Kwashenuña Akwenu Kulonda Atweshi Kuumika Kukala Kunakumonawu

1. Kakavulu Yehova wakulaña ñahi kulomba kwawambuñindi?

KOMANA muneluki nenu anateli kuyizatisha kudi Yehova kwakwilamu kulomba kwamuntu wunakulomba chakufuma hamuchima? Eña wukuyizatisha, chili mudi mukulumpi, nkoñi wakuzatila, payiniya hela mukakushimwina muchipompelu. Nateli cheñi kuyizatisha ninenu chili mudi kansi, mukulumpi, manakwetu hela muhela. Neyi muntu wamukeña Yehova amulomba nindi amukwashi, kakavulu Nzambi wazatishaña akulumpi niambuñindi ashinshika amakwawu kulonda “amukundeji chikupu.” (Kol. 4:11) Wenowu muzañalu wutukweti hakumukalakela Yehova niamanakwetu muniyi njila! Tunateli kuyikwasha hela kuyikundeja amanakwetu neyi kunenzi musoñu, wubanji wadimwekenaña hela neyi anakuyikabisha.

KWASHENUÑA AKWENU HAMPINJI YIKUNENZI MUSOÑU

2. Chinateli kutukalila ñahi kukwasha amanakwetu neyi kunenzi musoñu?

² Neyi kunenzi musoñu chinateli kutukalila kudikwasha wumu namukwawu. Chakutalilahu, hadaha tunateli kukeña kuya nakumona akwetu, ilana chinateli kutukalila kwilamu. Tunateli kukeña kutambikaku amanakwetu adi nakukala kwamali netu enzi kulonda tudiili hamu, ilaña muloña wachipupu kwila chitwesheka nehi. Hadaha tukukeña kukwasha amanakwetu, ilaña chinateli kutukalila neyi amuchisaka chetu anakukabakana. Hela chochu, twakeñaña kukwasha amanakwetu nawa Yehova watiyaña kuwaha neyi tuzata hanakumini ñovu jetu kuyikwasha. (Yish. 3:27; 19:17) Twatela kuyikwasha ñahi?

3. Chumanyi chitukudizila kudi akulumpi amuchipompelu mwekala muhela Desi? (Yeremiya 23:4)

³ Chuma chatela kwilawu akulumpi. Neyi mudi mukulumpi, ilukenu yuma yinakuhitamu anyikoku. (Tañenu Yeremiya 23:4.) Muhela Desi, ashimunawu muchibaaba chinafumihu wahosheli nindi, “Akulumpi amwizanvu munekala niamanakwetu amakwawu ashimwinineña hamu nanami nawa twekalileña nampinji yakuhanjeka.”b Chumichi chayipeleleli akulumpi kumukwasha muhela Desi chikwenjili chipupu chaCOVID-19 nawa antaña jindi amakwawu afwili naniwu musoñu.

4. Chumanyi chayikwashili akulumpi kumukwasha muhela Desi, nawa tunakudizilaku kwodi?

⁴ Muhela Desi wahosheli nindi, “Chineli nayimweneña akulumpi neyi amabwambu jami, champeleleleña kuyileja chinatiyileña niyuma yañakamishileña.” Yumanyi yatela kudizilaku akulumpi? Biñenuña anyikoku ayikunjikawu henohu kukala kanda kumwekani. Ikalenu amabwambu jawu. Neyi kunenzi musoñu wunakuyikañesha kudimona nawu mesu namesu, hanjekenuña nawu kuzatisha njila jikwawu. Muhela Desi wahosheli nindi, “Mpinji jikwawu akulumpi ashiyashana antemesheleleña mafoni hela mameseji hefuku dodimu. Nsona jantañilileñawu janshikileña hamuchima, hela chakwila nadiña najiluka dehi chiwahi.”

5. Akulumpi anateli kwiluka ñahi yuma yinakukeñawu amanakwetu niahela kulonda ayikwashi?

⁵ Njila yimu mumwatela kwilukila yuma yinakukeñawu amanakwenu niahela, hikuyihula mukubabala. (Yish. 20:5) Komana akweti yakuda yayivulu, yitumbu niyuma yikwawu yakuzatisha? Komana chinamwekani neyi atela kuyihaña nyidimu hela kuyihaña mwitala? Anakukeña nawu tuyikwashiku kusonekesha chakutambula wukwashu kunfulumendi? Muhela Desi amukwashili kumujimba kudi akwawu akakwitiya. Ilaña chuma chaswejeli kumukwasha hikukeña kwamumwekesheleliwu akulumpi nikumukolesha kuzatisha Bayibolu. Wahosheli nindi: “Akulumpi alombeli hamu nanami. Hela chakwila hinukutwesha kwanuka mazu ahosheliwuku, ilaña nanukaña chinatiyili. Iyi diyi njila mwanlejeleleñayi Yehova nindi, ‘Hiwudi nkaweyiku.’”—Isa. 41:10, 13.

