Chikasha Chamalwihu
◼ Munjilanyi jajiwahi mutwatela kukwashila apayiniya?
Muchaaka chamudimu cha 2009, amana kwetu niahela azatili mudimu wawupayiniya wampinji yejima niwadimena mukaayi kejima ashikili kwakwihi na 800,000. Awa ambuña akalakalaña mudimu wampinji yejima ahanaña nyikabu yatachi, mpinji yawu, ñovu niyuma yakumujimba kulonda kutiyakesha nsañu yaWanta. (Yish. 3:9) Yehova wazañaleli nankashi hakudihana kwawu! Munjilanyi mutwatela kumwekeshela chamonañayi Yehova iwu mudimu nikukwasha apayiniya kulonda ekaleña amuzañalu nikuumika muniwu mudimu wawupayiniya?
Chakadi nikujina kuhosha mazu amawahi kunateli kuyikolesha kutwalekahu kuzata wupayiniya. (Yish. 25:11) Komana kwila tuhimpa nzatilu yetu mumulungu kulonda kuzata nawu mumudimu wakushimwina nehi? Hampinji yitunakuzata nawu, twatela kufuukulahu kuzatisha motoka yetu chatela tuzatishi yawu. Nawa neyi tukandama mumotoka yawu, tunateli kuhanaku chawana kulonda akalandi manji itunazatishi. (1 Kor. 13:5; Fwi. 2:4) Tunateli cheñi kuyikwasha munjila yayiwahi kuhitila mukumwekesha chisambu nikuvula kuyitambika kumataletu nakudya nawu yakudya.—1 Pet. 4:8, 9.
Nsona yakana nawu Yehova wenkaña antu asambilaña kukeña Wanta windi yuma yakumujimba yakeñañawu. (Mas. 37:25; Mat. 6:33) Nzambi wazatishaña amana kwetu akwaKristu akweti kukeña hakukwasha antu atwamijañaku Wanta windi. (1 Yow. 3:16-18) Hela chochu, bayi neyi apayiniya akuhwelelaña nawu antu amakwawu ayakameneña munsañu jamaluku. Nawa hiyanateli kushikena dakuleja amakwawu neyi kudi yuma yinakaankiluwuku. Ilaña, tunateli kukwasha apayiniya ashinshika munjila yayiwahi “mwonsu mwanabuluwu,” kuhitila mukwikala asoñama nikwiluka munakaankiluwu.—2 Kor. 8:14, 15.
Mukwakushimwina wadikita wamuyaaka nkulakaji yatachi wamuchipompelu chaKenikiri wejina daFwibi chayiliyi kuRoma, Pawulu wakolesheli amana kwetu amuRoma nindi: “Mwakamutambuli mudi Mwanta mwatelela akwakujila; mwakamukwashuku namudimu windi, mwejima mwakakeñelayi.” (Rom. 16:1, 2) Anetu nawa tukweti kukooleka kwakukwasha antu adi muchipompelu anakushimwina nsañu yayiwahi chakadi kuleka chidi neyi apayiniya ampinji yejima niapayiniya adimena.—Yil. 5:42.