“Wunateli Kwikala Payiniya Wadikita!”
1. Indi muhela wumu watiyili ñahi hamudimu windi wawupayiniya?
1 Kathe B. Palm wahosheli nindi: “Hinadi kutwesha kuwana mudimu wudi wejima watela kunzañalesha nankashi hela kunyinka wuloku wakuspiritu chikupuku.” Wazatili neyi payiniya wadihana hadi yaaka yayivulu nakushimwina kwituña daChile, South America nikumatuña amakwawu. Hadaha kudi muntu wayilejahu dehi nindi: “Wunateli kwikala payiniya wadikita!” hamuloña wakutoñojoka hawuloku wekala nawantu azataña mudimu wampinji yejima.
2. Lumbululenu muloña wutwazañalelaña chikupu hakukalakala nyidimu yakuspiritu.
2 Mudimu Waletaña Muzañalu muChihandilu: Yesu Chitalilu chetu wadiñi namuzañalu waweni hakwila nkeñelu yaTata yindi. (Yow. 4:34) Dihafumini Yesu kuyileja atumbanji twindi namuchima wumu nindi, muzañalu waweni wenzaña kuhitila mukukalakala mudimu wakundama kukudifukula Yehova. Twazañalalaña neyi tukalakala mudimu watuleñelaña kwikala nawuselewa waYehova. Kubombelahu, neyi tuzatisha mpinji yeneni, ñovu jetu nimaheta etu hakukwasha amakwawu, twekalaña namuzañalu chikupu.—Yil. 20:31, 35.
3. Neyi tuzata mpinji yeneni mumudimu wakushimwina tukwikala namuzañalu wamuchidinyi?
3 Neyi tuzata mpinji yeneni mumudimu wakushimwina, tukwikala namuzañalu waweni wafumaña hakutachika kudiza Bayibolu nawenimatala. Neyi tukuluka yitembi munsañu yakushimwina, chili enimatala amwekana neyi akweti nyidimu yayivulu tukuwana netu antu amwiluña detu atiyililaña nsañu yitwashimwinaña nankashi kubadika chitwatoñojokeleña hakusambila. Apayiniya anateli kuzatisha yuma yadiziluwu kuShikola yaMudimu wawuPayiniya. Apayiniya awanikaña kushikola yeniyi hanyima yakuzata hadi chaaka chimu. (2 Tim. 2:15) Neyi tutwalekahu kushimwina tukutumba mbutu yachalala yikasoña nyikabu kumbidi.—Mukwa. 11:6.
4. Chumanyi chatela kushinshikahu atwansi adi kwakwihi nakumanisha shikola?
4 Atwansi: Komana munakutoñojoka chuma chimukela kumbidi, hampinji yimunakumanisha shikola yenu yasekondali? Chayinu mpinji, mwazatishaña mpinji yeneni hakuloñesha nyidimu yakushikola. Indi mpinji yimwazatishaña kushikola mukayizatishaña ñahi neyi munamanishi dehi? Chatela mufwileña kuzata mudimu wakumujimba, komana kwila mushinshika nikulombelela hachikonkwanyi chakuzata wupayiniya wampinji yejima nehi? Yuma yimukudiza, hakushimwina antu achisemwa chacheñi, kushinda kukala kwahalwenu, kwikala nachililu chakudihemba, nikwiluka mwakutañishila, kukayikwasha muwumi wenu wejima.
5. Indi anvwali niantu amuchipompelu anateli kukolesha ñahi amakwawu kuzata wupayiniya?
5 Anvwali, komana munakuzata mudimu wenu wakukwasha anyanenu kulonda afwileña kuzata wupayiniya wampinji yejima? Yuma yimwahoshaña nichakutalilahu chachiwahi chinateli kuyikwasha kutwamijaku Wanta. (Mat. 6:33) Ray watachikili wupayiniya henohu wudi kwakwihi nakumanisha shikola yasekondali wahosheli nindi: “Mama wanlejeleña mpinji yejima nindi mudimu wawupayiniya waletaña muzañalu chikupu muchihandilu.” Ejima muchipompelu atela kukolesha antu kuzata wupayiniya kuhitila muyuma yahoshañawu nikuyikwasha. Jose wakuSpain wahosheli nindi: “Antu amuchipompelu chetu amweneña wupayiniya nawu himudimu wasweja kuwaha watela kuzata atwansi. Yuma yahosheleñawu nichahamekeleñawu mudimu wawupayiniya kushilahu niwukwashu wawu kwankwashili kutachika wupayiniya.”
