Komana Mweluka?

Kambanji Stefwanu wadiwunjikili ñahi hamukabishileñawu?

STEFWANU amulukukili kudi izanvu dawambanji. Chineli adiña nakuzata muchota cheneni chaSanihedilini muIsarela, awa ansompeshi 71 adiña hakachi kawantu adiña nawuswa mwituña. Ayipompesheli kudi Kapristu Muneni Kayafwasi, wasompesheli muloña waletesheli Yesu amujahi hadi tukweji twantesha twahitilihu. (Mat. 26:57, 59; Yil. 6:8-12) Hampinji yenjileñawu wumu-wumu nakuhana wunsahu wakutwamba, amweni chuma chakuhayamisha kudi Stefwanu, kumesu indi kwamwekeni “neyi kumesu akañelu.”—Yil. 6:13-15.

Stefwanu wadiwunjikili ñahi muniyi mpinji yakala? Henohu kanda amutwali muSanihedilini, spiritu yaNzambi yamukwashili Stefwanu kudikita chikupu mudimu wakushimwina. (Yil. 6:3-7) Hampinji yadiñayi muchota, spiritu yaNzambi yadiña hadi yena, yamukundejeli nikumwanukisha. (Yow. 14:16, tth.) Spiritu yajila yamukwashili Stefwanu kwanuka nyikanda 20 hela kubadikahu yamuNsona jachiHeberu hampinji yahanineñayi wunsahu windi wasonekawu haYilwilu kapetulu 7. (Yow. 14:26) Chikuhwelelu chaStefwanu chakoleli cheñi hamweniyi Yesu muchimwenu nemani kuchikasa chaNzambi chachidilu.—Yil. 7:54-56, 59, 60.

Hadaha ninetu anateli kututiyisha woma nikutukabisha. (Yow. 15:20) Neyi tudizaña Izu daNzambi mafuku ejima nikudikita chikupu mumudimu wetu wakushimwina, spiritu yaYehova yikutukwasha. Cheñi, tukwikala akola hampinji yinakutukabishawu nawa tukutwalekahu kwikala nakuwunda kwamuyitoñojoka.—1 Pet. 4:12-14.