“Muntu Wukweti Chisambu Wakakooleka”
KUFUMA tuhu kunyima, nyilambu yekala chibalu chamukudifukula kwalala. A Isarela alambwileña anyama, nawa akwaKristu ayiluka nawu ahanaña “mulambu wakuhameka.” Hela chochu, kudi cheñi nyilambu yikwawu yamutiyishaña Nzambi kuwaha. (Heb. 13:15, 16) Iyi nyilambu yaletaña muzañalu ninkisu neyi chinamwekeshiwu muyakutalilahu yinalondelihu.
Hana, kambuña washinshika wadiñaku kunyima wakeñeleña mwana chikupu, ilaña wavwalileña wanyi. Mukulomba kwindi, wamulejeli Yehova nindi neyi wukuvwala mwana weyala, wakamwinkayi “Yehova akekali windi hohu mafuku indi ejima amba kahandayi.” (1 Sam. 1:10, 11) Chimwahitili mafuku, Hana wemitili ivumu nawa wavweli mwana weyala watumbiliyi nindi Samweli. Samweli chasumukiliyi, Hana wamutwalili kutabanaka, neyi chochakaniniyi. Yehova wamukwiswilili Hana muloña wamuchima windi wakudihana. Wavweli cheñi anyana amakwawu 5 nawa Samweli wekalili kaprofwetu nawa wadiña nsoneki yaBayibolu.—1 Sam. 2:21.
Kufwana Hana niSamweli, akwaKristu makonu ahanaña wumi wawu kuzata nyidimu ya Nleñi yewu. Yesu wahosheli nindi akatukiswila hanyilambu yejima yitwahanaña hakudifukula kudi Yehova.—Maku 10:28-30.
Mumafuku awapostolu, mumbanda mukwaKristu wejina daDokasi amwilukili muloña wazatileña “nyidimu yayiwahi yayivulu nawa wahanineña yawaana yaluwi,” yawaana yahanineñayi yakwashili antu amakwawu. Chawushona, “wakatili nawa wafwili,” chumichi chaletesheli chipompelu kuneña. Atumbanji chatiyiliwu nawu Petulu wadiña mwiluña, amutambikili nawu yenzi. Atela azañaleli chikupu chamusañwiliwu Dokasi kudi Petulu. (Yilw. 9:36-41) Nzambi havulameneni nyilambu yaDokasiku. (Heb. 6:10) Chisambu chamwekesheliyi achisoneka Mwizu daNzambi kulonda etu tumwimbujoleña.
Kapostolu Pawulu niyena wazatishili mpinji yindi kwakamena antu. Pawulu wayisonekeleleli amanakwindi amuKorinda nindi: “Ami nakahana yuma yami yejima namuzañalu nikudihana ami aweni kukoola enu.” (2 Kor. 12:15) Pawulu welukili nindi kudihana kuzatila akwawu kwaletaña muzañalu, sweje-e Yehova watiyaña kuwaha nawa wakiswilaña.—Yil. 20:24, 35.
Mwamweni, Yehova watiyaña kuwaha neyi tuzatisha mpinji niñovu yetu hakutwamijaku Wanta nikukwasha akwetu akwakwitiya. Kudihu cheñi njila jikwawu mutunateli kukwashila mudimu wakushimwina Wanta? Eña! Kubombela hayuma yitunashimuni, tunateli kumelemesha Nzambi nayawaana yetu yakuhana chakufuma hamuchima. Yazatikaña kumudimu wakushimwina wamukaayi kejima, wabombelamu kukwasha amishonali niantu adi mumudimu wampinji yejima. Kubombelahu, iyi yawaana yazatikaña hakukukwasha mudimu wakuloñesha nikubalumuna nyikanda nimavidiyo, kukwasha kunamwekani wubanji wadimwekenaña nikutuña Matala aWanta. Tunakuhweleli chikupu netu muntu “wahanaña” akamukiswila. Kubombelahu, neyi tuhana yuma yetu yalema, dikwila nawu tunakumulemesha Yehova nayuma yetu yalema.—Yish. 3:9; 22:9