Mumaha, Mwatookashana Dehi to-o, Ashika Dehi Hakumuna
1. Mudimwinyi walema wutunakuzata?
1 Chakumishiliyi kushimwina kudi mumbanda kaSamariya, Yesu walejeli atumbanji twindi nindi: “Fumbulenu mesu mutali mumaha, chimwatookashana dehi to-o, ashika dehi hakumuna.” (Yow. 4:35, 36) Adiña nakuzata mudimu wakumuna kwakuspiritu, nawa Yesu wamweneñahu dehi nindi iwu mudimu akawuzata mukaayi kejima. Yesu nakutwalekahu chikupu kulombola iwu mudimu wakumuna, hela chakwila wudi hachifulu chindi chamwiwulu. (Mat. 28:19, 20) Yumanyi yinakumwekesha nawu iwu mudimu wunakutwalekahu nakutohelaku chineli wudi kwakwihi nakumana?
2. Yumanyi yinakumwekana yinakumwekesha nawu mudimu wakumuna wamukaayi kejima wunakutohelaku?
2 Kumuna Kwamukaayi Kejima: Muchaaka chamudimu cha 2009, akwakushimwina mukaayi kejima avulililuku namapesenti 3.2. Mumatuña mwakaanishawu mudimu wakushimwina avulililuku namapesenti 14. Naambala yawantu anakudizishawu Bayibolu hakakweji nikakweji yabadikili ha 7,619,000, iyi naambala yinabadiki naambala yakuvulilaku kwawakwakushimwina nawa yinakutemukila muchikunku chachihita chinabadiki naambala yawatudizi yachina chaaka. Iwu mudimu chiwunakunyakala kuyilaku hambidi mumatuña amavulu, antu amavulu anakusonekesha kuhita mushikola yaGilead yakudiza mudimu wawumishonali. Mumatuña amavulu mwashimwinañawu mumadimi akumatuña acheñi nimwena anakusoña nyikabu yayivulu nankashi. Chinakumwekana chikupu nawu Yehova nakunyakesha iwu mudimu muyinu mpinji yakukumisha kumuna. (Isa. 60:22) Komana mwakeña “mumaha” enu mumwashimwinaña?
3. Antu amakwawu anateli kukunkulula nawudi kutalisha hamudimu wakumuna mwiluña dawu?
3 Kumuna Mwiluña Denu: Antu amakwawu anateli kuhosha nawu “mwiluña munashimwinaña himwasoñaña nyikabuku.” Dimu, maluña amakwawu hiyasoñaña nyikabu neyi chasoñaña amakwawuku, hela neyi chiyadiña nakusoña kunyimaku. Dichi aYinsahu amakwawu anateli kukunkulula nawu antu amavulu eteja dehi chalala munawa maluña nawa mudimu wawu wunashali wakunonojola hohu anashalashali. Komana dimu?
4. Indi mudimu wetu wakushimwina twatela kuwumonaña ñahi, nawa muloñadi?
4 Kufuma tuhu hakutachika kushika nikukumisha, mpinji yakumuna dihekala mudimu weneni. Talenu mazu ahosheliyi Yesu akuzata mukunyakashana nindi: “Mbutu jajivulu jinahi dehi, ilaña akwakukalakala anakehi. Dichi lombenu kudi Mwanta wakumuna atemeshi akwakukalakala kukumuna kwindi.” (Mat. 9:37, 38) Yehova, Mwanta wakumuna, diyi welukaña mpinji niluña kwasoñaña nyikabu. (Yow. 6:44; 1 Kor. 3:6-8) Hanu dinu etu tukweti mudimwinyi? Bayibolu yakulaña nawu: “Habudidi tumbaña mbutu jeyi, nihamelela bayi wulekesha chikasa cheyuku.” (Mukwa. 11:4-6) Eñañi, neyi mpinji yakumuna hiyikumana bayi tulekesha chikasa chetuku!
5. Muloñadi chitwatela kutwalekahu nakushimwina neyena mumaluña mwabulaña kusoña nyikabu?
5 Twalekenuhu Nakumuna: Hela neyi mwiluña detu tunazatilimu kakavulu nawa kwosi nyikabu yinakufumamu, twatela kutwalekahu nakuzata neyena nikwila yuma mukunyakala. (2 Tim. 4:2) Yuma yatama yinakumwekana mukaayi yinakuleñela antu kuhimpa yililu yawu nikutoñojoka nankashi hachihandilu chawu chakumbidi. Atwansi niwena chinakukulawu, akufwilaña kuwana kukiñewa nikushakama mukuwunda. Kutatakena kwetu kunateli kukokola antu amakwawu. Antu adiña nakukaana anateli kwiteja nsañu yayiwahi kumpinji yakumbidi. Hela tuhu antu akaanaña nsañu yalala mumushikila niwena twatela kuyisoñamisha.—Ezek. 2:4, 5; 3:19.
6. Chumanyi chikutukwasha kutwalekahu kushimwina neyena, neyi chakwila mwiluña mutwashimwinaña mwakala?
6 Neyi chakwila mwiluña mutwashimwinaña mwakala, chumanyi chikutukwasha kutwalekahu kushimwina neyena? Hadaha kubombela hakushimwina kwitala nikwitala tunateli kuzatisha njila jikwawu jakushimwinamu, chidi neyi kushimwina kuyisankanu hela hanshiña. Hela tunateli kuzatisha njila jashiyashana kulonda tuyisolomokeña antu munjila yacheñi. Tunateli kuhimpa nzatilu yetu kulonda tushimwineña namelela hela hampinji yikwawu yitwatela kuwana antu hamatala. Hadaha tunateli kudiza idimi dacheñi kulonda tushimwineña nsañu yayiwahi kudi antu amavulu. Tunateli kukalakala chikupu mudimu wetu wakushimwina kuhitila mukuzataku wupayiniya wampinji yejima. Hela tunateli kuya nakuzatila kwiluña kudi akwakumuna antesha. Neyi tukeña mudimu wakumuna, tukufwilaña kudikita chikupu muniwu mudimu walema nankashi.
7. Twatela kutwalekahu namudimu wakwañula kushika mpinjinyi?
7 Andimi ekalaña nampinji yantesha hohu yakwañula mbutu, dichi hiyalepujokaña hela kuzata chovu-chovuku, sampu anamanishi kwañula. Chochimu, chakeñekaña kunyakala hakuzata mudimu wakumuna kuspiritu. Twatela kutwalekahu nakwañula kushika mpinjinyi? Twatela kutwalekahu “mafuku ejima nikwakakumina nyaka.” (Mat. 24:14; 28:20) Kufwana Mukwakukalakala waYehova wabadika, twatela kumanisha mudimu wetu watwinkawu. (Yow. 4:34; 17:4) Dichi, tutwalekenuhu nakudikita mumudimu wetu neyena, namuzañalu nikuwukeña kushika nikunsa. (Mat. 24:13) Mudimu wakumuna wuchidi kutwalekahu!
[Mazu ekoku adi hefu 2]
Kufuma tuhu hakutachika kushika nikukumisha, mpinji yakumuna dihekala mudimu weneni