Komana Munadiloñeshi Kumona Wubanji Wamwekanaña Waweni?
1. Muloñadi chichekalila chamaana kudiloñesha chadimu henohu wubanji kanda?
1 Chaaka nichaaka, yihita yawantu kunyeñumuka kaayi kejima, kubombelahu amana kwetu niahela amavulu, anakuwanika munyitentanshi, chaaña, nadibaji. Chineli wubanji wamwekanaña waweni watela kuzatika chakubula kwiluka nawa wunateli kutumwekena wejima wetu, chachiwahi kwikala adiloñesha.—Yish. 21:5.
2. Muloñadi wutwatela kulejela aeluda makeyala nijinaambala jetu janshiña jakatataka?
2 Chimwatela Kwila Henohu Wubanji Kanda Wumwekani: Mpinji yikwawu akwachiyulu asoñamishaña hawubanji wudi kwakwihi nakumwekana. Chekala chalema nankashi kutiyilila kukusoñamisha kwamuchidiwu. (Yish. 22:3) Mumakabi amuchidiwu aeluda atela kweseka kuhosha nawantu ejima muchipompelu kuyikwasha kulonda kudiloñesha chachiwahi. Neyi wubanji wunahiti dehi, aeluda akafwila kuhosha nawantu ejima enzaña kukupompa hachipompelu nakumona kwila nawu adi hohu chachiwahi nakwiluka neyi kudi wukwashu wunakukeñeka. Anateli kumba mpinji yalema neyi chakwila aeluda hiyakweti naambala yashiña yakatataka nikeyalaku. Komana chalema nankashi akwakushimwina kuleja ansoneki niankoñi alombolaña kudiza kwamukanda makeyala nijinaambala jawu janshiña jakatataka.
3. Munjilanyi mutunateli kuzatila hamu nawaeluda neyi chakwila twashakamaña mwiluña mwamwekanaña wubanji nankashi?
3 Neyi chipompelu chekala mwiluña mwamwekanaña wubanji nankashi, aeluda atela kwihula akwakushimwina ayinki ijina ninaambala yanshiña yawa ntaña jawu hela naambala yebwambu dawu wabulaña kushakama munodu iluña nawa atela kulejawu neyi chakwila kumwekana wubanji wakukasumwisha. Ichi chikukwashaku aeluda kwiluka antu anafumishiwu mwiluña mudi wubanji. Aeluda niwena anateli kufuukula chatela kwila chipompelu neyi kumwekana wubanji wakukasumwisha, ichi chinabombelumu yuma yidi neyi kwikala nandandanda yayuma yatela kwikala namuntu wejima, nikuloñesha chakufuma munodu iluña, nintanjikilu yakukwashilamu antu adi nakukankila kweneni. Kuzatila hamu naniyi ntanjikilu yayiwahi hichuma chalema nankashi.—Heb. 13:17.
4. Chumanyi chitwatela kwila neyi wubanji wunamwekani mwiluña detu?
4 Neyi Wubanji Wunahiti Dehi: Chumanyi chimwatela kwila neyi wubanji wunamwekani mwiluña denu? Ilukenu chikupu nenu munanyakali kwakamena yisaka yenu lwakumujimba. Neyi mukutwesha, hanenuku wukwashu kudi amakwawu anakabakani. Fwilenu kuhosha nankoñi walombolaña kudiza kwamukanda hela eluda mukwawu chakubula kulabisha mpinji. Mwatela kwila mwenimu hela chakwila himudi mukukalaku nawa himunakukeña wukwashuku. Neyi munakukeña wukwashu, ilukenu chikupu nenu amana kwenu anakuzata nañovu yejima kulonda kuyikwasha. (1 Kor. 13:4, 7) Anukenu nenu Yehova neluki kukala kwenu; shindamenenu hadi yena hakwila yayikwashi. (Mas. 37:39; 62:8) Ikalenu asoñama hakwikala nakukooleka kwakukwasha amakwawu lwakuspiritu nilwakumujimba. (2 Kor. 1:3, 4) Tachikenu cheñi mudimu wenu wamafuku ejima waTeokalatiki chakubula kulabisha mpinji.—Mat. 6:33.
5. Etu hamu neyi eniKristu indi kuchinisha kwawubanji kwatukuma ñahi?
5 Chineli kuchinisha kwawubanji kwaleteshaña kwakamena nankashi mukaayi, twatela kutalila mpinji yakumbidi nachikuhwelelu. Katataka wubanji wejima wuhiti. (Chim. 21:4) Chayinu mpinji, tunateli kulondeja jinjila jashikila kulonda tudiloñeshi kumona wubanji niyuma yakala chitunakutwalekahu namuzañalu hakushimwina nsañu yayiwahi kudi amakwawu.