika, wakombeli yuma yindi nakunshiya nawanyana ayedi.” Janeti waweni mudimu, ilaña kawufwetu kakulandamu yuma yamwitala kakeheli. Janet hamweneña kukala kwamali hohuku. Wahosheli nindi: “Nadakameneneña nankashi nami nekala dehi namudimu weneni wunukudikitaña nkawami.” Watwalekeluhu nindi, “Natoñojokeleña nami nukukañanyaña kukeñela anyanami yuma yayivulu yenkañawu akwetu anvwali anyanawu. Niyinu mpinji, neluki wanyi chanmonañawu akwetu nianyanami. Kwiji atoñojokaña nawu chiña nazatili nañovu kulonda nihembi maluwi ami?”

Kulomba kwawundishaña yitoñojoka yaJaneti kulonda yatwalekuhu kwikala nawubwambu naNzambi. Nindi, “Chankalilaña nankashi nawufuku neyi mwejima munamweni nawa yitoñojoka dihu yaswejaña.” Kulomba nikutaña Bayibolu diyuma yankwashaña kukama. Nsañu yinasweja kukeña yekala haAfwilipi 4:6, 7 yahosha nawu: ‘Bayi mwakama chumaku; ilaña mulejenu Nzambi yuma yejima yimunakeñi mukulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu.’ Kakavulu nawufuku nalombaña nawa kuwunda kwaYehova kwankundejaña.”

Mazu akukolesha ahosheliyi Yesu kutalisha hakulomba muMpanji yindi yaHampidi akwila nawu: “Tata yenu neluki yuma yimunabuli himuchidi kanda mulombi kudi yena” azatikaña muyuma yejima yitwakamaña. (Matewu 6:8) Twatela kumulomba. Kulomba diyi njila yeneni ‘mutwakundaminaña kwakwihi naNzambi.’ Yumanyi yafumañamu? “Niyena wukukundama kwakwihi nanenu.”—Yakoba 4:8.

Kulomba kwatukwashaña muyuma yayivulu yinabadiki hakutiya chiwahi neyi tuhosha hayuma yitunakwakama. Yehova, ‘Mukwakutiya kulomba,’ niyena wayililaña yuma ejima amukeñakeñaña nakashinshi. (Masamu 65:2) Dihafumini Yesu kuleja atumbanji twindi nindi, atela ‘kulomba mpinji yejima chakadi kuleka.’ (Luka 18:1) Tumulombeña Nzambi kulonda yatulomboleña nikutukwasha, nikukuhwelela netu wakatwinka wuloku muloña wachikuhwelelu chetu. Bayi tujinoka netu hakweti mpwila hela wuswa wakutwilila yuma yitunamulombuku. ‘Kubula kuleka kulomba’ muniyi njila kwamwekeshaña nawu tudi nachikuhwelelu chikupu.—1 Atesalonika 5:17.

MWATALISHA KWIKALA NACHIKUHWELELU

Indi chikuhwelelu hichumanyi? Chikuhwelelu chabombelamu ‘kumwiluka’ Nzambi netu himuntu. (Yowanu 17:3) Chatachi, twelukaña yitoñojoka yaNzambi kuhitila mukutaña Bayibolu. Twadizaña netu watumonaña wonsu wetu nawa nakukeña kutukwasha. Hakwila twikali nachikuhwelelu chalala twatela kwiluka yuma yayivulu kubadika kumwiluka hohu Nzambi. Cheñi twatela kwikala nawubwambu wakola nayena. Chochakwatañawu antu wubwambu, wubwambu wetu hiwukutwesha kukola mukapinji kanteshaku. Chikuhwelelu chetu ‘chakolaña’ mukuhita kwampinji hampinji yitunakumwiluka, hampinji ‘yitunakwila yuma yamutiyishaña kuwaha’ nihampinji yitunakutambwila wukwashu windi. (2 Akorinda 10:15; Yowanu 8:29) Chikuhwelelu chamuchidiwu dichamukwashaña Janet kuumika kwakama.

Janet nindi, “Chuma chacheni chinaleteshi nikali nachikuhweleli chakola hikumona chikasa chaYehova muyuma yejima yitwelaña.” Watwalekeluhu nindi “kakavulu atwilaña katama chakwila twamonaña netu hitukutwesha kuumikaku. Kuhitila mukulomba nankashi, Yehova watubuzilaña njila chakwila kankawami hinukutweshaku. Chinamusakilila, nanukaña yuma yayivulu yinakoñeliyi. Watukwashaña kakavulu hampinji yatelela. Wanyinka amabwambu alala akwaKristu amayala niambanda. Ankwashaña mpinji yejima nawa ekala akutalilahu amawahi kudi anyanami.”a

“Neluki chahoshelayi Yehova haMalaki 2:16 nindi: ‘Nahela kudiseña.’ Chumichi chikuneñesha nankashi mukwenu wunabuli muloña. Munahiti yaaka yayivulu kufuma hanshiliyi nfumwami, ilaña kumuchima kwayeñaña mpinji jikwawu. Neyi hikukuyeña, nayaña nakukwasha antu amakwawu, iyi njila yinankwashi nankashi ninami.” Kuzatisha lushimbi lwakubula kudambula kudi akwetu lunamukwashi Janeti kuumika yuma yamwakameshaña.b—Yishimu 18:1.

Janet nindi “chuma cheneni chankundejaña,” neluka nami Nzambi ‘hitata yawanyana abula atata jawu nawa mukwakukiña antuluwa.’ Hamba katushiya neyi chanshiyayi nfumwamuku. (Masamu 68:5) Janet weluka nindi Nzambi hatwesekaña “nayuma yatamaku.” Ilaña wahanaña maana ‘nankashi kudi antu ejima’ nawa wahanaña “ñovu jabadika nankashi” kulonda yatukwashi kuumika yuma yitwakamaña.—Yakoba 1:5, 13; 2 Akorinda 4:7.

Tunateli kwila ñahi neyi tunakwakama muloña chihandilu chetu chidi muwubanji?