6. Yumanyi yatela kwilawu antu muchipompelu kulonda akwasheña akwawu? (Talenu mwevulu.)

⁶ Yuma yatela kwilawu amakwawu muchipompelu. Tweluka netu akulumpi diwu atela kwakamena amanakwetu niahela muchipompelu. Ilaña Yehova wakeñaña nindi wejima wetu tukolesheña akwetu nikuyikwasha. (Ñal. 6:10) Hela neyi tumwilila muntu wakata kachuma kanyanya, chikumukolesha. Mwana wanyanya neyi ahempula manakwetu wakata hela kumusonekela mukanda chinateli kumukolesha. Kansi wunakuli nateli kumulandilaku muhela wakata yuma hela kumuzatilaku nyidimu yikwawu. Amakwawu muchipompelu niwena anateli kumuloñeshelaku muntu wakata yakuda nakumutwalila kwitala. Chakadi nikujina, neyi musoñu wunataandi, antu ejima muchipompelu akeñekaña kuyikolesha. Hadaha tunateli kushalaku chantesha hanyima yakupompa kulonda tuyihempuli amanakwetu niahela, kuyendela hela kuzatisha vidiyo konfalensi. Akulumpi niwena akeñekaña kuyikolesha. AYinsahu amakwawu atemeshaña mazu akusakilila kudi akulumpi adikitaña nankashi hampinji yikunenzi musoñu. Chikuwaha neyi tuzataña nañovu “[kudikolesha] wumu namukwawu nikudituña wumu namukwawu”!—1 Tes. 5:11.

KWASHENU AKWENU ADI MUWUBANJI WADIMWEKENAÑA

7. Kukalanyi kwamonañawu antu namuloña wawubanji?

⁷ Wubanji wunateli kuhimpa chihandilu chamuntu neyi mukulabula kwadisu. Antu anakumona iku kukala anateli kujimbesha maheta awu, matala, hela antaña jawu. Amanakwetu niahela akaKristu niwena ahitaña muniku kukala. Tunateli kwila ñahi kulonda tuyikwashi?

8. Yumanyi yatela kwilawu akulumpi ninyitu yayisaka henohu kanda kumwekani wubanji?

⁸ Yuma yatela kwilawu akulumpi. Akulumpi, yikwashenu amanakwenu kudiloñeshela chadimu henohu wubanji kanda wumwekani. Yikwashenu ejima muchipompelu eluki chatela kwilawu hakwila ekali akiñewa nikutemeshela akulumpi foni neyi kudi kukala. Muhela Margaret, ashimwiniwu muchibaaba chinafumihu, wahosheli nindi: “Akulumpi atusoñamishili mumpanji yakukaankila nawu kesi kanamani wanyi. Atulejeli nawu neyi akawuswa ahosha nawu tufumi mwiluña detu hela neyi kukala kuswejelaku, twatela kufumamu swayi-swayi.” Amanakwetu atusoñamishili hampinji yatelela muloña kesi kenjili munyilungu yitanu yahiñilihu. Hakudifukula kwachisaka, mutu wachisaka watela kuhosha hayuma yatela kwila muntu wejima muchisaka. Neyi enu nianyanenu mudiloñeshela chadimu, mwakekala awunda neyi kunamwekani wubanji.

9. Akulumpi anateli kuzata ñahi nañovu henohu wubanji kanda wumwekani nihanyima yawubanji?

⁹ Neyi mudi mukulumpi wezanvu, mwatela kutambwila chadimu manaambala awantu amwizanvu denu henohu wubanji kanda wumwekani. Sonekenu hachipapilu nawa neyi kudi mukakushimwina wunahimpi naambala, tambulenu yayiha. Neyi kunamwekani wubanji, chakekala chaswayi kuhanjeka nawakakushimwina nikuyikwasha. Lejenumu swayi nloñeshi wezanvu dawakulumpi kulonda niyena alejimu nkoñi wañinza. Neyi awa amanakwetu azatila hamu, chinateli kukwashana. Chikwamwekeni kesi, nkoñi wañinza wadiña muñinza mwadiña muhela Margaret wakaamini wanyi hadi maora 36 kulonda akwashi akulumpi kuzata nañovu kutemeshela nikwakamena amanakwetu 450 adiña muniku kukala. (2 Kor. 11:27) Chafuminimu, ejima abulili iluña kwakushakama ayiloñesheleli kwakushakama.

