Akwakwendela Hatuwalu Awana niNenu

Akwakwendela Hatuwalu Awana niNenu Lushindu lwayikwa lunakutiyakana chikupu! Tuwalu tuwana niakwakwendelahu anakumwekesha chikupu nawu iyi nsañu yalala! Kawalu katachi katooka nawa mukwakwendelahu himuntu walema mwanta wamuha anavwikiwu chibañula. Hanyima yindi hihakulondela kawalu kachinana kanakwimenaku mukwakwendelahu wunakufumisha kuwunda hamaseki. Hihakulondela cheñi kawalu kamuchisatu, keyila neyi wufuku, hadi mukwakwendelahu nakwati pezu iku anakubidika nsañu yakukeha kwayakuda. Hihakulondela cheñi kawalu kamuchiwana katokoloka, kakweti chinjikijilu chayikatu niyuma yikwawu yatama yakisañanaña nawa wunakwendelahu Hikufwa. Nawa Ijamu, dawantu ejima, dinakumulondela mukamwihi, dinakuloñejeka mawumi awantu amavulu!—Chimwekeshu 6:1-8.

“Natiyili woma chinatañili katachi iyi nsañu yahosha hadi akwakwendela hatuwalu awana. Natoñojokeli nami Ifuku daWunsompeshi dinakwinza, chineli nadiña kanda nidiloñeshi nelukili nami nikupuluka wanyi.”—Crystal

“Natiyili kuwaha nansañu yawakwakwendela hatuwalu awana adiña hatuwalu twashiyashana. Chinelukili mwatalisha ichi chimwenu, natiyishili nsañu yejima.”—Ed.

Munateli kutiya neyi chatiyiliyi Crystal kutalisha hadi akwakwendela hatuwalu awana anakwimenaku kukuma kwakaayi? Indi kwiji munateli kutiya neyi chatiyiliyi Ed? Mudi mwejima mumukutiyila, kwenda kwanawa akwakwendela hatuwalu kwemenañaku nsañu yelukawu chikupu yekala muChimwekeshu, mukanda wakukumishaku wamuBayibolu. Munateli kuhetelamu neyi mutiyishisha ichi chimwenu. Munjilanyi? Nzambi wakana nindi munateli kuwana muzañalu walala kuhitila mukutaña, kudiza nikwila yuma yasonekawu muniwu mukanda wawuprofwetu.—Chimwekeshu 1:1-3.

Hela chakwila antu amakwawu atiyaña woma nanichi chimwenu chawakwakwendela hatuwalu awana, ilaña ichi chimwenu hiyachisonekeli nawu chiyitiyisheña womaku. Kafwampi, antu amavulu anakoleshi chikuhwelelu chawu muloña wanichi chimwenu nawa chinayikwashi kutwalekahu kuchiñeja yuma yayiwahi yidi kumbidi. Chinateli kuyikwasha ninenu! Mwani twalekenuhu kutaña iyi nsañu.