Malwihu Kufuma Kudi Antañi

Komana Masamu 144:12-15 yatenaña antu jaNzambi tahindi antu atama akumatuña acheñi ashimunawu muvasi 11?

Izu dachiHeberu dazatishiliwu datalisha mwamuvulu. Nsañu yidi heshina yikutukwasha kwiluka antu atenawu:

1. Tañenu isamu dejima. Nkisu jashimunawu muvasi 12 nakushika ku 14 akajitambwila kudi antu aloña, anakulomba ‘kuyipulwisha kudi antu atama’ ashimunawu (muvasi 11). Iyi nsañu yinesekani namazu adi muvasi 15, muyazatishawu mazu akwila nawu “anakooleki” kapampa kayedi hakutena antu wowamu—“antu akweti Nzambi yawu Yehova.”

2. Iyi nsañu yinesekani nansañu yikwawu yekala muBayibolu yashimuna antu jaNzambi ashinshika chiyakatambwilawu nkisu jaNzambi. Idi isamu damwekesha Davidi chamukuhweleleliyi Nzambi hanyima yakuyipulwisha aIsarela kudi ayilumbu jawu, Wayikiswilili nawa ashakamineña chachiwahi. (Lev. 26: 9, 10; Kuhit. 7:13; Mas. 128:1-6) Chakutalilahu, Kuhituluka 28:4 yahosha nawu: “Nianyaneyi, ninyikabu yaheseki deyi, ninyikabu yakuyimuna yeyi, mwakasemunwinawu añombi jeyi nianyana kanyikoku yeyi, yakakooleka hohu.” Mwamweni, mpinji yayuulileñayi Solomoni mwana kaDavidi, antu adiluñishili chikupu kuwunda nawa ashakamineña chachiwahi. Cheñi nawa, chiyuulu chaSolomoni chemeneneñaku chiyuulu chaMesiya.—1 Anya. 4:20, 21;Mas. 72:1-20.

Mukukunkulula, nsañu yekala Mwisamu 144 yaletesha isamu dejima kutiyakana chikupu chidalumbulula nkisu jakatambwilawu antu jaNzambi kumbidi hela chakafumishayi Nzambi yuma yatama nakusinsishahu kuwunda kwalala nawa antu akashakamaña chachiwahi.—Mas. 37:10, 11.