Neyi Kunamwekani Wubanji

“Hatachi twatoñojokeli netu ichi kunamani. Yuma yetu yejima yakisikili namalowa apotomokeleña nadibaji.”—Andrew, Sierra Leone.

“Chamanini mpepela yeneni yahurricane, twafuntili kwitala detu. Mwosi jashalilimu. Twakuminini dakumwena. Mwanami wamumbanda wadinatili heseki nakudila.”—David, Virgin Islands.

NEYI mwahitahu dehi muwubanji wamuchidiwu, muneluki ilamba damoñawu akwenu ayipuluka: ahayamaña, akaanaña, aluwankanaña, adakamenaña nawa anzaanzaña. Ayipuluka amavulu hikwekalaña akuyikolesha kulonda atwalekihuku.

Neyi chihandilu chenu chidi mukukala muloña wakukala kwawubanji kunayimwekeni, hadaha ninenu munakutoñojoka nenu mukuhanda wanyi. Munateli kutoñojoka nenu nikufwa tuhu kwakuwahi. Ilaña, Bayibolu yatulejaña nawu wumi wawuwahi nawa nawu kudi yuma yatuleteshaña twikali namuchima wakuchiñeja yuma yayiwahi.

TWACHIÑEJAÑA MULOÑA WACHALALA CHITWADIZA MUBAYIBOLU

Mukwakutañisha 7:8 yatulejaña nawu: ‘Kukuma kwansañu kwakuwahi kubadika ntachikilu yachu.’ Neyi dihu munafumi tuhu muwubanji, yuma yakalaña nankashi. Ilaña yatachikaña kuwaha neyi mudishaku nakudiwunjika.

Bayibolu yatulejaña nawu: ‘hikwamba katiyakana cheñi ikumbu. . . hela kukaluka nyitetuku.’ (Isaya 65:19) Yumiyi yakamwekana neyi iseki anadibalumuni dehi paradisa neyi Wanta waNzambi wunatachiki kuyuula. (Masamu 37:11, 29) Wubanji hiwakamwekanahu cheñiku. Yihuñu yejima yitwamonaña akayifumishahu chikupu, muloña Nzambi wasweja ñovu nashiiki nindi: “Yuma yakusambila hiyakayanuka nawaku, hiyakenza nikumuchimaku.”—Isaya 65:17.

Okuwaha: Nleñi naloñeshi yuma ‘kulonda yayinki mpinji yahaya nyaaka nikuchiñeja’, chihandilu chakuwunda muchiyuulu chachiwahi chaNzambi. (Yeremiya 29:11) Komana chihandilu chenu hichikuwahaku neyi mwiluka ichi chalala? Sally, itwatena muchibaaba chatachi wahosheli nindi, “Natoñojokaña hayuma yayiwahi yejima yakatwilila Wanta waNzambi kumbidi nawa chumichi chinankwashi kuvulamena yihuñu yinamweni kunyima nawa nomikaña kukala kunnakumona makonu.”

Komana kwila mwilukilahu yuma yikwawu yakakoñelawu antu kudi Wanta waNzambi nehi? Chimwela mwenimu, mukwiluka chikupu nenu hela munahiti muyihuñu munateli kutwalekahu kuhanda hampinji yimunakutalila mpinji yakadi yihuñu. Chayinu mpinji, Bayibolu yatulejaña nsañu yinateli kutukwasha kuumika yihuñu yafumaña muwubanji. Tuhanjekenu hayakutalilahu.

Mavasi amuBayibolu Anateli Kuyikwasha

Kamenuña mpinji yeneni.

“Chachiwahi kunooka mpinji yantesha kubadika kudikanjikija kuzata nyidimu yakola nakukabila tuhu mpepela”—Mukwakutañisha 4:6. NWT.

Akwakusandujola ashimunaña nawu antu adi nachikela, aneñaña chikupu nawa aswejaña kuluwankana neyi “anakukama nankashi wanyi.” Dichi, chachiwahi kukama mpinji yeneni.

Shimunenu kukala kumukweti.

“Kwakama kwaleteshaña muchima wamuntu kulema [hela, kwamuneñeshaña,” tumazu twaheshina], ilaña mazu amawahi asañumunaña muchima.”—Yishimu 12:25, NWT.

Lejenuku ntaña hela ibwambu denu imwakuhwelela. Wena akutiya mwabu wenu, akuyikolesha nawa akuyileja mwakwilila.a

Talilenu yuma yayiwahi kumbidi.

“Kudi mawulu amaha niiseki dadiha jitwatalilaña kwesekeja nachikaninu [chaNzambi], nawa mwenimu dimu mwakekalaña kuloña.”—2 Petulu 3:13.

a Muntu washakamaña nachikela hela wakamaña nankashi watela kuya kuchipatela.