Twatela Kwikala Adiwunjika Mumudimu Wetu Wakushimwina
1. Indi Yehova wadiwunjika ñahi nawantu?
1 Nzambi wadiwunjika chikupu nawantu. (Kwid. 34:6; Mas. 106:41-45; 2 Pet. 3:9) Chakutalilahu chabadika chakudiwunjika kwindi twachimwenaña mumudimu wakushimwina Wanta mukaayi kejima. Yehova nazati nawantu hadi yaaka kwakwihi na 2,000, nawa watwalekahu kukokola antu ashinshika. (Yow. 6:44) Tunateli kwikala ñahi adiwunjika mumudimu wetu wakushimwina neyi Yehova?
2. Tunateli kudiwunjika ñahi neyi tunakuzatila mwiluña detu dakushimwina?
2 Mumudimu Wakushimwina Kwitala niKwitala: Twembujolaña kudiwunjika kwaYehova kuhitila mukushimwina ‘chakadi kuleka’ mumaluña mwekala antu achidi kanda ekali nampwila yakudiza Bayibolu. (Yil. 5:42) Twadiwunjikaña kuhitila mukuumika kadiwu, kasekesha niikañesha mumudimu wetu wakushimwina. (Maku 13:12, 13) Twadiwunjikaña cheñi kuhitila mukutwalekahu kutukumwina mbutu yachalala hela chakala kuwana antu akweti mpwila yakudiza chalala hamatala.
3. Muloñadi wutwatela kudiwunjika neyi tunakufuntila kudi antu amwekesheli mpwila nihakulombola atudizi aBayibolu?
3 Atudizi aBayibolu: Kutumba mutondu kwakeñekaña kudiwunjika. Tunateli kuwuhemba chiwahi ilaña hitunateli kuwukulisha swayuku. (Yak. 5:7) Chochimu, antu akulaña chovu-chovu kuspiritu nawa munjila yashiyashana. (Maku 4:28) Antu itwadizaña nawu chinateli kuyikalila kuleka yuma yamunsakililu yakutwamba yakuhwelelawu hela tushidikilu twakaanishawu munsona. Hitwatela kuyileja atudizi etu kuyilaku hambidi swayi-swayi kuhitila mukuyikakeja netu ahimpuku. Kudiwunjika kwakeñekaña hakwila nawu kadizi yekali nampinji yashikila kulonda spiritu yaNzambi yimukwashi.—1 Kor 3:6, 7.
4. Indi kudiwunjika kukutukwasha ñahi kushimwina chiwahi kudi antaña jetu abula kwikala ayinsahu?
4 Antaña Abula Kwikala aYinsahu: Hela chikwila twakeñaña netu antaña jetu abula kwikala aYinsahu adizi chalala, twatela kudiwunjika kuhitila mukuhembelela mpinji yatelela hakwila tuyileji yuma yitwakuhwelela, nikubabala kulonda tubuli kuyileja nsañu yayivulu nankashi hampinji yimu. (Mukwa. 3:1, 7) Ilaña twatela kwikala nayililu yayiwahi yikumwekesha nawu tweluka chalala nawa twadiloñesha kushimwina yuma yitwakuhwelela munjila yakudizoza nawa yakalemesha. (1 Pet. 3:1, 15) Eñañi, neyi twikala adiwunjika mumudimu wakushimwina tukuzataña chiwahi nawa tukumuzañalesha Tata yetu wamwiwulu.