Chimunateli Kudiluñisha Chikupu Kudiza Bayibolu

Yoshuwa nakutaña Nshimbi; mpwembu yaYeriku yinahumuki nawa itala daRahaba dinahumuki wanyi; Yoshuwa nololi makasa mwiwulu nakulomba

YOSHUWA wadiña namudimu weneni wamwakamishili. Amwinkeli mudimu wakulombola muza wawaIsarela Mwituña Dachikaninu mwabombeleli kumona kukala kwasweja. Hela chochu, Yehova wamukolesheli nindi wakatwesha nawa wamulejeli nindi: ‘Wakadikwatishaña, Wakomikaña chacheni. Wakashuku muchima wakwila mwaya Nshimbi jami. Chiña wakatoñojokañamu nimwaana niwufuku, kulonda wakashuku muchima wakwila mwejima mwanasonekuwu. Dichi wakakooleka munjila yeyi, dichi wakamona kuwaha.’—Yosh. 1:7, 8.

‘Muyinu mpinji yakala’ ninetu tunakumona kukala kwasweja. (2 Tim. 3:1) Kufwana Yoshuwa tunateli kutwesha neyi tulondela kufumba kwamwinkeliwu. Twatela kutañaña Bayibolu mafuku ejima nikuzatisha yishina mukukala kwejima kutunateli kumona.

Hela chochu, etu amavulu tunateli kwiteja netu chatukalilaña kudiza Bayibolu. Ilaña, chineli kudiza Bayibolu kwalema, hitulukenu muchikasha chinakwila nawu “Esekenu Iji Njila” jinateli kuyikwasha kudiluñisha chikupu kudiza Bayibolu.

Ñimbi yamasamu wembili nindi: “Ñendeshi munjila yakuleja kweyi; dimu naluñilaña.” (Mas. 119:35) Munateli kudiluñisha chikupu neyi mutaña Izu daNzambi. Mukudiza yuma yayivulu chimukukeñakeñaña yuma yalema yakuspiritu.

Hela chakwila himudi namudimu wakulombola muza neyi Yoshuwaku, mukweti kukala kumwamonaña. Dichi, kufwana Yoshuwa, dizenuña nikulondela yuma yasonekawu kulonda yiyikwasheña. Neyi mwila mwenimu, ninenu mukutwesha nawa mukuzata mwamaana.

ESEKENU IJI NJILA

Lombenu henohu kanda mutachiki kudiza. MuBayibolu mwekala yitoñojoka yaNzambi wañovu yasonekawu kulonda yiyikwasheña. Dichi neyi himukutaña Bayibolu lombenu wukwashu windi hakwila muyitiyishishi, kwanuka nsañu yimunadizi nikuyizatisha muchihandilu chenu.—Ezera 7:10.
Dihulenu malwihu neyi munakutaña Bayibolu hela nyikanda yashindamena haBayibolu, nenu: ‘Iyi nsañu yinnandizishidi kutalisha hadi Yehova? Yinadifwaniku ñahi nansañu yejima yekala Mwizu dindi? Nateli kukwasha ñahi antu amakwawu naniyi nsañu?’
Toñojokenu chikupu hansañu yimunadizi. Hudikilenu nawa toñojokenuhu: ‘Iyi nsañu yinnantiyishi ñahi? Muloñadi chiyinnantiyishili muniyi njila? Yinnakunlejadi kutalisha hachihandilu chami chakunyima, chayinu mpinji hela chidi hambidi? Nateli kuzatisha ñahi iyi yishina yamuBayibolu nikufumba muchihandilu chami?’ (Yoba 23:5; Mas. 49:3) Shinshikenu neyi mukutwesha kulumbulula chaletesheli Yehova yaleji antu jindi kutondolwelahu yuma yimu hela toñojokenu kukaka kunateli kufuma mukwila yuma yakaanishayi.—Kuhit. 32:28, 29.
Fwikijenuña neyi munakutaña. Chakutalilahu kwila mufwikija amanakwaYosefu anakumulandisha kudi akwaIshimeli nehi? (Kutach. 37:18-28) Yumanyi yimunakumona, kutiya nawa ivumbanyi dinakwepuka? Difwikijenu neyi iyenu anakulandishawu. Yumanyi yinakutoñojokawu nawa anakutiya ñahi? Kufwikija yuma muniyi njila kunateli kuleñela kudiza kwenu kwikala kwakuwahi nawa kwalumbuluka.
Zatishenu yozelu yakudiza nachu yatuloñeshelawu kulonda yitukwasheña kusandujola. Ilukishenu chakuzatisha yozelu yidi mwidimi denu, yidi haintaneti hela yakupulinta. Bayi mushintajala kwihula akwenu eluka chakuzatisha iyi yozelu kulonda ayikwashi chakuyizatishaku. Chakutalilahu, The Watch Tower Publications Index hela Chitwa chakukwasha aYinsahu jaYehova hakusandujola nsañu, jinateli kuyikwasha kuwana nsañu yasonekawu hanyitu yamaneni nikuwana nsañu yalumbululawu yamavasi amavulu amuBayibolu. Zatishenu Apendikisi yamu New World Translation of the Holy Scriptures neyi mudi nayu mwidimi dimweluka. Yashimuna nsañu yamaluña, kuchinda yaaka mundonda, mpezu, nichipimu hela chesekelu, kushilahu niyuma yikwawu.
Tondenu yikuma munsañu yimwadizaña kulonda yiyikwasheña kwanuka yuma yimunadizeña. Kuhiñahu, lejenuku antu amakwawu. Kudihu nsañu yimunateli kuzatisha mumudimu wakushimwina? Muniji njila, himukukumina dakuhemba yikumaku, ilaña mukulejañaku niantu amakwawu.