“Nzambi Wadiña Kudihi?”

NEYI KUMWEKANA WUBANJI, MWADIHULAHU DEHI NENU: ‘NZAMBI WADIÑA KUDIHI?’ INDI KWIJI KUDIHU KUKALA KUMWAMWENI MUCHIHANDILU CHENU KWAYILETESHELI MUDIHULI NENU NZAMBI WAÑAKAMENAÑA?

Hadaha munakutiya neyi chatiyiliyi Sheila, washakamaña kuUnited States. Wakulili muchisaka chawakwakwitiya, wahosheli nindi: “Kufuma tuhu kuwansi wami namwilukili Nzambi muloña diyi Ileñi yetu. Ilaña wadiña ibwambu dami wanyi. Nelukili nami wammweneña, ilaña wammweneneña hahalehi. Hinatoñojokeleña nami Nzambi wanhelaku, ilaña nelukili wanyi neyi wankeña.” Muloñadi Sheila chajinookeleleñayi neyi Nzambi wamukeña? Wahosheli nindi: “Chisaka chetu chahitili mukukala kwamboka mboka nawa Nzambi watukwashileña wanyi.”

Kufwana Sheila hadaha ninenu mweluka chikupu nenu Nzambi wekala kwoku. Ilaña, munateli kujinooka neyi Nzambi wayakamenaña. Iyala washinshika Yoba, welukili ñovu nimana aNleñi, niyena wadiña nakujinooka. (Yoba 2:3; 9:4) Chelili Yoba yamoni makabi asweja niwakumukwasha nehi, wamwihwili Nzambi nindi: ‘Wanswekelañadi mesu eyi, wunfwikiji neyi nidi chilumbu cheyi?’—Yoba 13:24

Bayibolu yahoshaña nawudi? Twatela kumwinka Nzambi muloña neyi kumwekana wubanji? Kudihu wunsahu wunakumwekesha nawu Nzambi wakamenaña antu ejima nihamuntu hamuntu? Kudihu wumu hakachi ketu wuneluki chikupu neyi chakwila Nzambi watumonaña, watwiluka, wukweti luwi hela watukwashaña mumakabi etu?

Muyibaba yinalondelihu, tukushinshika hayileñaleña chiyatudizishaña nawu Nzambi watwakamenaña. (Aroma 1:20) Kuhiñahu, tukuzatisha Bayibolu kulonda twiluki chatwakamenañayi Nzambi. Yileñaleña yindi niIzu dindi yikutukwasha ‘kumwiluka’ nankashi, kuhiñahu tukwiluka chikupu netu ‘watwakamenaña.’—1 Yowanu 2:3; 1 Petulu 5:7.