Malwihu Kufuma Kudi Antañi

Mumpinji yawaIsarela, komana mwivumu mwavwalikililiyi Mesiya alondeleleña wedi?

Mpinji yimu twahoshahu dehi muniyi njila. Chumichi chinesekani namazu itwatañaña haAheberu 12:16. Iyi vasi yamwekeshaña nawu Esawu wabulili “kulemesha yuma yajila” nawa “wahimpili [naYakoba] wuswana windi wakwikala wedi nayakuda, yakuda kamu hohu.” Chumichi chamwekeshili nawu Yakoba wekalili ‘nawuswana wakwikala wedi,’ nawa wekalili nkakulula mwavwalikililiyi Mesiya.—Mat. 1:2, 16; Luka 3:23, 34.

Hela chochu, nsañu yamuBayibolu yamwekeshaña nawu muntu hateleleli kwikala wedi mwaka yekali nkakulula yaMesiyaku. Shinshikenu nsañu yimu:

Rubeni diyi wadiña wedi waYakoba (Isarela), wavweliyi mudi Leya. Kuhiñahu, mwana kaYakoba wawedi mudi ñodindi akeñeliyi Racheli wadiña Yosefu. Rubeni cheliliyi yuma yatama, amutambwili wuswa windi wakwikala wedi nakumwinka Yosefu. (Kutach. 29:31-35; 30:22-25; 35:22-26; 49:22-26; 1 Kushi. 5:1, 2) Hela chochu, Mesiya wavwalikilili wanyi muchisaka chaRubeni hela chaYosefu. Wavwalikilili muchisaka chaYuda, mwana kaYakoba naLeya wamuchiwana.—Kutach. 49:10.

Luka 3:32 yashimuna antu 5 amuchisaka mwavwalikililiyi Mesiya. Chidi neyi muntu wejima ashimunawu wadiña wedi. Bowazi wavweleli Obed, nawa Obedi wavweleli Jesi.—Luti 4:17, 20-22; 1 Kushi. 2:10-12.

Hela chochu, Davidi mwana kaJesi hadiña wediku. Diyi wadiña kabinda hadi anyana 8 awamayala. Ilaña Mesiya wavwalikilili muchisaka chaDavidi. (1 Sam. 16:10, 11; 17:12; Mat. 1:5, 6) Munjila yoyimu, Mesiya wavwalikilili mudi Solomoni, hela chakwila hadiña mwana kaDavidi wawediku.—2 Sam. 3:2-5.

Chumichi hichinayi mukwila nawu kwikala wedi kwadiña kwamukunkulwayiku. Mwana wawedi adiña nakumulesha nawa kakavulu wahiñileña hawumutu wetala. Wadiña cheñi nakuswana maseka ayedi ayuma.—Kutach. 43:33; Kuhit. 21:17; Yosh. 17:1.

Ilaña wuswa wakwikala wedi adiña nakuwutuntulula. Abarahama wamutambwili Ishimeli wuswa wakwikala wedi nakumwinka Isaka. Nawa neyi chitwashimuna hewulu, Rubeni amutambwili wuswa wakwikala wedi nakumwinka Yosefu.

Ichi tuhanjekenu haHeberu 12:16, hahosha nawu: “Babalenu kuchiina hakachi kenu hakenda kekala chivumbi, hela muntu wabulaña kulemesha yuma yajila, neyi chadiñayi Esawu wahimpili wuswana windi wakwikala wedi nayakuda, yakuda kamu hohu.” Iyi nsona yatalisha mudihi?

Kapostolu Pawulu wahosheleña wanyi hachisaka mwavwalikililiyi Mesiya. Wadiña nakukolesha akwaKristu kulonda ‘atwalekihu kwolola njila jakwendamu nyendu yawu.’ Chumichi chikuyileñela kubula “kukañanya kutambwila luwi lwaNzambi lwasweja,” neyi adiñija muwuvumbi. (Heb. 12:12-16) Neyi ela mwenimu, adi kwikala neyi Esawu. Wabulili “kulemesha yuma yajila,” ‘nakuyijilola.’

Esawu wadiñaku hampinji yadiñaku ankakulula, nawa mpinji yikwawu watela wadiña nakulambula nyilambu. (Kutach. 8:20, 21; 12:7, 8; Yoba 1:4, 5) Ilaña muloña wanzala, Esawu wahanini iku kukooleka kwejima nasupu. Hadaha wachinineña kukala kwashimwiniwu kwenjileña hadi mwana kaAbarahama. (Kutach. 15:13) Esawu wamwekesheli nindi wajilolileña, nawa walemesheli wanyi yuma yajila chelili yasumbuli ambanda ayedi abulileña kudifukula kudi Nzambi, waneñesheli anvwali jindi. (Kutach. 26:34, 35) Ilaña Yakoba dicheliliyi wanyi, yena wasumbwili muntu wadifukwileña kudi Nzambi walala!—Kutach. 28:6, 7; 29:10-12, 18.

Tukukunkulula netudi kutalisha hachisaka mwavwalikililiyi Yesu, Mesiya? Mpinji yikwawu antu amakwawu mwavwalikililiyi adiña awedi, ilaña bayi neyi ejima adiña awediku. A Yudeya elukili chumichi nawa achitejeli, chelili eteji nawu Kristu wakafuma mumutaña waDavidi, kabinda kaJesi.—Mat. 22:42.