Kudiwunjika naKuumika

MULOÑA wakukala kunakumwekana “mumafuku akukuminina,” antu jaYehova atela kwikala adiwunjika chikupu. (2 Tim. 3:1-5) Tunakushakama nawantu adikeña awenawu, abulaña kukeña kutiyañana nawakwawu nawa abulaña kudiyuula. Antu ekalaña naniyi yilwilu hiyekala adiwunjikaku. Dichi, mukwaKristu wejima watela kudihula nindi: ‘Komana ninami nidi naniyi yilwilu yakubula kudiwunjika yidi mukanu kaayi? Kudiwunjika chikupu kwatalisha mudihi? Nateli kutwalekahu ñahi kwikala nanichi chilwilu chawakwaKristu muchihandilu chami?

KUDIWUNJIKA KWATALISHA MUDIHI?

MuBayibolu, izu dakwila nawu kudiwunjika hidatalisha hohu mukuumika kukalaku. Muntu wukweti chilwilu chaNzambi chakudiwunjika woomikaña nankeñelu. Watoñojokaña hayuma yidi kumbidi nikutoñojokelaku muntu anadiluwañeshiyi nindi. Hamuloña wachumichi, muntu wadiwunjika neyi anamuvuloki walekaña wanyi kuchiñeja nindi akekala amabwambu cheñiku. Cheñi, Bayibolu yasha chilwilu ‘chakudiwunjika’ kwikala chilwilu chatachi hayilwilu yenzaña muloña wakukeña.a (1 Kor. 13:4) Mwizu daNzambi, “kudiwunjika” kwekala cheñi hakachi ‘kanyikabu yaspiritu.’ (Ñal. 5:22, 23) Hanu dinu, tunateli kwila ñahi hakwila nawu twikali nanichi chilwilu chaNzambi?

CHITWATELA KWIKALA NACHILWILU CHAKUDIWUNJIKA

Hakwila nawu twikali nachilwilu chakudiwunjika, twatela kulomba wukwashu waspiritu yaYehova yenkañayi antu amukuhwelela nawa amushindamena. (Luka 11:13) Hela chakwila spiritu yaNzambi yikweti ñovu, twatela kuzata nañovu nikwila mutunakulomba. (Mas. 86:10, 11) Dichi twatela kudiwunjikaña mafuku ejima hakwila twikali nanichi chilwilu mumuchima wetu. Cheñi, twatela kuzata nañovu chikupu hakwila tutwalekihu kwikala nachilwilu chakudiwunjika. Chumanyi chitwatela kwila cheñi?

Tunateli kwikala nachilwilu chakudiwunjika neyi tumwimbujolaña Yesu. Kapostolu Pawulu chahosheliyi mazu akwila nawu “wuntu wawuha” wabombelamu “kudiwunjika,” watukonkomweneni nindi “[twitejeña] kuwunda kwaKristu kuyuuleña munyichima [yetu.]” (Kol. 3:10, 12, 15) Tunateli kwiteja iku kuwunda “kuyuuleña” munyichima yetu kuhitila mukwimbujola chikuhwelelu chaYesu chakwila nawu Nzambi wakamanisha kukala kunatukundami hampinji Yindi yatelela. Neyi tumwimbujola Yesu, tukatwalekahu kwikala adiwunjika hela chakwila tukamona kukala kwamuchidinyi.—Yow. 14:27; 16:33.

Hela chakwila tunakufwila kumona ituña dadiha dakanayi Nzambi, twekalaña adiwunjika chikupu neyi tutoñojokaña hakudiwunjika kwaYehova. Nsona yatukoleshaña nawu: “Yehova hanakulaba kutalisha hakushikija chikaninu chindi neyi chatoñojokañawu antu amu nawu nalabiku, ilaña wadiwunjika nanenu muloña hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Chitunakutoñojoka hakudiwunjika kwaYehova, komana kwila tudiwunjika nawakwetu nehi? (Rom. 2:4) Mpinjinyi yakeñekaña kudiwunjika?

MPINJI YAKEÑEKAÑA KUDIWUNJIKA

Yuma yitwelaña mafuku ejima yinateli kutuleñela kubula kudiwunjika. Chakutalilahu, neyi kudi yuma yimunakukeña kuhosha mwatela kudiwunjika kulonda mubuli kumukañesha mukwenu wunakuhosha. (Yak. 1:19) Mwatela cheñi kudiwunjika neyi mudi nawakwenu akwakwitiya ekala nayilwilu yayineñeshaña. Chatela mubuli kudiwunjika, toñojokenu Yehova niYesu chadiwunjikawu nakuzeyazeya kwetu. Hiyashinshikaña hatuyiluwa twanyanya tutwakoñañaku. Ilaña atalaña hayilwilu yetu yayiwahi nawa adiwunjika nakushinshika chitunateli kuwahisha yilwilu yetu.—1 Tim. 1:16; 1 Pet. 3:12.

Twatela cheñi kudiwunjika neyi muntu yashimuna nindi twahosheli hela twelili chuma chatama. Hadaha tunateli kushikena kuhila nikukeña kudiyiñisha. Hela chochu, Izu daNzambi datulejaña chitwatela kwila. Dashimuna nawu: “Wadiwunjika mumuchima nabadiki wadinka wanta mumuchima. Bayi wunyakala kuzuwa mumuchima weyuku; muloña kuzuwa kwashakama muntulu jawayisupi.” (Mukwa. 7:8, 9) Hela chakwila anatutwambili, twatela kwikala adiwunjika. Dicheliliyi Yesu hampinji yamutwambililiwu kudi antu.—Mat. 11:19.

