Munateli Kwikala naKuwunda haMpinji Yimunakumona Kukala

1. “Kuwunda kwaNzambi” hichumanyi, nawa yumanyi yafumañamu neyi twikala naku? (AFwilipi 4:6, 7)

KWEKALA kuwunda kwabula kwilukawu antu amukanu kaayi. ‘Hikuwunda kwaNzambi,’ kuwunda kwenzaña muloña wakwikala nawubwambu wakola natata yetu wamwiwulu. Neyi tudi nakuwunda kwaNzambi, twatiyaña netu twakiñewa. (Tañenu AFwilipi 4:6, 7.) Twadikundaña chikupu nawantu amukeña. Nawa twadikundaña chikupu “[naNzambi] wakuwunda.” (1 Tes. 5:23) Neyi tumwiluka Tata yetu, tumukuhwelela nikumwovwahila, kuwunda kwaNzambi kukuwundisha muchima wetu wunakwakama hitunakuhita mukukala kwasweja.

2. Muloñadi chitukukuhwelela netu chikutwesheka kwikala nakuwunda kwaNzambi?

² Komana chaswayi kwikala nakuwunda kwaNzambi neyi tunakumona kukala, kudi neyi wubanji wadimwekenaña, njita hela anakutukabisha? Iku kukala kwejima kunateli kututiyisha woma. Ilaña, Yesu wayifumbili akakumulondela nindi: “Bayi mwiteja nyichima yenu yakameña hela kuzeya hamuloña wawomaku.” (Yow. 14:27) Chasweja kuwaha, amanakwetu nawahela alondelaña kufumba kwaYesu. Nawukwashu waYehova, anakutwesha kwikala nakuwunda hampinji yinakuumikawu kukala kwasweja.

CHAKWIKALA NAKUWUNDA MUMPINJI YIKUDI MUSOÑU

3. Musoñu hela chipupu chinateli kuluwañesha ñahi kuwunda kwetu?

³ Musoñu hela chipupu chinateli kushikena kuhimpa chihandilu chawantu amavulu. Talenu kukala kwamweniwu antu amavulu muloña waCOVID-19. Kwesekeja nakusandujola kumu, ashimwini nawu antu amavulu akañenyeña kukaama hampinji yikwadiña ichi chipupu. Iwu musoñu waletesheli antu kwakaama nankashi, kuneña, kusweja kunwa walwa, kuzatisha yitumbu yashetana, madombu muyisaka nikukeña kudijaha. Neyi kwiluña kumwashakamaña kunenzi musoñu, munateli kukeheshaku ñahi kwakama kulonda mwiikali nakuwunda kwaNzambi?

4. Kwiluka wuprofwetu waYesu wahosha hamafuku akukuminina kwatukwashaña ñahi kwikala nakuwunda?

⁴ Yesu washimwineñahu dehi nindi mumafuku akukuminina kwakekala yipupu, hela nyisoñu yakataanda “mumaluña ashiyashana.” (Luka 21:11) Kwiluka iyi nsañu kwatukwashaña ñahi kwikala nakuwunda? Hitwahayamaña hakumona iyi nyisoñu yinakwinzaku. Tweluka netu iyi yuma yinakumwekana neyi chahosheliyi Yesu nindi yakamwekanaña. Dichi tukwovwahilaña kufumba kwalejeliyi Yesu antu akashakamaña mumafuku akukuminina nindi: “Bayi mwakatiya womaku.”—Mat. 24:6.

5. (a) Kwesekeja naAFwilipi 4:8, 9, yumanyi yitwatela kulomba neyi kunenzi musoñu? (b) Kutiyilila kumazu amuBayibolu akukwata dehi kunateli kuyikwasha ñahi?

