Neyi Muntu Imwakeña Nafwi

“Yuma yankalilili chafwiliyi yayami weyala mukukasumwisha. Mukuhita kwatukweji, namwanukileña nawa chankatileña, neyi kwiji mpoku yinantapi kumuchima. Mpinji jikwawu, nahilileña. Nadihwileña nami, Yayami nafwilidi? Nadinkeleña nyiloña nami kachi nashakamineña nindi mpinji yeneni.”—Vanessa, Australia.

NEYI mwafwishahu ntaña yenu, munateli kutiya kuyeña kwamuchidiwu, mwaneñaña nankashi nawa yuma yayikalilaña. Hadaha mpinji jikwawu mwahilaña, mwadinkaña nyiloña nikutiya woma. Hadaha mwatoñojokaña nenu nikufwa tuhu kuwaha.

Mwatela kwiluka nenu chatama wanyi kuneña. Chamwekeshaña chimwamukeñeli wunafwi. Hanu, munateli kuwundisha ñahi muchima hampinji yamuchidiwu?

CHELAÑAWU ANTU AMAKWAWU NEYI ANAFWISHI

Hela chakwila yihuñu yinatwalekihu, nsañu yidi heshina yikuyikundeja:

KALENU NAMPINJI YAKUDILA

Antu adilaña munjila yashiyashana. Hela chochu, kudila kwakeheshaña chineñi. A Vanessa, itwatena hakusambila nawu: “Nadilileña hohu; nakeñeleña kumanisha chineñi.” Sofía, wukweti yayindi wamumbanda wafwili chakukasumwisha nindi: “Kumuchima kwakataña nankashi neyi wanuka yuma yamwekeni, chidi neyi wunakutatubula hachilonda kulonda wukosihu. Kwekalaña hikuyeña, ilaña kwaleñelaña chilonda kukusuka.”

HOSHENU HAKUKALA KUMUKWETI

Mwalala, mpinji jikwawu mukukeña kwikala nkawenu. Ilaña chineñi hichiteli chalema chimwatela kusendashana. Jared wayaaka 17 wafwishili atata yindi nindi: “Nayilejeleña akwetu chineñi chinadiña nachu. Neluki wanyi neyi nelileña jamaana, ilaña chawahili muloña nahosheleña hakukala kwami.” A Janice, itwatena muchibaaba chatachi, ahosheli hakuwaha kukwawu: “Kuhosha nawantu kwankwashili nankashi. Natoñojokeli nami antu aneluki kukala kwami nawa chumichi chankwashili kuumika.”

ITEJENU ANTU AYIKWASHI

Ndotolu wumu nindi: “Neyi anafwishi eteja antaña jawu niamabwambu kuyikwasha, chekalaña chaswayi kuumika ilamba damuchidiwu.” Lejenu amabwambu jenu eluki yuma yimunakukeña; hadaha anakukeña kuyikwasha ilaña neyi kuyileja nehi akwiluka wanyi.—Yishimu 17:17.

KUNDAMENU KWAKWIHI NANZAMBI

A Tina nawu: “Chafwiliwu amwanta wami nakansa, wakuleja kukala kwami kwadiña kwosi, namulejeleña Nzambi kukala kwejima! Hefuku-hefuku namulombeleña nami yankwashiku. Nzambi wankwashili mwamuvulu nankashi.” Tarsha, wadiña nayaaka 22 mpinji yafwili amama yindi nindi: “Kutaña Bayibolu hefuku-hefuku kwankundejeleña. Nawanineñamu mazu ankolesheleña inatoñojokeleñahu.”

FWIKIJENUÑA MPINJI YIKAMUSAÑULAWU NTAÑA YENU

A Tina nawu: “Hatachi, kuchiñeja kwakusañuka kwakundejeleña wanyi muloña nakeñeleña nfumwami, anyanami niwena akeñeleña kwikala natata yawu. Ilaña ichi, hayaaka yiwaana yinahitihu, nachiñejaña hohu. Dihashindamena wumi wami. Namumonaña muchifwikija, muchima wawundaña nawa wazañalalaña!”

Hela chochu, chineñi hichikushikena dakumanaku. Ilaña, chuma chayimwekeneni aVanessa chinateli kutukwasha. Nawu, “Wukutoñojoka neyi chineñi chikamana wanyi, ilaña chamanaña chovu-chovu.”

Hela chakwila mukumwanukaña ntaña yenu, mukutwalekahu kuhanda. Nawukwashu waNzambi, Munateli kwikala nawamabwambu amawahi nawa nichihandilu. Katataka Nzambi wukusañula afu. Nakukeña nindi enu mwakayitambwili antaña jenu. Haniyi mpinji dihakamana chikupu chineñi chejima chimukweti.

Mavasi amuBayibolu Anateli Kuyikwasha

Nzambi wakamenaña kuneña nimadilu enu.

Nsoneki wumu waBayibolu wamulejeli Nzambi nindi: “Eyi wachindaña mwejima munakimbokaña. Shaku madilu ami muchumpa cheyi; ochu hiyadi mumukanda weyuku?”—Masamu 56:8.

Mulejenu Nzambi yuma yejima yidi kumuchima.

“Hinukumuleja [Nzambi] munamoni yihuñu . . . Nabileli kudeyi, eyi Yehovaa.”—Masamu 142:2, 5, NWT.

Ninenu chiñejenuña.

“Kwamba kekala kusañuka.”—Yilwilu 24:15.

Yehova wakana kusañula yihita yawantu afwa dehi nawa nakufwila kwila mwenimu.b—Yob 14:14, 15, Tumazu twaheshina.

a Yehova didu ijina daNzambi dashimunawu muBayibolu.

b Neyi munakukeña kwiluka nsañu yakusañuka, talenu kudiza 30 mumukanda waMunateli Kwikala naMuzañalu Haya Nyaaka! wasonekawu kudi aYinsahu jaYehova nawa munateli kuwuloñolola chawaana ha www.jw.org/lun.