Tudi naMuzañalu waKuzata Chikupu muMudimu waYehova!
1 Kapostolu Pawulu watiyili kuwaha ‘kudihana chikupu’ hakwila yazati mudimu windi wawiniKristu. (2 Kor. 12:15) Makonu, eniKristu amavulu azataña chikupu neyi apayiniya. Amakwawu akweti nyidimu yayivulu muchisaka ambulañaku mpinji hanyidimu yawu yayivulu kulonda kuzataku mumudimu wakushimwina mulungu nimulungu. Amakwawu ayekelaña nayikatu azataña kushika hakumina ñovu yawu kulonda kutwala mudimu waWanta hambidi. Chatukoleshaña hakumona antu jaYehova anakuzata nañovu mumudimu waYehova, hichidi namuloña wakushinakaja hela nshakaminuku.
2 Kukeña Antuñi Netu: Kudishaku chikupu kulonda kumukalakela Yehova, kumwekesha nawu twakeña Nzambi niantuñi netu, kwatwinkaña chinleji chachiwahi. Muloña wakwila Pawulu wahanini wumi windi hakushimwina nsañu yayiwahi, wahosheli namuzañalu nindi: ‘Nakuyileja lelu, nami nabuli muloña wamashi awantu ejima.’ (Yil. 20:24, 26; 1 Tesa. 2:8) Kuzata mumudimu wakushimwina kushika hakumina ñovu yetu kukutwileñela kubula kwikala namuloña wamashi.—Ezek. 3:18-21.
3 Kuzata nañovu kulonda kukwasha amakwawu kwatuletelaña muzañalu. (Yil. 20:35) Mana kwetu wumu wahosheli nindi: “Mwalala iwu mudimu wazeyeshaña. Hakufunta kwitala namelela, hanyima yakuzata ifuku damukuma mumudimu waYehova, nazeyaña nankashi. Ilaña nidi namuzañalu, nawa namusakililaña Yehova hakunyika muzañalu wakwila kwosi muntu watela kuwutambula.”
4 Kumukeña Nzambi: Muloña waweni wutwazatilaña nañovu mumudimu waYehova wudi wakwila nawu chamuzañaleshaña Tata yetu wamwiwulu. Kumukeña Nzambi kwatwileñelaña kutiyilila nshimbi jindi, kwabombelamu kushimwina nikwilisha atumbanji. (1 Yowanu 5:3) Hela chakwila antu anakudiwula hela anakukaana, twatwalekañahu kumuzatila Yehova chikupu namuzañalu.
5 Ayinu bayi neyi himpinji yakuleka kushimwinaku. Tudi mumpinji yakumuna. (Mat. 9:37) Kakavulu ndimi wazataña mpinji yeneni chikupu hampinji yakumuna muloña wekalaña nampinji yantesha yakwañula mbutu henohu kanda yikisiki. Mpinji yiyahanawu yakwañula mumudimu wakuspiritu niyena yinakehi dehi. Kwiluka mpinji yitunakushakamamu, wejima wetu tutwalekuhu kuzata nañovu mumudimu wakushimwina.—Luka 13:24; 1 Kor. 7:29-31.