⁵ Neyi kunenzi musoñu tunateli kutachika kwakama nikutiya woma. Dichuma chamumwekeneni muhela Desi.b Hanyima yakwila atata yindi awanyiki, manakwindi nindotolu anafwi na COVID-19, watiyili woma nindi keña asambula iwu musoñu nikusambwishaku amama yindi akula dehi. Ichi chipupu chamuletesheli kutoñojoka nindi hadaha mudimu wunateli kumana, dichi wadiña nakwakamena kwakafumishañayi mali akulanda yakuda niakufweta kwitala. Yumiyi yamwakamishileña nankashi chakwila wakañenyeña nikukaama. Ilaña muhela Desi wekalili cheñi nakuwunda. Chumanyi chamukwashili? Walombelelihu hayuma yamwakamishileña nindi Yehova amukwashi kulonda ekali nakuwunda nikutoñojoka hayuma yayiwahi. (Tañenu AFwilipi 4:8, 9.) Wamutiyileña Yehova “chinakuhoshayi” nayena kuhitila mukutiyilila kumazu amuBayibolu akukwata dehi. Wahosheli nindi, “Mazu awantañi akukundeja ankwashili kuleka kusweja kwakama nawa añanukishili haluwi lukwetiyi Yehova.”—Mas. 94:19.

6. Kudiza halwenu nikuya nakupompa kukuyikwasha ñahi?

⁶ Chakadi nikujina, musoñu wunateli kuluwañesha yuma yayivulu yimwelaña, ilaña bayi mwiteja wuyikañesheña kudiza halwenu hela kuya nakupompaku. Yuma yayimwekeneni amanakwetu yekala munyikanda yetu nimumavidiyo yikuyanukisha nawu amanakwenu niahela anakutwalekahu kwikala ashinshika hela chakwila anakumona kukala kwokumu. (1 Pet. 5:9) Kupompa kukuyikwasha kutoñojoka hayuma yayiwahi yekala muBayibolu. Kukuyikwasha cheñi kwikala nampinji yakukolesha akwenu nawa kukuyikoleshaña ninenu aweni. (Rom. 1:11, 12) Chimukutoñojokaña hachayikwashiliyi Yehova akakudifukula indi hampinji yakatiliwu, yatiyiliwu woma, hela hatiyileñawu wuudi, chikuhwelelu chenu chikukolelaku nawa mukwiluka chikupu nenu ninenu wukuyikwashaña.

7. Chumanyi chimunakudizila kudi kapostolu Yowanu?

⁷ Ikalenuña nampinji yakuhanjeka nawamanakwenu niahela. Neyi kudi musoñu, hadaha chikukeñeka nawu tudishiileña chintampu hela chakwila tudi nawakwetu akakudifukula. Mumpinji yamuchidiwu, munateli kutiya neyi chatiyiliyi kapostolu Yowanu. Wakeñeleña kudimona nebwambu dindi Gayusi mesu namesu. (3 Yow. 13, 14) Hela chochu, Yowanu welukili nindi hayina mpinji, hadi kutwesha kudimona naGayusiku. Dichi wafuukwilihu kumusonekela hohu Gayusi mukanda. Neyi mukutwesha wanyi kudimona nawamanakwenu niahela mesu namesu, munateli kuhanjeka nawu kuzatisha foni, vidiyo konfalensi hela kuyitemeshela meseji. Neyi muhanjekaña nawakwenu akaKristu, mukutiya nenu mwakiñewa nawa mukwikala nakuwunda. Hanjekenu nawakulumpi neyi munakwakama nawa itejenu munakuyikoleshawu.—Isa. 32:1, 2.

CHAKWIKALA NAKUWUNDA MUMPINJI YAWUBANJI WADIMWEKENAÑA

8. Wubanji wadimwekenaña wunateli kuluwañesha ñahi kuwunda kwenu?

⁸ Neyi ayiwanahu dehi kudi dibaji, mutentanshi, hela kesi, hadaha munateli kwakama nankashi hadi mpinji yayilehi hanyima yaniku kukala. Neyi mwafwishili antu imwakeña hela yuma yenu yakisikili, hadaha chumichi chayineñesheli, mwakañenyi mwakwilila, indi kwiji mwahilili. Ichi hichinatalishi mukwila nawu mwakeñesha yuma yakumujimba hela mudana chikuhweleluku. Mwamweni kukala kweneni nawa hadaha antu amakwawu akukeñaña nawu mumwekeshi yilwilu yatama. (Yoba 1:11) Ilaña hela chakwila munakuhita mukukala kwasweja, munateli kwikala nakuwunda. Munjilanyi?

