‘Wakooleka Muntu Womikaña Chamonayi Kweseka’
1 EniKristu ejima amonaña kweseka. (2 Tim. 3:12) Kukala kwejilaña muyikatu, kubula mali, kweseka, hela kuyandisha, hadaha kwatela kwinjila munjila jikwawu. Kweseka kwatwiletelaña Satana kwekala kwakutwifuntisha hanyima, kutwileñela kubula kuta maana kumudimu wetu wawiniKristu, hela kutwilekesha kumukalakela Nzambi. (Yoba 1:9-11) Indi kumika kweseka kwatwiletelaña ñahi muzañalu?—2 Pet. 2:9.
2 Diloñeshelenu Chadimu Kumona Kweseka: Yehova natwinki Izu dindi dansañu yalala, kushilahu ninsañu yakuhanda kwaYesu nintañishilu yindi. Kuhitila mukutiyilila mazu aYesu nikwila mwatulejañayi, dikwila nawu tunakwala chikuku chakola nakudiloñeshela chadimu kumona kweseka. (Luka 6:47-49) Twawanaña cheñi ñovu kufuma kudi ana kwetu niahela awiniKristu, kupompa kwachipompelu, ninyikanda yashindamena haBayibolu kufuma kudi izaza danduñu wamaana nikashinshi. Twazatishaña chikupu chawana chatwinkayi Nzambi chakulomba.—Mat. 6:13.
3 Yehova natwinki cheñi kuchiñeja. Neyi twikala nachikuhwelelu chakola muyikaninu yaYehova, kuchiñeja kwetu ‘kwemikishaña wumi, neyi chikuñu chakwimikisha nachu watu kwalala nawa kwakola.’ (Heb. 6:19) Mumpinji yakunyuma, maatu hiyanyamukileña hiyemenaña chakadi chikuñu chakwimika nachuku, hela chakwila kwosi mpepela yeneni. Neyi mpepela yinza chakukasumwisha, kuzelumuna chikuñu kwatela kukañesha watu kubula kuwunata kumalola. Chochimu, kukuhwelela muyikaninu yaNzambi makonu kukutwikolesha neyi kumwekana kukala kweneni. Kukala kunateli kumwekana mukukasumwisha. Hela chakwila mudimu waPawulu naBaranaba wakushimwina hatachi awitambwilili chachiwahi kuLisitira, aYudeya akwakukañesha chiyashikili, yuma yahimpikili mukunyakashana.—Yil. 14:8-19.
4 Kumika Kwaletaña Muzañalu: Kutwalekahu kushimwina hela chakwila kudi ikañesha kwatwileñelaña kubula kwakama. Twazañalalaña neyi atwifuukwila kutela kusawuka kukoola Kristu. (Yil. 5:40, 41) Kumika kweseka kwatukwashaña kwikala nayililu yakudizoza, kwovwahila, nikumika chikupu. (Kuhit. 8:16; Heb. 5:8; Yak. 1:2, 3) Kwatudizishaña kushindamena hadi Yehova, kukuhwelela yikaninu yindi, nikubatama mudi yena.—Yish. 18:10.
5 Tweluka netu kweseka kwakampinji kantesha. (2 Kor. 4:17, 18) Kweseka kwatwinkaña kukooleka kwakumwekesha chitwasweja kumukeña Yehova. Kuhitila mukumika kweseka, tunateli kwakula makudi aSatana. Dichi, twatwalekañahu nakumika! ‘Wakooleka muntu womikaña chamonayi kweseka, muloña neyi anamutompi dehi wakatambula chibaaba chawumi.’—Yak. 1:12.