Emika Chakutalilahu Chachiwahi chaKashinshi
1 Muchaaka cha 1937 dimwatachikili njila yayiha yamudimu wampinji yejima—mudimu wawupayiniya wadimena. Amayala niambanda ashikahu, akuluka yitembi mumudimu wawiniKristu wakushimwina, mukudikeñela etejeli nyidimu yakukalakela kwejima kwayitemesheli kuloñesha. Dichi mukuhita kwayaaka yayivulu, apayiniya adimena anakutwalekahu kwimika chakutalilahu chakashinshi chatelela kwimbujola.—Heb. 6:12.
2 Alombweli: Hakusambila, apayiniya adimena diwu adiña nakulombola mudimu wakushimwina kuhitila mukuzatisha yisanji yakumakasa yamaseleti nakuyivumishilaña hachisu chamwiniitala. Azatishileña cheñi jitepu mwadiña jimpanji jashindameneni haBayibolu neyi hiyakufuntilaku. Chumichi achilileña munyisumba yamaneni mwadiñi mwakutuña dehi yipompelu. Nkumininaku, apayiniya adimena ayitemesheli kumaluña kwadiña kukankila kweneni kwawakwakushimwina aWanta. Atwalekelihu nakwendela antu ejima amwekesheli mpwila yansañu yaWanta, nakulombola kudiza kwaBayibolu. Hamuloña wakudikita kwawu, chafuminimu, atuñili yipompelu yayivulu. Hamuloña wakuzata nañovu mumudimu wawu wakushimwina kwaletesheli kuloñesha kutunakumona lelu dinu kuswejeliku kutoha. (Isa. 60:22) Apayiniya adimena anatwalekihu nakukalakala mudimu walema mukushimwina nsañu yayiwahi “mwahita kuleña kwejima kwekala mwishina dewulu.”—Kol. 1:23.
3 Apayiniya Adimena Atelela Kuyimbujola: Apayiniya adimena amakwawu anakalakali mumudimu wampinji yejima yaaka yayivulu. Mukuhita kwayaaka, awa amayala niambanda ovwahila yikuhwelelu yawu ayitookesheli nakukala kwashiyashana. (1 Pet. 1:6, 7) Mukudikeñela ahanineña yuma yawu yakumujimba kulonda kuya nakukalakela maluña mudi kukankila kweneni. Amakwawu ashinakaja dehi nawa adi nayikatu kunyijimba hela atalañanaña nakukala kukwawu. (2 Kor. 4:16, 17) Ilaña, ‘anakutwalekahu kwikala akola muwushinakaji wawu.’ (Mas. 92:14) Asha chikuhwelelu chawu mudi Yehova nawa atambwilaña nkisu yindi.—Mas. 34:8; Yishi. 10:22.
4 Mwalala twatela kuyihameka apayiniya adimena chikupu. Neyi mudi nakukooleka kwakwikalahu nawapayiniya adimena atemeshawu hachipompelu chenu, zatishenu kukooleka kweniku kwakushakamaña nawu hamu kulonda muhetelimu muyakuhumañana yawu chikupu. Mwekeshenu kusakilila hamudimu wawu neyi akwakushimwina Wanta ashinshika. Kwatilenuku ñovu kukumika kwawu. Antu ejima anakwimbujola chikuhwelelu chawu niwena akatambwila kukooleka ninkisu yaYehova muloña “elaña mwalala yena wayitiyaña kuwaha.”—Yish. 12:22.