Sweje-e anvwali atela kwikala adiwunjika hampinji yinakukeña kukwasha anyanawu neyi amona yilwilu yatama yinakukoñawu. Shinshikenu chakutalilahu chaMattias wamuchisaka chaBeteli yamuScandinavia. Hadiñayi kampululu, amukabishili nankashi hashikola muloña wayuma yakuhwelelayi. Hatachi, anvwali jindi elukili wanyi nawu anakumukabisha. Hela chochu, ateleleli kuzatila hakukala kwahitileñamu mwanawu, wehwileña neyi chakwila yuma yadizileñayi yadiña yalala. Manakwetu Gillis, tata yaMattias, wahosheli nindi “Twakeñekeleña kudiwunjika hakwila nawu tumanishi iku kukala.” Mattias wehwileña nindi: “Nzambi hinyi? Komana mwalala Bayibolu Hizu daNzambi? Tuneluki ñahi netu Nzambi diyi wakeñaña nindi tumukalakeleña?” Wayihwileña cheñi atata yindi nindi: “Muloñadi antu chakunsopeshelawu neyi nibula kukuhwelela yuma yimwakuhwelela?”

Manakwetu Gillis walumbulwili nindi: “Mpinji yikwawu wehwileña iku nahili, wahililileña etu wanyi ilaña wahililileña chalala chatoñojokeliyi nindi dichaletesheli amukabisheña.” Manakwetu Gillis wamanishili ñahi iku kukala? Wahosheli nindi: “Twahanjekeleña nindi hadi mpinji yayilehi. Kakavulu nadiña nakumutiyilila nikumwihula malwihu kulonda niluki chinakutoñojokayi. Mpinji yikwawu namulejeleña nsañu yakutoñojokahu hadi ifuku damukuma hela henohu kanda tutachiki kuhanjeka. Mpinji yikwawu, namulejeleña nami yanyinkiku mafuku antesha kulonda nitoñojokihu hansañu yinashimuniyi. Hamuloña wakuhanjekahu mafuku ejima, Mattias watachikili kwiluka nsañu chovu-chovu nikwiteja ntañishilu yefutu danyiloña, chiyuulu chaNzambi nikukeña kwaYehova. Hahitili mpinji yeneni, nawa chadiña chakala, ilaña mukuhita kwampinji watachikili kumukeña Yehova chovu-chovu. Ami niñodami twatiyaña kuwaha chitwadiwunjikili hakumukwasha mwanetu hadiñayi kampululu.”

Manakwetu Gillis niñodindi akuhweleleli nawu Yehova wukuyikwasha hampinji yadiwunjikiliwu hakumukwasha mwanawu. Manakwetu Gillis chanukayi wahoshaña nindi: “Kakavulu namulejeleña Mattias nami, ami nimama yindi twalombeleña nankashi kudi Yehova netu yamukwashi muloña wakukeña kutwamukeñeli.” Awa anvwali azañalalaña muloña elili chiwahi hakudiwunjika.

Kubombela hakukwasha muntu kupama kuspiritu, akwaKristu alala atela cheñi kwikala adiwunjika neyi anakwakamena muntu wakata muchisaka hela ibwambu dawu. Shinshikenu chakutalilahu chamuhela Ellen,b niyena washakamaña kuScandinavia.

Hadi yaaka 8 yinahitihu, nfumwa amuhela Ellen wakatili chikatu chakalepa kapampa kayedi chaleñeleli woñu windi kuleka kuzatika chiwahi. Chafuminimu, waleka kutiya wushona, muzañalu hela luwi. Chamukalilaña muhela Ellen chikupu. Wahosheli nindi: “Nadiwunjikaña nikulomba chikupu.” Wabombelelihu nindi: “Nsona yankundejaña hiAfwilipi 4:13, yahoshaña nawu: ‘Nikweti ñovu yakuhita muyuma yejima muloña wanowu wanyinkaña ñovu.’” Muloña waniyi ñovu, Ellen nakudiwunjika nakuumika nikukuhwelela muwukwashu waYehova.—Mas. 62:5, 6.

IMBUJOLENUÑA KUDIWUNJIKA KWAYEHOVA

Dichi neyi tunakukeña kwikala adiwunjika, twatela kwimbujola Yehova wadiwunjika chikupu. (2 Pet. 3:15) MuBayibolu mwekala nsañu yayivulu yashimuna kutalisha hadi Yehova chadiwunjikiliyi chikupu. (Nehe. 9:30; Isa. 30:18) Chakutalilahu, Yehova welili ñahi hampinji yamwihwiliwu kudi Abarahama hakeñeleñayi kujilumuna musumba waSodoma? Yehova hamukañesheli Abarahama hampinji yahosheleñayiku. Ilaña Yehova wadiwunjikili nakutiyilila malwihu ejima amwihwileñawu kudi Abarahama niyuma yakameneniyi. Kuhiñahu, Yehova wamwekesheli nindi watiyili hampinji yakwileñayi malwihu ejima amwihwiliwu kudi Abarahama nakumuleja nindi Wakajilumuna wanyi musumba waSodoma hela chakwila yawanamu antu aloña 10. (Kutach. 18:22-33) Yehova wadiwunjikili chikupu nakumutiyilila chakadi kumukañesha.

Chilwilu chakudiwunjika hichilwilu chalema chawuntu wawuha chatela kuvwalawu akwaKristu ejima. Neyi tuzata nañovu kulonda twikali nanichi chilwilu chalema, tukumulemeshaña Tata yetu wamwiwulu nawa akatuchindila hakachi kawantu “akaswana yuma yakanawu muloña wachikuhwelelu nikudiwunjika kwawu.”—Heb. 6:10-12.