Enu Atwansi—‘Fwilenuña Nyidimu Yayiwahi’

Mumukanda wonenewa wamusonekeleliwu Titusa, Kapostolu Pawulu wasonekeli nindi atwansi kushilahu niTitusa, atela kufwila kwikala akutalilahu “munyidimu yayiwahi yejima.” (Tit 2:6, 7) Nkumininaku, mukapetulu kokamu, wamwekesheli nindi antu jaYehova ayitookesha kudi Yesu kulonda “afwilaña nyidimu yayiwahi.” (Tit 2:14) Hakachi kaniyi nyidimu yayiwahi hadi kushimwina nikutañisha antu haWanta waNzambi. Neyi muchidi muyaaka yawukampululu, kwila muzatisha ñovu yenu kuzataku wupayiniya wakukwasha hela wampinji yejima nehi?—Yis 20:29.

Neyi munakukeña kwikala payiniya, diloñeshenu kulonda muzatiku. (Luk 14:28-30) Chakutalilahu, mukudakamenaña ñahi munsañu jamali hampinji yimukukalakalaña mudimu wampinji yejima. Mukushikijaña ñahi maora akeñekaña? Mulombenu Yehova kulonda yayikwashi. (Ms 37:5) Hanjekenuku nawanvwali jenu ninawamanakwetu anakalakali muniwu mudimu hadi mpinji yayilehi yuma yimunafuukuli. Kuhiñahu dinu ilenu mumunafuukuli. Yehova wukuyikiswila heyena dimukweti dakufwila kuzata mudimu windi.

TALENU VIDIYO YAATWANSI AMULEMESHAÑA YEHOVA NAWA AKULENU AWA MALWIHU:

• Kukalanyi kunashindiwu amakwawu hakwila nawu atachiki wupayiniya, nawa elili ñahi mwenimu?

• Anvwali anateli kukwasha ñahi anyanawu kwikala apayiniya ampinji yejima?

• Chalemenadi kwikala nandandanda yakushimwina?

• Antu amuchipompelu anateli kukolesha ñahi nikukwasha apayiniya?

• Yumanyi yadiluñishaña antu anakuzata wupayiniya?