Muloña Wutwafuntilañaku Kakavulu
1. Lwihwinyi lutunateli kwihula kutalisha hamudimu wetu wakushimwina?
1 Mumaluña amakwawu, kakavulu twawanishaña maluña etu akushimwinamu. Twatwalekañahu kufuntila kumatala wowamu mpinji yejima hela chakwila mwiniitala watulejeli nindi hanakukeñaku. Muloñadi wutwatwalekelañahu kwendela antu abulili kututambwila chiwahi kunyima?
2. Muloñanyi waweni wutwatwalekelañahu mumudimu wakushimwina?
2 Twamukeña Yehova niAntu: Kumukeña Yehova dimuloña weneni wutwatwalekelañahu namudimu wakushimwina. Muchima wetu watushinjilaña nawu tutwalekuhu nakuleja amakwawu hadi Nzambi yetu muneni. (Luka 6:45) Kumukeña Yehova dikwatuleñelaña twovwahileña nshimbi jindi nikukwashaku amakwawu niwena kumwovwahila. (Yish. 27:11; 1 Yow. 5:3) Kumika chikupu muniwu mudimu hikwashindamena hakwiteja kwawantuku. EniKristu amunkulankaji yatachi niwena chiyayiyandishileñawu, atwalekeluhu kushimwina ‘chakadi kuleka.’ (Yil. 5:42) Neyi antu adikaña, chumichi bayi chituneñeshaku, ilaña twatela kukola ngu-u nakumwekesha kukeña kwetu kwakweni nikumwakama Yehova.
3. Indi kukeña antu kukutukwasha ñahi kutwalekahu kushimwina?
3 Cheñi twatwalekañahu nakushimwina muloña twakeña antuñi netu. (Luka 10:27) Yehova hakeñaña muntu niwumu yakanoñiku. (2 Pet. 3:9) Nimwiluña dazatilawu kakavulu, twawanañamu antu anakukeña kumukalakela Yehova. Chakutalilahu, mwituña daGuadeloupe, muntu wumu hadi antu 56 hanichi chitutu hiChinsahu chaYehova, ilaña mwaka wadi antu 214 ayipapatishili. Kwakwihi nawantu 20,000 awanikili kuChanukishu, dikwila nawu muntu wumu hadantu 22 ahachina chitutu.
4. Munjilanyi mwahimpikilaña maluña?
4 Kuhimpika Kweluña: Mpinji yejima mwiluña detu mwekalaña antu ashiyashana. Mpinji yikwawu yitukuya hetala habuliliwu kutwitambwila chiwahi, hadaha muntu mukwawu wamuchisaka wabulahu dehi kutiya nsañu yetu nateli kututambwila nakutiyilila. Hadaha tunateli kuwanahu antu acheñi anakushakamahu akumwekesha mpwila. Anyana akweti anvwali ayikañeshaña chiyakula afumaña hetala. Anyana amuchidiwu anateli kukeña kutiyilila kunsañu yaWanta.
5. Yumanyi yinateli kukojeja antu kwiteja?
5 Antu niwena ahimpaña. Kapostolu Pawulu wadiña “mukwakutuka Nzambi, mukwakukabisha akwawu, mukwawinyi.” (1 Tim. 1:13) Makonu, antu amavulu anakumukalakela Yehova kunyuma hiyakeñeli chalalaku. Amakwawu atela akaanineña nsañu yayiwahi. Chineli nsañu yamukaayi yinakuhimpa, akwakukañesha amakwawu hela antu adiña nakadiwu anateli kutiyilila. Amakwawu anateli kwiteja hanyima yakumona kukala, kudi neyi kufwisha ntaña, kumana kwanyidimu, kukala kwamali, hela yikatu.
6. Muloñadi wutwatela kutwalekahu kushimwina namuzañalu?
6 Akanu kaayi kadi kwakwihi nakumana, ilaña mudimu wetu wakushimwina nikutañisha wunakunyakala chikupu. (Isa. 60:22) Dichi, twatela kutwalekahu kushimwina namuzañalu nikufwila kwikala nayililu yayiwahi. Muntu mukwawu yitukuhosha nindi nateli kutiyilila. Twatela kutwalekahu kushimwina! ‘Neyi tukwila mwenimu tukudamwina etu aweni niantu akututiyilila.’—1 Tim. 4:16.