9. Yumanyi yahosheliyi Yesu yinateli kutukwasha kudiloñeshela chadimu nawubanji wadimwekenaña?

⁹ Anukenu chaprofweteliyi Yesu. Kwambukaku nawantu amukaayi atoñojokaña nawu wubanji wadimwekenaña wunateli kuyimwekena wanyi, etu tweluka netu iwu wubanji wukuvulilañaku nawa wakwawu wunateli kutushikena ninetu. Yesu walejeli akakumulondela nindi “nyitentanshi yamaneni nankashi” niwubanji wukwawu wadimwekenaña jakamwekanaña henohu kukuma kanda. (Luka 21:11) Waprofweteli cheñi nindi “kutama kukasweja,” yumiyi yinakumwekena muwubanji, mumadombu nikudilukuka nakudijaha. (Mat. 24:12) Yesu wahosheli wanyi nindi iku kukala kwakashikena hohu ana afutalelayi Yehova. Kafwampi, ambuña aYehova ashinshika amavulu niwena anakuyishikena kudi wubanji wadimwekenaña. (Isa. 57:1; 2 Kor. 11:25) Yehova hanateli kutukiña muchihayamisha kuniwu wubanji wejimaku, ilaña wukutukwasha munjila yidi yejima kulonda twiikali nakuwunda.

10. Muloñadi kudiloñeshela chadimu henohu wubanji wadimwekenaña kanda chikwamwekeshelaña nawu tukweti chikuhwelelu? (Yishimu 22:3)

¹⁰ Neyi tudiloñeshela chadimu chakwila henohu kukala kanda kushiki, chakekala chaswayi kubula kusweja kwakama neyi kukala kutukasumwisha. Komana kudiloñeshela chadimu kwamwekeshaña nawu twamukuhwelela Yehova wanyi? Inehi. Kafwampi, neyi tudiloñeshela chadimu henohu wubanji kanda, tukumwekesha netu twakuhwelela muñovu jindi jakutwakamena. Muloñadi? Izu daNzambi datukwashaña kudiloñeshela chadimu henohu wubanji wadimwekenaña kanda. (Tañenu Yishimu 22:3.) Nawa kuhitila muyibaaba yamumagazini, kupompa niyakubidika yitwatambwilaña hampinji yatelela, kuloñesha kwaNzambi kunatwalekihu kutukolesha kudiloñeshela chadimu henohu kukala kwamwekanaña mukukasumwisha kanda.c Komana twamukuhwelela Yehova? Neyi twamukuhwelela, tukudiloñeshela chadimu chayinu mpinji, henohu wubanji wadimwekenaña kanda wumwekani.

11. Yumanyi yimunadizili kudi muhela Margaret?

¹¹ Talenu chuma chamumwekeneni muhela Margaret. Amulejeli kufuma hetala dindi chikwenjili kesi mwiluña dawu. Muloña wakwila antu amavulu atemukileña hampinji yoyimu, munyikwakwa mwenzeli nyotoka chakwila yakañenyeña nikwenda. Mpepela yatamini nankashi nawishi, nawa muhela Margaret hatwesheli kufuma mumotoka yindi haniyi mpinjiku. Hela chochu, wapulukili muloña wadiloñesheleli chadimu. Mukachola kindi kanyanya washilimu mapu yakumukwasha kuwana njila yakutemukilamu kulonda apuluki. Wadiña wahitamu dehi namotoka muniyi njila kulonda chakamupeleli kuyizatisha neyi kunamwekani wubanji. Chineli wadiloñesheleli chadimu, muhela Margaret wapulukili kuniwu wubanji.