10. Muloñadi akulumpi chalemeshelawu mudimu wakubiña? (Yowanu 21:15)

¹⁰ Mudimu wukwawu wukwetiwu akulumpi muchipompelu hikwakamena antu kuspiritu nikukwasha ananeñi. (1 Pet. 5:2) Neyi kunamwekani wubanji, chuma chatachi chatela kwilawu akulumpi hikwiluka neyi amanakwetu niahela akiñewa, adi nayakuda, yakuvwala nihakukaama. Nawa neyi munahiti dehi tukweji twatuvulu, amanakwetu apulukili kuwubanji akakeñekaña kuyakamena kuspiritu nikuyikwasha muloña wachineñi. (Tañenu Yowanu 21:15.) Manakwetu Harold, wamuKometi yaKasanji kaMutayi nawa wunamoni amanakwetu niahela amavulu anahiti muwubanji wahosheli nindi: “Halehaña hakwila ajimbaliku. Anateli kutachika kujimbalaku yuma yamwekeni, ilaña akwanukaña ntaña yawu wafwili, iheta dajimbesheliwu nikukala kwahitilimu hakwila apuluki. Kwanuka yumiyi kunateli kuyiletesha kutachika cheñi kuneña. Ichi hichinayi mukwila nawu adana chikuhweleluku, ilaña dichatiyañayi muntu wejima.”

11. Wukwashwinyi wakeñaña yisaka yinakuhita muwubanji?

¹¹ Akulumpi azatishaña kufumba kwakwila nawu “dilenuña nanowu anakudila.” (Rom. 12:15) Akulumpi anateli kuleja ana anapuluki nawu Yehova wuchidi wayikeña kushilahu niamanakwawu akaKristu. Akulumpi anateli kukwasha iyi yisaka kutwalekahu kwila yuma yakuspiritu chidi neyi kulomba, kudiza, kupompa, nikuzataku mumudimu wakushimwina. Atela cheñi kukolesha anvwali akwasheña anyanawu kusha maana hayuma yatela kubula kukisañanawu kudi wubanji. Anvwali, yilejenuña anyanenu nenu Yehova wukutwalekahu kwikala ibwambu dawu nawa wukutwalekahu kuyikwasha. Yilumbulwilenu eluki nawu adi muchisaka chawamanakwetu niahela mukaayi kejima chinateli kuyikwasha neyi adi mukukala.—1 Pet. 2:17.

12. Yumanyi yatela kwilawu amuchipompelu hakwila akwashi kunamwekani wubanji? (Talenu mwevulu.)

¹² Yuma yatela kwilawu amakwawu muchipompelu. Neyi kunamwekani wubanji, ihulenu akulumpi chimunateli kukwashana. Hadaha munateli kuloñeshela ana anahiti muwubanji hela anenzi nakukwashana hatela kukaamawu. Munateli kuyitwalilaku akakushimwina anakaankili yakuda hela yuma yinakukeñawu. Hela chakwila wubanji wunamwekeni kwiluña dakwakulehi, munateli kukwashana. Munjilanyi? Kuhitila mukuyilombelaku. (2 Kor. 1:8-11) Hadaha munateli kukwashaku ana adi mukukaankila kuhitila mukuhanaku yawaana mumudimu wamukaayi kejima. (2 Kor. 8:2-5) Neyi munateli kuya kwiluña kunamwekani wubanji nakukwashana, ihulenu akulumpi chimwatela kwila. Neyi ayitambika kuya nakuzataku kunamwekani wubanji, akayidizisha chakwila kulonda mwakazati chiwahi kwakayitemeshawu hakayikeñawu.

KWASHENU AMANAKWETU KUUMIKA IKABISHA

13. Kukalanyi kwamonañawu amanakwetu ekala mumatuña mwalekeshawu mudimu wetu?

¹³ Mumatuña mwalekeshawu mudimu wetu, ikabisha daleteshaña amanakwetu niahela kukabakana nankashi. Amanakwetu ashakamaña munawa matuña amonaña kukala kwamali, akataña, nawa afwishaña antaña jawu. Muloña wakwila ayilekesha, akulumpi hiyayaña nakuhela hela kwikala akasunuka nanana anakukeñeka kuyikoleshaku. Ichi dichuma chamumwekeneni manakwetu Andrei, ashimwiniwu muchibaaba chinafumihu. Muhela wamwizanvu dindi damudimu wakushimwina wadiña nakukala kwamali. Kuhiñahu wadiña mumaposu. Wakeñekeleña kumuladika nawa wazatileña wanyi. Hela chakwila alekesheli mudimu wetu nawa kwadiña musoñu, amanakwetu azatili nañovu kumukwasha iwu muhela nawa Yehova wadiña nakumona.