6. Chumanyi chitwatela kwila neyi hitukweti mpwila yakuzata wupayiniya katatakaku?
6 Kushinda Yuma Yakañeshaña: Indi neyi muhosha nenu, ‘Hinikweti mpwila yakuzata wupayiniyaku.’ Neyi mwasambilaña kutoñojoka muniyi njila, lombenu kudi Yehova chimunakutoñojoka nakumulejamu nenu, ‘Hineluki neyi natela kuzata wupayiniyaku, ilaña inakufwila kwila chuma chakukuzañalesha.’ (Mas. 62:8; Yish. 23:26) Kuhiñahu keñenu wukwashu Mwiizu dindi nimukuloñesha kwindi. Apayiniya ampinji yejima amavulu asambilili ‘kutompa’ wupayiniya kuhitila mukuzata wupayiniya wakukwasha, dichi muzañalu watiyiluwu wayiletesheli kuzata mudimu wampinji yejima.—Mas. 34:8.
7. Tunateli kushinda ñahi yitoñojoka yakujinoka netu hitunateli kushikija maora 70 akeñekaña hakakwejuku?
7 Indi neyi munakujinoka nenu himukutwesha kuwanisha maora 70 akeñekaña hakakwejuku, mukwilaña ñahi? Komana kwila muhanjeka nawapayiniya akweti kukala neyi kumukweti nehi? (Yish. 15:22) Kufumahu sonekenu jindandanda jatela kuzatika chiwahi. Mukwiluka nenu kukwatila mpinji maana kulonda kuzata mudimu wakushimwina kubadika kuzatisha mpinji yenu kuyuma yabula kulema chikupela kubadika chimwatoñojokelaña.—Efwes. 5:15, 16.
8. Muloñadi wutwatela kushinshika chidi chihandilu chetu hampinji hampinji?
8 Shinshikenu Cheñi Chihandilu Chenu: Kakavulu chihandilu chamuntu chahimpikaña. Chachiwahi kushinshika cheñi chihandilu chenu hampinji hampinji. Chakutalilahu, komana mudi kwakwihi nakuleka mudimu wakumujimba? Randy, wanyakeli kuleka mudimu wakumujimba wahosheli nindi: “Kuleka mudimu swayi kunankwashi kutachika wupayiniya wampinji yejima nañodami, nawa chatwinka kukooleka kwakuya nakuzatila kwiluña kudi kukankila kweneni. Naheti nkisu jajivulu hakufuukula muniyi njila, ilaña nkisu yasweja kuwaha hikwikala nachinleji chamuchima chitooka.”
9. Chumanyi chatela kushinshikahu antu adisumbula?
9 Hanyima yakushinshika chiwahi chihandilu chawu, antu amakwawu adisumbula amona neyi wejima wawu hiyatela kuzata mudimu wampinji yejima wakumujimbaku. Kafwampi chumichi chakeñekaña chisaka kupeleshaku chihandilu chawu, ilaña mwafumaña yuma yayiwahi mukudihana kwawu. John wukweti ñodindi waleka mudimu wakumujimba katataka kulonda yazateña chikupu mudimu wakushimwina wahosheli nindi: “Kwiluka nami iñodami wazataña mudimu waYehova mwaana wejima hichuma chanzañaleshaña nankashi.”
10. Chumanyi chasañumunaña akwaKristu kushinshika hamudimu wawupayiniya?
10 Kukeña niChikuhwelelu Dikwatusañumunaña Kuzata Wupayiniya: Kushimwina himudimu walema kumesu aYehova wutwatela kuzata wejima wetu. Kanu kaayi katama kamakonu keña akikisañani, ilaña antu atambikaña hejina daYehova hohu diwu akahanda. (Rom. 10:13) Kukeña kutwamukeña Nzambi nikuhameka hayuma yatukoñelayi dikwatusañumunaña kwovwahila nshimbi yatwinkayi Mwanindi yakudikita hakushimwina. (Mat. 28:19, 20; 1 Yow. 5:3) Kubombelahu, kukuhwelela netu tunakushakama mumafuku akukuminina kukutusañumuna kuzata chikupu mudimu wakushimwina henohu kuchidi mpinji kubadika kuzatisha chikupu yuma yamunu mwishina.—1 Kor. 7:29-31.
11. Neyi muntu yatuleja nindi tunateli kwikala payiniya wadikita tukutoñojoka ñahi?
11 Kukalakala mudimu wawupayiniya wampinji yejima bayi neyi hikuzata maora amavulu mumudimu wakushimwina hohuku; ilaña wamwekeshaña nawu twamwakama Nzambi. Dichi neyi muntu yoyileja nindi wunateli kwikala payiniya wadikita, ilukenu nenu nayihameki. Nawa shinshikenu nikulombelahu kulonda mudibombi nawantu akalakalaña iwu mudimu waletaña muzañalu.
[Mazu ekoku adi hefu 4]
Anvwali, komana munakuzata mudimu wenu wakukwasha anyanenu kulonda afwileña kuzata wupayiniya wampinji jejima?
[Mazu ekoku adi hefu 5]
Kushimwina himudimu walema kumesu aYehova wutwatela kuzata wejima wetu.