Nzambi Hinyi?

Antu amavulu ahoshaña nawu amwiluka Nzambi. Ilaña chimwayihula nenu Nzambi hinyi, ahanaña ñakwilu jashiyashana. Amakwawu nawu, Nzambi hinsompeshi watama, wababeshaña antu aluwañeshaña. Amakwawu nawu, wayikeña antu nawa wayanakenaña, hela chakwila anakosomoni chamuchidinyi. Amakwawu niwena nawu Nzambi wekala kwakulehi nawa hatwakamenañaku. Chineli antu akweti yitoñojoka yashiyashana, amavulu ahoshaña nawu hitukutwesha kwiluka chekalayi Nzambiku.

Komana twatela kumwiluka? Eña. Kumwiluka Nzambi chiwahi kunateli kuyikwasha kwikala nachihandilu chachiwahi. (Yilwilu 17:26-28) Chitwaswina nankashi kudi Nzambi, niyena wukusweja kutukeña nawa wukutukwashaña. (Yakoba 4:8) Neyi mumwiluka Nzambi chiwahi, chikayikwasha kwikala nawumi wahaya nyaaka.—Yowanu 17:3.

Munateli kumwiluka ñahi Nzambi? Toñojokenu hadi muntu imweluka nankashi, chidi neyi ibwambu denu imwakeñesha. Wubwambu wenu watachikili ñahi? Hadaha mwelukili ijina danowu muntu, yilwilu yindi, yuma yakeñayi niyabula kukeñayi, yuma yelayi niyinakufwila kwilayi niyuma yikwawu. Diyuma yaleteshili mumukeñi, mwamwilukili chiwahi.

Munjila yoyimu, tunateli kumwiluka Nzambi neyi tutoñojoka hanawa malwihu:

• IJINA DANZAMBI HINYI?

• WUKWETI YILWILU YAMUCHIDINYI?

• YUMANYI YINAKOÑIYI NZAMBI?

• YUMANYI YIKAKOÑAYI NZAMBI?

• KUMWILUKA NZAMBI KUKUYIKWASHA ÑAHI?

Ayinu magazini anayisoneki kulonda yihani ñakwilu yanawa malwihu kuzatisha Bayibolu. Yibaaba yidimu bayi neyi yikuyikwasha hohu kwiluka chekalayi Nzambiku, ilaña niyuma yamba kayililayi kumbidi neyi mwikala ibwambu dindi chikupu.