12. Muloñadi chitwalondelaña nshimbi jakudikiña nachu?

¹² Hakwila atukiñi niakwetu, akawuswa anateli kutuleja nshimbi jakulondela hakufuma munodu iluña, hela njila jikwawu jitwatela kulondela. Antu amakwawu ovwahilaña swayi wanyi hela ashintajalaña muloña hiyakeñaña kushiya yuma yikwetiwuku. Indi akaKristu elaña ñahi? Bayibolu yatulejaña nawu: “Hamuloña waMwanta, ovwahilenuña antu akweti wuswa, hela mwanta wabadika kulema hela anguvulu anatemeshiyi.” (1 Pet. 2:13, 14) Kuloñesha kwaNzambi nikwena kwatwinkaña nshimbi jakudikiñilamu. Mpinji yejima atwanukishaña nawu tuyinkeña akulumpi mafoni naamba etu kulonda akatweshi kututemeshela neyi kunamwekani wubanji. Mwayinka dehi? Hadaha anateli kutuleja cheñi iluña kwakutemukila, kufuma munodu iluña nikutambula yuma yakukwasha antu adi mukukala hela kutuleja chitunateli kukwasha akwetu nimpinji yakwila mwenimu. Neyi tubula kovwahila, tunateli kusha wumi wetu niwawakulumpi muwubanji. Anukenuña nenu awa amayala ashinshika anakuyihemba enu. (Heb. 13:17) Muhela Margaret wahosheli nindi, “Neluki chikupu nami kulondela wunlomboli wawakulumpi nikuloñesha kwampulwishili.”

13. Chumanyi chinakwashi akaKristu amavulu ashiya nyikala yawu kwikala namuzañalu nikuwunda?

¹³ Amanakwetu niahela amavulu ashiyili nyikala yawu muloña wawubanji wadimwekenaña hela njita, anazati nañovu nakutachika kuhanda kwesekeja nachidi yuma nawa anashi muchima hamudimu waYehova. Neyi chelili akaKristu akusambila apalañenenimu muloña wakuyikabisha, niwena anatwalekihu “kushimwina nsañu yayiwahi yezu.” (Yilw. 8:4) Kushimwina kwayikwashaña kusha maana haWanta chatela ashi maana hakukala kunakumonawu. Chinafumimu, anatwalekihu kwikala namuzañalu nikuwunda.

CHAKWIKALA NAMUZAÑALU HAMPINJI YINAKUYIKABISHAWU

14. Makabisha anateli kuluwañesha ñahi kuwunda kutukweti?

¹⁴ Neyi anakutukabisha tunateli kuleka kusha maana kuyuma yayivulu yatukwashaña kwikala nakuwunda. Twazañalalaña neyi tunakupompa hamu mukukasunuka, tunakushimwina hatooka nikutwalekahu kuzata nyidimu yitwazataña hefuku-hefuku chakadi kuchiina netu akutukasa. Neyi atulekesha kwila yumiyi, tunateli kwakama, nakutiya woma chikwikala yuma. Chatama wanyi kutiya muniyi njila. Ilaña twatela kwikala asoñama. Yesu washimwini nindi makabisha anateli kukojeja antu amulondelaña kuhukana. (Yow. 16:1, 2) Hanu dinu tunateli kutwalekahu ñahi kwikala nakuwunda hampinji yinakutukabishawu?

