CHATELA KUSHAKAMAWU AKWAKRISTU
Yehova Wukuyikwasha Kuumika Kukala Kudi Kwejima
Munanu mafuku akukuminina, tunakumona kukala kwakuvulu. Mpinji yikwawu, tunateli kumona netu kweseka kutunakumona kunasweji chakwila hitukutwesha kuumikaku. Hela chochu, neyi tutwalekahu kuswina kwakwihi naYehova, wukutukwasha kuumika nikukala kwasweja. (Isa 43:2, 4) Tunateli kuswina ñahi kwakwihi naYehova neyi tunakumona kukala?
Kulomba. Neyi tulomba kudi Yehova chakufuma hamuchima, wukutwinka kuwunda kwamuyitoñojoka niñovu yakuumika.—Fwp 4:6, 7; 1Te 5:17.
Kupompa. Makonu, tunakukeñesha nankashi yakuda yakuspiritu niwubwambu wakola wahanañayi Yehova hakupompa. (Heb 10:24, 25) Neyi tuloñesha kupompa, tuya nakupompa nikwakulahu hakupompa, spiritu yaYehova yikuyikwasha.—Chi 2:29.
Mudimu Wakushimwina. Chikutukwashaña kutoñojoka hayuma yayiwahi neyi tuzataña mudimu wakushimwina mpinji yejima. Nawa chikutukwasha nikwikala nawubwambu wakola naYehova ninawakwetu.—1Ko 3:5-10.
TALENU VIDIYO YAYEHOVA WUKUYIKWASHA, NAWA AKULENU AWA MALWIHU:
Chumanyi chamukwashili Malu kumushindamena Yehova hamweneñayi kukala?
Kufwana Malu, mazu ekala haMasamu 34:18 anateli kutukwasha ñahi neyi tunakuumika?
Yuma yamumwekeneni Malu yinakutudizisha ñahi nawu Yehova watwinkaña “ñovu yabadika hañovu” kulonda tuumiki kukala?—2Ko 4:7