Komana Munateli Kwiñila ‘muChenzelu chaNyidimu Cheneni’?
1. ‘Chenzelwinyi chanyidimu cheneni’ chinatwenzulukili?
1 Hampinji yamwenzulukilili kapostolu Pawulu “chenzelu chanyidimu cheneni,” wakolekeleleli chikupu iyi mpinji kulonda kutwalekahu mumudimu wakushimwina hela chakwila kwadiña akwakukañesha amavulu. (1 Kor. 16:9) Makonu akwakushimwina aWanta 642,000 mukaayi kejima aneñili muchenzelu chanyidimu cheneni kuhitila mukwikala apayiniya ampinji yejima.
2. Muloñadi chichawahila kushinshika hanshakaminu yetu mpinji yejima?
2 Nshakaminu Yahimpaña: Hela chakwila nshakaminu yetu yakatataka yatela kukañesha nyidimu yetu, nshakaminu yahimpaña. Dichi dinu chachiwahi kushinshika hachihandilu chetu mpinji yejima kubadika kuhembelela netu nshakaminu yikawahi. (Mukwa. 11:4) Komana wuchidi kansi wudi kwakwihi nakumanisha shikola yakusekondali? Komana wudi nvwali wukweti anyana adi kwakwihi nakutachika shikola? Komana wudi kwakwihi nakuleka mudimu wakumujimba? Kuhimpika kwamuchidiwu kukuletesha enu kwikala nampinji yakutachika wupayiniya wampinji yejima. Muhela wumu wadiña nakukata hampinji yakunyima wafuukwiluhu kutachika mudimu wawupayiniya henohu wudi nayaaka 89. Muloñadi? Muloña mwahitili chaaka chakubula kumutentekahu muchipatela, dichi watiyili nindi nakoli watela kuzataku wupayiniya.
3. Indi amakwawu anahimpi ñahi chihandilu chawu kulonda kuzataku wupayiniya?
3 Pawulu wakeñeli nankashi kuya nakuhempula ana kwindi kuKorinda. Ilaña wahimpili yitoñojoka yindi kulonda kushimwina nsañu yayiwahi. Amavulu anakuzata wupayiniya wampinji yejima makonu ahimpili muyuma yayivulu kulonda atweshi kuzataku wupayiniya. Amakwawu anapeleshuku chihandilu chawu kuhitila mukuzata mudimu wampinji yantesha kulonda awaneñamu mali akudikwasha nachu muchihandilu chiyanapeleshiwu. Adi namuzañalu wakuzataku iwu mudimu. (1 Tim. 6:6-8) Adisumbula amakwawu anahimpi chihandilu chawu chakwila iyala diyi wukuzataña hohu mudimu wakumujimba, kulonda mumbanda yazateñaku mudimu wawupayiniya.
4. Chumanyi chitwatela kwila neyi tunakujinoka netu hitunateli kuwanisha mawola akeñekañaku?
4 Bayi munyakala kukaana yitoñojoka yakuzataku wupayiniya muloña munakuchina nenu himukutwesha kuwanisha mawola akeñekañaku. Mawola antesha akubadika ayedi hohu diwanakukeñeka hefuku. Neyi munakujinoka nenu himukutweshaku, esekenu kuzataku wupayiniya wakukwasha hadi kakweji kamu hela tuyedi nachikonkwanyi chakushikija mawola 70. Kwila mwenimu chikuyikwashaku kutompa muzañalu wekala mumudimu wawupayiniya. (Mas. 34:8) Hanjekenu nawantu anakuzataku wupayiniya chakatataka. Apayiniya amakwawu atela ashindili kukala kwokumu kumunakumona. (Yish. 15:22) Mulombenu Yehova kulonda yakiswili ñovu yenu yakutoheshaku mudimu wenu wakushimwina.—1 Yow. 5:14.
5. Muloñadi wupayiniya wampinji yejima chewekalila mudimu wawuwahi kufwila?
5 Kufwila Mudimu Wawuwahi: Kukalakala neyi payiniya wampinji yejima kwaletaña nkisu yayivulu. Kwayileñelaña kuwana muzañalu weneni wafumaña mukusweja kuhana. (Yil. 20:35) Kuzataku wupayiniya kukuwahisha wuswa wenu wakulumbulula Izu daNzambi dansañu yalala chachiwahi. (2 Tim. 2:15) Mukwikala nakukooleka kweneni kwakumona chikasa chaYehova chichikuyikwasha. (Yil. 11:21; Fwi. 4:11-13) Kuzataku wupayiniya cheñi kukuyikwasha kwikala nayililu yaspiritu, chidi neyi kumika nawa kukuyikwasha kukundama kwakwihi naYehova. (Yak. 4:8) Komana munateli kwiñila muchenzelu chanyidimu cheneni nakwikala payiniya wampinji yejima?