15. Muloñadi chitwatela kubulila kuchiina makabisha? (Yowanu 15:20; 16:33)

¹⁵ Izu daNzambi datulejaña nawu: “Ejima afwilaña kuhanda kwesekeja nakumwakama Nzambi muloña wakudikunda naKristu Yesu, niwena akayikabisha.” (2 Tim. 3:12) Chamukalilili manakwetu Andrei kwiteja nsañu yidi haniyi nsona helili mudimu wetu awulekeshi mwituña dawu. Wahosheli nindi: ‘Mudinu ituña mudi aYinsahu amavulu nankashi. Hanu dinu akawuswa akutukasa ñahi wejima wetu?’ Ilaña chatela iyi yitoñojoka yimuleteli kuwunda, yamuletesheli kwakama nankashi. Amanakwetu amakwawu ashili ichi chisenda mumakasa aYehova, atoñojokeleña wanyi nawu hiyakutwesha kuyikasaku. Elukili nawu anateli kuyikasa, ilaña aswejeli wanyi kwakama neyi manakwetu Andrei. Dichi wafuukwilihu kuyimbujola nawa wamukuhweleleli Nzambi. Hashimbwili wanyi, wekalili nakuwunda nawa ichi wekalaña namuzañalu hela chakwila nakumona kukala. Ninetu chinateli kutumwekena. Hela chakwila Yesu watulejeli nindi twatela kukuhwelela kumona makabisha, ilaña watulejeli cheñi nindi tunateli kutwalekahu kwikala ashinshika.—Tañenu Yowanu 15:20; 16:33.

16. Nshimbinyi jitwatela kwovwahila hampinji yinakutukabishawu?

¹⁶ Neyi mudimu wetu anawukaanishi hela anawulekeshi chikupu, tunateli kutambwila nshimbi kufuma kukasanji kamutayi nikudi akulumpi. Awa ekalilaku kutukiña, atukwashaña kutwalekahu kutambwila yakuda yakuspiritu nikutukwasha kutwalekahu kushimwina kwesekeja nachidi yuma. Zatenuña nañovu jenu jejima kwovwahila nshimbi jimunakutambwila, hela chakwila himunelukishi chinakuyinkelawu oju nshimbiku. (Yak. 3:17) Cheñi, bayi mushimuna nsañu yinakundami amanakwetu niahela hela nyidimu yamuchipompelu kudi antu atela kubula kuyilukaku.—Mukwa. 3:7.

17. Neyi cheliliwu apostolu amumafuku awakaKristu akusambila, yumanyi yitwatela kufwilaña kwila?

¹⁷ Chuma chimu chacheni chaleteshaña Satana azuñeña njita nawantu jaNzambi chidi chakwila nawu “akweti mudimu wakushimuna wunsahu hadi Yesu.” (Chim. 12:17) Bayi mwiteja Satana nikaayi kindi kuyichiinishaku. Twekalaña namuzañalu nikuwunda neyi tutwalekahu kushimwina nikutañisha hela chakwila anakutukabisha. Mumafuku awakaKristu akusambila helili akawuswa aYudeya aleji apostolu nawu aleki kushimwina, awa amayala ashinshika afuukwilihu kumwovwahila Nzambi. Atwalekelihu kushimwina nawa iwu mudimu wayileteleleña muzañalu. (Yilw. 5:27-29, 41, 42) Hela chochu, neyi mudimu wetu anawulekeshi, twatela kwikala ababala hampinji yitunakushimwina. (Mat. 10:16) Ilaña neyi tuzata hakumina ñovu jetu, twakekala namuzañalu wenzaña muloña wakumutiyisha Yehova kuwaha nihamuloña wakushimwina nsañu yakupulwisha mawumi awantu.

“NZAMBI WAKUWUNDA WUKWIKALAÑA NANENU”

18. Kudinyi kutunateli kuwana kuwunda kwakweni?

¹⁸ Kuhwelelenu chikupu nenu nimumpinji yakala chikupu, tunateli kwikala nakuwunda. Muniyi mpinji, twatela kwanukaña netu kuwunda kutwatela kwikala naku hikuwunda kwaNzambi, dikwila nawu, kuwunda kwahanañayi Yehova hohu. Mushindamenenuña hampinji yikunenzi musoñu, wubanji wadimwekenaña, hela neyi anakuyikabisha. Ovwahilenuña kuloñesha kwindi. Talilenuña yuma yayiwahi yidi kumbidi. Neyi mwila mwenimu, “Nzambi wakuwunda wukwikalaña nanenu.” (Fwili. 4:9) Muchibaaba chinalondelihu, twakahanjeka hachitunateli kukwasha akwetu akaKristu anakuumika kukala chatela kwikalawu nakuwunda kwaNzambi.