“Mudimu Weneni”

HIMPINJI yalema yakubulakana muYerusalema. Mwanta Davidi natambiki atulamba, atulala niamayala añovu. Anakufwila kutiya nsañu yalema. Yehova namuleji Solomoni mwana kaDavidi kutuña itala deneni adihani kudi Nzambi walala kulonda adifukwileñamu. Mwanta wawaIsarela washinakaja dehi anamuleji naspiritu yajila chakutuña nawa namuleji Solomoni. Davidi hakuhosha nindi, ‘Mudimu weneni, muloña tembeliyi hiyamuntuku yaYehova Nzambi.’—1 Kushi. 28:1, 2, 6, 11, 12; 29:1.

Kuhiñahu Davidi hakwihula nindi: “Wukulambula chakutiya kuwaha adijiliki lelu ekali waYehova hinyi?” (1 Kushi. 29:5) Neyi mwadiña kwoku, mwadi kwakula nenudi? Mwadi kudihana kukwasha iwu mudimu? A Isarela atachikili kukwasha iwu mudimu. Mwamweni, ‘azañaleli nanochu chalambwiluwu chakutiya kuwaha muloña amulambwili Yehova namuchima walala chikupu chakutiya kuwaha.’—1 Kushi. 29:9.

Chimwahitili yaaka, Yehova waloñesheli chuma chalema kubadika tembeli. Waloñesheli tembeli yaneni yakuspiritu, chuma chakwashaña antu kukundama kudi yena mukudifukula kushindamena hamulambu waYesu. (Heb. 9:11, 12) Yehova nakukwasha ñahi antu makonu kukundama kudi yena? Kuhitila mumudimu wetu wakwilisha atumbanji. (Mat. 28: 19, 20) Chinakufumamu, chaaka nichaaka mamiliyoni awatudizi aBayibolu anakudizishewa, makombakanji awatumbanji anakupapatishewa nawa nkulakaji yayipompelu yinakutuñewa.

Dichi, iku kuvula kwawantu kunakukeña kupulinta nyikanda yayivulu yashindamena haBayibolu, kutuña Matala aWanta nikutuña maluña akupompela kupompa kwanyanya nikwamaneni. Komana mukwiteja wanyi nenu mudimu wetu wakutandisha nsañu yayiwahi weneni nawa mwafumaña yuma yayiwahi?—Mat. 24:14.

Kumukeña Nzambi niantuñinetu nikuzata mudimu wakushimwina Wanta mukunyakashana kwakwojejaña antu jaNzambi “kulambula chakutiya kuwaha . . . kudi Yehova” kuhitila mukuhana yawaana. Twatiyaña kuwaha ‘kumulemesha Yehova nayuma yetu yalema’ nikumona anakuyizatisha munjila yayiwahi.—Yish. 3:9.

Njila Mwahaninañawu Amakwawu Yawaana Yakukwasha Mudimu Wamukaayi Kejima

Antu amavulu makonu “atentekaña mali hambadi” nakusha muchikasha chamuchipompelu chasonekawu nawu “Mudimu Wamukaayi Kejima.” (1 Kor. 16:2) Kakweji nikakweji, yipompelu yatemeshaña iyi yawaana kukasanji kawaYinsahu jaYehova kamwituña dawu. Ninenu munateli kutemesha yawaana yamali kuhitila mukuzatisha mutayi wetejawu munshimbi wazatishañawu aYinsahu jaYehova mwituña denu. Hakwila mwiluki mutayi wetejawu munshimbi, mwani ihulenu kasanji kamwituña denu kawaYinsahu jaYehova. Makeyala munateli kuyiwana ha www.jw.org/lun. Nyitapu yayawaana yimunateli kutemesha kukasanji diyi iyi:

YAWAANA YAKUDIKEÑELA

Yawaana yakutuma kuzatisha intaneti, debit card, credit card, hela mobile money transfer. Mutusanji tukwawu azatishaña jw.org hela webu sayiti yetejawu.
Munateli kuhana mali, yingelingeli hela yuma yikwawu. Mwatela kusoneka mukanda nakuwutemeshela hamu namali hela yawaana yidi yejima yimunatemeshi.

NJILA YAKUHANINAMU MALI AKUSONDAMISHA

Mwatela kuhana mali kulonda ayizatishi kumudimu wamukaayi kejima nawa neyi himukukeña mali enu akuyifuntishila.
Mwatela kusoneka mukanda nakuwutemeshela hamu namali hela yawana yidi yejima yimunatemeshi.

NJILA JIKWAWU JAKUHANINAMU YAWAANA

Kubombela hayawaana yamali niyuma yalema wuseya, kudi njila jimunateli kuhaninamu yawaana hakukwasha mudimu waWanta mukaayi kejima. Iji njila anajishimuni heshina. Henohu kanda mutemeshi yawaana, mwani sambilenu kwihula kasanji kamutayi kamwituña denu kulonda mwiluki njila jazatishañawu mwituña denu. Chineli nshimbi ninyisonku yashiyashana, mwatela kwihula antu akuluka yitembi munsañu yanyisonku ninshimbi henohu kanda muwani njila yayiwahi yakuhaninamu yawaana.

Inshuwalansi: Munateli kusoneka nenu aWatch Tower Bible and Tract Society of Pennsylvania diwu atela kutambula mali akukiñilamu wumi

Mali Akunyambawulu: Mali akunyambawulu, yipapilu yimwaswekejelañahu mali, hela mali apeshoni mwatela kuyihana kudi aWatch Tower Bible and Tract Society of Pennsylvania neyi munafwi, kwesekeja nanshimbi yanyambawulu yamwituña denu.

Mali Asompokañamu: Antu amakwawu ekala namakampani nawa mali asompokañamu ayihanaña chawaana kuWatch Tower Bible and Tract Society of Pennsylvania hela anateli kusoneka nawu neyi wena mwiluña mwosi aWatch Tower Bible and Tract Society of Pennsylvania diwu akatambula mali.

Mpata Hela Matala: Munateli kuhana itala hela mpata yatela kulandishawu neyi chawaana, neyi mudi netala mwatela kusonekesha nenu mukashila aWatch Tower Bible and Tract Society of Pennsylvania, enu aweni mukutwalekahu nakushakamamu.

Chawaana chahaChaaka: Iyi hinjila yimu yakuhaninamu mali hela njila yikwawu yakuhembelamu mali kumutayi wazatishañawu aYinsahu jaYehova. Mukwakuhana niyena hela muntu mukwawu anenkuwu iwu mudimu kudi mukwakuhana, wukutambulaña nfwetu hachaaka hachaaka muchihandilu chindi.

Mawilu niYikumba: Munateli kuloñesha nenu yikumba yenu hela mali akayihani neyi munafwi. Munateli kusonekesha nenu yikashali mumakasa aWatch Tower Bible and Tract Society of Pennsylvania kuhitila mukusoneka wilu, munateli kusoneka nenu aWatch Tower Bible and Tract Society of Pennsylvania diwu akatambula yikumba. Neyi muhana yikumba yenu kulonda yikwasheña chipompelu yikuyileñela mubuleña kufweta nyisonku.

Neyi munakukeña kwiluka nsañu jajivulu, munateli kwihula kukasanji kawaYinsahu jaYehova kamwituña denu.