Nzambi Keña Yafumishihu Makabi Ejima

“Eyi Yehova, nukudila dile e kushika kumwakanyi chakadi eyi kutiya? Nabidiki kudeyi jamadombu, eyi kwamwina nehi.” (Habakuki 1:2, 3) Awa himazu aHabakuki, iyala wadiña hibwambu daNzambi. Mazu indi anakumwekesha kubula chikuhwelelu? Inehi mwani. Nzambi wamulejeli Habakuki nindi wadiña watoñola dehi mpinji yakufumishahu makabi.—Habakuki 2:2, 3.

Neyi munakukabakana hela muntu imwakeña nakubakana, munateli kuhosha nenu Nzambi nakulaba kufumishahu makabi muloña nayikwashi wanyi. Ilaña Bayibolu yatulejaña nawu: “Yehova hanakulaba kutalisha hakushikija chikaninu chindi neyi chatoñojokañawu antu amu nawu nalabiku, ilaña wadiwunjika nanenu muloña hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.”—2 Petulu 3:9.

NZAMBI WAKAFUMISHAHU MAKABI MPINJINYI?

Katataka! Yesu wahosheli nindi ikiñu dimu dikamona yuma yashiyashana yikamwekesha “kukuma kwanshakaminu yamakonu.” (Matewu 24:3-42) Kushikijewa kwawuprofwetu waYesu mumafuku etu kunakumwekesha nawu Nzambi keña yafumishihu yuma yatama.a

Hanu dinu Nzambi wakafumishahu ñahi makabi ejima? Yesu hadiñayi hamaseki, wamwekesheli ñovu yaNzambi yakufumishahu makabi ejima. Talenu yuma yeliliyi.

Wubanji Wadimwekenaña: Yesu nawapostolu indi chazambukileñawu kaluñalwinji kaÑaliliya, mpepela yeneni yakeñeleña kujishiyisha watu. Ilaña Yesu wamwekesheli nindi yena niTata yindi akweti ñovu yakukañesha wubanji wadimwekenaña. (Akolosi 1:15, 16) Yesu wahosheli nindi: “Mwena! Wundaku nzo-o!” Chumanyi chafuminimu? “Mpepela yalekeli nawa hawundili chikupu.”—Maku 4:35-39.

Yikatu: Antu elukili chikupu nawu Yesu wadiña nawuswa wakuuka amputamesu, akwachinkonya, akwakalepa niyikatu yikwawu. ‘Wokili ejima adiña akata.’—Matewu 4:23, 24; 8:16; 11:2-5.

Kukeha kwayakuda: Yesu wazatishili ñovu yamwikeliwu kudi Tata yindi yakuvulisha yakuda. Bayibolu yahosha nawu hadiñayi nakushimwina, wadiishili makombakaji awantu kayedi.—Matewu 14:14-21; 15:32-38.

Kufwa: Nsañu yahosha hachasañwiliyi antu kasatu yamwekeshaña nawu Yehova wukweti ñovu yakufumishahu kufwa. Muntu wumu wasañwiliyi wafwili hadi mafuku awana.—Maku 5:35-42; Luka 7:11-16; Yowanu 11:3-44.