14. Akulumpi anateli kumwekesha ñahi nawu amushindamena Yehova?

¹⁴ Yuma yatela kwilawu akulumpi. Manakwetu Andrei walombeli nawa wazatili nañovu hakwila akwashani. Yehova wakwili ñahi kulomba kwindi? Wasañumwini amanakwetu amakwawu kuya nakumukwasha. Amakwawu amutwalileña kuchipateli kulonda ayi nakudimona nandotolu. Amakwawu niwena amwinkeleña mali akumukwasha. Yehova wayikwashili awa amanakwetu kuzata nañovu nawa wayikiswilili kumukwasha iwu muhela muyuma yejima yinakeñiyi. (Heb. 13:16) Enu akulumpi, neyi mudimu wetu anawulekeshi, inkenuku akwenu nyidimu. (Yere. 36:5, 6) Chuma chabadika, mushindamenenu Yehova. Nateli kuyikwasha kwakamena amanakwenu niahela adi mukukaankila.

15. Tunateli kutwalekahu ñahi kwikala anuñañana hela chakwila anakutukabisha?

¹⁵ Yuma yatela kwilawu amakwawu muchipompelu. Neyi tudi mwituña mwakaanishawu mudimu wetu, tunateli kubulakanaña nawamanakwetu mutumazanvu twanyanya. Haniyi mpinji chalema nankashi kwikala nakuwunda nawamanakwetu. Zuñenuña naSatana, bayi kudizuñañesha wumu namukwawuku. Diwulenuña tuyiluwa twawamanakwenu, hela kumanisha swayi kukala. (Yish. 19:11; Efwe. 4:26) Tachikilenuñahu kukwasha akwenu. (Tit. 3:14) Wukwashu wamukwashiliwu muhela waletesheli antu mwizanvu dakushimwina kutachika kudikwasha wumu namukwawu. Adikundili neyi chisaka.—Mas. 133:1.

16. Kwesekeja naAKolosi 4:3, 18, tunateli kukwasha ñahi amanakwetu niahela anakukabishawu?

¹⁶ Amanakwetu niahela akaKristu amavulu atwalekañahu kumukalakela Yehova hela neyi anakuyikañesha kudi nfulumendi. Amakwawu ayikasaña muloña wachikuhwelelu chawu. Tunateli kuyilombelaku wena, yisaka yawu, niamanakwetu anakusha wumi wawu hakatoña kulonda ayikwashi amanakwetu niahela kuspiritu, kumujimba, nikuyihoshelaku muyota.c (Tañenu AKolosi 4:3, 18.) Bayi mudiwula ñovu yekala mukulombelaku akwenuku!—2 Tes. 3:1, 2; 1 Tim. 2:1, 2.

17. Munateli kudiloñeshela nahi chadimu henohu kanda mumoni ikabisha?

¹⁷ Enu nichisaka chenu munateli kudiloñeshela chadimu chayinu mpinji nekabisha dikamwekana kumbidi. (Yilw. 14:22) Bayi mutoñojokaña hayuma yatama yinateli kuyimwekenaku. Ilaña, koleshenu wubwambu wenu naYehova nawa yikwashenu nianyanenu kwila mwomumu. Mpinji jikwawu neyi mutachika kwakama, mulejenumu Nzambi chimunakutiya. (Mas. 62:7, 8) Hamu neyi chisaka, hanjekenuhu kulonda mwiluki muloña waweni wumwatela kumukuhwelela.d Kutalisha hansañu yawubanji, chimwadiloñeshela chadimu nikumukuhwelela Yehova chikukwasha anyanenu kwikala ahamuka nawa akwikala nakuwunda.

18. Yumanyi yitwakadiluñisha kumbidi?

¹⁸ Kuwunda kwaNzambi kwatukwashaña kwiluka netu twakiñewa. (Fwili. 4:6, 7) Muloña waniku kuwunda, Yehova wawundishaña muchima wetu hela chakwila kudi yikatu, wubanji wadimwekenaña nawa neyi anakutukabisha. Wazatishaña akulumpi adikita kutubiña. Nawa watwinka kukooleka kwakudikwasha wumu namukwawu. Kuwunda kutukweti chayinu mpinji kwatukwashaña kwikala adiloñeshela chidimu nalukadi lutwakamona kumbidi, kushilahu “[ni]lukadi lwasweja.” (Mat. 24:21) Haniyi mpinji, tukakeñekaña kwikala mukuwunda nikukwasha akwetu kwila mwomumu. Ilaña hanyima yaniku kukala, hitwakamonahu kukala kukwawu kwakatwakamishaku. Haniyi mpinji twakadiluñisha chuma chakeñañayi Yehova nindi tudiluñisheña—kuwunda kwabulaña kumana.—Isa. 26:3, 4.